Read Weh Jɔn 18 Bible Online

Jɔn 18 - Weh bible

Jɔn 18

¹Ambə Yeso gɔŋŋə may tsu, tə n nuu tsu ghi ngəd tə wi tə, daŋ shi kɔʼ bɔʼ kə loʼ kə ghə â tɔŋŋə nə̀ a loʼ Bɔʼ kə Kidrɔn, nyi ndow n dəŋə key sum u loʼ wə â loʼ tii. Wi ghi ngəd tə wi tə n nyi ndow n sum u tii wə.

²À n loʼ sey nə̀ Judas wən tə â fìi fuunə wi khənu luʼu kə tii kə, n təŋkey, Yeso â ndow kpiilə zeeli tsə fu ghi ngəd tə wi tə.

³Sey, Judas n ndow bə fu n sum u tii wə n saʼ kə təsawgoʼ kə ghi bwoli tə loʼ tə, tə â keyyənə n dzəŋi kə dzûmə tə Klisto key n Yerosalem, nə a ghə tûm bə ghə fɔɔngili a nii ghə ghi ghə̂ a tə Falasi ghə. Ghə n khə fə u tsam nsə saalə tə, a loʼ ghə n khə udaa.

⁴Yeso n khə zey ghəə zey i khə ni shi n kow wi. Tə n təmi shi bə isə, bəb tə̀ ghə nə̀, “Ghaa kəŋə ndee?”

⁵Ghə n beeli ndow wi nə̀, “Ghey kəŋə Yeso, wù Nazaled.” Yeso n dza tə̀ ghə nə̀, “A loʼ mə wi.” À n loʼ sey nə̀ Judas wey tə fìi fuunə Yeso tey dzəŋi soʼo fu ghi ghə.

⁶Nghee tə̀ Yeso dza shi ndow tə ghə nə̀, “A loʼ mə wi.” Ghə n dzə̀ŋ bwù ndow ibam, bwu doʼo ndow aghəd.

⁷Yeso n kəm bəb kpiʼi ndow tə̀ ghə nə̀, “Ghaa kəŋə ndee?” Ghə n nam dza ndow kə tə̀ wi nə̀, “Ghey kəŋə Yeso, wù Nazaled.”

⁸Yeso n beeli ndow ghə nə̀, “Mə n dza tə̀ ghaa nə̀ a loʼ mə wi, abə a loʼ nə̀ ghaa kəŋə mə, zəghə na ghə̂ ghuŋ ghən tə̀ ghə nuu.”

⁹Ghəə ghən â shi ni luulə ghɔɔmə zey Yeso â dza naŋa nə̀ i bə shi isəŋə nə̀, “N ghə̂ ghey wə â fuunə tə̀ mə, wù umɔʼ tii ka nay shi dzə.”

¹⁰Shimun Pita n khə kɔb, tə n daŋŋə sɔŋ shi i kɔʼ, tsɔɔ khəə maʼa ndow tuŋŋə kə zəə kə kɔd kə fɔɔngili u nii nii wə tii. Zəd i kɔd kə tii kə â loʼ nə a loʼ Malkus.

¹¹Yeso n dza tə̀ Pita nə̀, “Sɔʼ naŋa nyi dzəŋŋə tsu kɔb zə n mbəghə kə wi. Ghaa moʼlə nə̀ ghaa loʼnu ni ghəŋə nə̀ n ka boʼo ngoʼ zey Bày wuŋ â fuu naŋa nə̀ n boʼo ə?”

¹²Tow kə sàʼ kə təsawgoʼ nsə sawgoʼ tə wi tə ghi bwoli tə ghə̂ a Təjuu tey n daŋŋə kwu kow tsu Yeso.

¹³Ghə n ney ndow dzə wi isə n səə Anas. Anas bəwey ə Kayfas wey tə â loʼ fɔɔngili u nii nii wə n num kə tii kə.

¹⁴Kayfas â loʼ wù wey tə â tsə̀nə ngəd tə Təjuu tə nə̀, “Dzɔb loʼ nə̀ tə wù umɔʼ mə kpu n tow kə ghə̂ ghən adzəm.”

