Read Weh Lukas 15 Bible Online

Lukas 15 - Weh bible

Lukas 15

¹Ghə̂ a kwɔɔ a kəmàʼlə ghə nsə ghə̂ a bəbə ghə â bəghə ghə n zuŋŋə bə ni zəllə ghɔɔmə i Yeso nghee tə diinə,

²sey ghə̂ a tə Falasi nsə ghə̂ ghə ulaŋ ghə n nyuŋŋə ghɔɔmə n wû i ghə dza, “Wù wən təmə dzəŋi ghi ghə̂ a bəbə ghə, zəə dzəŋi soʼo ghi ghə.”

³Ambə Yeso koʼnə ghəə ghey ghə ghəŋŋənə, tə n dza ndòw zəzəə fə fənkəfən fən tə̀ ghə nə̀,

⁴“Abə wù ghaa u loʼ khənə njì tə fəbɔm, imɔʼ nay tsunə, tə i ghəŋə ngee? N dza tə naŋa səə tsu tə̀ loʼ tey nghəm ntaandzuu nsə ghii tə tətaandzuu nə ibəghə, tə nuu ndòw ni kəŋ i zey i naynə ni ndow kùm n nəŋə zey tə i koʼonə ə?

⁵Abə tə kəŋ koʼ tsunə, tə i duʼlə, tə boʼo gaʼ kɔʼ n mboʼ ə wi, tə i ney fən bə.

⁶Abə tə fən bənə, tə n tɔŋŋə bə fə̂ a wi ghə nsə ghə̂ ghə ukɔli ghə, tə n dza ndow tə ghə nə̀, ‘bə duʼlə na ghi mə, n təŋkey, mə n kəŋ koʼ njì zuŋ zən i mə naynə.’

⁷N dza bə tə ghaa nə a loʼ ighələ n fɔɔ u Kəzə̀, duʼlə i ngii loʼ idəŋ, abə wù bəbə umɔʼ kweyyə fəŋ ə wi, bəghəm tə Zə̀ kə, tsəghəshi abə aghə̂ nghəm ntaandzuu nsə ghə̂ ghə a tandzuu, ghə loʼ nə tsətsəghə n sə K-a-zə̀, ghə kəm khə way zuŋ kə ni kweyyə fə̀ŋ tə ghə.”

⁸“Abə a ney kɔʼ nə̀ weyzən u loʼ u khənə khəə wə nngɔ̀ʼ ighəm, fəmɔʼ fə nay tsunə, tə i jiə n ngee? N dza tə i daa tsu kədaa, tə zəd bə ndaw, tə i tɔʼ kəŋ sa ni ndow kuum n nəŋə zey tə i koʼonə ə?

⁹Abə tə koʼ tsunə, tə i tɔŋɔ bə fə̂ a wi nsə ghə̂ ghə ukɔli, tə dza tə ghə nə̀, ‘duʼlə na ghi mə, n təŋkey mə n koʼ ngɔʼ fuŋ fey fə a naynə.’ Khəə u fəngɔʼ u naynə

¹⁰N dza bə tə ghaa nə̀ à loʼ soʼo ighələ tsətəndəghə tə Kəzə̀ tə i duʼlənə, abə wù bəbə umɔʼ kweyyə kɔʼnə fə̀ŋ ə wi, tə bə dzəŋŋə n səə Kəzə̀.”

¹¹Yeso n tsəghə ndòw n sə kə, nam dza kuulə ndòw zəzəə fə loʼ fən nə̀, “wù loʼ â loʼ tsə kənu, tə n khə waa a num ghə abəghə.

¹²Waa u tə̀ghə̀ wey n dza tə wi nə̀, ‘Bày, fuu nuu bə tuʼ zə ufə zuŋ zə.’ Sey, bày n dzawwə fu ndow fə u wi tə waa a wi ghə abəghə.

¹³Ghab kə n ka shi, waa u tə̀ghə̀ wey n ney kɔʼ fə u wi, nuu nay ndòw n naʼ i kətûm, zə saŋŋə maʼa may tsu n muu i bəbə zə.

¹⁴Ambə tə zə may tsunə khəə u wi wə, dzəŋ i faalə zə n nyi bə fu tii inaʼ, nə tə kəm khə way fə kə n wɔ.

¹⁵Sey tə n kəŋ ndòw kəfwaʼ n tənnə wù loʼ fu tii inaʼ. Wù tii n ney naŋa ndòw wi nə tə i chiə feelibu u wi wə n mbvən.

