Read Weh Lukas 8 Bible Online

Lukas 8 - Weh bible

Lukas 8

¹Ambə ghəə ghən a tsəghə tsunə, Yeso n bwey ndòw naʼa tə naʼa, naʼlə ndòw tûm i dzuŋu zə bòʼ fɔɔ u Kəzə̀. Tsətəndəghə tə wi tey ighəm n ghə̂ ghə abəghə ghə n lòʼ ghi wi,

²nsə gheyzən a loʼ ghə Yeso â baŋŋənə ghə nə tədzaŋa, dzùm shiələ zay u bwu wə n kow ghə, ghə â loʼ; Maria wən ghə â tɔŋŋənə nə̀ a loʼ Maʼdala tə â dzùm shiələnə vəətsəə ghə asəghəmbəghə n kow wi,

³Joana wey Kuza tə â lòʼnə tow kə ghə̂ a kəfwaʼ ghə n ndaw Helɔd. Susana â loʼ soʼo tii, nsə ndəmə gheyzən a loʼ ghə̀ ghə â gaamənə ni tɔɔmə Yeso ghi ghə̂ a wi ghə n ngəŋə ghə.

⁴Nghee tə̀ nɔɔ kə aghə̂ kə dzəŋi bənə n səə Yeso nə̀ ghə nuu bə naʼa tə naʼa, Yeso n ghɔɔmə ndòw tə̀ ghə n ghɔɔmə i fənkəfən dza.

⁵“Wù usum u lòʼ wə â soʼnu ni ndòw təm təndzoʼ, nghee tə̀ tə təmə ndownə, tə lòʼ tə n tsɔʼlə bə n jii fə usum, ghə̂ ghə n dəʼlə nə aghow, nnən mən n zəʼlə idəŋ n bə tsowwə fə nuu kɔʼ.

⁶Tə lòʼ tə n tsɔʼlə n luʼu kə atay. Ambə tə fòw kɔʼnə tə n zum nuu i tsu tədzəm təŋkey luʼu kə tii kə, kə â kay way.

⁷Tə lòʼ tə n tsɔʼlə bə nə ukaakaa. Ambə tə fòw kɔʼnə, nyîmmə, kaakaa wə n nyîmmə soʼo, nyim zɔʼi naŋa tsu ndzoʼ tə tii tə.

⁸Ndzoʼ tə loʼ tə n tsɔʼlə bə n zub tə dzuŋu tə, tə n nyim i kɔʼ, bɔŋ dzɔb kɔʼ nə ukaʼ, sə̂ ghə asaŋ ghə n loʼ fəbɔm, fəbɔm nə ikey.” Ambə Yeso ghɔɔmə may tsunə, tə n dza shi kɔʼnə, “Wù wey tə khənə tuŋŋə wə, tə zow.”

⁹Ngəd tə Yeso tə n bəb ndòw tə̀ wi nə̀, “Ghɔɔmə i fənkəfən zən dii nə̀ ngee?”

¹⁰Tə n beeli ndow ghə nə̀, “Ghə n fu ghaa n tɔb u tii wə ni zowkeeli sad i fɔɔ u Kəzə̀, abə ghə̂ a lòʼ ghey n khə kə ni ghɔɔmə tə ghə n ghɔɔmə i fənkəfən; sey, ghə i lòʼ ni laalə, koʼo keeli way; zəllə zowkeeli way.

¹¹À wən lòʼ ghəə zey ghɔɔmə i fənkəfən zən dii nə̀, ndzoʼ tey lòʼ ghɔɔmə i Kəzə̀.

¹²Tə tey tə â tsɔʼlənə n jii fə usum, a loʼ ghə̂ ghey ghə zownə ghɔɔmə i Kəzə̀ zə, vəətsəə ghə n bə ney nuu kɔʼ ghɔɔmə i Kəzə̀ i tii zə n fə̀ŋ tə ghə, nə kə ghə nə keeli bəghəm i fə̀ŋ zə tə ghə keeli ibəghəshi.

¹³Tə tey tə â tsɔʼlənə n luʼu kə atay, à lòʼ ghə̂ ghey ghə zownə ghɔɔmə i Kəzə̀ zə, ney naŋa nə iduʼlə, zə n ka nyi təmi dzə n fə̀ŋ tə ghə, ghə bəghəm kɔʼɔ kə n tɔŋɔ fə inəŋə, ambə mɔɔmə koʼ i bənə, ghə n bwùlə doʼo i ndòw.