¹⁵Ngəd umɔʼ nsə Shimun Pita n nuu ndow n baa Yeso. Fɔɔngili u nii nii wey â tɔʼ khənu ngəd u loʼ wey. Sey, ngəd ə tii n nyi daŋŋə ndow ghi Yeso n bii kə Fɔɔngili u nii nii u tii wə.

¹⁶Pita n kee təmi doʼo tsu n fuʼ u mbàa. Ngəd u loʼ wey Fɔɔngili u nii nii wey a tɔʼ khənə wi n daŋŋə ndow ghɔɔmə tsu tə̀ wù kəfwaʼ u zən wey tə â fwaʼanə n fuʼ u mbàa, ney nyi bə Pita.

¹⁷Zən fə kəfwaʼ fey n fuʼ u mbàa n bəb tə̀ Pita nə̀, “N dza wə mgbaŋ loʼ soʼo ngəd ə wù wən ə?” Pita n tuu nə̀, “Hayi, n way dzə ngəd ə wi!”

¹⁸Ghə̂ a kəfwaʼ a fɔɔngili u nìi nìi wey nsə bwoli tey n faalə kɔʼ uvələ nə təkay ni zɔy, n təŋkey, fəb wə â loʼnu. Ambə ghə zɔy vələ u tii wə, Pita n səŋŋə kəŋə ndow soʼo fu ni zɔy vələ u tii wə ghi ghə.

¹⁹Fɔɔngili u nii nii wey n bəbə Yeso n ghəə ghə kuum ngəd tə wi nsə ghəə ghey tə diinə.

²⁰Yeso n beeli ndow wi nə̀, “N ghəə ghuŋ ghə â ghɔɔmə shiə bə n mgbaŋ tə̀ ghə̂ a mbi ghə. Mə â dii aghəə n ndaw tə udzəŋi tə ghə̂ a Təjuu nsə n ndaw Kəzə̀ i nii zə n Yerosalem. À wən loʼ luʼu tey ghə̂ a Təjuu adzəm a bə zuŋŋə doʼlənə tii. N ka kam nyì ghɔɔmə koʼ tsə ghə i loʼ zə.

²¹À sə loʼ kee ghaa bəbənə mə n ghəə ghən ə? Bəb tsu n na tə̀ ghə̂ ghey ghə â zow ghɔɔmə zuŋ zə, nə̀ mə â dza nə̀ ngee tə ghə ə, n təŋkey, ghə mâ zow ghəə ghey mə â dzanə.”

²²Ambə Yeso beeli ndow wi n jii zən, bwoli u loʼ wə fu n saa wi nə kəsali n tùm usə̂, bəb tə wi nə̀, “À wən loʼ jìi zey wə khə ni beeli fɔɔngili u nii nii wə tii?”

²³Yeso n beeli ndow wi nə̀, “Abə a loʼ nə̀ n ghɔɔmə bəəbənu, tiilə dza bə tə ghə̂ ghə adzəm, nə̀ n kee ghɔɔmə dzɔbnu, à sə loʼ kee wə saanə mə nə kəsali ə?”

²⁴Anas n ney tûm ndow Yeso tə Kayfas, tɔŋŋə fɔɔngili u nii nii wey, nə ghə nam kow naŋa wi nə ubaʼ.

²⁵Nghee tə Shimun Pita teynə, zɔy uvələ, ghə n bəb tə̀ wi nə̀, “À loʼ tə wə loʼ soʼo ngəd ə wi.” Pita n tuu tə ghə nə̀, “Ngaŋ! N way dzə ngəd ə wi.”

²⁶Wù kəfwaʼ a fɔɔngili u nii nii u loʼ wə, tɔŋŋə wù sad i ndaw i wù wey Pita â tsɔɔ nuu kɔʼ tuŋŋə kə wi kə n bəb tə̀ Pita nə̀, “N dza n mə mgbaŋ koʼ ghaa ghi wi fey nə usum ə?”

²⁷Pita n nam tuu. Nghee tə tuu tsu sey, mwaʼ kə n daŋŋə tɔŋ kɔʼ.

