Read Weh Jɔn 10 Bible Online

Jɔn 10 - Weh bible

Jɔn 10

¹Yeso n ndow n sə kə, dza tə̀ nɔɔ kə aghə̂ kə nə̀, “N kuum dza bə tə̀ ghaa nə̀, wù wey tə bə ghab nyi kɔʼnə n mbàa tənjì nə̀ tə ka tsəghə n fuʼ u mbàa, wù tii loʼ wù tsɔŋɔ, tə loʼ soʼo kàm kə tsɔŋɔ kə.

²Wù wey tə kee tsəghə nyiənə n fuʼ u mbàa, loʼ wù baʼa u tənjì wə.

³Fwaʼ kə wù keyyə kə loʼ ni chi fuʼ u mbàa tə wù baʼa u tənjì wə. Wù baʼa u tənjì wey təmi tsu kə n fuʼ u mbàa, tə n tɔŋɔ nuu shi ndow njì tey n zəd a ghə, njì tə tii tə n zowkeeli dzə̂ ə wi, dzûmə shi ndow wi.

⁴Abə tə tɔŋɔ may shi bənə ghə, tə n nuu ndòw isə, njì tə tii tə n təŋə nuu bə n baa wi, n təŋkey, tə zowkeelinu dzə̂ ə wi.

⁵Nji tə tii tə way ni dzûmə wù wey tə khə way wi. Ghə î fədlə tyiənu, n təŋkey, ghə zowkeeli way dzə̂ ə wi.”

⁶Yeso n ghɔɔmə ghɔɔmə i fənkəfən zən tə̀ ghə, ghə n ka kee zowkeeli ghəə ghey tə dzanə.

⁷Sey Yeso n kəm dza ndòw tə̀ ghə nə̀, “N kùm dza bə tə̀ ghaa nə̀, n loʼ fuʼ u mbàa u tənjì.

⁸Ghə̂ ghey ghə â bənə isə n kow mə̀, loʼ ghə̂ a tsɔŋɔ ghə nsə kàm u tsɔŋɔ wə, njì tə â ka zowkeeli dzə dzə̂ tə ghə tə.

⁹N loʼ fû u mbàa, wù wey tə̀ tsəghə nyinə tii, tə î keeli ibəghəshi. Ghə i shiə fəə ghii wə, nyiə dzəŋŋə nə̀ ghə khə way fəmmə kə loʼ kə.

¹⁰Wù tsɔŋɔ bəghə kə ni bə tsɔŋ, ni wey, nsə ni bəəbə. Abə mə, n bə nə̀ ghaa keeli muu zə itsali, ghaa keeli muu i tii zə naʼ idzəm.

¹¹N loʼ wù baʼa u tənjì u dzuŋu wə. Wù baʼa u tənjì u dzuŋu u loʼ tə wey tə loʼ ni kpu n tow kə njì tə wi.

¹²Wù kəfwaʼ wey tə baʼanə njì tə nə̀ ghə i tsəə wi, way dzə tə a loʼ wù baʼa u tənjì u dzuŋu wə nkee muu tənjì, n təŋkey, abə tə koʼ tsunə bəghə kə, kə bəghənə, tə n tyi naŋa sə tsu tənjì, bəghə kə tii kə n bə kwu fə njì tə loʼ tə, dzum saŋŋə tə loʼ tə.

¹³Wù kəfwaʼ wən tyə naŋŋə səə tsu tənjì, n təŋkey, tə maŋa fwaʼa nə̀ ghə i tsəə wi, tə khə way nəŋə zə n kow njì tə tii tə.

¹⁴N loʼ wù baʼa u tənjì u dzuŋu wə, n khənu njì tuŋ tə, njì tuŋ tə u khə soʼonə mə.

¹⁵Nghee tə Bày wuŋ khənə mə, mə u khə soʼonə Bày wuŋ, à loʼ ighələ tə̀ n khənə njì tuŋ tə, njì tuŋ tə u khə soʼonə mə, à wey loʼ ghə i tii zə n loʼnə ni kpu n tow kə njì tuŋ.

¹⁶N khənu njì tə loʼ tə nə̀ tə way dzə n kaʼ kən. N khə ni ney təmdzəŋi bə ghə, ghə i dzəŋi zow tə̀ mə. Sey nə̀ ghə i dzəŋi loʼ nə kəkaʼ kəmɔʼ, ghə i khə soʼo wù baʼa u tənjì wə umɔʼ.

¹⁷Bày wuŋ ləghə mə n təŋkey n bəghəmnu ni kpu, sey nə̀, mə i kəm keeli dzəŋŋə bə muu zuŋ ibam.

¹⁸Wù way ni wey maʼa mə nə̀ a ka mə bəghəm, à kee tsəm tsu mə ni fuu nuu ndòw muu zuŋ. N khənu daʼa kə tii kə ni fuu, khə soʼo daʼa kə tii kə ni ney dzəŋŋə. À loʼ Bày wuŋ tə fuunə mə n laŋ kə nə̀ n loʼ ni ghəŋə sey.”

¹⁹Nghee ghə̂ a Təjuu a zow tsunə ghəə ghən, ghə n dzawwə doʼo kpiʼi tsu bòʼ ghɔɔmə i tii zə.

²⁰Ndəmə ghə n dza, “Zay kə bəbə kə loʼ n kow wù wən, tow kə kpiilə way, a loʼ kee ghaa zəllə zeelinə ghɔɔmə i wi zə ə?”