¹⁴Ndzoʼ tey tə â tsɔʼlə bənə nə ukaakaa, à lòʼ ghə̂ ghey ghə zownə ghɔɔmə i Kəzə̀ zə, ambə ghə nuu ndownə, chɔd u mbi, ikum, nsə laabə i mbi zə n zɔʼi naŋa tsu ghəə a Kəzə̀, ghə n way ni nyim taw n bəghəm fə̀ŋ i ghə.

¹⁵Tə tey tə â tsɔʼlə bənə n zub tə dzuŋu tə, à loʼ ghə̂ ghey ghə zownə ghɔɔmə i Kəzə̀ zə, ngɔɔmə naŋa n fə̀ŋ tə dzuŋu tə, zuŋə kwɔɔ keeli tsu wû i ghə, zə n məə bə tam u dzuŋu wə n muu i ghə.

¹⁶Wù daa way daa kə tə n kəm tsət naŋa tsu nə̀ ifuʼ nkee n tənə ukay. Ghə daa kə naŋŋə tsə nə kənyələ nə abə ghə̂ a nyiə bənə ghə n koʼo asə̂ tii.

¹⁷Təŋkey ghə i lòʼ i way i nyi doʼonə nə̀ i nə shi koʼ way n mgbâŋ, nkee i tsət doʼonə nə̀ ghə nə ney naŋa bə way təghə.

¹⁸Sey, ghə̂mə na nghee ghaa zəllənə ghəə ghə tii, n təŋkey wù wey tə khənə fə kə, tə î keeli kpiʼinu, abə tə wey tə khə way fə kə loʼ kə, nyaŋi fey tə moʼlənə nə i khənu ghə i neynu daŋŋə.”

¹⁹Ambə nay Yeso ghi waazə a wi a bənə ni bə koʼ wi, ghə n dəmə kìi ni nyi koʼ wi bòʼ nɔɔ key kə â lòʼ fu.

²⁰Wù lòʼ n dza ndòw tə̀ wi nə̀, “Nay wə ghi waazə ghə a tey bii, ghə ləghə ni kòʼ wɔ̀.”

²¹Yeso n beeli dza ndòw tə̀ ghə nə̀, “Nay wûŋ ghi waazə ghûŋ a lòʼ ghə̂ ghey ghə zownə ghɔɔmə i Kəzə̀ zə̀, ghəŋə ndòw ghə zey i dzanə.”

²²Ambə n tsuʼ fə lòʼ fə Yeso n lòʼ n gûŋ inyi ghi tsətəndəghə tə wi tə. Tə n dza tə̀ ghə nə̀, “Bəghə na a daŋ shi ndòw n ŋgûŋ i zey.” Sey, ghə n nyi kɔʼ nə kəfən nuu ndòw nə u daŋa wə,

²³nghee tə̀ ghə daŋa ndownə, Yeso n kaʼ nə̀ u bweeli wə, zəŋ i taw zə n gbəllə kaʼ ni tsəghə fu tii nə inyi, sey mmuu mə n kaʼ ni nyi nə kəfən, à n lòʼ tə̀ fən kə i məllənu.

²⁴Sey ngəd tə Yeso tə n ndòw zhəm kɔʼ wi dza, “mûkəbii, fən kə nya kuŋunu.” Yeso n taa nuu kɔʼ, kii ndòw zəŋ zey nsə tuŋutuŋu tey, tə n bɔɔmə tsu buu doʼo i tsu, luʼu tə n tsu kây doʼo i tsu.

²⁵Tə n bəb ndòw tə̀ tsətəndəghə tə wi tə nə̀, “bəghəm i fə̀ŋ i ghaa i lòʼ ghee.” Dzuu zə zum ghə̂, ghə n lòʼ nə itsəŋ, bəbə n wû i ghə nə̀, “À wən baa lòʼ ndee, tə kiinə zəŋ nsə dzùu, zə n zow tə wi ə?”

²⁶Yeso ghi dzûmə tə wi tə n daŋ nyi ndòw n mboʼo Jerasenes, zə â laalə daŋa bənə Galili.

²⁷Ambə Yeso shi tsu tsunə nə kəfən n nguŋ i dzùu, tə n kpii tsu ghi wù loʼ tə nuu bə fu inaʼ, nə vəətsəə a lòʼ n kow wi. Wù tii â kəm dzəŋŋə tsə way ndzə tə, mù soʼo way n ndaw, lòʼ tən kə n dzuu a təsay.

