Read Weh Lukas 20 Bible Online

Lukas 20 - Weh bible

Lukas 20

¹Ambə n tsuʼ fə loʼ fə, Yeso n dii aghə̂ n Ndaw Kəzə̀ i nii zə n Yerosalem, naʼlə tûm i dzuŋu zə, ghə fɔɔngili a nii ghə nsə ghə̂ a dii ghə ulaŋ ghə n ngəd tə inaʼ tə n ndow bə fu,

²bəb tə wi nə̀, “Wə khə ndzoʼo daʼa kə ghaa kə ni ghəŋə ghəə ghən nə? A fu ndee wɔ n daʼa kə tii kə ə?”

³Tə n beeli ndow ghə nə̀, “N dza n bəb tsu dzə ghaa n ghə i loʼ zə. Ghaa beeli bə mə,

⁴mmuu n Kəzə̀ mən Jɔn a fu, â loʼ n daʼa kə ndee? Â loʼ n daʼa kə idəŋ kə mɔ â loʼ n daʼa kə aghə̂ ə?”

⁵Ghə n ghɔɔmə tsu n wù i ghə, dza, “Abə a dza tsu nə̀, nə â loʼ n daʼa kə idəŋ kə, tə i bəb tsu nə ghaa n ka bəghəm tə wi nə a loʼ kee?”

⁶Abə a dza ndow nə̀ â loʼ n daʼa kə aghə̂, ghə̂ ghən ghə i təmmə wey saa nə a tây, n təŋkey, ghə khənu nə Jɔn â loʼ tûm Kəzə̀.

⁷Sey ghə n dza ndow tə wi nə̀, “A khə dzə way luʼu key daʼa kə wi kə â nuu bənə tii.”

⁸Yeso n dza tə ghə nə̀, “N way soʼo ni dza tə ghaa luʼu key daʼa kuŋ kə nuu bə nə tii, tə mə ni ghəŋŋə ghəə ghən.”

⁹Tə n ndow n sə kə dza ndow zəzəə fə fənkəfən fən tə̀ ghə̂ ghə nə̀, “Wu loʼ â khə sûm u təlami, tə n tsoʼo naŋa ndow tə ghə̂ a loʼ ghə. Tə n bwey ndow n naʼ i loʼ zə, ndow ndəŋ doʼo tsu fu.

¹⁰Ambə nəŋə i təlami i kpi tsunə, tə n tûm ndow wù kəfwaʼ a wi, nə ghə fu bə tuʼ i lami tə wi, ghə n fəd kwu bwɔd tsu wi, dzùm dzəŋŋə bə wi n wɔɔ a zum ghə.

¹¹Tə n tûm kpiʼi ndow wù kəfwaʼ u loʼ wə. Ghə̂ ghey tə â tsoʼo naŋa sûm wə n wɔ ghə n bwɔd wi, lənnə tsu wi, tûm dzəŋŋə bə wi n wɔɔ a zum ghə.

¹²Tə tûm kpiʼi ndow wù kəfwaʼ u loʼ wə ni ghəŋŋə ndow aghə̂ atəghə, ghə n nam bwɔd wi, nyîmmə tsu wi, boʼo maʼa shi ndow wi.

¹³Sey mû usum wey n dza, ‘N baa loʼ ni ji ngee? N baa tûm ndow waa wùŋ wən N ngii ləghə, N moʼlə nə̀ ghə i tsəŋənu wi.’

¹⁴Ambə ghə koʼ tsu nə wi, ghə n ghɔɔmə tsu n wû i ghə dza nə̀, ‘À wən baa loʼ zəə kəbii, saa wey maʼa tsu wi tə a keeli sûm u tii wə.’

¹⁵Sey ghə n ney nuu shi bə wi nə usûm, ndow wey tsu wi.” Yeso n bəb ndow nya tə ghə nə̀, “Ghaa moʼlə nə̀ mû usum u tii wə i jiə ngee ghi ghə̂ ghən ə?”

