Read Weh Lukas 19 Bible Online

Lukas 19 - Weh bible

Lukas 19

¹Yeso n nyi bə n Jeriko nə tə tsəghə daŋŋənu.

²Wù kwɔɔ u kəmàʼlə u nii u loʼ wə n loʼ fu ghə â tɔŋŋənə, nə a loʼ Zakiə. Tə n loʼ wù kûm wə.

³Tə n ləghə ni koʼ Yeso, ji n way təŋkey tə â ngii kəbətəbə nu, nɔɔ kə aghə̂ kə n bəghəm soʼo way nə tə koʼ wi.

⁴Sey, tə n nyəŋ nuu ndow isə, n ji zey Yeso khə ni tsəghə tii, ndow kɔʼ doʼo kɔʼ n kaʼ fə loʼ fə ghə tɔŋŋə nə̀ à loʼ sikamɔ nə i koʼ Yeso.

⁵Ambə Yeso bə kùm tsu nə fu, tə n laalə kɔʼ ndow idəŋ, koʼ kɔʼ ndow Zakiə, dza tə wi nə̀, “Zakiə, zaŋŋə shi tsu bə, n təŋkey, mə i na loʼ n ndaw zə.”

⁶Sey Zakiə n lumə tsu bə, kpii ney kɔʼ wi nə iduʼlə.

⁷Nghee tə ghə̂ a koʼ tsu nə sey, ghə n kaʼ ni nyuŋŋə ghɔɔmə dza nə̀, “Yeso bweyyə ndow n ndaw ndzoʼo wù wey nə̀ tə loʼ wù bəbə.”

⁸Zakiə n fəd nu təmi i kɔʼ dza tə Mûkəbii nə̀, “Mûkəbii, mə i fuu ndow kəm kə ufə kuŋ tə ghə̂ a laa ghə, abə mâ tsi kə nə wù loʼ, mə i tsə dzəŋŋə ndow, n tsə kuulə ndow tənəŋŋə təkaykə n taŋ a fə wey mə â tsinə wi tii.”

⁹Yeso n dza tə wi nə̀, “Zə̀ kə n bəghəshi ndaw zən na, n təŋkey, wù wən loʼ soʼonu waa sali ndaw zə Abraham.

¹⁰Kùum nə Waa wù sɔŋtsuʼ bə ni bə kəŋ koʼ nsə ni bəghəshi ghə̂ ghey ghə nay doʼo nə.”

¹¹Nghee tə ghə̂ ghən zəllə ghəə ghən, Yeso n ndow n sə kə ni dza ghə n zəzəə fə fənkəfən fə. Ambə Yeso kuʼlə may ndownə n Yerosalem, ghə̂ ghey n kee moʼlə kə nə fɔɔ u Kəzə̀ u nya loʼ ni bə.

¹²Tə n dza nə̀, “Wu nii u loʼ wə a bwey nay ndow n naʼ i loʼ zə, nə ghə tsuʼ wi fu tə a loʼ kədəŋ, tə i kəm dzəŋŋə bə.

¹³Ambə tə dza i nu, tə n tɔŋŋə naŋa tsu ghə̂ a kəfwaʼ a wi ighəm, fu ndow kay wù n khəə wə nə ghə loʼ ni tsə wù kəfwaʼ tii nə təndzɔŋɔ tətəghə dza, ‘Ghəŋə ndow na bikiwən kə, n bəghənu.’

¹⁴A n loʼ sey, nə ghə̂ ghə inaʼ a wi a ləghə way wi. Sey ghə n tûm ndow aghə̂ nə ghə ndow dza nə̀ ghə ləghə way nə tə doʼo də̀ŋ kə ghə.

¹⁵Ambə ghə tsuʼ tsu wi tə a loʼ kədəŋ, tə n dzəŋŋə bə n naʼ i wi, daŋŋə tûm tɔŋɔ tsu ghə̂ a kəfwaʼ a wi ghey tə â fu nə ghə n khəə wə, ni kəŋ keeli kɔʼ fə key ghə keeli kuulə nə n bikiwən key ghə a ghəŋŋənə.