²⁸Ambə tə koʼ tsu nə Yeso, tə n buʼ shi kɔʼ kəbɔŋ, bwù ndòw n tənə fuu i Yeso dza shi kɔʼ n dzə i taw zə nə̀, “Yeso waa Zə̀ kə idəŋ kə, n khə kee ghi wɔ? N buʼ kəwɔɔ tə wɔ, ka mə chɔd dzə.”

²⁹Tə â dza sey təŋkey Yeso ma tsəʼlə laŋ kə nə zay u bwu wey nuu shi kow wi. Ndəmə tənəŋə, zay u bwû u tii wə â bəghə wə n ney nuu ndòw wi, abə ghə kùm naŋa tsu kə wi nə tətsaʼ; ni kpii nsə ni fuu, tə n nam tiillə maʼa istu, vəətsəə a tii ghə n ney shi ndòw wi n mbvən ə ntsaŋ.

³⁰Yeso n bəb ndòw tə̀ wi nə̀, “Zəd zə i lòʼ nə a loʼ ndee?” Tə n beeli kɔʼ, dza nə̀, “Zəd zûŋ i lòʼ nə a loʼ nɔɔ kə.” Tə â dza sey tənkey vəətsəə ghey mâ ndəŋ nyi doʼo kow wi.

³¹Ghə n buʼu kuulə kəwɔɔ tə̀ Yeso nə kə̂ tə nə tûm nə ghə n fɔŋŋə kə iwad key kə kuʼu way.

³²Â n lòʼ sey nə̀ nɔɔ kə ufeelibu kə lo fu kə zəə kaabə tsə fu nə ukaʼ. Zay u bwû wey n buʼ ndòw kəwɔɔ tə̀ Yeso nə tə mə zəghə ghə, ghə nyi ndòw kow feelibu wey, sey tə n zəghə tsu ghə.

³³Ambə vəətsəə ghey nuu shi bənə n kow wù wey, ghə n nyi ndòw n kow feelibu wey, ghəŋə feelibu wey wə n kwɔɔ tsu ndòw n gəə kə taw key, nyi kuŋ nay ndòw nə inyi.

³⁴Ambə ghə̂ ghey ghə â laalənə feelibu wey koʼ tsunə sey, ghə n nuu ndòw n tsi zə, naʼlə ndòw ghə zey i shinə nə inaʼ nsə nə təmbvənə.

³⁵Ambə ghə̂ a bənə ni bə kòʼ ghə zey i shinə, ghə n bə kòʼ bə Yeso nsə wù wey Yeso â dzùm shinə zay u bwu wey n kow wi tə doʼnə fuu ghi Yeso nə tə n ndzə tə dzəŋŋə lòʼ dzɔb n tɔ̀b u wi wə̀. Tsəŋ zə n kwu ghə.

³⁶Ghə̂ ghey ghə â kòʼnə ghə zey i shinə, ghə n tiilə dza ndòw tə̀ ghə nghee tə̀ ghə mə baŋŋənə wù wey tə â loʼ n vəətsəə ghə tii.

³⁷Sey, ghə̂ ghey fu n mboʼo Jerasenes adzəm n dza tə̀ Yeso nə̀ tə ndòw nuu n naʼ i ghə təŋkey tsəŋ i mâ ghə ngi nyi, sey Yeso n nyi dzəŋŋə kɔʼ nə kəfən nuu i ndòw.

³⁸Wù wey Yeso â dzùm shinə zay u bwu wey n kow wi n kee buʼ kəwɔɔ tə̀ Yeso nə i dzûmə bə wi. Yeso n fəd dzùm dzəŋŋə ndòw wi ibàm dza,

³⁹“Ndòw dzəŋi ibàm n ghə̂ ghə ghə̀, wə i tiilə dza ndòw ghəə a nii ghey Zə̀ kə ghəŋənə tə̀ wɔ.” Wù tii n nuu i ndòw, naʼlə ndòw ghəə a nii ghey Yeso ghəŋənə tə̀ wi nə inaʼ idzəm.

⁴⁰Ambə Yeso dzəŋŋə bənə n nguŋ ə nyi i lòʼ zən, nɔɔ kə aghə̂ key kə â ləmmənə wi n kpii ney kɔʼ wi.

