Read Weh Lukas 6 Bible Online

Lukas 6 - Weh bible

Lukas 6

¹N tsuʼ inaʼ u ghə̂ a Təjuu u loʼ wə, Yeso n bwey tɔɔlə ndòw n sûm zə asaŋ i loʼ zə. Dzûmə tə wi tə n kpey bə tow wə asaŋ, foʼo tsu n wɔ, fəə bə.

²Ghə̂ a tə Falasi a loʼ ghə n bəb ndòw tə ghə nə̀, “A loʼ kee ghaa ghəŋə ghəə ghən n tsuʼ inaʼ ə, nə a loʼ sey Laŋ kə saa kə̀ ka bəghəm naŋa?”

³Yeso n beeli ndòw ghə dza, “I sey dii nə̀ ghaa ka kam tɔŋŋə koʼ tsə ghəə ghey fɔɔ Devid nsə ghə̂ a wi ghə â ghəŋənə nghee dzəŋ â zabənə ghə ə?

⁴Nghee tə̀ tə â nyi ndòwnə n ndaw Kəzə̀, ney kɔʼ baa K-a-zə̀ key laŋ kə â diinə nə̀ â khə kə ghə fɔɔngili ni zə, zə kɔʼ ghi ghə̂ a wi ghə.”

⁵Ni gûŋ kɔʼ, Yeso n dza tə ghə nə̀, “Waa wù sɔŋtsuʼ loʼ Də̀ŋ kə tsuʼ inaʼ.”

⁶Ambə n tsuʼ inaʼ u ghə̂ a Təjuu u loʼ wə, Yeso n loʼ n ndaw kədzəŋi tə diinə, wù loʼ n loʼ fu nə kpi kə wi kə zəə kə n kpu doʼo.

⁷Ghə̂ a tə Falasi nsə ghə̂ a dii a kəlaŋ ghə n loʼ fu, ghə n tɔ̀ʼɔ laalə Yeso ni koʼ nə̀ tə i baŋŋənu wù n tsuʼ inaʼ tə̀ ghə kwu wi nə̀ tə bwù kəlaŋ.

⁸Yeso n loʼ nə tə n zowkeeli moʼlə tə ghə tə, tə n dza ndòw tə̀ wù wey kpi kə â kpu doʼonə nə̀, “Nuu kɔʼ, wə təmi shi bə fa isə.” Tə n daŋŋə nuu kɔʼ, təmi shi i ndòw.

⁹Yeso n dza ndòw tə ghə nə̀, “N dza n bəb bə tə̀ ghaa nə̀, Laŋ kə saa kə dza nə̀ ngee bòʼ tsuʼ inaʼ a? Nə a i ghəŋə ghəə a dzuŋu ghə mɔ a bəbə ghə ə? Nə a bəghəshi muu i wù mɔ nə a bəəbə maʼa?”

¹⁰Tə n laalə tsəghə ndòw aghə̂ adzəm, dza ndòw tə wù wey nə̀, “Naalə shi ndòw wɔɔ kə kə̀.” Tə n naalə shi i ndòw. Wɔkə wi kə n daŋŋə taw doʼo bə.

¹¹Ghə̂ ghey n fəələ ndòw n nəghə, kaʼ ni ghɔɔmə n wû i ghə dza, “Ghə loʼ ni baa ji ngee ghi Yeso ə?”

¹²Ambə n tsuʼ fə loʼ fə, Yeso n nuu kɔʼ ndòw nə ukaʼ ni ndòw gɔŋŋə, gɔŋŋə bweeli ndòw tsuʼ fə tii fə tə Zə̀ kə.

¹³Ambə tsuʼ u zow tsunə, tə n tɔŋɔ bə dzûmə tə wi, sày kɔʼ tow u ghə ighəm nsə ghə̂ ghə abəghə nə ghə doʼo ngəd tə wi.

¹⁴Ghə â loʼ; Shimun tə wən tə â tsə̀ tsu zəd i wi zə nə̀ a loʼ Pita, ghi waazə wi Andria; Jem ghi Jɔn, Filip ghi Batolomio;

¹⁵Matiə ghi Tɔmɔs; Jem waa Afus, nsə Shimun wən ghə â tɔŋŋə soʼonə wi nə̀ à loʼ wù wən tə ngii ləghənə naʼ i wi zə;

¹⁶Judas waa Jem, nsə Judas Iskariɔt, tə â fiinə Yeso.

¹⁷Ambə Yeso nuu tsu bənə nə ukaʼ ghi tsətəndəghə tə wi tə, tə n tey n bəghə i loʼ zə, nɔɔ kə dzûmətə wi kə n loʼ fu, nsə ndəmə ghə̂ a loʼ ghə ghə â nuu bənə n Judeya, Yerosalem, n nguŋ i Tayra, nsə n Sidɔn.

