Read Weh Lukas 2 Bible Online

Lukas 2 - Weh bible

Lukas 2

¹N nəŋŋə i tii zə, Kaysa Ogostus n tsəʼlə tsu kəlaŋ nə̀ ghə ney taŋ aghə̂ ghey adzəm ghə loʼnə n naʼ i Roma.

²Â wən loʼ nəŋə i sə̂ isə zə ni ney taŋ aghə̂ nə̀ Kwirinus loʼ Gɔvənɔ n naʼ i Sirya.

³Sey, kay wù n ndow kə n naʼ i wi nə ghə ney taŋ n kow wi.

⁴Sey, Yosef n nuu tsu soʼo n naʼ i Nazaled, n mboʼo Galili, kɔʼ ndòw n Betelehem, naʼ i Fɔɔ, Devid n mboʼo Judeya, n təŋkey tə â shi n sad i kəbii i Devid.

⁵Tə n ndòw ni ndòw tɔɔ izəd ghi Maria, wey wi tə â nyi naŋanə. A n loʼ sey nə̀ Maria loʼ nəghə u waa.

⁶Nghee tə ghə loʼnə fu n Betelehem, nəŋə zə n kpii tsu tə Maria ni ji.

⁷Tə n ji bə waa wi usə̂ isə wə̀, nə a loʼ waa u num wə. Tə n baŋ kɔʼ wi nə təndzə̂, nyəŋŋə naŋa tsu wi n kəŋ ufəzəə u tənyam, n təŋkey ghə â ka keeli bùʼ kə n ndaw i zayyə zə.

⁸Ghə̂ a baʼa a tənjì a loʼ ghə a kuʼlə loʼ fu n tsuʼu tə. Ghə n loʼ fu n kaʼ kə tənjì kə ghə kə ghə keyyənə.

⁹Tsəndəghə ə Kəzə̀ n təmi dii bə uwû tə ghə, sey tsə̂ u Kəzə̀ wə n taw dzəŋ naŋa kɔʼ ghə. Ghə n kaʼ ni tsəŋ.

¹⁰Tsəndəghə ə Kəzə̀ zey n dza tə̀ ghə nə̀, “kə̂ ghaa nə tsəŋənə, n bə ghaa n tûm i dzuŋu zə, zə i fuu duʼlə i nii zə tə ghə̂ ghə adzəm.

¹¹Koʼo na! N tsuʼ u na wən, ghə ji bəghəshi ə ghaa n naʼ i Fɔɔ Devid. Tə loʼ Wù wey Zə̀ kə Tsuʼ naŋanə tɔŋɔ Klisto[1] tə loʼ Mûkəbii.

¹²À wən loʼ tsəə zey ghaa i koʼo keelinə wi tii, ghaa i koʼo waa nə ghə n bàŋ nə təndzə̂, tə nyəŋnə n kəŋ u fəzəə u tənyam.”

¹³Nɔɔ kə tsətəndəghə tə Kəzə̀ kə n tsu bə idəŋ daŋŋə bə təmdzəŋi bə tsəndəghə ə Kəzə̀ zey, ghə n zey ndòw ni fu nkɔʼlə tə Zə̀ kə dza,

¹⁴“kɔʼlə n loʼ tə Zə̀ kə tə loʼ idəŋ, buulə i Kəzə̀ zə i loʼ tə̀ ghə̂ ghey ndzuŋ ə wi loʼ kow ghə fa n mbi.”

¹⁵Ambə tsətəndəghə tə Kəzə̀ tey zəghə tsunə ghə, ndòw dzəŋŋə idəŋ, ghə̂ a keyyə a tənjì ghey n dza n wû i ghə nə̀, “bəghə na a ndòw n Betelehem, a ndòw koʼ ghə zən i shi shinə fu, tə Bày chi dii bənə tə sa.”

¹⁶Sey, ghə n luumə ndòw, bə koʼ bə Maria, Yosef ghi waa tə nyəŋnə n kəŋ ufəzəə u tənyam

¹⁷Ambə ghə bə koʼ tsunə ghəə ghən, ghə n ndow kaʼ ni dza kaabə tə̀ ghə̂ ghə ghəə ghey tsəndəghə zey mə dzanə tə̀ ghə kûm waa tii.

¹⁸Dzuu zə n ngii zum ghə̂ ghey adzəm ghə â zownə ghəə ghən ghə̂ a keyyə a tənjì ghey ghə â dzanə.

