Read Weh Lukas 17 Bible Online

Lukas 17 - Weh bible

Lukas 17

¹Yeso n dza ndòw tə dzûmə tə wi tə nə̀, “ghəə ghey a ghəŋənə nə ghə̂ ghə î ghəŋə ghəə a bəbə ghə, a khə ni teeli bə, ngoʼ kee loʼ tə wù wey zə î bəghənə n baa wi.

²Kùm nə̀, abə ghə tsəm kow kɔʼ kənə tay i nii zə n mwey u wù, tuŋu maʼa nyi tsu ndow wi n dzuu, tə i nam zow kədzuŋ tsəghəshi ngoʼ zey wù wən tə ghəŋənə nə winətəghə umɔʼ bwu n ghəə a bəbə ghə i zownə.

³Sey î ney na ghə̂mə zə n wû i ghaa. Abə waazu ghəŋə tsunə ghə i bəbə zə, kpaa ndòw wi, nə tə kwey kɔʼnu fəŋ ə wi, wə n neyzəə ndòw wi.

⁴Abə tə tsəm ghəŋŋə bəəbə kə tə wɔ kɔʼɔ kùm ndow tənəŋə təsəghəmbəghə nə fətsuʼ, bə dzəŋŋə soʼo tənəŋə təsəghəmbəghə dza, ‘Mə n kwey fə̀ŋ zuŋ’, wə khə ni teeli neyzəə wi.”

⁵Ngəd tə wi tə n dza nə̀, “Mûkəbii dii bə tə̀ ghey nghee ghey loʼ ni ghəŋə ni keeli bəghəm i fə̀ŋ i nii zə.”

⁶Tə n beeli ndòw ghə dza, “Abə ghaa khənə bəghəm i fə̀ŋ zə tə̀ a loʼ sə̂ ikuu, ghaa loʼ ni dza tə̀ kaʼ fə nîi fən nə̀, ‘zəbə nuu kɔʼ wû wə wə̀, wə̀ ndòw zəghə doʼo tsu n fəŋ ə dzùu’, fə i zow bə tə̀ ghaa.

⁷Ney kɔʼ na nə wù ghaa u loʼ u khə wù kəfwaʼ tə vəllənə nkee tə laalənə tə njì tə, abə tə fən bə nə̀, wə i dza ndownu tə̀ wi nə̀, ‘ndòw ney kɔʼ fəzəə wə, wə̀ zə ə?’

⁸Ngaŋ! Wə̀ i fədlə dza ndow tə wi nə̀, ‘Kuu kɔʼ dzə fəzəə wùŋ wə, wə̀ faalə tsu wû wə, wə̀ ney teyyə bə fəzəə wùŋ tə n zə kɔʼ, wə̀ i sə zə u wə wə̀, nə̀ mə n zə may.’

⁹Tə i fuunu zɔŋŋə kə tə wù kəfwaʼ wey n fwaʼ key tə fwaʼnə tə wi ə?

¹⁰A loʼ soʼo ighələ ghi ghaa, abə ghaa fwaʼ may tsunə fwaʼ kə ghaa kə, ghaa n dza tsu nə̀, ‘Ghey maŋ loʼ ghə̂ a kəfwaʼ, ghey mə sa fwaʼa fwaʼ kə ghey.’”

¹¹Ambə Yeso ndòwnə n Yerosalem, Tə n tsəghə tɔɔlə ndòw n tii u mboʼo Samaria nsə n mboʼo Galili.

¹²Nghee tə nyiə ndòwnə n naʼ i loʼ zə fu, Tə n kpii ndow ghi ghə̂ ghə ukə̀m ghə ighəm. Ghə n tey n ghab kə,

¹³tɔŋɔ bə wi n dzə i taw zə nə̀, “Yeso! Mûkəbii! Kwɔɔlə sî zə n kow ghey!”

¹⁴Nghee tə koʼ ndòw nə ghə, tə n dza tə̀ ghə nə̀, “Ndòw dii na wû i ghaa zə tə ghə fɔɔngili.” Nghee ghə ndòwnə n jii, ghə n taw doʼo dzəŋŋə bə.

¹⁵Sey, wù umɔʼ n fəŋŋə kə ghə n nuu dzəŋŋə i bə, kaʼ ni fu nkɔʼlə tə Zə̀ kə, n dzə i taw zə.

¹⁶Tə n bə təm bə tənguʼ n tənnə Yeso, fu zɔŋə kə wi, a n loʼ nə a loʼ wù Samaria.

¹⁷Yeso n bəb tsu nə̀, “N dza ghə̂ a mə loʼ ighəm, ghə mə taw doʼo bə nə ə? A loʼ ghey a ntaandzuu kee loʼ ghee?

