Read Weh Lukas 14 Bible Online

Lukas 14 - Weh bible

Lukas 14

¹N tsuʼ inaʼ u ghə̂ a təjuu u loʼ wə, Yeso n bweyyə ndòw n ndaw Falasi u nii u loʼ wə ni ndòw zə, ghə̂ ghə n tɔʼɔ tsìi laalə wi.

²Wù loʼ n loʼ fu n sə kə Yeso nə tə dzaŋa dzaŋ i mowwə zə.

³Yeso n bəb ndòw tə ghə̂ a tə Falasi ghə nsə ghə̂ a dii ghə ulaŋ ghə nə̀, “Laŋ kə saa kə bəghəmnu nə̀ saa i baŋə wù n tsuʼ inaʼ u saa ə nkee kə dii way sey ə?”

⁴Ghə n ləghə way ni beeli, sey, Yeso n mɔm ndòw wù dzaŋa wey, tə n taw doʼo bə, tə n zəghə ndòw wi nə tə nuu ndòw.

⁵Tə n bəb tə ghə nə̀, “À loʼ wù ghaa u ghaa wə abə waa wi nkee mbɔŋ ə wi bwù nyi tsunə n buʼ kə mmuu, tə i doʼlənə nə̀ tə ka shiələ nuu tən kɔʼ n tsuʼ fə tii fə, abə à tsəm loʼ kə n tsuʼ inaʼ a?”

⁶Ghə n ka nam beeli wi.

⁷Yeso n koʼ tsu nə̀ ghə̂ ghey ghə â naʼanə ghə nə̀ kədzəŋi, ghə sày ndòw kuu u nii wə ni doʼo, sey, tə n dza ndow ghə n zəzəə fə fənkəfən fə nə̀,

⁸“Abə wù naʼa wɔ n zə̂ kə ney zə iwû, kə wə̀ nə say ndòw dzə nə kuu kə nii kə, bòʼ nə̀, i loʼ ni doʼo nə̀ ghə n wù loʼ naʼa soʼo tə tsəghəshinə wɔ.

⁹Sey, wù wey tə mə naʼanə ghaa i bə n səə wɔ, tə i dza, ‘fu tsu kuu kə tə wù wən.’ Sey, wə̀ i khə ni ndòw doʼo n kuu kə təghə kə, n tow kə dədlə kə.

¹⁰Abə wù naʼanə wɔ, fəd ndòw doʼo tsu n kuu kə təghə kə, sey nə̀, abə wù wey tə mə naʼanə wɔ koʼ tsunə sey, tə i dza nə̀, ‘Nu kɔʼ fey n fə̂, wə doʼo bə fa n kuu kə nii kə.’ Sey, a i ngii loʼ nkɔʼlə tə wɔ n fəŋŋə kə aghə̂.

¹¹Təŋkey, wù wey tə kɔʼlənə wû u wi wə, tə i fədlə keeli ulən, abə wù wey tə kɔʼlə way wû u wi wə, ghə i kɔʼlə naŋa kɔʼ wi.”

¹²Sey, tə n dza ndòw tə̀ wù wey tə mə naʼanə wi nə̀, “Abə wə̀ khənə zə̂ kə, ka kali naʼa kə fə ghə ghə̀, waazə ghə ghə̀, tyimghə ghə, nsə ghə̂ a kuum ghey ghə muu nə n kɔli wə, bòʼ nə abə wə ghəŋənə sey, ghə i mbɔŋɔ naʼa dzəŋŋə bə soʼonu wɔ, sey zə i loʼ nə ghə n wɔ tsə dzəŋŋə.

¹³Fət tɔŋɔ bə ghə̂ a laa ghə, ukəŋŋə nsə ghə̂ a fəbə ghə,

¹⁴kùmnə ghə i way ni tsə dzəŋŋə wɔ, sey, wə nə keeli ibuulə, abə ghə̂ ghey ghə loʼ tsətsəghə nə zhəm dzəŋŋə bənə nə ivə.”

¹⁵Ambə ghə zow tsu nə sey, wù loʼ n fəŋŋə kə ghə̂ ghey ghaa zəənə fu n dza tə Yeso nə̀, “I sey dii nə̀ buulə zə î ngii loʼ tə wù wey tə loʼnə n zə̂ key n fɔɔ u Kəzə̀.”

¹⁶Yeso n dza tə wi nə̀, “Wu loʼ â khə Kəzə̀, tə n naʼa ndow ndəmə aghə̂.

¹⁷Ambə nəŋə i kpii tsu nə̀, tə n tûm shi ndòw wù kəfwaʼ a wi nə tə tɔŋŋə bə ghə̂ ghey tə â naʼanə nə̀, ‘Bəghə na, a n bayyə naŋa may ghəə ghə.’

