Read Weh Lukas 12 Bible Online

Lukas 12 - Weh bible

Lukas 12

¹Nghee tə̀ nɔɔ kə aghə̂ kə təŋŋə bənə, bwùlə bə n kow awaazə, Yeso n kaʼ tsu dzə ni ghɔɔmə tə̀ dzûmə tə wi tə dza, “Ney na ghə̂mə zə n ghə̂ a tə Falasi, a loʼ ghə nəb ityim.

²Abə ghə i tsət doʼo kə ngee zə i bə doʼlənu təghə, abə i nyi doʼo kə ngee zə i bə doʼlənu n mgbaŋ.

³Sey ghə i ghaa zə ghaa dzanə nə kələm, zə̀ i shiə bənu n sə a zow ghə, i ghaa zə ghaa i tsɔŋ dzanə n fəŋ ə ndaw ghə i naʼa shiə kɔʼɔnu tə̀ ghə̂ adzəm a zow.

⁴N dza bə tə̀ ghaa a fə ghuŋ ghə, kə ghaa nə tsəŋənə ghə̂ ghey ghə weynə wû u wù wə, kəm khə way ghə̂ i loʼ zə ni ghəŋə ghi muu i wù zə.

⁵N dza n dza bə tə̀ ghaa ndzoʼo wù wey ghaa khənə ni tsəŋ. I tsəŋə na Zə̀ kə, n təŋkey, tə khə kədaʼa ni wey tsu wù, tə kəm ney kɔʼ zay kə wi, tə maʼa ndòw nə uvəllə, a wən loʼ wù wən ghaa khənə ni tsəŋ.

⁶Tə̂ ghə mgbaŋa fiilə ughala utaa nə ntwɔllə nbəghə. Seykə Zə̀ kə tsəmə neyzəə way ghala kə loʼ kə.

⁷Kuum kuum sa, kasə̀ nyuŋ tə kətow tə ghaa, Zə̀ kə khənu taŋa tii, sey, kə ghaa nə tsəŋənə ghə i loʼ zə təŋkey ghaa tsəghəshinu ndəmə ghala wən a kòʼonə tə̀ Zə̀ kə.

⁸N kûm dza bə isəŋə tə̀ ghaa nə̀, wù wey tə bəghəmnə mə n sə kə aghə̂, Waa wù sɔŋtsuʼ i bəghəm soʼonu wi nsəkə tsətəndəghə tə Kəzə̀.

⁹Wù wey tə tuu maʼanə mə n sə kə aghə̂, Waa wù sɔŋtsuʼ i tuu maʼa soʼonu wi nsəkə tsətəndəghə tə Kəzə̀.

¹⁰Wù wey tə ghɔɔmə bəəbənə ghəə ghə n kow Waa wù sɔŋtsuʼ, Zə̀ kə i loʼnu ni neyzəə wi, wù wey tə kee ghɔɔmə bəəbənə ghəə ghə n kow Zay kə Zow kə, Zə̀ kə i neyzəə way wi.

¹¹Abə ghə ney bənə ghaa n səə ngəd tə saʼa tə təsaʼ tə n ndaw kədzəŋi ni saʼ ghaa, kə ghaa nə fəmənə wû i ghaa zə ni moʼlə zeeli ghə zey ghaa i dzanə fu.

¹²Təŋkey Zay kə Zow kə i diinu tə̀ ghaa, ghəə zey ghaa khənə ni dza.”

¹³Wù umɔʼ n fəŋŋə kə aghə̂ key n dza shi kɔʼ nə̀, “Wù dii, kələ wɔ, dza nə̀ waazə wùŋ wən dzaw bə fə u bày ghey wey ghi mə.”

¹⁴Yeso n beeli ndòw wi nə̀, “Â towbəghə a fu ndee mə n daʼa kə tii kə nə n doʼo wù wey n saʼanə nkee n dzaw fuunə fə u ghaa wə?”

¹⁵Yeso n dza ndòw tə̀ ghə nə̀, “Ney kɔʼ na ghə̂mə zə n ləghə i fə u mbi, n təŋkey ghə muu i wù i taŋa way n ndəmə tə ufə tey tə khənə.”