¹⁶Tə n mbuŋə ni labi zəə kə fəzəə u kəfelibu wey, ghə n bùʼ way ni fu daŋŋə u tii wə tə̀ wi.

¹⁷Ambə tɔb u wi u fən nyi bənə, tə n dza n fəŋ ə wi nə̀, ‘Ghə̂ a kəfwaʼ a bày wùŋ a zəə kownu, buʼu naŋŋə səə u loʼ wə, mə n loʼ fa kpuu kɔʼɔ bə n wɔ̂ dzəŋ.

¹⁸N dzəŋŋə ndownu n səə bày wùŋ, n dza ndòw tə̀ wi nə̀, Bày mə n ngii ghəŋə bəəbə tə̀ Zə̀ kə nsə tə̀ wɔ.

¹⁹N ka kəm kɔʼ kpi dzə ni doʼo waa wə, ney ndòw kə mə tə̀ a loʼ wù kəfwaʼ wə.’”

²⁰Sey, tə n nuu i koʼ, ndòw dzəŋŋə n səə bày wi. Nghee tə bəghənə, bày n koʼ ndòw wi n ghab kə, sî zə n kwu wi bòʼ wi. Tə n nyəŋ ndòw bwù maŋə keeli ndow wi.

²¹Waa tii n dza tə̀ bày nə̀, “Bày, mə n ngii ghəŋŋə bəəbə tə Zə̀ kə idəŋ nsə tə wɔ. N ka kəm kɔʼ kpi dzə ni doʼo waa wə. Ney ndow kə mə tə a loʼ wù kəfwaʼ wə.”

²²Bày n fəd tɔŋɔ bə ghə̂ a kəfwaʼ a wi, dza tə̀ ghə nə̀, “Mbad ney bə na saŋ i dzuŋu zey, ghaa dzəŋə tsu n kow wi, ghaa dzəŋŋə tsu fətii n wɔɔ kə wi, ghaa dzəŋŋə tsu soʼo wi n gòwtə.

²³Ghaa ney bə mbɔŋ i nii zey, ghaa wey tsu, tə̀ a keeli Kəzə̀, a saŋŋə,

²⁴təŋkey, waa wùŋ wən mâ kpu, nya tə n zhəm dzəŋŋə bə. Tə mâ nay, a n kəm koʼ wi.” Sey ghə n kaʼ ni saŋŋə

²⁵“A n loʼ sey nə̀ weynyim ə wi nam loʼ n mbvən. Nghee tə fənə bənə, tə n kuʼlə bə n səə ndaw, tə n zow ndow dəm kə ibən n ndaw ghə,

²⁶tə n tɔŋɔ tsu wù kəfwaʼ umɔʼ, bəb tə̀ wi nə̀, ‘A shiə kee fa a?’

²⁷Wù kəfwaʼ wey n dza tə̀ wi nə̀, ‘Waazə wə n bə dzəŋŋə, bày wə u weytsunə mbɔŋɔlɔʼ i nii zey, n təŋkey, tə bə dzəŋŋə utaw.’

²⁸Weynyim wey n fəələ ndòw unəghə nghee tə zow tsu sey, tuu nə̀ tə nyiə way n ndaw. Bày n ndòw shi bə, kaʼ ndòw ni buʼ kəwɔɔ tə̀ wi.

²⁹Tə n fəd dza ndòw tə̀ bày nə̀, ‘koʼo fwaʼ kən n fwaʼa nə tə̀ wɔ, n nûm tən tə̀ a loʼ kəkɔd, zow tə wɔ, naŋŋə soʼo laŋ wə, wə ka kam fu koʼ tsə waa fə ji fə tə̀ mə, tə n mbɔŋ səghə n saŋŋə ghi fə̂ ghuŋ ghə.

³⁰Nghee tə̀ waa wə wən tə sàŋŋə maʼanə fə wə wə̀ ghi gheyzən a laŋŋə ghə, bə dzəŋŋənə, wə u wey tsunə mbɔŋ i nii zey tə̀ wi.’

³¹Bày n beeli ndòw wi, dza nə̀, ‘N waa, wə loʼ zeeli fa ghi mə, fə wən n khənə udzəm, a loʼ u wə wə̀.

³²I kpiinu tə̀ saa ni saŋŋə, a duʼlə, n təŋkey, waazə wə wən tə â kpuunu, tə n bə dzəŋŋə utaw, tə â naynu, a n kəm koʼ wi.’”