Read Weh Lukas 22 Bible Online

Lukas 22 - Weh bible

Lukas 22

¹Nəŋə i Kəzə̀ zey ghə â zəənə baa kə nə̀ ghə ka num tii kuu â nya kuʼlə bənu, tɔŋŋə Zə̂ kə taa zaʼa kə.

²Ghə fɔɔngili a nii ghə nsə ghə̂ a dii ghə ulaŋ ghə n kəŋə jii ni nyì wey Yeso, n təŋkey, ghə â tsəŋə ghaʼa aghə̂.

³Satan n nyi ndow n kow Judas ghə â tɔŋŋənə nə̀ a loʼ Iskariɔt, tə â loʼ tsəndəghə ə Yeso n tsəndəghə tə wi tey ighəm n ghii tə tə bəghə

⁴Sey Judas n ndow koʼ ndow ghə fɔɔngili a nii ghə nsə ghə̂ a kəfwaʼ a nii ghey n Ndaw Kəzə̀ i nii zə n Yerosalem ni saalə ghi ghə nghee tə i fiilə fuu Yeso tii.

⁵Ghə n ngii duʼlə ghi wi, bəghəm kɔʼ ni fu wi n khəə wə.

⁶Judas n bəghəm kɔʼ soʼo, zèy ndow ni kəŋ jìi zey tə i fiilə̀ fu shiənə Yeso tii nə̀ nɔɔ kə aghə̂ kə̂ ka keeli.

⁷Ambə n tsuʼ fey Zə̂ kə taa zaʼa kə bwù bweelinə tii, tsuʼ fey ghə weynə njì ə Zə̂ kə taa zaʼa kə tii ni fəələ umaʼlə,

⁸Yeso n tûm ndòw Pita ghi Jɔn isə dza, “Ndow khəələ na fəzəə u Zə̂ kə taa zaʼa kə tə̀ saa ni zə̂.”

⁹Ghə n bəb ndòw tə̀ wi nə̀, “Ghèy ndòw khəələ naŋa tsu ghee?”

¹⁰Yeso n dza ndòw tə̀ ghə nə̀, “Abə ghaa i nyi ndòwnə inaʼ, ghaa i kpiilə ghi wù tə boʼo keelinə tɔ̀ɔ mmuu, ghaa i dzûmə nyi ndòw wi n ndaw zey tə i nyiənə tii.

¹¹Ghaa i bəb ndow tə muu ndaw a wi nə̀, ‘Wù dii bəbə nə̀ dzuu i ndaw i wù bwey bə wə loʼ ghee fa tə n loʼ ni doʼo tsu tii ghi tsətəndəghə tuŋ tə ni zə̂ Zə̂ kə taa zaʼa kə ə?’

¹²Tə i dii ndòw ghaa n dzuu i ndaw i nii i loʼ zə n ndaw zey i doʼo kuulə kɔʼ ndow n tow kə ndaw nə̀ ghə n tɔ̀ʼ faalə̀, ghaa i bayyə naŋa tsu ndaw i tii zə.”

¹³Ghə n bɔɔmə ndow koʼ ndow kə ghəə a tii ghə tə̀ Yeso â dzanə, khəələ naŋa tsu ufəzəə ni zə̂ Zə̂ kə taa zaʼa kə.

¹⁴Ambə nəŋə i tii i kpii tsunə, Yeso n doʼo ndòw n bənə kə wi nə kəbaŋŋə ghi ngəd tə wi tə.

¹⁵Tə n dza ndòw tə̀ ghə nə̀, “Mə â ngii mbuŋŋənu ni zə̂ Zə̂ kə taa zaʼa kə kən ghi ghaa tə̀ n sə̂ kaʼ ni fəghə.

¹⁶Tə̀ n dza bə nə tə̀ ghaa nya, n nə̂ kə̀m way ni zə̂ kuulə zə̂ kən, a may kə nə zə̂ kə tii kə n doʼo may bə n fɔɔ u Kəzə̀.”

¹⁷Sey Yeso n ney kɔʼ wɔ̀ɔ n nlə mə tii, fu ndòw zɔ̀ŋə K-a-zə̀, dza, “Ney ndòw na, ghaa dzawwə ndòw n wû i ghaa.

¹⁸N dza bə tə̀ ghaa nə̀, ni kaʼ nuu tsu nya, mə̀ i kə̀m way ni mə nlə n mən, à may kə nə̀ fɔɔ u Kəzə̀ wə n bə.”

¹⁹Tə n ney kɔʼ kəbaa, fu ndòw zɔŋə K-a-zə̀, bòʼ i tsu, fu ndòw tə̀ ghə dza, “À wən loʼ wû wùŋ n fuunə bòʼ ghaa, ghaa khə ni ghəŋə ghəə ghən ni mòʼlə mə̀.”