²¹Ghə̂ a loʼ ghə n dza nə̀, “Ghɔɔmə zən way dzə ghɔɔmə i wù wey zay kə bəbə kə loʼnə n kow wi. Zay kə bəbə kə loʼ ngee ni ghəŋə nə̀ wù fəbə i koʼo luʼu tə ə?”

²²Nəŋə zey ghə â zə̂ə tsənə zə̂ kə Tsuʼ fey ghə â chinə Ndaw Kəzə̀ zey n Yerosalem, â loʼ tə a loʼ n nəŋə i ndzɔŋɔ Kəzə̀[7].

²³Yeso n bwey tsəghə n Ndaw Kəzə̀ n bad key ghə tɔŋɔnə nə̀ a loʼ zeeli kə Solomun.

²⁴Ghə̂ a Təjuu ghə n zuŋŋə dzəŋ tsəghə kɔʼ wi, bəb tə̀ wi nə̀, “Wə i naŋŋə ghey nə kələm ni ndòw kùm zeeli? Abə wə̀ loʼnə nə̀ wə loʼ wù wey Zə̀ kə â dza naŋa nə̀ i tûm bənu, wə n shi bə tsətsəghə.”

²⁵Yeso n beeli ndòw ghə nə̀ “Mə n tə̀ ghaa dza, ghaa u kee ləghə way ni bəghəm. Ghəə ghey n fwaʼanə n zəd i Bày wuŋ, tiilə dza bə wù wey n loʼnə ghii wə.

²⁶Ghaa ləghə way ni bəghəm, n təŋkey, ghaa way dzə njì tuŋ,

²⁷Nji tuŋ tə zowkeelinu dzə̀ zuŋ. N khənu ghə, ghə u dzûmənə mə.

²⁸N fuu ghə n muu zə itsali zə, ghə nə̂ kpu koʼ way. Wù umɔʼ tsəm way ni bəkeeli nuu ghə n wɔɔ kuŋ.

²⁹Bày wuŋ wən tə fuu bənə ghə tə̀ mə, taw tsəghəshi aghə̂ adzəm. Sey wù umɔʼ tsəm way ni bəkeeli nuu ghə n wɔɔ kə Bày.

³⁰Mə ghi Bày a loʼ kəfə̂ kəmɔʼ.”

³¹Nghee ghə zow tsunə sey ghə̂ a Təjuu ghey n kəm kumi kpiʼi kɔʼ atay ni təmmə wey wi tii.

³²Yeso n dza ndòw tə̀ ghə nə̀, “Bày wuŋ n ghəŋə mə nə̀ n ghəŋə ndəmə ghəə a dzuŋu ghə. À loʼ ghə i ghaa zə tii i ghəŋənə nə̀ ghaa i dza nə̀ ghaa dza i təmmə wey mə nə atay ə?”

³³Ghə̂ a Təjuu ghey n dza tə̀ wi nə̀, “Ghey dza i təmmə wey wɔ n təŋkey, wə tsayyə Kəzə̀, a way dzə bòʼ ghəə a dzuŋu ghey wə ghəŋŋənə. Wə maŋ loʼ wù sɔŋtsuʼ, wə u ney naŋa kɔʼnə wû wə wə̀ nə̀ wə loʼ Kəzə̀.”

³⁴Yeso n beeli ndòw ghə nə̀, “N dza i mgbaŋ tɔ̀ɔ doʼo n màʼlə K-a-zə̀ nə̀, ‘N dza nə̀ ghaa loʼ uzə̀ ə?’

³⁵Ghaa khənu nə̀ ghɔɔmə i Kəzə̀ i kwey way. Abə Zə̀ kə â loʼ ni tɔŋɔ ghə̂ ghey ghə â zəllənə ghɔɔmə i wi zə nə̀ ghə loʼ uzə̀,

³⁶a kee loʼ kee ghaa dzanə nə̀ n tsayyə Kəzə̀ nghee tə n dza tsunə nə̀, ‘N loʼ Waa Kəzə̀ ə?’ Loʼ sey nə̀ à loʼ Bày tə sày kɔʼnə mə, tûm bə mə fa n mbi.

³⁷Abə N loʼ nə̀ n fwaʼa way fwaʼ key Bày wuŋ tûmnə mə nə̀ n bə fwaʼ, kə ghaa nə̂ bəghəmnə tə̀ mə.

³⁸Abə a kee loʼ nə̀ n fwaʼanu fwaʼ key Bày tûmnə mə nə̀ n bə fwaʼ, nə ghaa ləghə kə way ni bəghəm tə̀ mə, labi bəghəm kɔʼ kə na nə̀ ghəə ghey n fwaʼanə, loʼ ghəə a dzuŋu ghə. Sey ghaa i zowkeeli tsu nə Bày nsə mə loʼ kəfə kəmɔʼ.”

³⁹Ghə n kəm nuu kpiʼi kɔʼ nə̀ ghə kwu wi, tə n kee nii nuu shi tsu n wɔɔ kə ghə.

⁴⁰Yeso n kəm nuu daŋ dzəŋŋə ndòw n nguŋ ə dzùu Jodan i loʼ zey n luʼu key Jɔn â fuunə mmuu n Kəzə̀ mə tii, ndòw doʼo ndòw fu.

⁴¹Ndəmə aghə̂ ghə n bəghə n səə wi dza nə̀, “Jɔn â ka ghəŋə dzə faalə n loʼ mə, i sey diinə ghəə ghey adzəm Jɔn â dzanə kuum wù wən loʼ isəŋə.”

⁴²Sey ndəmə aghə̂ fu, ghə n bəghəm tə̀ wi.