¹⁸Ghə̂ ghey adzəm ghə n fəd kaʼ ni tiilə dza zuŋ key ghə way ni ndow fu. Wù sə isə wey n dza, ‘N sa kuʼlə zuu kɔʼ kəluʼu, n dza n ndòw koʼ, kələ wɔ, zowkeeli tsu mə.’

¹⁹Wù loʼ wey n dza, ‘N sa kuʼlə zuu kɔʼ mbɔŋ tə vəllə tə ighəm n sa dza n soʼ mɔm koʼ. Kələ wɔ, zowkeeli tsu mə.’

²⁰Wù loʼ wey n dza, ‘N sa kuʼlə ney kɔʼ wey, a wey loʼ ghə i tii zə n way dzə ni bə.’

²¹Sey wù kəfwaʼ wey n dzəŋŋə ndow, bə dza bə ghəə a tii ghə adzəm tə̀ mûkəbii a wi. Fəŋ n ngii fə̂ mûkəbii wey, tə n tûm shi ndow wù kəfwaʼ wey dza, ‘Ndow n faabə tə jii nsə n jii tə ukɔli tə inaʼ, wə tɔŋɔ kaabə bə ghə̂ a laa ghə, ghə̂ a fəbə ghə nsə kəŋŋə wə.’

²²Ghab kə n ka shi, wù kəfwaʼ wey n dzəŋŋə bə, dza tə̀ mûkəbii nə̀, ‘Mûkəbii, mə n fwaʼ ghəə, ghey wə mə dza nə̀, a kee loʼ kə nə̀, buʼ kə nam loʼnu n ndaw.’

²³Mûkəbii wey n dza tə̀ wù kəfwaʼ a wi wey nə̀, ‘Ndòw tɔŋɔ kaabə bə ghə̂ ghə n jii nsə n jii tə mbvən, nə ghə bə, tə̀ ndaw zuŋ luu kɔʼ.

²⁴N dza bə tə̀ wɔ nə̀, wù umɔʼ n ghə̂ ghey mə â naʼanə î gaʼ way fə kə fa n ndaw.’”

²⁵Nɔɔ wə aghə̂ wə â bwey bə n baa Yeso, tə n khəəmə dza tə̀ ghə nə̀,

²⁶“Abə wù dza i doʼo dzûmə wuŋ, tə khə ni ləghə mə tsəghəshi jìi zey tə ləghənə bày wi ghi này wi, wey wi ghi waa a wi ghə, nsə waazə a wi ghə, tə buʼ ləghə mə tsəghəshi jìi zey tə ləghənə wû u wi wə tii. Nə a way sey, tə way ni doʼo dzûmə wùŋ.

²⁷Wù wey tə ka bəghəm ni boʼo zat kə fəkaʼ kə wi, tə dzûmə mə n ghii kə, tə way dzə ni doʼo dzûmə wùŋ.

²⁸Abə wù dza i bəghə ndaw zey i doʼo kuulə kɔʼ n tow kə ndaw, n dza tə bəghə tə n kəŋ keeli shi kɔʼ dzə nə fə key tə khənə, kə î kɔʼɔ kpiinu ni mayyə fwaʼ kə tii kə ə?

²⁹Təŋkey abə tə maŋ kaʼ ndòw nə fwaʼ kə, sət tsu tsə̂ kə ndaw, kəm way ni mayyə ndaw, ghə̂ ghey ghə koʼonə ghəə ghey tə ghəŋənə, ghə i kaʼ ni tsoʼ wi,

³⁰dza, ‘Wù wən â kaʼ ni bəghə ndaw, tə n kəm way ni mayyə fwaʼ kə tii kə.’

³¹Nkee abə də̀ŋ kə dza i soʼ tsam ghi də̀ŋ kə loʼ kə, ndza tə doʼlə tsunu tə n mòʼlə tsu nə̀, abə tə khənə sawgoʼ tə təkam ighəm, tə loʼnu ni təm baalə tsam ghi də̀ŋ kə loʼ key n sawgoʼ tə wi tə təkam wû u wû ə?

³²Abə tə koʼ tsu nə tə way ni təm baalə tsam i tii zə, tə î daŋa tûm ndòw aghə̂ isə nə də̀ŋ kə loʼ key nam loʼ naynu, nə ghə ndòw bayyə tsu ghəə a tii ghə ghi wi.

³³Yeso sey dza ndownu tə ghə nə̀, Abə ghaa way ni tuu maʼa fə u ghaa udzəm, ghaa way ni doʼo soʼo dzûmə tuŋ.”

³⁴“Ntsoʼ n dzɔbənu abə n tɔbənə, a kee loʼ kə nə̀, abə n kuŋ shi tsunə, mə kəm khə way fwaʼ kə.

³⁵N kəm dzɔbə way ni kuu nə təzub n kee nə kəduŋ, N nya loʼ kə ni feeli maʼa. Abə wù khənə tuŋŋə wə ni zow, tə zow.”