Read Weh Lukas 5 Bible Online

Lukas 5 - Weh bible

Lukas 5

¹Ambə n tsuʼ fə loʼ fə, Yeso n tey n nguŋə nyi i Jenesalet, nɔɔ kə aghə̂ kə n loʼ fu, tənə ndòw iwùu n səə wi ni zəllə ghɔɔmə i Kəzə̀.

²Yeso n koʼ ndòw ufən ubəghə n nguŋ i dzùu nə à naŋa ghə̂ a kwɔ̂ a tətsəghə ghə, ghə n kùʼlə loʼ fu sow wûu u tətsəghə

³Yeso n nyi kɔʼ n fə̀n kə lòʼ kə nə̀ a khə Shimun, dza ndòw tə̀ wi nə̀, tə bàŋ nyi ndòw kəfə̀n n fə̀ŋ ə dzùu fənyaŋi. Tə n doʼ fu nə kəfə̀n, dii bə aghə̂ n nguŋ i dzuu.

⁴Ambə tə dii may tsunə, tə n dza ndow tə Shimun nə̀, “Bàŋ nyi nay ndow n fəŋ ə dzuu, ghaa maʼa ndòw uwûu tə̀ ghaa kwu tətsəghə.”

⁵Shimun n beeli ndòw wi dza, “Ghey n fwàʼ bweeli, ghey ka fə kə kwu dzə, tə̀ wə dza dzənə, n maʼa kənu wûu u tii wə.”

⁶Ambə ghə maʼa ndownə, ghə n kwu tətsəghə sa, wûu tə tii tə n kaʼ ni tiilə,

⁷sey ghə n tɔŋɔ bə ghə̂ a loʼ ghey ghə â loʼ dzəŋinə ghi ghə nə̀ ghə bə tɔm ghə. Ambə ghə bənə, tsəghə tə n luu kɔʼ n fə̀n u tii wə ubəghə, wə n lòʼ tə̀ wə i məllə nyi tsu n dzùu.

⁸Nghee tə̀ Shimun, tɔŋŋə Pita koʼ tsunə sey, tə n təm ndòw tənguʼ n tənə Yeso dza, “Mûkəbii, nuu ndòw n səə mə a Bày n təŋkey n loʼ wù bəbə wə.”

⁹Tə â dza sey təŋkey ghə i tii zə̀ â ngii tsəghəshi Shimun ghi ghə̂ a wi ghə n ndzòʼò tsəghə tey ghə â kwunə.

¹⁰Ghə i tii zə̀ n tsəghəshi soʼo ghə̂ a loʼ ghey tɔŋŋə Jems ghi Jɔn, waa à Zebedii ghə â fwaʼa dzəŋinə ghi Shimun. Yeso n dza ndòw tə̀ Shimun nə̀, “Ka tsəŋ dzə, ni nuu tsu nya ndòw isə, wə i kwɔɔ aghə̂.”

¹¹Ambə ghə bàŋ shi ndòwnə fə̀n u ghə wə n nguŋ ə dzùu, ghə n naŋa taʼa tsu fə u ghə udzəm fu, dzûmə ndòw wi.

¹²N tsuʼ fə loʼ fə, Yeso ndow n naʼ i lòʼ zə, wù lòʼ n loʼ fu tə â khənə kə̀m wə n wû u wi udzəm. Ambə tə kòʼ ndòwnə Yeso, tə n bwù ndòw n tə̀nə̀ wi dza, “Mûkəbii, abə wə tsə̀mnə wə lòʼ ni baŋŋə mə̀ nə n taw.”

¹³Yeso n naalə shi ndòw kəwɔɔ mɔm tsu wi dza, “N ləghənu ni baŋŋə wɔ, taw kɔʼ.” Sey kə̀m u tii wə n daŋŋə may tsu.

¹⁴Yeso n dza tə wi nə̀, “Kə̂ wə nə dzanə ghə zən i shinə tə̀ wù loʼ, ndow dii wû wə wə̀ tə̀ fɔɔngili, wə fu naamə K-a-zə̀, tə̀ làŋ kə Mushi kə diinə ni dii tsu nə̀ wə n taw, tə ghə̂ adzəm a keeli tsu nə̀ wə nya zownu.”

¹⁵Seykə, zɔ̀ŋ u Yeso wə n fəd fuŋ nay ndòw, ghəŋə nɔɔ kə aghə̂ kə n dzəŋi bə ni zəllə ghɔɔmə i wi, nsə ni baŋŋə dzaŋa tə ghə.

¹⁶Yeso â bəghə tə n ndòw n luʼu k-a-nyi ni ndow gɔŋŋə.

¹⁷Ambə n tsuʼ fə loʼ fə Yeso n dii aghəə, ghə̂ a tə Falasi nsə ghə̂ a dii ghə ulaŋ a loʼ ghə n lòʼ fu, ghə â nuu bənə n naʼa tə Galili, Judeya, nsə n Yerosalem. À n loʼ nə Zə̀ kə n wi n daʼa kə fu ni baŋə ghə̂ a dzaŋa ghə̀

¹⁸Ghə̂ a loʼ ghə n ndòw bə fu ghi wù dzaŋa ghə boʼo keelinə nə̀ fəgham nə wû u wi wə n kpu doʼo, ghə n ləghə ni nyi naŋŋə wi n sə kə Yeso.

¹⁹Ambə ghə dəm kìi tsunə bòʼ nɔɔ key kə â loʼ fu, ghə n boʼo kɔʼ ndòw wi n tow kə ndaw, bwali nyi tsu, nyəələ nyi tsu ndòw wi n fəŋŋə kə aghə̂, a n bɔɔmə lòʼ n sə kə Yeso.

