Read Weh Lukas 7 Bible Online

Lukas 7 - Weh bible

Lukas 7

¹Ambə Yeso dza may tsunə ghəə ghən tə ghə̂ ghey, tə n nuu dzəŋŋə ndòw n Kapenum.

²Wù nii u təsawgoʼ u loʼ wə n lòʼ fu, wù kəfwaʼ a wi u loʼ wə tə â ngi ləghənə n dzaŋa, loʼ n ghəə a kpuu ghə.

³Nghee tə zow tsunə zɔŋ u Yeso wə̀, tə n tûm tsu ngəd n Təjuu n loʼ mə nə ghə ndòw tɔŋɔ bə Yeso, tə bə bəghəshi wù kəfwaʼ a wi.

⁴Ghə n bə kòʼ bə Yeso, buʼ wi n wɔɔ kə dza, “Wù wən ndzəm kpiinu tə̀ wə gaamə wi,

⁵təŋkey, tə ləghənu naʼ i Təjuu zə, à loʼ wi tə â bəghə funə n ndaw kədzəŋi.”

⁶Sey, Yeso n nuu ndòw ghi ghə. Ambə ghə kuʼlə ndòwnə n səə ndaw, sawgoʼ zey n tûm ndòw fə̂ a wi nə ghə ndòw dza ndòw tə̀ Yeso nə̀, “Mûkəbii, ka wû wə̀ u fəmmə dzə, kùm nə n ka kɔʼ kpii dzə tə̀ wə loʼ ni bə n ndaw zuŋ,

⁷à wən loʼ ghə i tii zə n ka bə n səə wɔ̀ n wû wùŋ wə təŋkey n ka kɔʼ kpii dzə, maŋ dza tsu kə ghə zə imɔʼ, wù kəfwaʼ wùŋ i taw doʼo bə.

⁸Kùmnə n lòʼ soʼo n tənə kədaʼa, mə n khə soʼonə sawgoʼ tə n tənə mə. Sey, abə n dza tsunə tə̀ umɔʼ nə ‘Ndow’ tə n mə i ndow, mə n dza tsu tə u lòʼ wə nə ‘Bəghə’ tə n mə i bə, nkee tə wù kəfwaʼ wùŋ nə ‘Ghəŋə ndòw sa’, tə n ghəŋə i ndòw.”

⁹Dzuu zə n zum Yeso nghee tə̀ tə zow tsunə ghəə ghən, tə n khə̀mə dza ndòw tə̀ nɔɔ kə aghə̂ key kə â bəghənə n baa wi nə̀, “N dza bə tə̀ ghaa nə n ka kam koʼ koʼ bəghəm i fə̀ŋ zə tə a lòʼ i zən wù wən khənə kasə̀ n naʼ zə Izree.”

¹⁰Ambə ghə̂ ghey tə â tûmnə, dzəŋŋə bənə n ndaw, ghə n bə kòʼ bə nə wù kəfwaʼ wey n taw.

¹¹Ambə ghəə ghən a tsəghə tsunə, Yeso n nuu ndòw n naʼ i lòʼ zə ghə tɔŋŋənə nə̀ a loʼ Nayn. Tsətəndəghə wi, nsə nɔɔ kə aghə̂ kə nii kə n lòʼ ghi wi.

¹²Nghee tə̀ ghə kuʼlə may ndòwnə ni nyi inaʼ, ghə n kpii tsu ghi və̀n i wù zə ghə boʼlə shiə bənə, à n lòʼ sey nə̀ â loʼ sɔ̀ʼi fə waa u num ə zən ə kpusə u lòʼ wə. Ndəmə aghə̂ n lòʼ ghi wi.

¹³Nghee Mûkəbii koʼ tsunə wi, tə n kwɔɔlə isî n kow nyiə tii, dza tə̀ wi nə̀, “Ka kəm dey soʼo.”

¹⁴Tə n ndòw mɔm tsu mbuŋ key ghə â boʼo keelinə tii, ghə̂ ghey ghə â boʼo keeli n təmi tsu. Ambə ghə təmi tsunə, tə n dza tsu nə̀, “Mbwɔ, n dza nə̀ wə nuu kɔʼ.”

¹⁵Wù kpû wey n daŋŋə nuu doʼo i kɔʼ kaʼ ndòw nə u ghɔɔmə wə. Yeso n ney fu dzəŋŋə ndòw wi tə̀ nay wi.

¹⁶Ghə̂ ghey n zey ndòw ni tsəŋ, kaʼ ni fuu ukali tə̀ Zə̀ kə dza, “Wù tûm Kəzə̀ u nii u loʼ wə n bən shi kɔʼ n fəŋŋə kə saa. Zə̀ kə n sey bə ni bə koʼ ghə̂ a wi.”

¹⁷Zɔŋ u Yeso wə n fuŋ tsəghə kaabə bə n naʼ i Judeya nsə n mboʼo tii idzəm.

