Read Weh Lukas 24 Bible Online

Lukas 24 - Weh bible

Lukas 24

¹Ambə n dzəmə tsuʼ inaʼ, gheyzən ghey n key kɔʼ utsuʼ, ney kɔʼ mmbvə n ləmmə mey ghə â bayyə naŋa nə̀, ndow n ghii mə n say i Yeso.

²Ghə n ndòw koʼ tsu nə ghə mâ bəŋŋə nuu tay i nii zey zə â fii naŋanə dzuu zə isay zə tii.

³Ghə nyi daŋŋə ndòw fu, ka koʼ vən i Mûkəbii Yeso.

⁴Nghee tə̀ ghə teynə fu, məʼlə ghə zey i shinə, aghə̂ abəghə ghə n maŋ bən shi kɔʼ n səə ghə n ndzə tə fəmə nyiələ tə.

⁵Ghə n taa tsəŋ, kùm naŋa tsu tow u ghə aghəd. Ghə̂ a tii ghə n bəb tə̀ ghə nə̀, “A loʼ kee ghaa kəŋə bənə wù nə tə loʼ utaw n fəŋŋə kə ghə̂ a kpuu ghə ə?

⁶Tə way fa, tə n zhim nə̀ ivə. Ghaa moʼlə kənu ghəə ghey tə â dza nə̀ n nəŋə zey tə â nam loʼnə ghi ghaa n Galili ə?

⁷Tə â dza nə̀ ‘Ghə khə ni teeli fu ndòw Waa wù sɔŋtsuʼ n wɔɔ kə ghə̂ a bəbə ghə, ghə i baa wi n zat kə fəkaʼ, nə ntsuʼu ntəghə tə i kəm zhim dzəŋi bə.’”

⁸Ghə n daŋŋə moʼlə bə ghɔɔmə i Yeso.

⁹Ambə ghə nuu tsu fu nə isay, dzəŋŋə ndòw inaʼ, ndòw naʼa ndòw ghəə a tii ghə tə̀ ngəd tə Yeso tey ighəm n ghii zə imɔʼ nsə dzûmə tə loʼ tey tədzəm.

¹⁰Gheyzən ghey ghə â bə naʼanə ghəə ghən tə̀ ngəd tə Yeso tə â loʼ Maria ə Maʼdala, Joana, Maria nay Jems ghi gheyzən a loʼ ghə.

¹¹Ghɔɔmə̀ i tii zə n loʼ tə̀ a loʼ ghɔɔmə̀ i zum zə tə̀ ngəd tə Yeso tə, ghə n way ni bəghəm.

¹²[Pita n fəd nuu kɔʼ, nyəŋ ndòw fu tii nə isay, gham tsu, laalə nyi ndòw, koʼ ndòw kə ndzə tey ghə â baŋnə Yeso tii, ka kee koʼ vən i wi. Tə n nuu dzəŋŋə ndòw ibam, məʼlə kìi ghə zey i baa shinə.]

¹³N tsuʼ fə tii fə kələ, dzûmə tə Klisto tə loʼ tə təbəghə, n bweyyə ndòw n naʼa fə loʼ fə ghə â tɔŋŋənə nə̀ a loʼ Emayɔs. Ghab kə jii kə tii kə ni nuu tsu n Yerosalem n loʼ tə̀ a loʼ tam tə jii ighəm n ghii zə imɔʼ.

¹⁴Nghee tə̀ ghə ndownə, ghə n khəə ndòw aghəə kûm ghəə ghey a kuʼlə shinə n Yerosalem.

¹⁵Nghee tə̀ ghə khəə ndòwnə ghəə ghə, Yeso n kwɔɔlə bə ghə, bwey dzəŋi ndow ghi ghə.

¹⁶Zə̀ kə n kee ghəŋə tsu nə̀ ghə ka koʼ keeli nə̀ a loʼ wi.

¹⁷Yeso n bəb ndòw tə̀ ghə nə̀, “Ghaa baa bwey ghɔɔmə bə kə kee n jii n wû i ghaa a?” Ghə n təmi tsu, maŋ tey n koʼ tə dədlə tə.

¹⁸Wù ghə umɔʼ ghə â tɔŋŋənə nə̀ a loʼ Klopas n beeli dza ndòw tə̀ Yeso nə̀, “Wə̀ bwey nyi bənu n Yerosalem ə? Wə̀ sə khə way ghəə ghey a shiənə fu n ntsuʼu n mən ə?”

