Read Weh Lukas 21 Bible Online

Lukas 21 - Weh bible

Lukas 21

¹Yeso n laalə koʼ ndow ghə̂ a kûm ghə, ghə a kuunə khəə K-a-zə̀ kə n Ndaw Kəzə̀ i nii zə n Yerosalem.

²Tə n kòʼ ndow soʼo wey kpusə u lòʼ wə tə kuu nyiə tsunə twɔlɔ mə nbəghə.

³Yeso n dza nə̀, “N dza bə isəŋə tə ghaa nə̀ wey kpusə u laa wən n kuu khəə K-a-zə̀ kə tsəghə shi aghə̂ adzəm fa.

⁴Təŋkey, ghə dzəə shiə bə fənyaŋi n ndəm zey ghə khənə. Weyzən wən n laa i wi zə, tə u kee fu may bənə nyaŋi fey tə mə khə ni muu tii.”

⁵Dzûmə tə Yeso tə lòʼ tə n ghɔɔmə kùm Ndaw Kəzə̀ i nii zə n Yerosalem. Ghə n kaali nghee tə ghə bɔm dzɔbnə Ndaw Kəzə̀ i nii zə n Yerosalem tii n tay a dzuŋu ghə nsə fə wey ghə â fəələ Zə̀ kə a tii. Yeso n dza,

⁶“Ghaa koʼonu fə u wən sa, nəŋə i bəghənu ghə nə beeli maʼa nə̀, itay imɔʼ nə ka kuulə doʼo n kow waazə.”

⁷Ghə n bəb ndow tə wi nə̀, “Wù dii wə, ghəə a tii ghə a nə ney zeeli bənə kə ə? Tsəə nə lòʼ kee ni dii tsu nə nəŋə i tii zə n kpii ə?”

⁸Yeso n beeli ndow ghə dza, “Ney na ghə̂mə zə kə̂ ghə nə nəbənə ghaa. Təŋkey ndəmə aghə̂ nə bəghənu n zəd zuŋ, ghə nə dza nə̀ ghə fwaʼa n daʼa kuŋ, ghə nə dza tə ghaa nə̀, ‘A loʼ mə wù wey ghə̂ a ləmmə nə̀, nəŋə zə n shɔd.’ Kə̂ ghaa nə dzûmə nə ghə.

⁹Kə̂ ghaa nə tsəŋənə bə ghaa zownə nə̀ tsam tə shiənu, ghə̂ ghə i zuulə baalənə wû i ghə zə nə inaʼ. Ghəə ghən a khə ni teeli shi dzə isə. Seykə, i sey dii dzə way nə nəŋə zə n shɔd tə mbi ni may.”

¹⁰Sey tə n tsəghə ndow n sə kə dza, “Naʼa tə nə zùulə baalə tûm tə, fɔɔ u nə zùulə baalə n wû i ghə.”

¹¹Ghəlitsə kə nə noʼlə faalə, dzəŋ nə lòʼ, dzaŋa tə nə kəmə, faalə tə aghəə nə tə ka kam shi koʼ koʼ tsə nə shiə, tsəə tə faalə tə nə dii n bikighow.

¹²Tə ghəə ghən ni bə shi, ghə nə̂ kwɔɔ ghaa, ghə nə̂ chɔd ghaa, ghə nə̂ fuu tsəghə ndow ghaa tə̀ ghə̂ ghey n ndaw tə udzəŋi u ghə̂ a təjuu nə ghə saʼ ghaa, ghə nə̂ kuu ghaa n ndaw tsaʼ. Ghə i ney bə ghaa n sə kə udəŋ nsə ghə̂ a saʼa ghə inaʼ ghə kùm zəd zuŋ.

¹³À nə lòʼ kəbùʼ tə ghaa ni təmi tiilə n tûm i dzuŋu zə.

¹⁴Sey, kə ghaa nə keelinə fəmmə zə n fə̀ŋ tə ghaa nə a i beeli ngee ghəə ghə?

¹⁵Boʼnə n nə fuu ghaa n ghɔɔmə i tii zə nsə tɔb wə n jìi zey ghə̂ a təngəmə a ghaa a nə way ni buʼ khə̂mə ghaa.

¹⁶A nə̂ ghaa fiilə fuu ghə bày a ghaa, waazə a ghaa, tyəm a ghaa nsə fə a ghaa. Ghə nə̂ wey ghaa a lòʼ ghə,

¹⁷ghə̂ adzəm nə̂ baa ghaa bòʼ mə.

¹⁸Wû u nyuŋ imɔʼ n tow kə ghaa nə kee nay way.

¹⁹Bə ghaa kwu tawwə tsunə fə̀ŋ tə, ghaa nə keeli ibəghəshi.

