Read Weh Lukas 9 Bible Online

Lukas 9 - Weh bible

Lukas 9

¹Ambə n tsuʼ fə lòʼ fə, Yeso n tɔŋɔ naŋa bə tsətəndəghə tə wi tey ighəm n ghii tə təbəghə, fu tsu ghə n daʼa kə ni dzùm shi zay u bwu wə nsə ni baŋə tədzaŋa.

²Sey, tə n tûm shi ndòw ghə nə ghə ndòw naʼa ghə i fɔɔ u Kəzə̀ nsə ni baŋə ghəə a dzaŋa ghə

³Tə n dza tə̀ ghə nə̀, “Kə̂ ghaa nə neynə fə kə lòʼ kə n bwey i zən, tə a loʼ mbaŋ, mɔ kəmbəghə, mɔ ufəzəə, nkee ukhəə, kàsə ndzə tə tsɔʼɔ kweyyə tə.

⁴Nə a loʼ kə n ndaw i ghaa zə ghaa nyi nə̀, doʼo na fu ni ndòw kùm tsuʼ fey ghaa i nuulənə tii.

⁵Abə ghaa nyi ndòwnə n naʼ i lòʼ zə nə̀ ghə ka ghaa bəghəm naŋa fu, nghee ghaa shiə ndownə, ghaa n buʼ maʼa tsu bvə key n fuu i ghaa ni dii tsu nə̀, ghə ka ghaa bəghəm naŋa fu.”

⁶Sey, ghə n nuu shi ndòw, bwey naʼa tə naʼa, naʼlə ndow tûm Kəzə̀, baŋə ghə a dzaŋa ghə.

⁷Ambə Helɔd wən ghə â tɔŋŋə soʼonə nə̀ à loʼ Antipas, tə â saʼanə mboʼo Galili zow tsunə ghəə ghey Yeso â fwaʼanə, tow kə n fwɔdlɔ wi n təŋkey ghə̂ a loʼ ghə â dza nə̀ a loʼ Jɔn wù fuu mmuu mə tə zhəm dzəŋŋə bənə nə ivə,

⁸a loʼ ghə n dza à lòʼ Tûm Kəzə̀ Elayja tə bənə, a lòʼ ghə n kee dzanə à lòʼ Tûm Kəzə̀ u wey wə tə bə dzəŋŋə nə.

⁹Helɔd n dza, “N mâ gboo tow kə Jɔn kə, a wən kəm lòʼ ndee ghə dzanə ghəə ghən bòʼ wi ə?” Tə n kəŋə jii ni kòʼ wi.

¹⁰Ambə ngəd tə Yeso tə dzəŋŋə bənə tə̀ Yeso â tûm shinə ghə, nə̀ ghə ndòw naʼa tûm Kəzə̀. Ghə n bə dza bə tə̀ wi nghee tə ghə fwaʼ kuumnə. Yeso n ney ndow ghə n luʼu k-a-nyi n naʼ i Bedsayda.

¹¹Nghee tə̀ ghə̂ a keeli tsunə luʼu key tə loʼnə tii, ghə n dzûmə ndòw wi. Tə n kpii ney kɔʼ ghə, ghɔɔmə tə̀ ghə bòʼ fɔɔ u Kəzə̀, baŋŋə a ghey ghə â loʼ nə̀ ghə khə tədzaŋa.

¹²Ambə nyi i nəmə tsu ndownə, tsətəndəghə tə wi tey ighəm n ghə̂ ghə abəghə n bə dza tə̀ wi nə̀, “Zəghə ndòw ghə̂ ghey, ghə ndòw nə tə naʼa, nsə nə tə mbvə̀nə̀ n mboʼ zən tə̀ ghə lòʼ ni keeli fə kə zəə kə nsə luʼu kə bweeli kə kûm nə saa fa loʼ n mbvə̀nə̀ ntsaŋ.”

¹³Yeso n beeli dza ndòw tə ghə nə̀, “Fu na ghə n fəzəə wə.” Ghə n beeli ndòw wi nə̀, “ghey fa khə kə nbàa ntâ nsə tsəghə tə təbəghə, à may kə nə̀ a ndòw kəŋ zuu bə ufəzəə tə̀ ndəmə ghə̂ ghən.”

