Read Weh Lukas 16 Bible Online

Lukas 16 - Weh bible

Lukas 16

¹Yeso n dza ndòw zəzəə fən tə dzûmə tə wi tə nə̀, “Wù kuum u loʼ wə â loʼ tsənu, tə n khə tsə wù kəfwaʼ a wi tə laalənə fə u wi wə. Ghə n bə dza tə wi n tsuʼ fə loʼ fə nə̀, wù kəfwaʼ à wi wey zəə saŋŋə fə u wi.

²Tə n tɔŋɔ naŋa bə wi, bəb ndòw tə̀ wi nə̀, ‘À wən loʼ ghəə a ghaa ghə n zownə bòʼ wɔ? Fu bə taŋ n fə wùŋ udzəm, n təŋkey wə kəm way ni laalə fə wùŋ.’

³Wù kəfwaʼ wey n ghɔɔmə kə nəghə unəghə, dza, ‘Mə i jiə tsu n ngee nya a? Mûkəbii wùŋ dza i shiələ nuu mə nə kəfwaʼ, n khə way daʼa kə ni bow ufaa, mə n dədlə soʼonə n tow kə ni doʼo wù nɔɔ wə.

⁴N khənu ghə zey mə i ghəŋŋənə, tə̀ abə n guŋu tsunə fwaʼ kuŋ kən, ghə̂ ghə i loʼ ni koʼ keeli mə n luʼu u loʼ wə, ghə bɔŋ naŋa mə n ndaw tə ghə.’

⁵Sey, tə n tɔŋŋə bə ghə̂ ghey ghə â khənə mûkəbii ə wi n ndàŋwə, tə n bəb ndow tə u sə isə wey nə̀, ‘Wə̀ khə mûkəbii wùŋ n ndâŋkə nə ukhəə usiʼi?’

⁶Tə n beeli ndow wi dza, ‘N khə wi n kaŋ wə mmbvə wə fəbɔm.’ Wù laalə u kəfwaʼ wey n dza tə wi nə̀, ‘Ney, à wən loʼ maʼlə kə undàŋ kə, tɔ̀ɔ tsu nə a loʼ ukaŋ nghəm ntaa.’

⁷Tə n bəb ndow tə u loʼ wə nə̀, ‘Ndàŋ kə kə̀ loʼ kəkee?’ Tə n dza ndow tə̀ wi nə̀, ‘N khə wi n mbəghə wə asəb wə nghəm ifam’. Wù laalə wə ufə wey n dza ndow tə wi nə̀, ‘Ney ndow maʼlə kadàŋ kə kən, wə tɔ̀ɔ tsu nə a loʼ nghəm ntuubə.’

⁸Mûkəbii n fəd kaali ndòw wù kəfwaʼ wey n tɔb u tsɔŋɔ wey tə â khənə. À kùm lo isəŋə nə ghə̂ a mbi khə tɔb u tsii wə aghə̂ wə, tsəghəshi ghə̂ a Kəzə̀.

⁹N fa tsə̀ə bə ghaa nə̀, i ney na fə u mbi wə, kaŋa ndòw afə̂ tii, tə̀ bə u nə maynə, ghə i kpii ney ghaa n muu kə wi kən idəŋ kə doʼo tən nə.

¹⁰Wù wey tə loʼ nə ni kwu keeli dzɔb nyaŋi fə ufə, sey loʼ soʼonu ni kwu keeli ndəmə ufə. Wù wey tə ghəəbə nə ni kwu keeli nyaŋi fə ufə, sey way ni doʼo tsətsəghə soʼo n ndəmə ufə.

¹¹Sey, abə ghaa way ni kwu keeli dzɔb fə u mbi, a loʼ ndee ni bəghəm ni fu ghaa n ndzəm ndzəm kə ighaʼ kə ə?

¹²Abə ghaa way ni tɔʼ kwu keeli fə u wù, ghaa i loʼ n ngee ni tɔʼ kwu keeli u ghaa wə ə?

¹³Wù kəfwaʼ umɔʼ way ni keeli dzə ghə mûkəbii abəghə, n təŋkey, tə i bə ləghə umɔʼ, tə baa u loʼ wə; nkee tə i zow tə̀ umɔʼ, tə tsayyə u loʼ wə. Sey, wù way ni ngɔɔmə Zə̀ kə tə i ngɔɔmə soʼo khəə wə.”

¹⁴Ambə ghə̂ a tə Falasi a zow tsunə sey, ghə n tsoʼ maʼa Yeso, n təŋkey, ghə a ngii ləghə ukhəə.

¹⁵Yeso n dza ndòw tə̀ ghə nə̀, “À loʼ ghaa, ghaa diinə wû zə n sə kə aghə̂, nə ghaa loʼ ghə̂ a dzuŋu ghə, Zə̀ kə a kee koʼonə fə̀ŋ tə ghaa tə. Sey, fə wey wù sɔŋtsuʼ gaʼanə fəŋ tii, u fədlə ləbinu tə̀ Zə̀ kə.