¹⁸A loʼ kee, a sə fəd loʼ wù kətûm tə dzəŋŋə bənə ni bə fu nkɔʼlə tə Zə̀ kə ə?”

¹⁹Yeso n dza ndòw tə̀ wi nə̀, “Nuu kɔʼ, wə nuu ndow i zə zə̀, bəghəm i fə̀ŋ zə, zə n baŋŋə wɔ.”

²⁰Tsuʼ fə loʼ fə, ghə̂ a tə Falasi a loʼ ghə n bəb ndòw tə̀ Yeso nə̀, “Fɔɔ u Kəzə̀ u nə bəghə zeeli.” Yeso n beeli ndòw ghə dza, “Fɔɔ u Kəzə̀ wə î bə way n jìi zey ghaa loʼ ni koʼ n mgbaŋ.

²¹Wù loʼ î dza dzə way nə u wey fey, nkee u wənə fa, n təŋkey fɔɔ u Kəzə̀ u loʼ n fəŋŋə kə ghaa.”

²²Sey tə n dza ndòw tə dzûmə tə wi tə nə̀, “Nəŋə i bəghənu ghaa nə mbuŋənə ni koʼ fətsuʼ n tsuʼu n Waa wù sɔŋtsuʼ ghaa nə way ni ndɔm koʼ wi.”

²³Ghə̂ a nə dza tə ghaa nə̀, “Tə wey fey, nkee tə wənə fa.” Kə ghaa nə dzûmənə ghɔɔmə i ghə zə.

²⁴Təŋkey, bə i waa wù sɔŋtsuʼ i nə loʼ n mgbaŋ, tə a loʼ ighow i mualə nə n bad kə bikighow kəmɔʼ kuum ndow n bad kə loʼ key.

²⁵Ghə i sə̂ isə i loʼ nə̀ tə nə fəʼlə dzənu n ndəmə tə aghəə, ghə̂ a num tə tən nə tuu maʼa soʼo wi.

²⁶Tə̀ zə â loʼnə n tsuʼu n Noa, a loʼ soʼo sey i nə doʼlənə n tsuʼu n Waa wù sɔŋtsuʼ.

²⁷N tsuʼu n tii mə, ghə̂ ghə â zəənu, məə, ney aghey ni kɔʼ kùm n tsuʼ fey Noa â nyinə nə kəfən, dzuu n luu shi bə, kuŋŋə wey maʼa tsu aghə̂ adzəm.

²⁸A loʼ soʼo sey zə â shinə n tsuʼu n Lɔd, ghə̂ ghə a zəənu, məə, fiillə, zuu ufə, vəllə isum, bəghə təndaw.

²⁹Ambə n tsuʼ fey Lɔd zə̀ghə̀ tsunə Sodom, vəllə wə n tsu bə n bikighow nsə bvəkə uvəllə kə, tə ghow i nə tsuulənə n tətay mə, bə ləŋi maʼa tsu aghə̂ adzəm.

³⁰I nə bɔɔmə loʼ soʼo sey n tsuʼu n Waa wù sɔŋtsuʼ.

³¹N tsu fə tii fə, nə wù loʼ n tow kə ndaw, kə tə nə ndɔm tsu bənə ni bə ney kəfə n ndaw wi, ighələ ghi wù wey tə loʼnə nə usum, kə tə nə dzəŋŋə bənə ibam n ndaw.

³²Moʼlə tsu na ghə zey zə â shinə ghi wey Lɔd.

³³Wù wey tə dəmənə ni keyyə mû i wi nə fədlə nayyə maʼanu mû i tii zə. Wù wey tə tuu maʼanə wû u wi wə bòʼ mə, nə fədlə keeli muu zə itsali.

³⁴N dza bə tə̀ ghaa nə̀, n tsuʼ fə tii fə, n tsuʼu tə, ghə̂ à nə nyə̀ŋ abəghə nə ukay, ghə nə ney nuu kɔʼ umɔʼ ghə naŋa səə tsu umɔʼ.

³⁵Agheyzən abəghə nə dzəŋi gwɔɔlə səb ghə, ghə nə ney nuu kɔʼ umɔʼ, umɔʼ n doʼo səə tsu.

³⁶Gheynum a nə loʼ nə usum abəghə, ghə nə ney nuu kɔʼ umɔʼ, ghə naŋa sə tsu umɔ.

³⁷Dzûmə tə Yeso tə n bəb ndòw tə̀ wi nə̀, “Ghəə ghən a nə shiə ghee a Mûkəbii?” Tə dza ndòw tə̀ ghə nə̀, “Dzədzəətə zuʼu kə n luʼu key nyam kpu doʼonə tii.”