Read Weh Lukas 4 Bible Online

Lukas 4 - Weh bible

Lukas 4

¹Ambə Yeso nuu dzəŋŋə bənə n dzuu Jordan, Zay kə Zow kə n loʼ ghi wi, kə n taali ndòw wi n mbvən ə ntsaŋ.

²Tə n doʼo fu nə ntsuʼu nghəm nkaykə, vəətsəə ghə n mɔɔmə koʼo wi. Tə n tsəmə zəə way fə kə loʼ kə n tsuʼu n tii mə. Ambə tsuʼu n tii n may tsunə, dzəŋ n zabə wi.

³Vəətsəə ghə n dza ndòw tə̀ wi nə̀, “Abə wə loʼnə Waa Kəzə̀, dza ndòw tə̀ tay zən nə̀ i fəd kɔʼ nə kəbaa, wə zə̂.”

⁴Yeso n beeli ndòw wi nə̀, “I loʼ n màʼlə K-a-zə̀ nə̀, ‘Wù kad muu way nə a loʼ ufəzəə.’”

⁵Vəətsəə ghə n ney kɔʼ ndòw wi idəŋ, dii may ndòw naʼa tə mbi tədzəm tə̀ wi n tɔŋɔ fə inəŋə.

⁶Vəətsəə ghey n dza ndòw tə̀ wi nə̀, “Ghə n fu mə n daʼa kə tii kə ni saʼ fə wən udzəm, n loʼ ni fuu tə̀ wù wey n ləghənə. Mə i fuunu daʼa kə tii kə nsə kûm i tii zə tə̀ wɔ.

⁷Sey, abə wə ngɔɔmə bənə mə, wə̀ i keeli fə u tii wə udzəm.”

⁸Yeso n beeli ndòw wi nə̀, “I loʼ n màʼlə K-a-zə̀ nə̀, ‘Wə khə ni ngɔɔmə Bày, Zə̀ kə kə̀, fwaʼa tənə kə tə̀ wi.’”

⁹Vəətsəə ghə n ney ndòw wi n Yerosalem. Ghə n ndòw təmi tsu n gɔŋ kə ndaw kə Ndaw Kəzə̀ i nii zə n Yerosalem. Vəətsəə ghə n dza tə wi nə̀, “Abə wə loʼnə Waa Kəzə̀, taa tsu ndòw aghəd,

¹⁰təŋkey i loʼ n màʼlə K-a-zə̀ nə̀, ‘Zə̀ kə î tsəʼlə tsu kəlaŋ tə̀ tsətəndəghə tə Kəzə̀ tə nə̀ ghə i Keyyə wɔ,

¹¹ghə i bɔɔmə keeli kɔʼ wɔ̀ sa n wɔ, kə wə nə tsɔbənə ghow kə kə̀ nə itay.’”

¹²Yeso n beeli ndòw wi nə̀, “I loʼ soʼo n màʼlə K-a-zə̀ nə̀, ‘Kə wə nə mɔm koʼonə Bày Zə̀ kə kə̀.’”

¹³Ambə vəətsəə a mɔm koʼ may tsunə Yeso n jii tədzəm, tə n nuu i ndòw, fu tsu wi n buʼ kə.

¹⁴Nghee Yeso nyi dzəŋŋə bənə n Galili, Zay kə Zow kə n loʼ ghi wi, zɔŋ u wi wə n fuŋ tsəghə kaabə ndow n mboʼ i tii zə idzəm.

¹⁵Tə n dii n ndaw tə udzəŋi, ghə̂ adzəm ghə n kali wi.

¹⁶Yeso n nuu ndow n Nazaled, naʼ zey tə â nyəm kɔʼ bənə tii. Ambə n tsuʼ inaʼ, tə n ndòw n ndaw Kədzəŋi, tə̀ tə â ghəŋə tsənə, tə n təmi kɔʼ ni tɔŋɔ ghɔɔmə i Kəzə̀.

¹⁷Ghə n fu ndòw maʼlə kə tûm Kəzə̀ Ayzaya tə̀ wi, tə n chi kɔʼ n luʼu key ghə tɔ̀ɔ naŋanə tii nə̀,

¹⁸“Zay kə Zow kə loʼ ghi mə təŋkey Zə̀ kə n mə sày nə̀ n naʼa tûm Kəzə̀ tə̀ ghə̂ a laa ghə, tə tûm mə nə̀ n ndòw naʼa bəghəshi i Kəzə̀ tə kɔt wə, n fù sə̂ a koʼo ghə tə̀ ghə̂ a fəbəghə, n bəghəshi ghə̂ ghey ghə loʼnə nə uchɔd,

¹⁹n naʼa tûm nə̀ nəŋə zə n kpii tə̀ Zə̀ kə ni ghəŋə ndzuŋ tə̀ ghə̂ a wi ghə.”

²⁰Yeso n tsəd dzəŋŋə tsu màʼlə key, fuu dzəŋŋə ndòw tə̀ wù wey tə naŋŋənə, tsu doʼo tsu. Ghə̂ ghey ghə â loʼnə fu n ndaw kədzəŋi n suu laalə kə wi.

²¹Tə n dza tə̀ ghə nə̀, “Ghɔɔmə i Kəzə̀ zən ghaa zownə na, ghəə a tii ghə n ney bənə kə.”

²²Ghə̂ ghey ghə â loʼnə fu, n ghɔɔmə ghəə a dzuŋu ghə bòʼ wi, ngii duʼlə ndzoʼo kɔb kə ighɔɔmə key kə a shiə bənə n dzuu i wi. Ghə n bəbə tiilə n wû i ghə nə̀, “À wən way waa Yosef ə?”