¹⁶Laŋ u Mushi nsə tûm tə Kəzə̀ tə â gaamə tsə ghaa ni keeli ghəə a Kəzə̀ ni bə kùm tə̀ Jɔn wù fuu u mmuu Kəzə̀ mə â bə nə. Ni ney nuu bə n nəŋŋə i tii zə, n sa naʼlə kə tûm i dzuŋu zə bòʼ fɔɔ u Kəzə̀, ghə̂ ghə a fuʼunə ni nyi fu tii nə kədaʼa.

¹⁷A maŋ loʼ nyaŋi fə ighəə tə bikighow nsə ghəlikətsə kə ni may, zə a fədlə ngii tawnə tə ghə imɔʼ ni səŋ n laŋ K-a-zə̀ fa n mbi.

¹⁸Wù wey tə dzawwənə ney zə iwûzə ghi wey wi, ney ndòw wey u nu wə, tə n taa zaʼ wey. Weynum wən tə neynə weyzən nə tə mâ dzawwə ney zə iwûzə ghi num, tə sey taa zaʼ soʼonu.

¹⁹Wù kûm u loʼ wə a loʼ tsənu, tə n labə tənnə tsə uwû n ndzə tə wən i taw zə. Tə n zəələ tsə kə uwû tsuʼ ndzəm.

²⁰Wù laa u loʼ wə n loʼ n fuʼ u mbàa u wi, ghə â tɔŋŋənə wi nə̀ à loʼ Lazarɔs. Tə n loʼ n bad zə n wû u wi udzəm.

²¹Tə n mbuŋə tsə ni labi zəə kə boʼo mə nbaa mən n tsɔʼlə abə wù kûm wey zə̂ənə, mə n way daŋŋə tə wi. Bvə tə n bə nəghə tsə bad zey nkow wi.

²²Ambə wù laa wey kpuu tsunə, tsətəndəghə tə Kəzə̀ tə n ney naŋa ndòw wi n səə Abraham, wù kûm wey n bə kpu tsu soʼo, ghə n ney tsələ ndow wi.

²³Ambə tə loʼnə n naʼ zə ivə zow ngoʼ fu, tə koʼ kɔʼ ndòw Abraham nə kədaa, ghi Lazarɔs n səə wi.

²⁴Sey tə n dey dza ndòw tə̀ Abraham nə̀, ‘Bày wuŋ Abraham! Kwɔɔlə sî zə n kow mə wə tûm tsu Lazarɔs tə tsum waa kəwɔɔ ə wi nə n mmuu tə n maŋ labi kayyə tsu waatɔŋ zuŋ tii, n təŋkey, n ngii zow ifɔbə fa nə uvələ.’

²⁵Abraham n fəd dza ndòw tə wi nə̀, ‘N waa moʼlə tsu nə nghee wə a muu nə mbi, wə â zəələ tsə uwû, Lazarɔs n kee muu tən tsə n ngoʼ. Nya tə kee zəələ uwû fa, wə a kee muunə n ngoʼ.

²⁶A buʼ loʼ nə wad i nii zə n saa dzawwə naŋa, sey, wù way dzə ni nuu tsu fa tə daŋ bə n bad key, nkee tə nuu tsu n bad key tə daŋ bə n bad kən.’

²⁷Sey, wù kûm wey n dza ndòw tə Abraham nə̀, ‘Bày, labi tûm ndòw kə wi n ndaw bày wùŋ,

²⁸Təŋkey, N khə awaazə ataa, tə ndòw kpaa naŋa tsu ghə, sey nə̀, kə ghə nə bəghənə fa n luʼu kə uchɔd kən.’

²⁹Abraham n dza tə̀ wi nə̀, ‘Waazə ghə a khənu laŋ u Mushi wə nsə tsə zən tûm tə Kəzə̀ tə â tɔ̀ɔ naŋa ni dzûmə, ghə khə ni zow tə̀ ghə.’

³⁰Wù kûm wey n dza ndòw tə̀ Abraham nə̀, ‘Hayi, zə i ka nam bwey dzə a bày Abraham, abə wù ka zhəm dzəŋŋə bə nə ivə ni bə dza ghəə ghən n wɔ ghə, ghə way dzə ni kwey fə̀ŋ tə ghə.’

³¹Abraham n fəd dza tə̀ wi nə̀, ‘Abə ghə way ni bwey n laŋ u Mushi nsə n tsə i tûm tə Kəzə̀, ghə i nam way ni kwey abə wù tsəm zhəm dzəŋŋə bə kə nə ivə bə dza bə tə ghə.’”