²⁸N bələbələ tə ghə̂ a nii a Təjuu ghə n daŋŋə ney shi bə Yeso n ndaw Kayfas, ndow fuu ndow wi n bali kə Pilato wən tə â loʼnə gɔvənɔ n mbuʼ ə tii. Ghə n wû i ghə zə n ka kee nyi fuu nə kəbali, sey nə̀ kə ghə nə dzəələ wû i ghə zə ni doʼo nə̀ ghə ka zə̂ Zə̂ kə taa zaʼa kə tə̀ nghee zə â loʼ n muu i ghə.

²⁹Sey, Pilato n shi koʼ bə ghə a bii, bəb tə̀ ghə nə̀, “Ghaa wù wən kwu nə̀ tə bəəbə kee?”

³⁰Ghə n beeli ndow wi nə̀, “Abə wù wən mə ka ghəŋə bəəbə, tə ghey mə ka ney bə dzə wi fa n səə wɔ.”

³¹Pilato n dza tə̀ ghə nə̀, “Abə a loʼ sey, ney ndow n na wi, ghaa ndow saʼ ndow wi nghee tə̀ laŋ kə ghaa kə dìinə.” Ngəd tə Təjuu tə n dza tə̀ wi nə̀, “Laŋ kə dii nə̀ ghey khə way daʼa kə ni tsəʼlə saʼ nə̀ ghə wey wù.”

³²Ghəə ghən â shi sey ni luulə tsu ghɔɔmə zey Yeso â ghɔɔmə naŋa ni dii ndzoʼo və zey tə i kpuu ghii zə.

³³Pilato n kəm nuu nyi ndow ibam nə kəbali, tɔŋɔ tsu Yeso, bəb tə̀ wi nə̀, “À loʼ wɔ Də̀ŋ kə Təjuu kə ə?”

³⁴Yeso n beeli ndow wi nə̀, “Ghəə ghən wə bəbənə tə̀ mə, à shi kɔʼ bə n fə̀ŋ zə mɔ à loʼ wù loʼ tə dza nə̀ wə bəb bə ghəə ghən tə̀ mə ə?”

³⁵Pilato n beeli ndow wi nə̀, “N sə loʼ wù Juu ə? À loʼ ghə̂ ghə inaʼ ghə ghi ghə fɔɔngili a nii ghə, ghə fuu tsəghə bənə wɔ tə̀ mə. Wə baa bəəbə kəkee tə ghə ə?”

³⁶Yeso n beeli ndow wi nə̀, “Fɔɔ wuŋ u way dzə u mbi wə. Abə fɔɔ wuŋ u mə loʼ u mbi wə, tə ghə̂ a kəfwaʼ ghuŋ a mə ka tsəm bəghəm nə̀ ghə̂ a Təjuu a gaʼ kəwɔɔ n kow mə. A fa loʼ kə nə̀ fɔɔ wuŋ u ka shi dzə fa n mbi.”

³⁷Pilato n dza tə̀ wi nə̀, “I sey dii nə̀ wə loʼ kədə̀ŋ!” Yeso n beeli ndow wi nə̀, “À dza wɔ nə̀ n loʼ kədə̀ŋ. Zuŋ key ghə â jinə mə fa n mbi â loʼ ni bə dza isəŋə. Wù wey tə ləghənə isəŋə i tii zə, zəllənu ghəə zey n dzanə.”

³⁸Pilato n bəb tə wi nə̀, “Isəŋə loʼ kəkee?” Nghee Pilato bəb tsu sey, tə n daŋŋə nuu shi kpiʼi ndow a bii n səə ghə̂ a Təjuu ghə, dza tə̀ ghə nə̀, “N ka koʼ ghə i loʼ zə wù wən ghəŋə bəəbənə.

³⁹À loʼ laŋ kə inaʼ kə ghaa nə̀ mə i chiə zəghə shiə bə wù ndaw tsaʼ umɔʼ tə̀ ghaa n nəŋə i Zə̂ kə taa zaʼa kə. Ghaa ləghənu nə̀ n chi zəghə shi bə ghaa n də̀ŋ kə ghə̂ a Təjuu kə ə?”

⁴⁰Ghə n keeli kɔʼ fu n dzə̂ tə taw tə nə̀, “Ngaŋ, ghey ləghə kə Barabas.” Barabas â loʼ taw kə wù tsɔŋɔ.