¹⁶“N dza bə tə ghaa nə tə i bə wey maʼa ghə, tə ney sûm u tii wə, tə fu tə ghə̂ a nu ghə.” Ambə ghə̂ ghey zow tsu nə sey, ghə n dza nə̀, “I kə̂ Zə̀ kə i bəghəm nə ndzoʼo ghəə ghey shi koʼ.”

¹⁷Yeso n laalə ndow ghə nə asə̂, bəb ndow tə ghə nə̀, “Zuŋ key ghə tɔ̀ɔ naŋanə n màʼlə K-a-zə̀ nə̀, ‘Tay zey wù bəghə u təndaw wə â tuu maʼa nə̀, Zə n kəm bə doʼo nùm itây n tsə kə ndaw, loʼ nə ngee?’

¹⁸Wù wey tə i taŋŋə bwù nə n tây i tii zə, tə i doʼlə sad u sad. Abə wù wey tay zey zə i bwù tsu bə n kow wi, tay i tii zə i jim maʼa wi.”

¹⁹Ghə̂ a dii ghə ulaŋ ghə nsə ghə fɔɔngili a nii ghə n kəŋŋə ji ni kwu tən tsu Yeso n nəŋə i tii zə, n təŋkey ghə mâ zowkeeli nə̀ tə zəzəə fə fənkəfən fey a khəə kuum ghə, ghə n kee tsəŋə ghə̂ ghey fu.

²⁰Sey, ghə n khə tən isə̂ n kow Yeso, zuulə naŋa tsu aghə̂ nə ghə i tsilə bwey ghi Yeso tə a loʼ ghə̂ a wi. Ghə i zəllə ghɔɔmə i wi zə nə̀ tə nə kpaʼi dza ghə i bəbə i loʼ zə, tə ghə loʼ ni kwu wi, ghə fu tsəghə ndow wi tə Gɔvənɔ a Roma wey tə khə daʼa kə fu.

²¹Tsi tey n dza ndow tə Yeso nə̀, “Wu dii wə, a khənu nə ghɔɔmə zə nsə dii zə i bɔɔmə loʼ tən tsətsəghə. Wə saʼa nə̀ wə fu way tûm usə̂ wə tə wù loʼ, wə bɔɔmə dii kə isəŋə bòʼ ghəə ghən Zə̀ kə ləghə nə̀ ghə̂ a keeli.

²²Laŋ kə saa kə bəghəmnu nə saa i tsow màʼlə kə tə Kaysa mɔ kə ka bəghəm ə?”

²³Yeso n zowkeeli ndow nə̀ ghə sey dza i mɔm koʼ wi, tə n beeli ndow ghə nə̀,

²⁴“Dii bə na mə n khəə wey ghaa tsownə maʼlə kə a tii. À wən loʼ zəŋŋə kə ndee tii? À wən loʼ zəd i ndee tii?” Ghə n beeli kɔʼnə, “À loʼ zəŋŋə kə Kaysa nsə zəd i Kaysa zə.”

²⁵Yeso n dza ndow tə ghə nə̀, “Abə i loʼ nə sey, fu na fə kə Kaysa kə tə Kaysa, ghaa fu fə K-a-zə̀ tə Zə̀ kə.”

²⁶Sey ghə n way ni kwu wi n ghɔɔmɔ i wi, dzuu zə n zum daŋŋə ghə n ji zey tə â beelinə ghə tii, ghə n zow doʼo ndow mɔŋ.

²⁷Ghə̂ a Sadusi ghən ghə bəghəm nə̀ zhəm dzəŋŋə zə ivə i way, a loʼ ghə n ndow bə n səə Yeso dza tə wi nə̀,

²⁸“Wu dii wə, Mushi a tɔ̀ɔ naŋa laŋ wə tə ghey nə̀ abə wù kpu naŋa taʼanə wey, nə ghə khə way waa, waazə khə ni nyəŋə ndow weyzən wey, tə ghə loʼ ni jii bə waa n zəd i wù kpuu wey.

²⁹Waazə a num a loʼ ghə â loʼ tsənu, tow ghə usəghəmbəghə. U nyîmmə wey n ney kɔʼ wey, kpuu naŋa sə i tsu, nə tə ka waa jii.