¹⁶Sey tə n dza ndòw ghə n zəzəə fə fənkəfən fə loʼ fə nə̀, “Sûm u wù kuum u loʼ wə a ngii dzɔbənu.

¹⁷Tə n kaʼ ni moʼlə n fəŋ ə wi dza, ‘Mə i jiə ngee nsə n fə wən n sə khə way luʼu kə ni zaa may fəzəə wùŋ wən ə?’

¹⁸Ahaa! Mə n moʼlə, mə i saʼa dzəŋŋə tsu saŋ kpaa wùŋ, N bəghə kɔʼ u nii wə tə̀ n loʼ ni zaa may səb ghuŋ n naŋa soʼo fə wùŋ u loʼ wə.

¹⁹Abə n fwaʼ may tsunə ghəə ghən, mə i daŋŋə kaali tsu wû wuŋ nə̀, ‘mbwɔɔ, wə̀ tsəm khə ndəmə ufəzəə, ni zə n ndəmə tənum. Zə̀ələ doʼo tsu izəzə, wə i zəə, zow kədzuŋ.’”

²⁰Zə̀ kə n dza tə̀ wi nə̀, “Dzəŋsə k-a-fə kən, na sa n tsuʼu tə n ney nuulə zay kə, sey a i kòʼ nə à keeli ndee ndəmə tə ufə tən wə̀ fwaʼ naŋanə?”

²¹“À wən loʼ nghee i loʼnə tii ghi wù wey tə zuŋŋə naŋanə ndəmə ufə, fwaʼa way fwa K-a-zə̀ kə.”

²²Yeso n dza ndòw tə̀ dzûmə tə wi tə nə̀, “N dza bə tə ghaa nə kə̂ ghaa nə ngii baŋŋə fəŋ bòʼ muu i ghaa. Kə̂ ghaa nə baŋŋənə fəŋ nə̀, ‘mə i zəə kee nkee mə i dzəŋŋə kee n wû wùŋ ə?’

²³Təŋkey muu i tsəghəshi ufəzəə, vən fə uwû fə wù fə u tsəghəshi ndzə̂ tə.

²⁴Koʼo na ŋɔɔŋɔɔ wə, u zəghə way fə wə, kpey naŋŋə way fəzəə u loʼ wə n luʼu kə loʼ kə. Seykə, Zə̀ kə u fuunə ghə n fəzəə wə. Ghaa tsəghəshinu nnən mə.

²⁵À loʼ ndee fa n mbi tə loʼ ni kuu kpiʼi nyaŋi fə inəŋə n muu i wi abə tə baŋŋə fəŋ n muu i wi ə?

²⁶Abə ghaa way ni ghəŋə nyanyi fə ighəə tə à loʼ i zən, ghaa sə wû i ghaa i fəmmə n fə u loʼ wey nə̀ a loʼ kee?

²⁷Koʼo na nghee tə tsaŋ u ji u nyimnə tii, ghə fwaʼa way, falə way ndzə tə ghə tə, seykə, kasə̀ Solomun n ghaʼ i wi zə idzəm tə n way ni lab dzɔb uwû tə̀ a loʼ ghə.

²⁸Abə Zə̀ kə loʼnə ni laalə dzɔb tə̀ tsaŋ u ji wən u nyimnə na ambə tsətsə nə ghə n kpəghə maʼa nə uvəllə, tə î sə boʼo labə ngee ghaa? Ghaa ngiʼi khə nyaŋi fə bəghəm i fə̀ŋ.

²⁹Kə ghaa nə̂ fəmənə wû i ghaa zə bòʼ fə key ghaa i zəənə nkee fə key ghaa i məənə,

³⁰təŋkey, ghə̂ a tətum n mbi a fa nyəŋə kaabə tsə n baa fə u tii wə, zə i loʼnə nə̀ Bày ghaa idəŋ khənu nə ghaa ləghənu fə u tii wə.

³¹Ghaa khə ni fəd kəŋ ndòw dzə fɔɔ u Kəzə̀, Zə̀ kə i ngəŋə fuu ghaa n fə wən udzəm.