¹⁸Ghə â bə ni bə zow ghɔɔmə i wi nsə ni baŋə wû i ghə. Yeso n baŋə ghə, baŋə soʼo ghə̂ ghey zay u bwu wə â fəmmənə ghə.

¹⁹Ghə̂ ghə n dəmə ni mɔm wi təŋkey daʼa kə â shiə bə n kow wi baŋə aghə̂ adzəm.

²⁰Yeso n laalə ndòw dzûmə tə wi, dza tə̀ ghə nə̀, “Buulə i loʼ tə ghaa ghey ghaa laanə, n təŋkey, fɔɔ u Kəzə̀ u loʼ u ghaa wə̀.

²¹Buulə i loʼ tə̀ ghaa ghey dzəŋ zabənə ghaa nya, n təŋkey, ghaa i zəə kownu. Buulə i loʼ tə̀ ghaa ghey ghaa deynə nya, n təŋkey ghaa i tsoʼonu.

²²Buulə i loʼ tə̀ ghaa ghey ghə bàanə ghaa, dzùm ghaa, kpaalə ghaa, khəə ghəə a bwù ghə n zəd a ghaa bòʼ Waa wù sɔŋtsuʼ.

²³Ghaa khə ni duʼlə, bənə, abə ghəə a shiənə sey ghi ghaa, n təŋkey naamə kə ghaa kə i downu idəŋ. Təŋkey, ghə bày a ghə â fwaʼa soʼo sey ghi tûm tə Kəzə̀ tə.

²⁴Chɔt u loʼ tə̀ ghaa ghey ghaa kuumnə nya təŋkey ghaa n keeli may ndzuŋ ə ghaa.

²⁵Chɔt u loʼ tə ghaa ghey ghaa zəə kownə nya təŋkey nəŋə zə i bəghənu ghaa i loʼ n dzəŋ. Chɔt u loʼ tə ghaa ghey ghaa tsoʼonə nya təŋkey ghaa nə mownu, ghaa i deyyə.

²⁶Chɔt u loʼ tə̀ ghaa ghən ghə ghɔɔmənə ghəə à dzuŋu ghə bòʼ ghaa nya təŋkey a loʼ soʼo sey ghə bày a ghə ghə â ghəŋənə ghi tûm tə Kəzə̀ tə tsɔŋɔ tə.

²⁷N dza bə tə̀ ghaa nə̀, ghaa khə ni ləghə ghə̂ a təngəmə a ghaa ghə, ghəŋə ndzuŋ tə ghə̂ ghey ghə bàanə ghaa.

²⁸I fuu buulə zə tə̀ ghə̂ ghey ghə tsɔɔmənə ghaa, gɔŋŋə tə ghə̂ ghey ghə chɔdlɔnə ghaa.

²⁹Abə wù bwɔd nyi ndòwnə wɔ̀ nə kədzòʼ, dii may ndòw kə loʼ key tə bwɔd soʼo. Nə̀ wù ney nuu sàŋ zə, fu may ndòw wi n danchiki fə tə keeli.

³⁰Abə a loʼ kə ndee tə nɔɔnə fə kə kə̀, fu ndòw. Nə̀ wù loʼ bə bəkeeli ndòw fə kə, ka bəb dzəŋŋə dzə.

³¹I ghəŋə ndòw ghəə ghə tə ghə̂ ghə ighələ tə̀ wə ləghənə nə̀ ghə i ghəŋə tə̀ wɔ̀.

³²Abə wə̀ ləghə kə ghə̂ ghey ghə ləghənə wɔ̀, wə̀ i zəə kee tii? Ghə̂ a bəbə a ngəŋə ləghə soʼo ghə̂ ghey ghə ləghənə ghə.

³³Abə wə ghəŋə kə ndzuŋ tə̀ ghə̂ ghey ghə ghəŋənə ndzuŋ tə̀ wɔ, wə̀ tii zəə kee? Ghə̂ a bəbə a ghəŋə soʼo sey.

³⁴Abə wə̀ fùulə fuu shiə kə fə kə tə̀ ghə̂ ghey wə moʼlənə nə̀ ghə i tsə̂ə dzəŋŋə bənu, wə̀ zəə kee tii? Ghə̂ a bəbə a ngəŋə fuulə fuu shiənu tə ghə̂ a bəbə ghə, moʼlə nə̀ ghə i tsə̂ə dzəŋŋə bə soʼo udzəm.

³⁵Sey, i ləghə na ghə̂ a təngəmə a ghaa ghə, ghəŋə ndzuŋ tə̀ ghə̂ ghə, fuulə fuu shiə fə u ghaa, moʼlə way nə ghə i teeli fu dzəŋŋə. Abə ghaa ghəŋənə sey, ghaa i keeli naamə kə nii kə, ghaa i loʼ luʼu wey waa a Kəzə̀ a səŋi a loʼnə tii, n təŋkey, tə ghəŋə ndzûŋ tə̀ ghə̂ à məə ghə nsə ghə̂ a bəbə ghə.