¹⁹Maria, n ney naŋŋə kə ghəə a tii ghə n fəŋ ə wi, moʼlə tənə tsə.

²⁰Sey ghə̂ a keyyə a tənjì ghey n nuu dzəŋŋə i ndòw, kɔʼlə ndow Kəzə̀, fuu kali u wi kuum ghəə ghey ghə â zownə. Sə̂ i koʼ ighələ tə tsəndəghə â dzanə.

²¹Ambə tsuʼu n tsəghə tsunə ifam, tsuʼ fə kpii tsunə ni faalə waa, ghə n tsə̀ tsu zəd i wi nə a loʼ Yeso. A n loʼ zəd zey tsəndəghə ə Kəzə̀ zey â fuunə nə̀ ghə ka kam bɔŋ wi.

²²Laŋ kə Mushi kə â dii tsu nə̀ abə ghə ji tsunə waa, bày waa ghi nay waa khə ni ndòw tə̀ ghə sòw ghə. Ambə Yosef ghi Maria mayyə tsunə ghəə zən, ghə n ney ndòw waa n Yerosalem ni ndòw dii wi n sə kə Bày.

²³Ghə â ndòw fu n təŋkey laŋ kə Bày kə â dii nə̀ “ghə khə ni fuu nuu ndòw waa u num u sə isə wə n wɔɔ K-a-zə̀.”

²⁴Ghə n ndòw soʼo ni fu maʼlə u Kəzə̀ ni luulə laŋ u Bày wey wə̀ â diinə nə “wù khə ni fu ufə̀ ubəghə nkee waa n təbuŋə nbəghə.”

²⁵Wù loʼ â loʼ fu n Yerosalem ghə â tɔŋŋənə nə̀ a loʼ Shimiɔŋ. Mû i wi zə n loʼ tsətsəghə n sə̂ K-a-zə̀. Tə n naŋŋə laŋ u Kəzə̀. Zay kə Zow kə n loʼ ghi wi. Tə n ləmmə tənə tsuʼ fey Zə̀ kə î bəghəshiənə ghə̂ ghə Izree ghə tii.

²⁶Zay kə Zow kə mâ dii tə̀ wi nə̀, tə nə̂ kpu way nə̀ tə ka koʼ Klisto wey Bày Tsuʼ naŋanə.

²⁷Zay kə Zow kə n ghəŋə nə̀ Shimiɔŋ nyi ndow n Ndaw Kəzə̀ i nii zə n Yerosalem. Ambə Maria ghi Yosef ney nyi bənə Yeso fu ni bə ghəŋə ghi wi nghee tə laŋ kə â diinə,

²⁸Shimiɔŋ n ney ndòw waa n kpii i wi, fu kali u Kəzə̀ dza,

²⁹“Bày, nya, wə loʼ ni ney ndòw mə wù kəfwaʼ wə̀ nə̀ ibuulə tə̀ wə â dza naŋanə,

³⁰kùmnə mə n koʼ bəghəshi wə n sə̂ zuŋ zə,

³¹tə̀ wə â bayyə naŋanə tə̀ ghə̂ a Təjuu ghə nsə ghə̂ ghən ghə way ghə̂ a Təjuu ghə ni kòʼ.

³²Tə loʼ tə a loʼ utsə̂ ni fu sə̂ a koʼo ghə tə ghə̂ ghən ghə way ghə̂ a Təjuu ghə tə ghə i khə wɔ, tə̀ i ney bə soʼo nkɔʼlə tə̀ ghə̂ ghə Izree ghə.”

³³Dzuu zə n ngii zum bày waa ghi nay waa nghee ghə zow tsunə ghəə ghey Simiɔŋ dzanə kùm waa ghə.

³⁴Sey Shimiɔŋ n buulə tsu ghə, dza ndòw tə̀ Maria nə̀, “waa wən, a tûm bə Kəzə̀. Bòʼ wi, ghə̂ a loʼ ghə î keeli tsɔɔmə i bəbə zə, a loʼ ghə i keeli ibəghəshi n naʼ zə Izree. Tə î loʼ tsəə ə Kəzə̀, seykə, ndəmə aghə̂ ghə i kɔɔbə wi,

³⁵sey tə i dii fuu moʼlə tey tə loʼnə n fə̀ŋ tə aghə̂. Chɔt u nə saw wɔ n fəŋ, u nə loʼ tə̀ ghə saw wɔ n kɔb.”