³²Sey, kə̂ ghaa nə tsəŋənə, abə ghaa təbə kənə, n təŋkey Bày ngii duʼlənu ni fu ghaa n fɔɔ u wi.

³³Fii na fə u ghaa wə, ghaa i fuu ndòw khəə u tii wə tə̀ ghə̂ a laa ghə. Kəŋ tsu na mbəghə wə ukhəə wən u dənə way, ghaa nyi naŋa ndòw fə u ghaa idəŋ, n təŋkey tsɔŋ u way fu tə̀ ghə loʼ ni tsɔŋ nkee sə̂soʼo tə̀ loʼ ni bəəbə maʼa.

³⁴Keeli tsu na nə̀, luʼu key fə u wù u loʼnə tii, fə̀ŋ ə wi î doʼlə soʼo fu.

³⁵Ndzuŋŋə tsu na wû i kəfwaʼ zə, ghaa daa naŋa tsu udaa

³⁶tə̀ a loʼ ghə̂ a kəfwaʼ ghey ghə ləmmənə mûkəbii ə ghə nə̀ abə tə dzəŋŋə bənə n luʼu kamali, bə buʼ tsu fuʼ u ndaw, ghə i zaŋə chi tsu tə̀ wi.

³⁷A i loʼ ghə i dzuŋu zə tə̀ ghə̂ a kəfwaʼ ghey mûkəbii ə ghə i kwɔɔlə bənə ghə nə̀ ghə loʼ n luʼu k-a-fwaʼ abə tə i dzəŋŋə bənə. N kûum dza bə isəŋə nə̀ tə i ndzuŋŋə tsu uwû tə bə fuu ghə n fəzəə wə.

³⁸Ndzuŋ î loʼ tə̀ ghə̂ a kəfwaʼ ghey mûkəbii î bəghə kwɔlənə nə̀ ghə nam loʼ kə idəŋ ghə ləmənə wi, abə tə bə kə n nəŋə i ghaa zə, n fəŋ ə tsuʼu tə nkee n tsuʼ u zowwə̀.

³⁹Keeli tsu na nə̀, abə mûkəbii mə khənə nəŋə zey wù tsɔŋɔ bəghənə tii, tə̂ tə ka bəghəm nə̀ ghə tsɔŋ ndaw wi.

⁴⁰Sey ghaa khə ni ndzuŋŋə tən tsu wû i ghaa, boʼnə ghaa khə way nəŋə zey Waa wù sɔŋtsuʼ loʼ ni bə tii.”

⁴¹Pita n bəb ndòw tə̀ wi nə̀, “Mûkəbii, wə̀ zəzəə fə fənkəfən fən khəə tə̀ ghey mɔ tə̀ ghə̂ ghə adzəm?”

⁴²Mûkəbii n beeli ndòw wi nə̀, “Wù kəfwaʼ u sə̀ŋi u loʼ wù wey tə khənə tow kə, tə̀ mûkəbii wi loʼ ni gaʼ fə̀ŋ n kow wi, tə ney naŋa wi tə a loʼ wù kətow nə tə i nyaŋə fə u ghə̂ a kəfwaʼ a loʼ ghə, nsə ni fu soʼo ghə n fəzəə wə n nəŋə i ghə i zə̂ə zə.

⁴³Ndzuŋ i loʼ tə̀ wù kəfwaʼ wən mûkəbii î bəghə kwɔllənə wi nə̀ tə fwaʼa dzɔbə fwaʼ kə wi.

⁴⁴N kùm dza bə tə ghaa nə̀ mûkəbii wey i kɔʼlə naŋa kɔʼɔ wi nə̀ tə i laalə tə̀ fə u wi wə udzəm.

⁴⁵Abə wù kəfwaʼ wey dza tsunə n fə̀ŋ ə wi nə̀, ‘Mûkəbii wùŋ i loʼlənu n bwey i wi,’ kaʼ ndòw ghə̂ a kəfwaʼ a loʼ ghey nə u bwɔdlə wə, agheynum nsə gheyzən ghə ighəllə, maŋa zəə i wi zə, məə khəə bə nlə.