¹⁴(Ghə̂ ghə â loʼnu fu tə â loʼ tə kam tə tâ) Yeso n dza ndòw tə̀ tsətəndəghə tə wi tə nə̀, “Ghəŋŋə na nə̀ ghə doʼo tsu nə ntuʼu nghəm ntaa, ntaa.”

¹⁵Ambə ghə ghəŋə tsunə sey,

¹⁶Yeso n ney kɔʼ baa wey utaa n tsəghə tey təbəghə, laalə kɔʼ ndòw kədəŋ, fu ndòw zɔŋŋə K-a-zə̀ n fəzəə u tii wə, ney boʼlə i tsu, fu ndòw tə̀ tsətəndəghə tə wi tə nə ghə dzawwə fu ndòw tə̀ ghə̂ ghey.

¹⁷Ghə̂ ghey n zə kow tsu n tə̀ŋ kə ghə, boʼlə mə n səə doʼo tsu, wə n shi kɔʼ ukhəə ighəm n ghii wə ubəghə.

¹⁸Ambə n tsuʼ fə lo fə, Yeso n gɔŋŋə n nəŋə wi, tsətəndəghə tə wi tə n loʼ fu, Yeso n bəb ndòw tə ghə nə̀, “Ghə̂ à baa dzanə n loʼ ndee?”

¹⁹Ghə n beeli ndòw wi nə̀, “Ghə̂ a loʼ a dzanə wə loʼ Jɔn wù fuu n mmuu n Kəzə̀ mə. À loʼ ghə a dzanə wə loʼ Elayja, a loʼ ghə a kəm dzanə wə loʼ tûm Kəzə̀ u wey wə tə zhəm dzəŋŋə bənə nə ivə.”

²⁰Yeso n bəb tə̀ ghə nə̀, “Abə ghaa, ghaa dza nə̀ N loʼ ndee?” Pita n beeli ndòw wi dza, “Wə loʼ Klisto Waa Kəzə̀.”

²¹Yeso n kii ghə, nə kə ghə nə dzanə tə̀ wù loʼ.

²²Tə n kəm dza tə̀ ghə nə̀, “Waa Weynum i teeli fəʼlənu, n ndəmə tə aghə̂, tə̀ ngəd, ghə fɔɔngili a nii ghə, n ghə̂ a dii ghə ulaŋ ghə i tuu maʼa tsu wi, ghə i wey wi, tə i kəm zhəm dzəŋŋə bə nə ntsuʼ ntəghə.”

²³Yeso n dza tə ghə adzəm nə̀, “Abə wù ləghənə ni dzûmə mə, tə khə ni tuu maʼa tsu wû u wi, tə boʼo kɔʼ zat kə fəkaʼ kə wi, tə dzûmə mə ntsuʼu ndzəm.

²⁴Təŋkey, wù wey tə ləghənə ni bəghəshi wû u wi, tə i fədlə guŋŋənu, abə wù wey tə guŋunə muu i wə zə bòʼ mə i fəd keeli ibəghəshi.

²⁵Wù î zəə kee abə tə keeli tsunə fə u mbi wə udzəm kee guŋə kɔʼ tow kə wi ə?

²⁶Wù wey tə i dədlə n tow kə bòʼ mə nsə ghɔɔmə zuŋ zə, Waa wù sɔŋtsuʼ nə dədlə soʼo n tow kə tə wù tii abə tə nə bənə n kɔʼlə n wi mə, nsə kɔʼlə n Bày mə nsə tsətəndəghə tə Kəzə̀ tə zow tə.

²⁷N dza bə isəŋə tə ghaa, nghee saa teynə fa, ghə̂ a loʼ a loʼnu ghə i koʼonə fɔɔ u Kəzə̀ wə nə ghə ka kpu.”

²⁸Tsuʼu mə n tsəghə tsu tə̀ a loʼ ifam nghee Yeso khəə tsunə ghəə ghən tə̀ dzûmə tə wi tə. Tə n ney kɔʼ Pita, Jɔn ghi Jems kɔʼ ndòw ghi ghə nə ukaʼ ni ndòw gɔŋŋə.

²⁹Nghee tə gɔŋŋənə, tûm usə u wi wə n kweyyə i kɔʼ, ndzə tə wi tə n nyiəllə fəmmə tə a loʼ ghow i mwallə zə.