²³Yeso n dza ndòw tə̀ ghə nə̀, “N khənu nə ghaa i fə̀nnə dza bənu tə̀ mə̀ nə̀, a wù Ngaŋ, bɔɔlə dzəm zə, ghəŋə soʼo ghəə ghey â zownə nə̀ wə a ghəŋə n Kapenum fa n naʼ zə.”

²⁴Tə n kəm dza tsu tə̀ ghə nə̀, “Isəŋə kee loʼ nə, ghə bəghəm naŋŋə tsə way wù tûm Kəzə̀ n naʼ i wi.

²⁵N kùm dza bə tə ghaa nə n tsuʼu mə Elayja, ghey a kpusə ghə â kəmənu n naʼ zə Izree, bikighow kə n fii doʼo ndòw, kùm kɔʼɔ ndow tənùm tətəghə n bad kə nə ghow i tsuu way, dzəŋ n ngii loʼ nə inaʼ,

²⁶Zə̀ kə n ka nam tûm dzə Elayja n səə wù ghə umɔʼ, fəd tûm ndòw wi n səə wey kpusə n naʼ i Zerafat n mboʼo Sidɔn.

²⁷Ghə̂ ghə ukə̀m ghə â kə̀mə̀nu n naʼ zə Izree n tsuʼu n wù tûm Kəzə̀ Elisha, Zə̀ kə n ka kee baŋŋə dzə wù ghə umɔ̀ tsəghəshiə way Naman wù Sirya.”

²⁸Nghee tə̀ ghə̂ ghey fu n ndaw Kədzəŋi zow tsunə sey, ghə n fəələ ndòw nnəghə,

²⁹daŋŋə nuu kɔʼ, dzùm shi ndòw wi fu nə inaʼ, ney kɔʼ ndòw wi n kàʼ wey naʼ i ghə zə â bəghə doʼonə tii, nə̀ ghə ndòw tuŋu maʼa tsu ndòw wi nə iwad,

³⁰tə n fəd nyi dzəŋŋə bə n fəŋŋə kə ghə, nuu ndòw luʼu tə wi.

³¹Sey, Yeso n nuu ndòw n Kapenum n mboʼo Galili, dii aghə̂ fu n tsuʼ inaʼ u ghə.

³²Dzuu zə n ngii zum ghə n ghɔɔmə i wi, kùmnə ghɔɔmə wi zə â khə kədaʼa.

³³Tsuʼ fə loʼ fə, Yeso n loʼ n ndaw Kədzəŋi, wù loʼ n loʼ fu nə vəətsəə ghə n nyi doʼo n kow wi. Ambə tə koʼ tsunə Yeso, tə n kii kəbɔŋ dza,

³⁴“Wey yey, zəghə maʼa ghey ley! A Yeso ə Nazaled, wə bə ni bə wey maʼa ghey ə? N khənu wù wey wə loʼnə ghii wə, wə loʼ wù zow wən Zə̀ kə tûm bənə.”

³⁵Yeso n kii naʼa ndòw wi dza, “Doʼo mɔŋ, wə bə tsəghə shi.” Sey vəətsəə a tii ghə n ney maʼa bə wù wey aghəd, nuu shi bə nə̀ a ka wi nyəmmə.

³⁶Dzuu zə n ngii zùm ghə̂ ghey fu, ghə n bəbə n wû i ghə nə̀, “À wən loʼ ndzoʼo ghɔɔmə i ghaa zə n daʼa kə sa a? Wù wən tsəʼlə kəlaŋ tə vəətsəə ghə n shiə nuulə bə.”

³⁷Zɔŋ u wi wə n fuŋ tsəghə ndòw n mboʼ i tii zə idzəm.

³⁸Ambə Yeso nuu tsunə n ndaw Kədzəŋi, tə n ndòw n ndaw Shimun. À n loʼ sey nə̀ nəwey Shimun loʼ n wû wə̀. Ghə n dey dza ndòw ghəə a tii ghə tə Yeso.

³⁹Yeso n təmi ndow n səə wi, kii ndòw wû u tii wə, wə n daŋŋə zəghə tsu wi. Tə n nuu kɔʼ kə n nəŋə i tii zə, khəələ fu ndòw ghə.

⁴⁰Ambə n nəŋə i fənə zə, ghə̂ ghə n kaʼ ni ney bə ghə̂ a ghə a dzaŋa ghə n səə Yeso. Tə n mɔm kə kay, wù tii n taw kɔʼ.

⁴¹Vəətsəə ghə n maŋa shiə nuulə n kow ndəmə aghə̂, buʼlə nbɔŋ dza, “Wə loʼ waa Kəzə̀.” Yeso n kii naŋa ndòw ghə, tsəmə bəghəm way nə̀ ghə ghɔɔmə shi kɔʼ, n təŋkey ghə â khənu nə̀ tə loʼ Klisto.

⁴²Ambə tsuʼ u zow tsunə, tə n nuu ndòw n luʼu k-a-nyi. Nɔɔ kə aghə̂ kə n kaʼ wi nə̀ u kəŋə kaabə wə, bə koʼ bə wi n luʼu key tə â loʼnə tii, ghə n dəmə ni kwu naŋa tsu wi kə̂ tə nə̀ zəghənə ghə.

⁴³Tə̂ n fəd dza ndòw tə̀ ghə nə̀, “N khə ni teeli naʼa tûm i dzuŋu zən bòʼ ghə i fɔɔ u Kəzə̀ n naʼa tə loʼ tən təŋkey a wən loʼ ghə zey Zə̀ kə tûmnə mə nə̀ n bə fwaʼ fa n mbi.”

⁴⁴Yeso n tsəghə ndòw kə n sə kə, naʼlə kaabə ndòw tûm i tii zə n ndaw tə udzəŋi n mboʼo Judiya.