¹⁶Wù sə isə wey n dza, ‘Mûkəbii, mə n keeli kuulə khəə wə tənəŋə ighəm n khəə wey wə a funə.’

¹⁷Tə n beeli ndow wi dza, ‘Wə loʼ wù kəfwaʼ u dzuŋu wə, n təŋkey, wə n laalə dzɔb nyanyi fə ufə fey mə â fu naŋa tə wɔ, sey, mə i naŋŋə wɔ tə a loʼ tsoʼ, wə i laalə kɔli tə ighəm.’

¹⁸Wu u loʼ wey n bə dza, ‘Mûkəbii, mə n kəŋ kuulə khəə wə tənəŋə tətaa n khəə wey wə a fu nə.’

¹⁹Tə dza ndow tə wi nə̀, ‘mə i naŋŋə wɔ tə a loʼ tsoʼ nə tə kɔli tətaa.’

²⁰Wu kəfwaʼ u loʼ wey n dza, ‘Mûkəbii, khəə wə u wən ə, mə â sa nyoʼlə kow naŋa kə nə təndzə, nyì naŋa i ndow.

²¹Mə a tsəŋə wɔ, n təŋkey, wə tawnu n wɔɔ ghə, wə ləghə ni ney nə̀ a ka wɔ naŋa, kpey nə usum, nə wə ka zəghə.’

²²Dəŋ key n dza, ‘Wə loʼ wù kəfwaʼ u bəbə wə, mə i saʼa kə wɔ n ghɔmə zey i shi bə n dzuu zə. Wə a khənu nə n loʼ wù taw n wɔɔ ghə, ney ufə nə a ka mə naŋa, kpey soʼo nə n ka zəghə

²³Â shi kee wə a ka sə ney khəə wùŋ, wə kuu naŋa n ndaw ukhəə ə? Mə bə ney nə̀ khəə u tii wə n ji kpiʼi.’

²⁴Tə n dza ndow tə ghə̂ ghey ghə teynə fu nə̀, ‘Ney nuu kɔʼ na khəə wey n wɔ wi, ghaa fu ndow tə wù wey tə â keeli kuulə nə khəə wə tənəŋə ighəm.’

²⁵Ghə n dza ndow tə wi nə̀, ‘Mûkəbii tə lɔʼlə khə kuulə ukhəə tənəŋə ighəm.’

²⁶Sey, mûkəbii wey n dza ndow tə ghə nə̀, ‘Keeli tsu na nə wù wey tə khə fə kə, ghə i fu kuulə wi n ndəmə ufə, abə wù wey tə khə way fə kə, ghə i ney nuu daŋŋə nyanyi fey tə khə.

²⁷Abə ghə̂ a təngəmmə ghuŋ ghey ghə â ləghə way nə n doʼo kədəŋ, ney bə na ghə n səə mə, ghaa wey tsu mə i koʼo.’”

²⁸Ambə Yeso ghɔɔmə may tsu, tə n ndow isə nə u kɔʼɔ wə n Yerosalem.

²⁹Nghee tə kuʼlə ndownə n naʼ i Betfaj nsə Betani n kaʼ u Olif, tə n tûm ndow tsətəndəghə tə wi təbəghə isə, dza ndow tə ghə nə̀,

³⁰“Ndow na n naʼ zey isə, tə ghaa nyiə ndow nə̀, ghaa i koʼ fənjakas ghə faŋa naŋa nə̀, nə wù ka kam kɔʼ koʼ tsə a tii, ghaa zìi bə n ghii kə fa.

³¹Bə wù loʼ bəbnə nə̀, ‘Ghaa Njakas fey zii nə a loʼ kee?’ Ghaa i dza ndow nə̀, ‘Mûkəbii khə kəfwaʼ tii.’”

³²Sey ghə n nu ndow isə̂, bɔɔmə ndow koʼ tsu Njakas fey ghə faŋa naŋanə tə̀ tə mə dzanə.