³⁰U wey tə dzûmə ndownə wi n nyəŋŋə ndow weyzən wey, kpu tsu i soʼo nə̀ tə ka waa jii.

³¹U wey tə a dzûmə ndownə u tii wə n nyəŋŋə ndow soʼo, zə n nam doʼo ndow kə ighələ nə̀ tə ka jii waa, ghə n nyəŋŋə tsəghə kpii tsu weyzən wey ghə adzəm, a n nam loʼ kə ghə i mɔʼɔ zə.

³²Weyzən wey n baa bə kpuu tsu i soʼo

³³Nya, abə n tsuʼ fey ghə nə zhəm dzəŋŋə bənə nə ivə, weyzən wən nə baa loʼ wey ndee nghee tə tow ghə usəghəmbəghə a ney tsəghə kpi tsu nə wi ə?”

³⁴Yeso n beeli ndow ghə nə̀, “À may kə ghə̂ ghən n num tə tən ghə neynə wû zə.”

³⁵Abə ghə̂ ghey ghə kɔʼ kpiinə ni zhəm dzəŋŋə nə ivə nsə ni muu n mbi zey i nə bəghənə, ghə ney way wûzə.

³⁶Ghə loʼ tə a loʼ tsətəndəghə tə Kəzə̀, ghə way ni kəm kpuu, boʼnə ghə nya loʼ waa a Kəzə̀ nghee ghə zhəm dzəŋŋə dzə nə ivə.

³⁷Mushi mâ ndzəm dii nə̀ ghə̂ a kpuu a zhəm dzəŋŋənu, nghee tə â tɔŋŋənə Yawe nə̀ a loʼ Zə̀ kə Abraham, Zə̀ kə Ayzik nsə Zə̀ kə Yakɔb nghee Zə̀ kə â dii bə wû u wi wə n luʼu key vəllə wə bəʼlə nə fəkaʼ.

³⁸Tə loʼ Zə̀ kə ghə̂ ghey ghə loʼ utaw, a way dzə Zə̀ kə ghə̂ a kpu ghə, boʼnə aghə̂, adzəm tə wi loʼ utaw.

³⁹Sey ghə̂ a dii ghə ulaŋ a loʼ ghə n dza shi kɔʼ nə̀, “À loʼ isəŋə a wù dii wə, wə n dza dzɔb.”

⁴⁰Təŋkey ghə â tsəŋənu ni kəm bəb kpiʼi wi n ghə i loʼ zə.

⁴¹Yeso n dza tə ghə nə̀, “I loʼ n ngee ni doʼonə Klisto loʼ waa Devid ə?

⁴²Loʼ sey nə̀ Devid dza n maʼlə kə Salm nə̀, ‘Zə̀ kə â dza tə Mûkəbii wùŋ nə; Doʼo tsu fa n kpi wùŋ u təmə wə

⁴³tə N ney naŋŋə bə ghə̂ a təngəmə ghə n tənə fuu zə.’

⁴⁴Abə Devid a tɔŋɔnə wi nə a loʼ Mûkəbii, zə i sə kəm doʼlə ngee nə tə loʼ waa wi ə?”

⁴⁵Nghee tə ghə a zəllənə ghəə ghey Yeso ghɔɔmə nə̀, tə n dza ndow tə dzûmə tə wi tə nə.

⁴⁶“Ney na ghə̂mə zə ghi ghə̂ a dii ghə ulaŋ ghey ghə ləghə ni bwey kaabə nə̀ ghə n wû i lab nə təsaŋ, ləghə nə̀ ghə̂ ghə i tɔŋŋə zow bə ghə nə ingɔɔmə n bikiwən, ləghə ni doʼlə kə n kuu u səŋi wə n ndaw kədzəŋi ə ghə̂ a Təjuu nsə n luʼu tə Kəzə̀.

⁴⁷Ghə ləghə ni tsii ghey a kpusə ghə, ney nuulə fə u ghə, gɔŋŋə daabə ni maŋ dii iwû. Ndzoʼo ghə̂ ghən, saʼ i ghə zə i faalə nu.”