¹⁸Ambə ngəd tə Jɔn tə koʼ tsunə ghəə a ghən, ghə n ndòw tiilə dza ndòw tə̀ wi. Sey Jɔn n tɔŋɔ tsu ngəd tə wi təbəghə,

¹⁹tûm ndòw ngəd tə tii tə nə̀ ghə ndòw bəb tə̀ Yeso nə̀, “À loʼ wɔ ghey â ləmmənə ə nkee ghey khə ni nam ləmə wù tii?”

²⁰Ambə ghə bə kòʼ bənə Yeso, ghə n dza ndòw tə̀ wi nə̀, “Jɔn Wù fuu u mmuu n Kəzə̀ mə tûm bə ghey, nə ghey bə bəb bə tə̀ wɔ nə̀, ‘À lòʼ wɔ tə â dzanə nə wə i bəghənu nkee ghey khə ni nam ləmə wù tii?’”

²¹N nəŋə i tii zə kə, Yeso n baŋŋə tsu lii tə tədzaŋa n kow aghə̂, dzùm shiə zay u bwu wə n kow ghə̂ ghə, ndəmə ghə̂ a fəbə ghə n kaʼ ni koʼ.

²²Yeso beeli ndòw ghə dza, “Dzəŋŋə ndòw na, ghaa ndòw naʼa ndòw tə̀ Jɔn ghəə ghey ghaa koʼnə nsə a ghey ghaa zownə, nə̀ ghə̂ a fəbə a nyaʼ koʼonu, kə̀ŋə̀ wə â bweynə, ghə̂ ghə ukə̀m ghə u taw, kuʼ wə â zownə tuŋŋə wə, ghə̂ a kpuu ghə a zhəm dzəŋŋə bə nə̀, ghə̂ a laa ghə a zow soʼonə tûm Kəzə̀ i dzuŋu zə.

²³Buulə i loʼ tə̀ wù wey tə səmə way ni dzûmə mə.”

²⁴Ambə tsətəndəghə tə Jɔn tə nuu ndownə, Yeso n kaʼ ni ghɔɔmə tə̀ nɔɔ kə aghə̂ key bòʼ Jɔn dza, “Ghaa â baa ndòw n mbvən ə ntsaŋ ni ndòw koʼ kee? A loʼ kədzaŋ zəŋ noʼlənə mɔ?

²⁵Ghaa â baa ndow ni ndow koʼ kee? Wù nə tə n wû u lab dzɔb mɔ? Ngaŋ! Ghə̂ ghey ghə labənə wû zə, muu nə idyat, loʼ nə tətɔʼ.

²⁶Baa dza bə na fə̂ key ghaa â ndòwnə ni ndòw koʼ. Â lòʼ wù tûm Kəzə̀ ə? Ndzəm ndzəm, ghaa mâ ndzə̀m koʼ wù nə tə bùʼ tsəghəshi wù tûm Kəzə̀.

²⁷Â wən lòʼ wù wey ghə a tɔ̀ɔ naŋanə n màʼlə K-a-zə̀ nə̀, ‘Mə i tûm bə tsəndəghə isə̂, nə tə bə bayyə naŋa jii zə.’

²⁸Na n kûm dza bə tə̀ ghaa, Jɔn tsəghəshi ghə̂ ghən adzəm ghə ji naŋa koʼnə fa n mbi. Abə n fɔɔ u Kəzə̀, Jɔn ka kɔʼ kùm dzə wù wey tə guŋŋə bə nə.”

²⁹Ghə̂ ghey adzəm nsə ghə̂ a kwɔɔ ghə umaʼlə ghey ghə a zownə ghəə ghən Yeso dzanə, ghə n bəghəm kɔʼ nə̀ saʼ i Kəzə̀ i kpiinu, n təŋkey, ghə mâ ney mmuu n Kəzə̀ mə n wɔ̂ Jɔn.

³⁰Ghə̂ a tə Falasi nsə ghə̂ a dii ghə ulaŋ ghə n tuu maʼa saʼ i Kəzə̀ zə n wû i ghə nghee ghə â ka ney dzə mmuu n Kəzə̀ n wɔ Jɔn.

³¹Yeso n tsəghə ndòw n sə kə dza, “N lòʼ ni foʼlə ngee ghə̂ ghən nya n num tən ə? Ghə baa lòʼ ngee?

³²Ghə lòʼ tə a loʼ aghinətəghə n bikiwən, ghə ghɔɔmə tiilə ndòwnə n wû i ghə dza, ‘A tɔŋ ndɔŋ, ghaa ka bən, A u zhəm dzaŋ ivə, ghaa ka dey.’

³³‘Jɔn wù fuu u mmuu n Kəzə̀ mə â bənu zəə way baa kə, məə way nlə mə, ghaa n dza nə̀ tə khə zay kə bwu kə.’