⁴¹Wù lòʼ n ndòw bə fu tə â lòʼnə wù nii wə n ndaw kədzəŋi ə ghə i lòʼ zə ghə â tɔŋŋənə wi nə̀ a lòʼ Jayrus. Tə n bə təm bə tənguʼ n səə Yeso, buʼ kəwɔɔ tə̀ wi nə̀ tə bə n ndaw wi,

⁴²n təŋkey sɔʼi fə waa fə wi fə zən fə, fə â lòʼ nə num tə ighəm nsə num tə təbəghə, fə â kpuu kɔʼɔ bənu. Nghee tə̀ Yeso ndownə, nɔɔ kə aghə̂ kə n zuʼu ndòw n kow wi.

⁴³Weyzən u lòʼ wə̀ n lòʼ fu nə̀ tə n muu num tə ighəm nsə num tə təbəghə nə̀ tə bam ndzɔŋ. Tə n lòʼ nə̀ tə n bəəbə may khəə u wi wə udzəm n wɔ ghə̂ a təngaŋ ghə, wù umɔʼ ə ghə n tsəm way ni baŋŋə wi.

⁴⁴Tə n fàʼlə nyi ndow n fəŋŋə kə aghə̂, ndòw mɔm tsu ndzə tə Yeso ibàm, bam i ndzɔŋ i tii zə n daŋŋə may tsu n kow wi.

⁴⁵Yeso n bəb tsu nə̀, “A mə mɔm ndee?” Ghə̂ ghey ghə â lòʼnə n səə wi n tuu tsu kə adzəm. Pita n dza ndòw tə̀ wi nə̀, “Mûkəbii, ghə̂ à zuʼu kaabə n kow wɔ nə təbadla tədzəm, wə sə lòʼ ngee ni bəb nə̀ a mə mɔm ndee?”

⁴⁶Yeso n dza tə̀ wi nə̀, “Wù n mə mɔm, n təŋkey daʼa kə n nuu shi n kow mə.”

⁴⁷Nghee tə weyzən wey koʼ tsunə nə̀ tə way ni nyi wû u wi, tə n tsəŋə bə təm bə tənguʼ n tənə Yeso, dza shi kɔʼ zuŋ kə ighəə key kə ghəŋənə nə̀ tə mɔm Yeso, nsə nghee dzaŋ i wi i daŋŋə may tsunə.

⁴⁸Yeso n dza ndòw tə̀ wi nə̀, “N waa, bəghəm i fə̀ŋ zə zə̀ n wɔ baŋŋə, ndòw nə ibuulə.”

⁴⁹Nghee tə̀ Yeso nam ghɔɔmənə, wù lòʼ n nuu bə n ndaw Jayrus wù nii wey n ndaw kədzəŋi, bə dza tə̀ wi nə̀, “Waa wey n kpu, ka wù dii kəm fəmmə soʼo.”

⁵⁰Ambə Yeso zow tsunə sey, tə n dza ndòw tə̀ Jayrus nə̀, ka tsəŋ dzə, keeli tsu bəghəm i fə̀ŋ zə, waa wə i tawnu.

⁵¹Ambə ghə ndòw nyi ndòwnə n ndaw Jayrus, tə n ka bəghəm nə̀ wù lòʼ kəm nyi ndòw fu tii n ndaw ghi wi tsəghəshiə way Pita, Jɔn, Jems isə bày waa ghi nay waa.

⁵²Ghə̂ ghey ghə â lòʼ fu tii n deyyə, mow bòʼ waa tii. Yeso n kə̀m ndòw ghə dza, “Kə̂ ghaa nə deynə, tə ka kpuu dzə, tə bweelinu.”

⁵³Ghə n fəd tsòʼ maʼa wi təŋkey ghə â khə nə̀ tə n kpuu.

⁵⁴Yeso n kuŋŋə kwu kɔʼ kpii kə wi dza, “N waa, nuu kɔʼ.”

⁵⁵Zay kə wi kə n bɔɔmə dzəŋŋə bə, tə n ghaʼ nuu kɔʼ. Yeso n dza nə̀ ghə kəŋ fu ndòw wi n fə kə zəə kə.

⁵⁶Ghə i tii zə n ngii tsəghəshi bày waa tii ghi zə̂. Yeso n fəd dza ndòw tə̀ ghə nə̀, “Kə ghaa nə dzanə ghəə zey i shi tə̀ wù loʼ.”