²⁰Ambə ghə zə̂ may kɔʼnə, tə n ney pkiʼi kɔʼ wɔɔ nlə, fu ndow tə ghə dza, “Wɔɔ nlə zən loʼ nkaa n fəghə mə ghaa zəə ghi Zə̀ kə n kaŋ tuŋ n fəələnə bòʼ ghaa.[3]

²¹A kee loʼ nə̀, wù wey tə təminə tsə̀m n tòw kuŋ loʼ fa ghi mə̀ nə kəbaŋŋə.

²²Waa wù sɔŋtsuʼ î kpuunu tə̀ Zə̀ kə â dza zey. Ngoʼ i faalə i kee loʼ tə̀ wù wey tə təminə tsə̀m n tow kə wi.”

²³Ghə n kaʼ ni bəb n wû i ghə nə a loʼ ndee tə lòʼnə ni ghəŋə ndzoʼo ghəə ghən sa.

²⁴Ngəd tə Yeso tə n kaʼ ni baŋŋə təfəghəm n wû i ghə ni koʼ nə̀ a loʼ ndee tə kpiinə ni doʼo kətòw ə.

²⁵Yeso n dza ndow tə̀ ghə nə̀, “Də̀ŋ u naʼa tə ghə̂ ghən ghə ka bəghəm tə̀ Zə̀ kə, kwɔɔ keeli ghə̂ a ghə n wɔɔ a taw ghə, ghə̂ ghey ghə saʼanə ghə̂ a tətûm a tii ghə a ləghə nə̀ ghə i kali bə ghə nə ghə loʼ ghə̂ a dzuŋu ghə.

²⁶À wən way dzə nghee doʼo i ghaa i khənə ni loʼ tii. I kee loʼ nə̀, wù wey tə lòʼnə tə a loʼ kətow n fəŋŋə kə ghaa khə ni teeli zuŋ wû wi tə a loʼ winətəghə nsə nə wù wey tə dza i doʼo kətow n fəŋŋə kə ghaa khə ni teeli loʼ tə a loʼ wù kəfwaʼ tə ghaa adzəm.

²⁷À lòʼ ndee wù kətow n ghə̂ ghən abəghə ə? Wù wey tə doʼo tsu n bənə kə zəə kə ghə a tsəʼlə bə wi n fəzəə wə mɔɔ wù wey tə tsəʼlə fu nə fəzəə wə ə? N dza a mgbaŋ loʼ wù wey tə doʼnə zəə ə? À wey loʼ ghə i tii zə n lòʼ ghi ghaa tə a loʼ wù kəfwaʼ.

²⁸Ghaa n doʼo kɔʼ bə ghi mə n tsuʼu mən ndzəm ghə â mɔmmə koʼonə mə.

²⁹Ighələ tə̀ Bày wùŋ fuunə mə̀ n daʼa kə ni saʼ tə a loʼ kədəŋ, mə̀ i fuu soʼonu ghaa n daʼa kə nə ghaa i saʼ tə a loʼ udəŋ.

³⁰Sey nə̀ ghaa i loʼ ghi mə̀ n baŋŋə kuŋ, n fɔɔ wùŋ, ghaa i zəə, ghaa i məə, ghaa doʼo ndow n kuu u təfɔɔ ni saʼ naʼa tə Izree tən ighəm n ghii tə təbəghə.”

³¹Shimun, Shimun, zow, Satan n daʼa kə nɔɔ ni mɔɔmə koʼ ghaa adzəm, tə̀ tə tsàʼ shi bə ghə̂ a loʼ ghə, tə wù nə tsaʼanə fuŋ mə.

³²“À kee lòʼnə mə̀ n gɔŋŋə tə wɔ a Shimun, nə khə bəghəm i fə̀ŋ zə i nə buu doʼonə, abə wə̀ i təmi dzəŋŋə bənə, wə̀ i gàamə̀ soʼo waazə ghə.”

³³Pita n dza ndow tə wi nə̀, “Bày, n bəghəmnu ni ndòw n ndàw tsaʼ ghi wɔ, n buʼ kpu soʼo ghi wɔ.”

³⁴Yeso n beeli ndow wi nə̀, “Pita, n dza n dza bə tə wɔ nə̀, mwaʼ kə î tɔ̀ŋ way na n tsuʼu tə nə̀ wə ka mə̀ tuu màʼa tənə̀ŋə̀ tə tə̀ghə̀.”