³⁶Tûm Kəzə̀ u zən u loʼ wə â loʼ soʼo fu, tɔŋŋə Anna waa Fanuel tə â shi n naʼ i Asha. Anna mâ ngii dən. Tə n loʼ nə tə mâ num ney, muu tsu ghi wi tənum təsəghəmbəghə, num wi n bə kpu tsu,

³⁷sey tə n loʼ wey kpusə. Tə â nya loʼ ghəm n tənûm ifam n nûmtə təkaykə. Tə n muu tsə kə n Ndaw Kəzə̀ i nii zə n Yerosalem, gɔŋŋə zeeli tsuʼ ndzəm; n tsə nsə n tsuʼu tə, bam idzuu, ngɔɔmə Kə̀zə̀ nəŋə tədzəm.

³⁸Nghee tə Maria ghi Yosef loʼnə fu ghi waa, Anna n bɔɔmə bə soʼo n nəŋə i tii zə, bə kaʼ ni fuu ukali tə̀ Zə̀ kə, khəə soʼo aghəə kùm Yeso tə̀ ghə̂ ghey adzəm ghə â ləmmənə bəghəshi ə Yerosalem.

³⁹Ambə Yosef ghi Maria màyyə kɔʼnə ghəə ghey ghə â khənə ni ghəŋə tə̀ laŋ kə Bày kə ləghənə, ghə n nuu dzəŋŋə ndòw n naʼa fə ghə n Nazaled n naʼ i Galili.

⁴⁰Waa tii n nyəmmə, taw, khə utɔb, Buulə i Kəzə̀ zə n loʼ i wi.

⁴¹Nùm tədzəm bày Yeso ghi nay wi ghə â bəghə ghə n ndòw tsə n Yerosalem ni ndòw zə Zə̂ kə taa zaʼa kə.

⁴²Ambə Yeso kùm tsunə nùm tə ighəm n nùmtə təbəghə ghə n ney kɔʼ ndòw ghi wi ni ndòw zə Zə̂ kə taa zaʼa kə tə ghə â ndow tsənə.

⁴³Ambə tsuʼu n Kəzə̀ n may tsunə, ghə n nuu dzəŋŋə bə, Yeso n kee doʼo səə tsu n Yerosalem nə bày ghi zə̂ ka keeli.

⁴⁴Ghə n bwey zeeli ndow moʼlə kə nə tə loʼ n fəŋŋə kə nɔɔ key kə â dzəŋi bənə. Sey, ghə n zey ni kəŋ wi n fəŋŋə kə awaazə a ghə nsə ghə̂ ghey ghə â muu dzəŋinə ghi ghə.

⁴⁵Ambə ghə kəŋ kìi tsunə wi, ghə n nuu dzəŋŋə ndòw n Yerosalem ni ndòw kəŋ wi.

⁴⁶Ambə tsuʼu n tsəghə tsunə ntəghə, ghə n bə koʼ bə wi n Ndaw Kəzə̀ i nii zə n Yerosalem. Tə n doʼ n fəŋŋə kə ghə̂ a dii ghə, zəllə ghəə ghey ghə khəənə, bəbə soʼo ghə n ghəə ghə.

⁴⁷Dzuu zə n ngii zum ghə̂ ghey adzəm ghə â zownə wi kùmnə tə â zowkeeli aghəə, nsə n ji zey tə â beelinə tii.

⁴⁸Ambə bày wi ghi nay wi koʼ tsunə wi, ghə i tii zə n tsəghəshi ghə. Nay wi n bəb ndòw tə̀ wi nə̀, “n waa, a loʼ kee wə ghəŋənə sa tə ghey ə? Mə ghi bày wə, n wɔ kuum kəŋ, fə̀ŋ tə mə baŋa ghey bòʼ wɔ.”

⁴⁹Tə n beeli ndow ghə dza, “ghaa mə kəŋə mə bòʼ kee? Ghaa mə khə way nə n mə khə ni loʼ n ndaw bày wùŋ ə?”

⁵⁰Ghə n ka buʼ zowkeeli ghəə ghey tə dzanə.

⁵¹Sey tə n nuu dzəŋŋə ndòw ghi ghə n Nazaled, zow tə ghə. Zə̂ n kee ney naŋŋə kə ghəə a tii ghə adzəm n fə̀ŋ ə wi.

⁵²Yeso n nyîmmə kɔʼɔ bə, nyîmmə kɔʼɔ bə soʼo nə utɔb, buulə i Kəzə̀ zə n loʼ ghi wi, buulə zə aghə̂ zə n loʼ soʼo ghi wi.