³⁰Ghə̂ a loʼ ghə abəghə n maŋ fòw shi kɔʼ fu tɔŋŋə Elayja ghi Mushi, ghɔɔmə ghi Yeso.

³¹Ghə â bən shi kɔʼ n ghaʼ i Kəzə̀, ghən ghɔɔmə i Yeso nghee tə̀ tə i kpuunə n Yerosalem, ni luulə laŋ kə bày.

³²Pita, nsə ghə̂ a wi a loʼ ghey n kee kùm tə bweeli. Nghee ghə zhim kɔʼnə ghə n koʼ ndòw ghaʼ i Yeso ghi ghə̂ ghey abəghə ghə â teynə ghi wi.

³³Nghee ghə̂ ghey zəghə tsu nə Yeso nuulə ndòw, Pita n dza ndòw tə̀ wi nə̀, “mûkəbii, i dzɔbənu nghee tə̀ a loʼnə fa, a loʼ ni bəghə kɔʼ nfəə ntəghə, fəmɔʼ tə wɔ, fəmɔʼ tə Mushi, fəmɔʼ tə Elayja.” (Tə â maŋa dza soʼo sey, khə way ghəə ghey tə dzanə).

³⁴Nghee tə̀ tə nam ghɔɔmənə, mbàʼ i loʼ zə n bə tsət bɔmi bə ghə, ngəd tə Yeso tey n zey ni tsəŋ.

³⁵Dzə n shi bə fuu n mbaʼ dza, “À wən loʼ waa wùŋ u tsuʼu wə n sày kɔʼnə, i zow na tə wi!”

³⁶Nghee tə̀ dzə zən ghɔɔmə may tsunə, ghə n kəm koʼ ndòw Yeso n nəŋə wi. Tsətəndəghə tə wi tey n fuŋ doʼo ndòwkə mɔŋ n ghə i tii zə, ghə n ka ngəmmə dza shi ghəə ghey ghə â koʼnə n nəŋə i tii zə tə wù loʼ.

³⁷Tsətsə wey, Yeso ghi tsətəndəghə tə wi tey n dzəŋi shi tsu bə nə ukaʼ. Nɔɔ kə aghə̂ kə n kwɔɔlə bə wi.

³⁸Wù loʼ n buʼ shi kɔʼ kəbɔ̂ŋ n fəŋ ə nɔɔ key; dza, “Wù dii! N buʼu kəwɔɔ, gaamə waa wùŋ, kuum nə̀, a loʼ kə wi n khənə.

³⁹Zay kə bwu kə kwɔɔ tsu wi, tə n buʼ shi kɔʼ kəbɔ̂ŋ, bwùkə n kwu daŋŋə bə wi, tsəbə tə n kaʼ ni shi n dzuu i wi, kə n ndzəmə kəghəmətsu wi, kə zaŋə zəghə way wi.

⁴⁰N mâ buʼ wɔɔ kə tə̀ tsətəndəghə tə tə̀ nə̀ ghə gaamə shi wi, ghə n dəm kii tsu.”

⁴¹Yeso n dza, “Ghaa ghən n num tən maŋ loʼ ghə̂ a laʼa bəghəm i fə̀ŋ zə, ghaa khə kə ghəə a bəbə ghə, mə i boʼo mûulə tənum tə siʼi ghi ghaa ni koʼo zeeli ghəə ghən ə? Mbwɔ, ney bə waa wə fa.”

⁴²Nghee waa wey kəŋə ndòw nə n səə Yeso, zay kə bwu key n ney maʼa bə wi aghəd nə kəbù, Yeso n kii ndòw Zay kə bwû key, baŋŋə tsu waa tii, waa wey n daŋŋə taw i kɔʼ, tə n ney fu dzəŋŋə ndòw wi tə̀ bày wi.

⁴³Dzuu zə n ngii zum aghə̂ ndzoʼo daʼa kə faalə key Zə̀ kə khənə. Tə n dza ndòw tə̀ tsətəndəghə tə wi tə nə̀,

⁴⁴“Kə ghaa nə neyzəənə ghəə zən n ndza n dza bə tə̀ ghaa nya, ghə nə ney tsəʼlə ndòw Waa wù sɔŋtsuʼ n wɔɔ kə ghə̂ a bwû ghə.”