³³Ambə ghə zii nə Njakas fey, ghə muu a tii ghə n bəb tsu nə̀, “Ghaa Njakas fey zii nə a loʼ kee?”

³⁴Ghə n beeli ndow wi dza, “Mûkəbii khə kəfwaʼ tii.”

³⁵Sey ghə n ney bə Njakas fey n səə Yeso, zey kɔʼ ndow ndzə tə ghə tii, ney doʼlə naŋa kɔʼ Yeso tii nə fənjakas.

³⁶Nghee tə ghə ndow nə̀, ghə n zey ndow ndzə tə ghə n jii.

³⁷Ambə tə kuʼlə ndownə n Yerosalem, n luʼu key jii ndownə n kaʼ u Olif, nɔɔ kə dzûmə tə wi kə n kaʼ ndow ni duʼlə, fuu ukali tə̀ Zə̀ kə, n dzə tə taw tə, bòʼ faalə mey ghə koʼnə dza nə̀,

³⁸“Zə̀ kə buulə də̀ŋ key kə bənə n zəd i Mûkəbii! Ibuulə nsə kɔʼlə mə i loʼ tə Zə̀ kə idəŋ!”

³⁹Ghə̂ a tə Falasi a loʼ ghə n fəŋŋə kə a nɔɔ key n dza ndow tə Yeso nə̀, “Kii naŋa tsu dzûmə tə tə̀ nə ghə doʼo tsu mɔŋ.”

⁴⁰Yeso n beeli ndow ghə nə̀, “N kùm dza bə tə ghaa nə̀, abə ghə doʼo kə nə mɔŋ, tay ghə i kaʼ ni buʼlə nbɔŋ.”

⁴¹Ambə tə kuʼlə may ndownə n Yerosalem, koʼ ndow naʼ i tii zə, tə n dey dza,

⁴²“Abə ghaa ghən ghaa loʼnə nya fa ghi mə, ghaa mə khə jìi zey i ney bə nə buulə zə, n tsuʼ fə na fən! À fa loʼ kə nə ghə n nyi naŋa ghəə a tii ghə n wɔ ghaa nə kə ghaa nə koʼo keeli!

⁴³Nəŋə zə i bəghənu, ghə̂ a təngəmə a ghaa ghə i bəghə dzəŋ tsəghə kɔʼ ghaa nə təmbàa, ghə baʼlə naŋa kɔʼ ghaa badla tədzəm.

⁴⁴Ghə nə ləŋi may tsu ghaa adzəm nsə waa a ghaa ghə, ghə saʼ maʼa naʼ i ghaa kasə̀ kədzədzəə, kə nə buʼ way kùumnə ghaa â ka koʼ keeli nəŋə zey Zə̀ kə a bənə ni bə bəghəshi ghaa.”

⁴⁵Sey tə n nyi ndow n bii kə Ndaw Kəzə̀ i nii zə n Yerosalem kaʼ ndow ni dzum shi ghə̂ ghey ghə â fillə fu

⁴⁶dza tə ghə nə̀, “I tɔ̀ɔ doʼo n màʼlə K-a-zə̀ nə̀, ‘Ndaw zuŋ i bə doʼlə ndaw i gɔŋŋə zə’, Ghaa a fəd ney naŋa kɔʼnə, nə̀ a loʼ ndaw ghə̂ a tsɔŋɔ ghə.”

⁴⁷Yeso â nyiə dii tsə n Ndaw Kəzə̀ i nii zə n Yerosalem tsuʼu ndzəm. Ghə fɔɔngili a nii ghə, ghə̂ a dii ghə ulaŋ ghə nsə ghə̂ ghey ghə â loʼ towwə fu n kəŋŋə jii ni wey wi.

⁴⁸Jìi n kee way, n təŋkey, ghə̂ adzəm ghə a zəllə kə tə wi, ləghə way ni guŋə ghə i loʼ zə.