¹⁹Tə n bəb ndòw tə̀ ghə nə̀, “Ghəə a ghaa ghə?” Ghə n dza, “Ghəə ghən ghə â shinə kûm Yeso wù Nazaled wən tə â loʼnə tûm Kəzə̀. Ghəə ghey tə â ghəŋŋə nə̀ nsə ghəə ghey tə â khəə n loʼ n zən kə n sə kə aghə̂ nsə n sə̂ K-a-zə̀.

²⁰Ghə fɔɔngili a nii ghə nsə ngəd tə inaʼ tə ghey tə n ney fu nuu ndòw wi nə ghə tsəʼlə saʼ ni wey wi. Ghə n baa tsu wi n zat kə fəkaʼ.

²¹Ghey â moʼlə tənə nə a i loʼ wi tə i kuum shiənə naʼ zə Izree zə. Ghə zey i tsəghəshiənə ghey loʼ nə̀, a naa ghəŋŋə ndow ntsuʼu ntəghə tə ghəə ghən ghə â shinə.

²²Ghə zey i baa zumnə ghey n dzuu zə tsəghə shi aghəə adzəm loʼ nə, gheyzən a ghey a loʼ a mə bəd ndow na n say i wi,

²³ghə u bə dza bə nə̀, ghə mə ka koʼ dzə vən Yeso zə. Ghə u koʼ tsunə tsətəndəghə tə Kəzə̀ tə, tə u dza bənə tə̀ ghə nə Yeso loʼ utaw.

²⁴Sey, ghə̂ a ghey a loʼ ghə u nyəŋ ndòwnə fu nə isay, bɔɔmə ndòw koʼ ndow kə nghee tə gheyzən ghey mə dzanə, ka kee koʼ wi.”

²⁵Yeso sey dzanu tə̀ ghə nə̀, “Ghə̂ a laʼlə! I sa tsəghəshiə ghaa ni keeli fə̀ŋ ni bəghəm ghəə ghey tûm tə Kəzə̀ tə â tɔ̀ɔ naŋanə ə?

²⁶N dza i mâ dii may nə̀ Wù wən Zə̀ kə â dza naŋa nə̀ i tûm bənu î khə ni koʼ ndəmə uchɔd tə̀ wi ni kəm ndòw dzəŋŋə n nkɔʼlə n wi ə?”

²⁷Sey, ni zey tsu n laŋ wey Mushi â tɔ̀ɔ naŋa nə̀, ney may bə tûm tə Kəzə̀ tədzəm, tə n tiilə kɔʼ bə ghəə ghey ghə â tɔ̀ɔ naŋŋənə n màʼlə K-a-zə̀ kûm wi.

²⁸Nghee tə ghə kuʼlə may ndòwnə naʼ zey ghə â ndòwnə tii, Yeso n ghəŋə tə̀ tə tsəghə daŋŋənu.

²⁹Ghə n buʼ wi n wɔɔ kə dza, “Tsuʼ wə n dzə̂ may, bəŋ bweeli kɔʼ ghi ghey, n təŋkey, nəŋŋə zə n ndow, tsuʼ u nya dzəə bənu.” Sey, tə n dzûmə ndòw ghə.

³⁰Ambə ghə doʼo tsunə ni zə̂, Yeso n ney kɔʼ kəbaa, buulə tsu, bòʼ fu tsəghə ndòw tə̀ ghə.

³¹Nghee tə̀ tə fu tsəghə ndownə, Zə̀ kə n ghəŋə nə̀ ghə koʼ keeli ndòw wi, tə n daŋŋə nuu saŋtsu.

³²Ghə n ghɔɔmə tiilə n wû i ghə dza, “N dza fə̀ŋ tə saa tə mə duʼlənu nghee tə mə ghɔɔmə bəghənə ghi saa n jii, tiilə dza bə ghəə ghey a loʼnə n màʼlə K-a-zə̀ ə?”

³³Ghə n nuu kɔʼ kə n nəŋə i tii zə, nuu dzəŋŋə ndòw n Yerosalem, ndòw koʼ ndòw dzûmə tə wi tey ighəm nsə ghii zə imɔʼ ghi ghə̂ a loʼ tə ghə zuŋŋə doʼnə n luʼu kəmɔʼ.

³⁴Dzûmə tey n dza bə tə̀ ghə nə̀, “Ndzəm, ndzəm, Mûkəbii n zhəm nə ivə. Tə ma dii wû u wi wə̀ tə̀ Shimun.”