⁴⁵Tsətəndəghə tə wi tə n ka zowkeeli dzə, n təŋkey ghəə a tii ghə â nyi doʼonu n jìi zey ghə â way ni zowkeeli. Ghə n tsəŋ ghaʼ soʼo ni bəb tɔʼlətsu ghə i tii zə n wɔ Yeso.

⁴⁶Ngəd tə Yeso tə n kaʼ ni baŋŋə təfəghəm n wû i ghə ni keeli wù wey tə loʼ nə wù nii n fəŋŋə kə ghə.

⁴⁷Yeso n khə moʼlə tey ghə khənə n fə̀ŋ tə ghə, tə n ney bə winətəghə, teyyi naŋa bə n səə wi,

⁴⁸dza ndòw tə̀ ghə nə̀, “Wù wey tə kpii neynə waa wən n zəd zuŋ, sey kpii ney mə. Wù wey tə kpii neynə mə sey kpii ney soʼo wù wey tə tûmnə mə. Wù wey tə loʼ nə wù kənunu n fəŋŋə kə ghaa, a loʼ wi tə loʼ nə wù nii.”

⁴⁹Jɔn n ghɔɔmə shi kɔʼ dza, “Bày, ghey n koʼ wù loʼ tə dzùm shiənə vəətsəə ghə n zəd zə, a u dəm tsunə ni kii naŋa ndòw wi təŋkey tə way dzə ghi saa.”

⁵⁰Yeso n dza ndòw tə̀ Jɔn nsə tsətəndəghə tə wi tə loʼ tey nə̀, “Kə ghaa nə kii naŋanə wi təŋkey wù wey tə tsayyə way wɔ sey loʼ ghi wɔ.”

⁵¹Ambə nəŋə i kpii bənə tə̀ Yeso ni kɔʼ idəŋ, moʼlə i wi zə n loʼ tən kə ni ndòw n Yerosalem.

⁵²Tə n tûm ndòw tsətəndəghə tə wi tə loʼ tə isə, n naʼ i loʼ zə n Samaria nə̀ ghə ndòw bayyə naŋa tsu aghəə tə wi.

⁵³Ghə̂ ghey fu n ka kpii ney dzə wi təŋkey tə â ndòw n Yerosalem.

⁵⁴Ambə ngəd tə Yeso tɔŋŋə Jems ghi Jɔn koʼ tsunə sey, ghə n bəb ndòw tə̀ wi nə̀, “Mûkəbii, wə̀ ləghənu nə̀ a tɔŋɔ tsu bə uvələ n bikighow u bə mayyə ghə ə?”

⁵⁵Yeso n khə̀mmə kii ndòw ghə.

⁵⁶Sey ghə n nuu ndòw muu ndow n naʼ i nuu zə.

⁵⁷Nghee tə̀ ghə ndòwnə n jii, wù loʼ n dza tə̀ Yeso nə̀, “Mə i dzûmə wɔ abə wə ndòw kə ghee.”

⁵⁸Yeso n dza tə̀ wi nə̀, “Səŋŋə n mû nə ubuʼ, nnən mə idəŋ mə a khə ndaw tə, Waa wù sɔŋtsuʼ kee khə way luʼu kə loʼ kə ni gaʼ tow kə wi kə tii.”

⁵⁹Tə n dza ndòw tə̀ u loʼ wə nə̀, “Dzûmə bə mə.” Wù tii n fəd dza ndòw tə wi nə̀, “mûkəbii, ndza ndow tsəllə bə dzə bày wùŋ”

⁶⁰Yeso n dza ndòw tə̀ wi nə̀, “naŋa tsu tə̀ ghə̂ a kpuu a tsəllə ndòw ghə̂ a kpuu ghə, abə wɔ, ndòw naʼa ndòw ghəə a fɔɔ u Kəzə̀.”

⁶¹Wù loʼ n dza ndòw soʼo tə̀ wi nə̀, “mûkəbii, N dzûmənu wɔ, n dza n ndòw tɔŋŋə zow tsu dzə ghə̂ ghuŋ n ndaw.”

⁶²Yeso n dza ndòw tə̀ wi nə̀, “Wù wey tə gaʼ dzə wɔɔ kə n fù ni vəllə, kəm laalə ndòw ibam, ka kɔʼ kpii dzə ni doʼo n fɔɔ u Kəzə̀.”