Read Weh Lukas 3 Bible Online

Lukas 3 - Weh bible

Lukas 3

¹Â loʼ tənùm ighəm n num tə tətaa tə̀ Tiberia loʼnə Kaysa n naʼ i Roma, Zə̀ kə n fuu tsu tûm tə Jɔn waa Zakalia nə tə loʼ n mbvənə ntsaŋ. N tsuʼu n tii mə Pontus Pilato n loʼ Gɔvənɔ n Judeya. Helɔd n saʼa naʼ i Galili. Waa bày wi Filip n saʼa naʼa tə Ituriya nsə Trakonitis. Lysanias n kee saʼa naʼ i Abilene. A n loʼ soʼo nə Anas ghi Kayfas ghə loʼ ghə fɔɔngili a nii nii ghə.

³Sey, Jɔn n bwey tsəghə ndòw naʼa tey tə â loʼnə n bad kə inaʼ key dzuu Jodan â loʼnə tii. Tə naʼlə kaabə ndòw tûm ə Kəzə̀ nə̀, ghə̀ a khə ni kweyyə fə̀ŋ tə ghə, ghə ney mmuu n Kəzə̀, tə̀ Zə̀ kə neyzəə ghəə a ghə a bəbə ghə.

⁴Ghəə ghən ghə â shi ighələ tə i loʼnə n maʼlə Ayzaya, wù tûm Kəzə̀ nə̀, “dzə̀ shiə bə n mvənə ntsaŋ dza, ‘bayyə naŋa tsu jii tə Bày, ghəŋə tsu na jii tə wi tə i doʼo tsətsəghə.

⁵Wad tə nə gəmmə iwû. Təkaʼa nsə nguʼu wə, u nə naŋŋə. Ngɔli u tə jii u nə naalə doʼo bə tsətsəghə, jii tə bəbə tə i kɔŋi soʼo iwû,

⁶sey ghə̂ a mbi adzəm i koʼ nghee tə Zə̀ kə bəghəshiənə ghə̂ ghə tii.’”

⁷Nɔɔ kə aghə̂ kə bə n səə Jɔn ni bə ney mmuu n Kəzə̀. Tə n dza ndòw tə̀ ghə nə̀, “Zuu tən! À ghaa tsiəllə ndee nə ghaa tsi ngoʼo Kəzə̀ zən i bəghənə?

⁸Mə̂ bə na tam u dzuŋu wə ni dii nə̀ ghaa n kùm kwey fə̀ŋ tə ghaa tə. Kə ghaa nə dzanə n wû i ghaa nə̀, ‘Abraham loʼ bày ghey u wey wə.’ Təŋkey n kûm dza bə tə̀ ghaa nə̀ Zə̀ kə loʼ ni buʼ fəd tay ghən tə̀ a doʼo waa ghə Abraham.

⁹Fôw i loʼ tən n key i fəkaʼ. Abə kaʼ fə məə way tam u dzuŋu wə, ghə i fùŋ maʼa, ghə maʼa ndòw nə uvəllə.”

¹⁰Ghə̂ ghə n bəb ndòw tə̀ wi nə̀, “a nya khə ni ji ngee?”

¹¹Tə n beeli ndòw ghə dza, “abə wù khənə ndzə tə təbəghə, tə n fu ndòw wù wey tə khə way ndzə imɔʼ. Abə wù khənə fəzəə wə, tə n dzaw fu ndòw wù wey tə khə way.”

¹²Ghə̂ a kwɔ a màʼlə kə tsow kə n bə soʼo ni bə ney mmuu n Kəzə̀. Ghə n bəb tə̀ wi nə̀ “wù dii wə, a nya khə ni ji ngee?”

¹³Tə n dza ndòw ghə nə̀, “ka ney tsəghə shi dzə tsòw ə Kəmaʼlə tə̀ laŋ kə diinə.”

¹⁴Sawgoʼ tə loʼ tə n ndòw bə soʼo, bəb tə̀ wi nə̀, “abə ghey, ghey nya khə ni ji ngee?” Tə n beeli ndòw ghə nə̀, “kə ghaa nə̂ neynə khəə wə n wɔ̂ wù nə kədaʼa. Kə ghaa nə̂ kwɔɔ soʼonə wù nə ighəə nə a way isəŋə. Ghaa i duʼlə n khəə wey ghə tsə̀ənə ghaa tii.”

¹⁵Ghə̂ ghə n məʼlə n fə̀ŋ tə ghə nə Jɔn wən sə̀ loʼ Klisto wey Zə̀ kə Tsuʼnə a ləmənə mɔ?

¹⁶Jɔn n beeli ndòw ghə adzəm dza, “mə, n fuu ghaa n Mmuu n Kəzə̀ mə nə n mmuu, wù loʼ bəghənu, tə tsə̀ghə̀shinə mə. N ka buʼ kɔʼ kpii dzə ni zii baʼ u təgow u wi. Tə i bəghə fuu ghaa n Mmuu n Kəzə̀ mə n daʼa kə Zay kə Zow kə nsə nə uvəllə.