³⁶I kwɔɔlə na sî zə tə̀ ghə̂ ghə ighələ tə̀ Bày ghaa kwɔɔlənə sî zə tə̀ ghə̂ ghə.

³⁷Kə ghaa nə saʼabəəbənə ghə̂ ghə, n təŋkey Zə̀ kə i saʼa bəəbə soʼo ghaa. Kə ghaa nə tsəʼlənə saʼ n kow ghə̂ a loʼ ghə təŋkey Zə̀ kə i tsəʼlə saʼ soʼo n kow ghaa. Ghaa khə ni neyzəə ghəə a bəbə ghey ghə ghəŋənə tə ghaa, Zə̀ kə i neyzəə soʼo ghəə a ghaa a bəbə ghə.

³⁸I fuu ndòw na fə̂ wə tə̀ ghə̂ ghə, Zə̀ kə i fu dzəŋə tə̀ ghaa n fəŋ i dzuŋu zə, ghə i mən nyi tsu, ghə soʼlə tsu, ghə kuu luulə kɔʼ sa, wə i shiə a bii, n təŋkey fòʼ zey wə̀ fuu shiənə tii, a loʼ soʼo n foʼo tii Zə̀ kə i fuunə tə̀ wɔ.”

³⁹Yeso n dza ndòw soʼo ghɔɔmə i fənkəfən i loʼ zə tə ghə nə̀, “wù fəbə way ni tali dzə wù fəbə u loʼ wə, tə̂ ghə i dzəŋi ndòw bwù nyi tsu nə kəbùʼ.

⁴⁰Waa kəmàʼlə way dzə ni tsəghəshi dzə wù dii wə, a kee loʼ nə abə tə tɔʼ zoʼlə tsunə tə loʼ ni bə doʼo tə̀ a loʼ wù dii wey.

⁴¹A loʼ kee wə laalənə fəghə fey n sə̂ i waazu kee koʼo way kəm kə fəkaʼ key n sə̂ zə ə?

⁴²Wə loʼ ngee ni dza tə̀ waazu nə̀, ‘N waazə, na n shiələ bə fəghə fey n sə̂ zə,’ nə̀ a loʼ sey wə buʼu koʼo way kaʼ fey n sə̂ zə ə? Nəb ityim tə a loʼ wɔ, buʼ shiələ nuu tsu dzə kaʼ fey n sə̂ zə, sey wə i loʼ ni tɔʼ koʼ təluʼu ni shiələ nuu fəghə fey n sə̂ i waazu.

⁴³Keeli tsu na nə̀, kaʼ fə dzuŋu fə way ni mə̀ dzə tam u bəbə wə, ighələ tə̀ kaʼ fə bəbə fə way ni mə dzə tam u dzuŋu wə.

⁴⁴Saa koʼo keeli fəkaʼ n tam u wi. Wu way dzə ni kɔy tam u təfig nə təmgbii nkee tə kɔy lami n kɔɔ tə təmgbii.

⁴⁵Wù dzuŋu ghəŋə kə ghəə a dzuŋu ghey a shi kɔʼ bənə n fə̀ŋ ə wi. Wù bəbə ghəŋə kə ghəə a bəbə ghey a shi kɔʼ bənə n fəŋ ə wi, kuumnə wù ghɔɔmə kə ghəə ghey a kuʼ doʼonə n fəŋ ə wi.

⁴⁶A loʼ kee ghaa tɔŋɔnə mə nə ‘Mûkəbii’, ‘Mûkəbii’, nə a loʼ sey ghaa ghəŋə way ghəə ghey n dzanə.

⁴⁷N dza n dii bə tə ghaa nghee tə wù wey tə bənə n səə mə, zəllə ghɔɔmə zuŋ, ghəŋə ndòw ghəə ghey n dzanə loʼnə a tii.

⁴⁸Tə loʼ tə̀ a loʼ wù wey tə a dza i bəghə ndaw, tə n bow dzɔb nyi tsu ndòw tsə kə ndaw, bɔm kɔʼ bə tsə̂ u tii wə nə atay. Ambə dzuu naali tsən bənə ndaw tii, zə n way ni beeli təŋkey ghə â bɔm dzɔbnu.

⁴⁹Abə wù wey tə zownə ghɔɔmə zûŋ zə, ghəŋə way ghə zey n dzanə. Tə loʼ tə a loʼ wù wey tə bɔmnə ndaw n ghəlikətsə nə tə ka tsə kə sət dzə. Ambə dzuu naali tsən bənə n ndaw tii, zə n beeli, luʼlə may tsu.”