²⁰Yeso n ndow n sə kə dza nə̀, “Abə ghaa i koʼnə nə sawgoʼ tə dzəŋ tsəghə naŋa kɔʼnə Yerosalem, a nə sey loʼ nə̀ nəŋə i nya kpii bənu tə ghə ni ləŋi maʼa wi.

²¹Sey, ghə̂ ghey ghə i loʼnə n Judeya ghə i tyi kɔʼ ndow nə təkaʼa, a ghey ghə i loʼnə n fəŋ inaʼ, ghə i tsii shiə bə, a ghey ghə loʼnə bii, kə̂ ghə nə̂ nyiə dzəŋŋə bə nə inaʼ.

²²Təŋkey a wən loʼ nəŋə i zow i ngoʼ zə, ni luulə ghəə ghey ghə tɔ̀ɔ naŋanə n màʼlə K-a-zə̀.

²³Tsuʼu n tii n nə ngii faalənu n kow gheyzən ghey ghə loʼ nə nəghə mə awaa mə nsə gheyzən ghey ghə nyɔŋŋənə waa ghə, n təŋkey, chɔd wə i ngii loʼnu n mbi, ngoʼo Kəzə̀ nə lòʼ tə ghə̂ ghən.

²⁴Ghə nə weyyə aghə̂ nə təkɔb, ghə nə kwu nuu ndow ghə̂ a loʼ ghə tə a loʼ ghə̂ a ndaw tsaʼ n naʼa tə ghə̂ ghən ghə ka bəghəm tə̀ Zə̀ kə. Ghə̂ ghən ghə ka bəghəm tə̀ Zə̀ kə i chɔd Yerosalem ni ndow kùm n nəŋə zey Zə̀ kə bəghəm naŋanə.

²⁵Ghə̂ a nə koʼo tsəə tə faalə tə nə inyi, n ndzɔŋ nsə nə nsəghəbələ. A fa n ghəlikətsə, ngoʼ nsə tsəŋ i nə nyi nə tənaʼa bòʼ tuŋutuŋu tə nali kə dzuu, tə kwɔɔ bənə.

²⁶Ghə̂ a nə mbvuŋŋə bə n wɔ tsəŋ zə bòʼ tsəə tey ghə koʼonə tə shiənə n mbi. Təŋkey bikighow kə nə noʼlə nu nsə fə wey u loʼ nə fu tii udzəm.

²⁷Sey ghə nə daŋŋə kòʼ Waa wù sɔŋtsuʼ tə bəghənə nə təmbaʼ ghi daʼa kə səŋŋi kə nsə kɔʼlə mə.

²⁸Abə ghaa i koʼnə ghəə ghən a shiənə, ghaa i təmi kɔʼ nə ifuu, ghaa laalə kɔʼ ndow idəŋ, n təŋkey bəghəshi i ghaa zə n shɔd.”

²⁹Yeso n dza ndow zəzəə fə fənkəfən fən tə ghə nə̀, “Koʼo na nghee kaʼ fə fig nsə nkaʼ n loʼ mən ghəŋŋənə.

³⁰Abə n kaʼ tsunə ni zòw dzəŋŋə, a n daŋŋə keeli nə̀ ghow i dza i tsu fən.

³¹A lòʼ ighələ abə ghaa i koʼnə ghəə ghən a shiə nə̀, keeli tsu na nə fɔɔ u Kəzə̀ wə n shɔd.

³²N dza bə isəŋə tə ghaa nə ghə̂ ghən n num tə tən nə kpuu may way nə̀ ghəə ghən a ka shi.

³³Ghəlikətsə nsə dəŋ kə nə bə tsəghə nuulənu, ghɔɔmə zuŋ i nə tsəghə koʼ way.

³⁴Ney na ghə̂mə zə kə ghəə a zəə ghə, nsə ghəə a məə ghə nsə chɔd u mbi u nə ney nuulənə fə̀ŋ tə ghaa tə. Nə a way sey, tsuʼ fə tii fə nə bə nə̀ ghaa ka keeli.

³⁵Təŋkey wə i bəghə tə ghə̂ ghə adzəm fa n mbi.

³⁶Tɔʼɔ təmi taw tsu na, gɔŋŋə nəŋə tədzəm tə ghaa i keeli daʼa kə tii kə ni nɔb shi n ghəə ghən ghə i shiənə, sey ghaa i loʼ ni təmi n sə kə Waa wù sɔŋtsuʼ.”

³⁷N tsuʼu n tii mə, Yeso n dii zeeli ndow aghə̂ n Ndaw Kəzə̀ i nii zə n Yerosalem, à n bə n nəŋə i fənə tə, tə n ndow bweeli ndow n kaʼ u Olive.

³⁸Ndəmə aghə̂ n bədlə bəghə tsə n Ndaw Kəzə̀ i nii zə n Yerosalem ni bə zəllə ghɔɔmə i wi.