³⁵Yeso n bəb ndow tə̀ tsətəndəghə tə wi tə nə̀, “Nghee tə mə â tûm shinə ghaa nə̀ ghaa khə way mbəghə kə ukhəə kə, təgow, nkee kəmbəghə, ghaa â kpaʼi laʼ kìinu fə kə ə?” Ghə n beeli kɔʼ nə̀, “ghey ka fə kə làʼ kìi dzə.”

³⁶Yeso n dza ndow tə ghə nə̀, “Nya, wù wey tə khənə mbəghə fə ukhəə fə, nkee mbəghə kə loʼ kə, tə khə ni ney kɔʼ. Wù wey tə khə way kɔb, tə khə ni fìi tsu ndzə tə wi, tə zuu kɔʼ.

³⁷Kùm nə nəŋə zə n kpi tə ghə zey i tɔ̀ɔ doʼo n màʼlə K-a-zə̀ bòʼ mə nə̀, ‘Ghə â təm naŋa dzəŋi wi ghi ghə̂ a bəbə ghə’ ni ney kəbənə. Boʼnə, ghə zey i tɔ̀ɔ doʼonə n màʼlə K-a-zə̀ bòʼ mə̀ khə ni kuʼlə bə shi.”

³⁸Tsətəndəghə tə wi tə n dza tə̀ wi nə̀, “Bày, Kɔb tə lòʼ fa təbəghə.” Tə n dza ndòw tə̀ ghə nə̀, “Tə tey tə n kpi.”

³⁹Sey, Yeso n nuu tsu inaʼ, kɔʼ ndòw n kàʼ u Olif nsə tsətəndəghə tə wi tə tə̀ tə â ghəŋŋə tsənə.

⁴⁰Ambə ghə kɔʼ kùm tsunə fu, tə n dza tə̀ ghə nə̀, “I gɔŋŋə ndòw na, kə ghaa nə bwù n ghəə a bəbə ghə.”

⁴¹Tə n zə̀ghə̀ tsu ghə, nyaʼi səŋŋə ndòw n ghab kə. Tə n nyaʼa tsu nə anyi, zey ndòw ni gɔŋŋə nə̀,

⁴²“Bày abə wə ləghə nə̀, ney nuu wɔ̀ɔ uchɔd zən n wɔ̀ mə̀. Ghəŋŋə kə ghəə zey wə ləghənə n kow mə, a way dzə i zey n ləghənə.”

⁴³Tsəndəghə ə Kəzə̀ n təmi bə n sə̀ə wi, fu wi n daʼa kə.

⁴⁴Tə n baa ndeemi nyi ndow uwû ni gɔŋŋə, ghəə a tii ghə n ngii dədlə wi n fə̀ŋ sa, zuʼlə n wi mə n chim tsu aghəd tə̀ a loʼ təkaŋ[4]

⁴⁵Ambə tə gɔŋŋə may tsunə, tə n dzəŋŋə ndow n səə tsətəndəghə tə wi tə, ndow koʼ ndow nə̀ ghə n bwù nyi ndow bweeli tə n wɔ mow zə.

⁴⁶Tə n bəb ndòw tə ghə nə̀, “Ghaa bweeli kee, nuu kɔʼ na nə u gɔŋŋə wə, kə ghaa nə bwù n ghəə a bəbə ghə.”

⁴⁷Nghee tə̀ Yeso nam ghɔɔmə nə̀, nɔ̂ɔ kə aghə̂ kə n fuŋ təmi bə, nə a ney bə Judas tə â loʼnə wù umɔʼ n dzûmə tə Klisto tey ighəm n ghii tə təbəghə. Tə səŋ təmi ndow n səə Yeso dza i maŋə keeli ndow wi.

⁴⁸Yeso n bəb ndòw tə wi nə̀, Judas, a loʼ n maŋə keeli zən wə dza i ney fii Waa wù sɔŋtsuʼ ə?

⁴⁹Ambə dzûmə tə Klisto tə loʼ tən koʼ tsunə nə̀ ghə i dza i shi, ghə n bəb ndòw tə Yeso nə̀, “Mûkəbii, ghey sɔŋ kɔʼ kɔb tə ghey ni zûu ghi ghə̂ ghən ə?”

⁵⁰Wù umɔ̀ʼ ə ghə n daŋŋə sɔŋ kɔʼ kɔb ə wi, tsɔɔ khə̀ə tsu tuŋə kə zəə kə wù kəfwaʼ a fɔɔngili u nii nii wə.

⁵¹Ambə Yeso koʼ tsunə sey, tə n dza, zə n kpii sey. Tə n mɔm ndòw tuŋə kə wi, kə n taw doʼo i bə.