¹⁷Tə khə tən neeli kə wi n wɔ ni fəəbə nuu kɔʼ udzə nə təndzoʼ. Tə i ney kɔʼɔ tə dzuŋu tə, tə naŋa ndòw nə utaa, tə ney kɔʼ dzə wey, tə kpəghə maʼa ndow n vəllə wey u nəmmə koʼo tsə way.”

¹⁸Sey, Jɔn n tsə̀ə ndòw ghə n ndəmə tə təjìi, naʼlə tûm i dzuŋu zə tə̀ ghə.

¹⁹Ambə n nəŋə i loʼ zə, Jɔn n kpâatsu Helɔd tə â loʼnə Də̀ŋ kə nə tə ghəŋə bəəbənu ni tsii ney Herodias n wey. Herodias â loʼ wey waazə wi. Tə n kpâatsu soʼo wi n ndəmə tə aghəə tə̀ bəbə tə loʼ tə tə â ghəŋənə.

²⁰Helɔd n baa kəm ghəŋə kpii tsu ghə i bəbə i loʼ zə, ney fii naŋa ndòw Jɔn.

²¹Ambə ghə̂ adzəm a ney kɔʼ mmuu n Kəzə̀ mə, Yeso n bə soʼo ni bə ney mmuu n Kəzə̀. Nghee tə Yeso ney kɔʼnə mmuu n Kəzə̀ mə, tə n kaʼ ndòw ni gɔŋŋə. Ambə tə gɔŋŋənə, bikighow kə n chi tsu,

²²Zay kə Zow kə n tsu bə n kow wi n wû u kəfə̀, dzə̀ i loʼ zə n ghɔɔmə tsu bə idəŋ dza, “wə̀ loʼ waa wùŋ u tsuʼu wə, n ngii duʼlənu ghi wɔ.”

²³Yeso n kaʼ tsu fwaʼ kə wi nə tə loʼ tə̀ a loʼ ghəm n tənùm ntəghə. Ghə̂ ghə n khə wi nə tə loʼ waa Yosef. Yosef â loʼ waa Eli. Eli n loʼ

²⁴waa Matat. Matat n loʼ waa Levi. Levi n loʼ waa Melki. Melki n loʼ waa Jannai. Jannai n loʼ waa Yosef.

²⁵Yosef n loʼ waa Matatias. Matatias n loʼ waa Emɔs. Emɔs n loʼ waa Nahum. Nahum n loʼ waa Hesli. Hesli n loʼ waa Naggai.

²⁶Naggai n loʼ waa Maath. Maath n loʼ waa Matatias. Matatias n loʼ waa Semein. Semein n loʼ waa Josek. Josek n loʼ waa Joda.

²⁷Joda n loʼ waa Joanan. Joanan n loʼ waa Resa. Resa n loʼ waa Zerubbabel. Zerubbabel n loʼ waa Shitiel. Shitiel n loʼ waa Neri.

²⁸Neri n loʼ waa Melki. Melki n loʼ waa Addi. Addi n loʼ waa Kɔsam. Kɔsam n loʼ waa Elmadam. Elmadam n loʼ waa Er.

²⁹Er waa Joshua. Joshua n loʼ waa Elieza. Elieza n loʼ waa Jorim. Jorim waa Matat. Matat n loʼ waa Levi.

³⁰Levi waa Shimiɔŋ. Shimiɔŋ n loʼ waa Juda. Juda n loʼ waa Yosef. Yosef n loʼ waa Jonam. Jonam n loʼ waa Elyakim.

³¹Elyakim n loʼ waa Melea. Melea n loʼ waa Menna. Menna n loʼ waa Matata. Matata n loʼ waa Natan. Natan waa Devid.

³²Devid n loʼ waa Jesse. Jesse n loʼ waa Obed. Obed waa Boaz, Boaz n loʼ waa Salmon. Salmon waa Nashon.

³³Nashon n loʼ waa Aminadab. Aminadab n loʼ waa Admin. Admin n loʼ waa Ani. Ani n loʼ waa Hezrɔn. Hezrɔn n loʼ waa Peres. Peres n loʼ waa Juda.

³⁴Juda n loʼ waa Yakɔb. Yakɔb n loʼ waa Ayzik. Ayzik n loʼ waa Abraham. Abraham n loʼ waa Tera. Tera n loʼ waa Nahor.

³⁵Nahor n loʼ waa Serug. Serug n loʼ waa Reu. Reu n loʼ waa Peleg. Peleg n loʼ waa Eba. Eba waa Shela.

³⁶Shela n loʼ waa Kainan. Kainan n loʼ waa Afazad. Afazad n loʼ waa Shem. Shem n loʼ waa Noa. Noa n loʼ waa Lamech.

³⁷Lamech n loʼ waa Metuselah. Metuselah n loʼ waa Enɔk. Enɔk n loʼ waa Jared. Jared n loʼ waa Mahalaleel. Mahalaleel n loʼ waa Kainan.

³⁸Kainan waa Enɔsh. Enɔsh n loʼ waa Set. Set n loʼ waa Adam, Adam n loʼ waa Kəzə̀.