⁴⁶Mûkəbii wey î ndòw bəghə n tsuʼ fə loʼ fə nə̀ wù kəfwaʼ wey khə way, n nəŋə zey tə mə mòʼlə way nə̀ tə loʼ ni bə tii, tə i fuu wi n fən mə, tə ney təm naŋa dzəŋi ndòw wi ghi ghə̂ a bəbə ghə.

⁴⁷Wù kəfwaʼ wey tə khənə ghəə ghey mûkəbii ə wi ləghənə, ka kee fwaʼ tə̀ tə mə̀ khənə ni fwaʼ î ndəŋə məə n fən.

⁴⁸Abə tə wey tə khə way ghə zey mûkəbii ləghənə, ghəŋə bəəbə tsu n ghəə à loʼ ghə, tə î məə nyaŋi fə n fən, n təŋkey wù wey ghə ndəŋ funə wi n fə wə, tə i sey khə ni fu dzəŋŋə soʼo ndəm. Abə tə wey ghə fu naŋanə ndəmə ufə nə̀ tə i laalə, ghə î sey tsaʼa soʼo ndəmə aghəə n wɔ wi.

⁴⁹N bə fa n mbi ni bə daa təluʼu nə uvələ, tə i mə fa loʼ nə tə nya bəʼlənu.

⁵⁰A loʼ kə nə̀, N nam khə ndəm uchɔd ni koʼ isə tə̀ wù nə ney mmuu n Kəzə̀ mə n dzuu. Mə i sa loʼ kə nə imôw ni ndòw kùm n nəŋə zey zə maynə tii.

⁵¹Ghaa moʼlə nə̀ n fa bə mbi ni bə fu ibuulə ə? Ngaŋ! N bə ni bə ghəŋə nə̀ ghə̂ a dzawwə doʼo.

⁵²Sey, ni zey tsu nya ndòw isə aghə̂ n ndaw imɔʼ ghə i tsɔbə tow wə n wû i ghə, nə a loʼ aghə̂ ataa n ndaw imɔʼ, aghə̂ atəghə ghə zùulə ballə ghə̂ ghə abəghə.

⁵³A wey loʼ nghee zə i doʼlənə tii, bày nə dəmə ghi waa wi u num wə, waa u num u nə dəmə ghi bày. Nay nə dəmə soʼo ghi waa wi u zən wə, waa u zən u nə dəmə ghi zə̂. Inum nə dəmə ghi wey waa wi, wey waa nə dəmə ghi inum wi.”

⁵⁴Yeso n kəm dza ndòw tə̀ nɔɔ key nə̀, “Abə ghaa kòʼnə mbaʼ tə kɔʼɔnə n bad key nyî i nyiətsunə tii, ghaa n daŋŋə dza nə̀, ‘ghow zə î tsunu na,’ zə n teeli tsu soʼo.

⁵⁵Abə ghaa koʼnə zəŋ ə bad kə itən kə, ghaa n dza, ‘tsə̂ wə î zeeli nu na,’ zə n teeli doʼo kə sey.

⁵⁶Ghə nəb ityim ghən, ghaa khə kə ni tiilə kòʼ i ghəlikətsə nsə bikighow kə, a kee loʼ kee ghaa sə̂ way ni tiilə dza ghəə ghən a tsəghənə nya a?

⁵⁷Ghaa nə saʼa n wû i ghaa, ghəə zey i kpiinə.

⁵⁸Abə wə ndòwnə n ndaw tsə ghi wù wey wə̀ khənə saʼ ghi wi, dəm tsu nə wə bayyə nuu tsu ghə i tii zə n ji. Bə a way sey, ghə i ney fu ndòw wɔ̀ tə̀ wù saʼa u təsaʼ wə, tə i ney fu tsəghə ndòw wɔ̀ tə̀ sawgoʼ tə, ghə i ney fii naŋa ndòw wɔ̀ n ndaw tsaʼ.

⁵⁹N sa kûm dza bənu, nə abə i doʼo tsunə sey, wə i shi way n ndaw tsaʼ nə wə ka tsə may ndaŋ kə kə̀.”