³⁴Waa wù sɔŋtsuʼ u bənə, zəə, məə nlə, ghaa u dza, ‘Koʼo na tə wən ə, a lòʼ gub, wû khəə wə nlə wə, à loʼ wù fə̂ ə ghə̂ a kwɔɔ a kəmàʼlə ghə nsə ghə̂ a bəbə ghə.’

³⁵À kee loʼ nə̀, tɔb u Kəzə̀ u lòʼ isəŋə n muu i ghə̂ ghey ghə bəghəm nə̀ tə̀ wi.”

³⁶Wù Falasi u lòʼ wə n tɔŋɔ tsu Yeso nə tə bə zə ghi wi, sey, Yeso n ndòw n ndaw wù tii, ndòw doʼo tsu nə u zəə wə.

³⁷Weyzən u lòʼ wə n lòʼ fu n naʼ i tii zə tə â muunə muu i bəbə zə. Ambə tə zow tsunə nə̀ Yeso zəə n ndaw wù Falasi wey, tə n bə n mmbvə n ləmmə mə n sɔ̀ʼ fə alabasta.

³⁸Tə n bə nyaʼa doʼo bə n baa Yeso, dey tsuulə tsu nsə̂ n fuu i Yeso, zə̀llə̀tsu fuu i wi n nyûŋ tə kətow tə wi, tsoʼlə tsu n mmbvə n ləmmə mə.

³⁹Ambə wù Falasi wey tə mə naʼanə Yeso koʼ tsunə sey, tə n moʼlə n fə̀ŋ ə wi nə̀, “Abə wù wən mə ndzəm lòʼnə wù tûm Kəzə̀, tə̂ tə mə khə wù wey tə mɔmmə nə wi, ndzoʼo weyzən wən tə lòʼ ghii wi, nə a loʼ weyzən u bəbə wə.”

⁴⁰Yeso n dza tə̀ wi nə̀, “Shimun, n khə ghə i lòʼ zə ni dza tə̀ wɔ.” Tə n dza, “Dza bə a wù Dii wə.” Yeso n dza tə wi nə̀,

⁴¹“Ghə̂ a loʼ ghə abəghə ghə â khə kəndàŋ n wɔ wû lòʼ tə â fuulə fuu shiə tsənə khəə wə. Wù umɔ̀ʼ n khə kəndàŋ nə nbɔm ntaa, u lòʼ wey n khə kəndàŋ nə nghəm ntaa.

⁴²Ambə tə kòʼ tsunə nə̀ ghə way ni tsə dzəŋŋə khəə u tii wə, tə n kwɔɔlə isî n kow ghə, kàa maʼa tsu ndàŋ kə ghə nə kə ghə nə kə̀m tsəənə. Wə̀ moʼolə nə a loʼ ndee n tow ghə ubəghə tə î ngii ləghə tsəghəshiənə nə wi?”

⁴³Shimun n beeli ndow nə̀, “N moʼlə nə̀ â lòʼ tə wey ghə â ndəŋ kàa maʼa tsu ndàŋ kə wi kə.” Yeso n dza tə̀ wi nə̀, “Wə n saʼ dzɔb.”

⁴⁴Yeso n khə̀mə laalə ndòw weyzən wey, dza tə Shimun nə̀, “Wə koʼonu weyzən wən ə? N nyi bə n ndaw zə, wə ka mə n mmuu mə fu nə n kaali ifuu tii, tə u nyi bənə, sow maʼa fuu zuŋ n sə̂ n wi, zəd maʼa n nyûŋ tə kətow tə wi.

⁴⁵Wə ka mə maŋŋə keeli dzə ni kpii ney mə nghee n mə bənə, weyzən wən sa khə kə kəfwaʼ ni zəllə fuu zuŋ zə tə̀ tə mə nyi bə nə fa.

⁴⁶Wə ka kuu soʼo mmbvə mə n tow kuŋ, tə u tsoʼlənə fuu zuŋ zə n mmbvə n ləmmə mə

⁴⁷Sey, n dza bə tə wɔ nə ndzoʼo ləghə zən tə dii bə nə̀, lòʼ ni dii bə nə ghə n ghəə a wi a bəbə ghə neyzəə may adzəm, a sə downə. Abə wù wən tə diinə nyaŋi fə iləghə fə, a sey lòʼ nə ghə n neyzəə nyaŋi fə ibəb fə wi fə.”

⁴⁸Sey, Yeso n dza ndow tə weyzən wey nə̀, “Ghə n neyzəə ghəə ghə a bəbə ə ghə.”

⁴⁹Ghə̂ a lòʼ ghey ghə a lòʼnə fu, ghə n kaʼ ni moʼlə n fə̀ŋ tə ghə nə̀, “À wən lòʼ ndzoʼo wù ghaa wə, tə loʼnə ni neyzəə ghəə â ghə̂ a bəbə ə ghə.”

⁵⁰Yeso n dza ndow tə weyzən wey nə̀, “bəghəm i fə̀ŋ zə zə̀ n wɔ bəghəshi, ndòw kə nyaʼa nyaʼa.”