²⁰Yeso n kòʼtsu nə̀ ghə ndzə̀m khənu bəghəm i fə̀ŋ zə̀. Sey, tə n dza ndòw tə wù dzaŋa wey nə̀, “A boo, ghə n bəb zə neyzəə.”

²¹Ghə̂ a tə Falasi nsə ghə̂ a dii ghə ulaŋ ghə n kaʼ ni dza n wû i ghə nə̀, “À wən lòʼ fə ndee fə tsayyənə Zə̀ kə? A kəm lòʼ ndee ni neyzəə bəb i wù ə, tsəghəshiə way Zə̀ kə ə?”

²²Nghee tə̀ Yeso zowkeeli tsunə moʼlə tə ghə tə, tə n bəb ndòw tə̀ ghə nə̀, “Ghaa sey moʼlə ndzoʼo ghəə a ghaa ghə n fə̀ŋ tə ghaa a?

²³A tsəghəshi ghə i ghaa zə̀ ni dza? ‘Ni dzanə ghə n bəb zə̀ i neyzəə’ nkee ‘ni dza nə̀ nuu kɔʼ idəŋ wə bwey ndow ə?’”

²⁴“N dza n maŋ dii bə tə ghaa nə̀ Waa wù sɔŋtsuʼ khənu daʼa kə fa n mbi ni neyzəə bəb zə.” Sey tə n dza ndòw tə wù dzaŋa wey wû u wi wə â kpu doʼonə nə̀, “N dza tə wɔ nə̀, nuu kɔʼ, wə ney kɔʼ gham zə, wə ndòw dzəŋŋə n ndaw zə.”

²⁵Wù tii n daŋŋə nuu kɔʼ n sə kə ghə, ney kɔʼ fə key tə â nyəŋnə tii, nuu ndòw n ndàw wi, bwey kali ndow Kəzə̀.

²⁶Ghə i tii zə n ngii tsəghə shi ghə̂ ghey ghə â lòʼ fu, ghə n fuu ukali tə̀ Zə̀ kə, fəŋŋə khə itsəŋ n fə̀ŋ tə ghə, dza, “Ghey n koʼ ghə i faalə zə na.”

²⁷Ambə ghəə ghən tsəghə tsunə, Yeso n nuu shi bə, bə kòʼ tsu wù kwɔɔ u màʼlə kə tsow kə, ghə â tɔŋŋənə wi nə̀ a loʼ Levi, tə doʼnə n luʼu kə kwɔɔ k-a-màʼlə kə. Yeso n dza tə̀ wi nə̀, “dzûmə bə mə̀.”

²⁸Sey, Levi n nuu ikɔ̀ʼ, naŋa sə̂ tsu fə u wi udzə̀m, dzûmə ndòw Yeso.

²⁹Levi n ney ndòw Yeso n ndàw wi, ndòw zɔʼ tsu wi. Ghə̂ a kwɔɔ a màʼlə kə tsow kə n loʼ fu nsə ghə̂ a loʼ ghə soʼo, dzəŋi zəə.

³⁰Ghə Falasi nsə ghə̂ a dii ghə ulaŋ ghey ghə â loʼ dzəŋinə ghi ghə n nyuŋə ghɔɔmə dza tə̀ dzûmə tə Klisto tə nə̀, “À loʼ kee ghaa zə̂ənə, məə dzəŋi ghi ghə̂ a kwɔɔ a kəmàʼlə ghə nsə ghə̂ a bəbə ghə ə?”

³¹Yeso n beeli ndòw ghə nə̀, “Ghə̂ ghey ghə dzaŋa way, ghə kəŋə tsə way wù ngàŋ, a loʼ ghə̂ ghey ghə dzaŋanə ghə kəŋənə wù ngàŋ.

³²N ka bə dzə ni bə tɔŋɔ ghə̂ a dzuŋu ghə, n bə ni bə tɔŋɔ shi ghə̂ a bəbə ghə nə̀ ghə kwey fə̀ŋ tə ghə.”

³³Ghə n dza ndòw tə̀ Yeso nə̀, “Dzûmə tə Jɔn nsə dzûmə tə ghə Falasi tə bam tsə idzuu, gɔŋŋə, a ghə ghə̀ a kee khə kə ni zəə, məə.”

³⁴Yeso n beeli ndòw ghə nə̀, “fə̂ a nùm weyzən a bam tsə idzuu nə̀ tə loʼ fu ghi ghə ə? Ey Ngaŋ!

³⁵Nəŋə i nə̀ bəghənu, ghə nə ney nuulənə nùm weyzən n wɔ ghə, sey, ghə nə bam idzuu n nəŋə i tii zə.”

³⁶Yeso n dza ndòw soʼo ghɔɔmə i fənkəfən zən tə ghə, “Wù way dzə ni ney bad kə ndzə kə fəghə kə, tə taŋi ndòw ndzə tə̀ wey tə, n təŋkey, abə tə ghəŋənə sey, tə i bəəbə maʼa ndzə tə fəghə tey, nə a loʼ sey bad kə ndzə kə fəghə key ka buʼ kpiilə soʼo n ndzə tə wey tey.

³⁷Ighələ tə̀ wù way ni ney kɔʼ səŋ nlə tə kuu ndòw n suʼ[2] iwey zə, n təŋkey abə tə ghəŋənə sey, mə i bey buʼu maʼa kɔʼ suʼ nlə i tii zə, nlə n tii mə i kuŋ nay, suʼ i tii zə i bəb daŋŋə.

³⁸Wù ney kɔʼɔ səŋ nlə tə n kuu tsu n suʼ i fəghə zə.

³⁹Wù way dzə ni mə̂ bweeli kə nlə, tə i kəm ləghə ni mə̂ səŋ nlə, n təŋkey, tə̀ wi, a dzɔbə bweeli kə nlə.”