⁵²Sey, Yeso n bəb ndòw tə ghə fɔɔngili a nii ghey, ghə̂ a nii ghey n Ndaw Kəzə̀ i nii zə n Yerosalem, nsə ngəd tə inaʼ tey ghə â bənə ni bə kwu wi nə̀, “N loʼ wù tsɔŋɔ ɔ? Ghaa sə shi bənə n kɔb tə nsə mbaŋ tə ni bə kwu mə ə?

⁵³Mə̀ â mgbaŋ loʼ tsə ghi ghaa n Ndaw Kəzə̀ i nii zə n Yerosalem tsuʼu ndzəm ghaa n way ni kwu mə. À wən kee loʼ nəŋə i ghaa ni kwu mə, n təŋkey, a loʼ nəŋə zey daʼa kə avəətsəə kə fwaʼanə.”

⁵⁴Sey ghə n kwu kɔʼ Yeso ney nuu ndòw ghi wi n ndaw fɔɔngili u nii nii wə. Pita n kee tsiilə̀ dzûmə ndow ibam.

⁵⁵Ambə ghə faalə kɔʼnə vəllə wə n fəŋ ə Kəbii, doʼo dzəŋ tsəghə ndòw tii nə u zɔy wə, Pita n bə təmdzəŋi bə ghə.

⁵⁶Waa u zən u loʼ wə n loʼ fu nə a loʼ wù kəfwaʼ. Ambə tə koʼ ndòwnə Pita, tə n tɔ̀ʼ fwɔ̀t kə wi sa, dza, “N dza wù wən â loʼ dzəŋi ghi Yeso.”

⁵⁷Pita n tɔ̀ʼ tuu dza, “Iwaa, n buʼ khə dzə way wi.”

⁵⁸Ghab kə n ka shi, wù lòʼ n kəm koʼ tsu Pita dza, “N dza wə â loʼ soʼo i ghə.” Pita n dza, “Mbwɔ, n way dzə ghi ghə.”

⁵⁹Ambə nəŋŋə zə izow i tsəghə tsu nə imɔʼ, wù loʼ n tɔʼɔ dza kə nə̀, “Wù wən â ndzəm loʼ ghi wi, n təŋkey, tə loʼ wù Galili.”

⁶⁰Pita n beeli ndòw wi dza, “Mbwɔ n khə dzə way ghə zey wə dzanə.” Nghee tə nam ghɔɔmənə mwaʼ kə n tɔŋ i tsu.

⁶¹Mûkəbii n khəəmə laalə ndòw Pita, Pita n daŋŋə taa moʼlə bə ghə zey Mûkəbii â dzanə tə wi nə̀, “tə mwaʼ kə ni tɔŋ na, a i loʼ nə wə n mə tuu maʼa tənəŋə tətəghə.”

⁶²Pita n nuu shi ndòw a bii, ndòw dey dzɔb i tsu.

⁶³Ghə̂ ghey ghə â keyyənə Yeso n kaʼ ni tsayyə wi, bwɔdlə soʼo wi.

⁶⁴Ghə n kow naŋa tsu sə a wi bwɔdlə wi dza, “Suŋ wù wey tə bwɔd nə wɔ̀ nya.”

⁶⁵Ghə n nyɔʼi khəə ndəmə ghəə a tsayyə ghə tə wi.

⁶⁶Ambə tsuʼ u zow tsunə, ngəd tə inaʼ, nsə ghə fɔɔngili a nii ghə, nsə ghə̂ a dii ghə ulaŋ ghə n dzəŋi i bə, ney bə Yeso n tay i saʼ i ghə.

⁶⁷Sey, ghə n bəb tə wi nə̀, “Dza bə tə ghey na, a ndzəm loʼ wɔ wù wən Zə̀ kə â dza naŋa nə̀ i tûm bənu ə?” Yeso n fəd beeli ndòw ghə dza, “Abə n dza bə nə̀, ghaa i bəghəm way.”

⁶⁸Seykə, abə n bəb bə nə ghaa n ghə zə, ghaa i way ni beeli.

⁶⁹“Ni nuu tsu nya, ndòw isə̂, Waa wù sɔŋtsuʼ î doʼlə n kpii u Kəzə̀ u təmə wə tə loʼnə zaamə mbi.”

⁷⁰Ghə n dzəŋi fuʼ bəb ndow tə wi nə̀, “wə fey nya dza wə loʼ waa Kəzə̀ ə?” Tə n beeli ndòw ghə nə̀, “À loʼ sey tə ghaa dzanə.”

⁷¹Sey ghə n dza nə̀, “Saa kəm ləmmə təmi tiilə i ghaa zə, saa adzəm a mgbaŋ zow ghə zey tə dzanə.”