³⁵Dzûmə tey təbəghə n dza ndòw soʼo ghəə ghey a mə shinə ghi ghə n jii, nsə nghee ghə mə koʼ keeli ndòwnə wi n nəŋə zey tə dzawnə fəzəə wə.

³⁶Nghee tə̀ ghə ghɔɔmənə, Yeso n wû u wi wə n təmi bə fu n fəŋŋə kə ghə, tə n tɔŋŋə zow ndòw ghə dza, “buulə i loʼ ghi ghaa.”

³⁷Ghə n taa tsəŋ, moʼlə kə nə ghə sey koʼ avəətsəə.

³⁸Tə n bəb ndòw tə̀ ghə nə̀, “À loʼ kee ghaa tsəŋə nə ə? À loʼ kee ghaa khə way bəghəm zə n fə̀ŋ tə ghaa a?

³⁹Koʼo na wɔ ghuŋ ghə nsə ghôw ghuŋ ghə, a loʼ mə. Mɔm bə na mə. Vəətsəə a khə dzə way wû wə sa tə̀ ghaa koʼo bənə.”

⁴⁰[Ambə tə dza tsu nə sey, tə n dii ndòw ghə n wɔɔ a wi ghə, nsə ghôw a wi ghə.]

⁴¹Ghə n ngii khə iduʼlə n fəŋ, kee nam way ni bəghəm ghə i tii zə, sey, tə n bəb ndòw tə̀ ghə nə̀, “Ghaa khə way fə kə zəə kə fa ə?”

⁴²Ghə n fu ndòw wi n tɔŋ kə itsəghə kə kuulə kə.

⁴³Tə n ney fə i ndòw n sə̂ kə ghə.

⁴⁴Sey tə n dza ndòw tə̀ ghə nə̀, “À wən loʼ ghəə ghey mə â dza naŋanə tə̀ ghaa n nəŋə zey mə â nam loʼnə ghi ghaa nə̀, aghəə adzəm khə ni bə doʼo tə̀ ghə â tɔ̀ɔ naŋanə kûm mə n laŋ u Mushi, ghəə ghey tûm tə Kəzə̀ tə̀ â naʼanə, nsə n maʼlə kə Sams.”

⁴⁵Tə n chi kɔʼ tɔb u ghə tə̀ ghə zowkeeli tsu ghɔɔmə i Kəzə̀.

⁴⁶Tə n dza tə̀ ghə nə̀, “Ghə tɔ̀ɔ naŋa n màʼlə K-a-zə̀ nə̀ wù wən Zə̀ kə â dza naŋa nə̀ i tûm bənu, teeli khə ni koʼ uchɔd, ghə i wey wi, tə i zhəm dzəŋŋə bə nə ivə n bam zə ntsuʼu ntəghə.

⁴⁷Nsə nə ghaa naʼa tûm i dzuŋu zə n zəd i Yeso n badla tə mbi tədzəm nə ghə̂ a kweyyə nuu bə fə̀ŋ tə ghə n ghəə a bəbə ghə tə Zə̀ kə neyzəə bəb i ghə, ni zey tsu n Yerosalem, kuum ndow n badla tə mbi tədzəm.

⁴⁸Ghaa loʼ ghə təmi tiilə n ghəə ghən adzəm.

⁴⁹Sey, abə n ndownə, mə i tûm bə wù wey Bày wùŋ idəŋ â dza naŋanə tə̀ ghaa. Sey, ghaa khə ni doʼo ləmə n naʼ i Yerosalem tə daʼa K-a-zə̀ kə tsu bə n kow ghaa.”

⁵⁰Ambə tə ghɔɔmə may tsunə, tə n ney kɔʼ ghə n Yerosalem, nuu ndòw ghi ghə n naʼ i Betani, tə ney shi kɔʼ wɔɔ a wi idəŋ, buulə tsu ghə.

⁵¹Nghee tə̀ tə buulənə ghə, tə n zəghə tsu ghə, Zə̀ kə n ney nuu kɔʼ ndòw wi idəŋ.

⁵²Ghə n ngɔɔmə wi, nuu dzəŋŋə ndòw n Yerosalem n duʼlə i nii zə.

⁵³Ghə n ndow n Ndaw Kəzə̀ i nii zə n Yerosalem tsuʼu ndzəm, ghə ndow fuunə kɔʼlə mə tə̀ Zə̀ kə.