Read Weh Jɔn 20 Bible Online

Jɔn 20 - Weh bible

Jɔn 20

¹Ambə n tsuʼ inaʼ wə nkala, Maria Maʼdalen n kèy kɔʼ utsuʼ ndow nə isay, ndow koʼ ndow nə̀ ghə n bəŋŋə nuu tay zey zə â loʼnə n dzuu zə isay.

²Tə n daŋŋə nuu tsu fu n nyəŋ zə, ndow koʼ ndow Shimun Pita ghi ngəd i loʼ zey Yeso â ngii ləghənə, tə n dza tə̀ ghə nə̀, “Ghə n vən i Mûkəbii i ney nuu shi nə isay, ghey khə way luʼu key ghə ney ndownə wi tii.”

³Pita ghi ngəd i loʼ zey n tsəghə shi bə, nuu ndow fu nə isay.

⁴Ghə â nyəŋə ndow ndownu, ngəd i loʼ zey n kee nyəŋ tsəghə tsu Pita, ndow nyi ndow fu nə isay isə.

⁵Nghee tə gham laalə nyi ndow say i tii zə, tə n koʼ nyi ndow kə ndzə tey ghə â baŋnə Yeso tii, tə maʼa doʼonə. Tə n ka kee nyi ndow dzə fu.

⁶Shimun Pita n daŋŋə ndow bə n baa wi, say nyi daŋŋə ndow kə uwû fu nə isay, nyi koʼ tsu soʼo ndzə tey tə maʼa doʼo.

⁷Tə n koʼ soʼo bad kə ndzə key ghə â baŋ tow kə Yeso kə tii nə̀ kə n nyoʼlə gɔy doʼo n nəŋ.

⁸Ngəd zey i mə bənə isə fu nə isay n daŋŋə nyi ndow soʼo, koʼ i tsu, daŋŋə bəghəm fuu nə̀ Yeso n ndzəm zhəm dzəŋŋə.

⁹Tə ghəə ghən ni shi, ghə â ka kam tɔʼ zowkeeli ghɔɔmə i Kəzə̀ zey i dza nə̀ Yeso khə ni zhəm dzəŋŋə bə nə ivə.

¹⁰Ngəd tə tii tə n daŋŋə nuu dzəŋŋə ndow n ndaw tə ghə.

¹¹Ambə ngəd tey nuulə ndownə, Maria n kee təmi doʼo tsu fu n səə isay, tə deynə. Nghee tə deynə sey, tə n gham laalə nyi ndow say i tii zə.

¹²Tə n koʼ nyi ndow tsətəndəghə tə Kəzə̀ təbəghə nə̀ ghə n lab wû zə n ndzə tə fəmə tə. Ghə n doʼ n luʼu key vən i Yeso zə â nyəŋ tii, umɔʼ n luʼu key tow kə wi kə â loʼnə tii, umɔʼ n luʼu key fuu i wi zə â loʼnə tii.

¹³Tsətəndəghə tə Kəzə̀ tey n bəb tə̀ wi nə̀, “Iwaa, wə tsuulə sə̂ n kee mə ə?” Tə n dza tə̀ ghə nə̀, “A loʼ n təŋkey ghə n ney nuu vən i Mûkəbii wuŋ zə, mə n khə way luʼu key ghə ney naŋanə wi tii.”

¹⁴Ambə tə ghɔɔmə may tsu sey, tə n fəd kɔʼ uwû ni nuu ndow, baŋ koʼ kɔʼ Yeso tə tey, kee khə way nə̀ a loʼ Yeso.

¹⁵Yeso n bəb tə̀ wi nə̀, “Iwaa, wə tsuulə sə̂ n kee mə? Wə kəŋə ndee fa a?” Maria n moʼo kə nə̀ à loʼ wù usum u loʼ wə, tə n dza tə̀ wi nə̀, “Mûkəbii, abə à loʼ nə̀ wə n vən i wi i boʼo nuu, wə tiilə bə luʼu key wə ndow nyəŋi naŋanə wi tii tə̀ n ndow boʼo nuu.”

¹⁶Yeso n tɔŋɔ tsu wi nə̀, “Maria.” Maria n laalə ndow wi, tɔŋɔ ndow wi n ghɔɔmə i Hibru nə̀, “Raboni!” I dii nə̀, “Wù dii.”

¹⁷Yeso n dza tə̀ wi nə̀, “Ka mə mɔm, n təŋkey, n ka kam kɔʼ taa dzə n səə Bày. Kee ndow n səə waazə ghuŋ ghə, wə dza tə̀ ghə nə̀ n nya ndow n səə Bày wuŋ, tə wey tə â loʼ soʼonə Bày ghə, tɔŋŋə Zə̀ kuŋ kən kə loʼ soʼonə Zə̀ kə ghə kə.”

¹⁸Maria Maʼdalen n ndow koʼ ndow soʼo ngəd tə Yeso, dza tə̀ ghə nə̀, “Mə n koʼ Mûkəbii.” Tə n daŋŋə ney dza ndow ghɔɔmə i Yeso tə̀ ghə.

¹⁹N nəŋə i fənə zə n tsuʼ inaʼ wə nkala u mɔʼɔ wey, ngəd tə Yeso tə n dzəŋi loʼ n ndaw nə̀ ghə n fii naŋa baʼ wə, n təŋkey ghə â tsəŋə ngəd tə Təjuu. Nghee ghə loʼnə fu, ghə n maŋ fwey Yeso tə teynə n sə kə ghə. Tə n dza tə̀ ghə nə̀, “Buulə zə loʼ ghi ghaa.”

²⁰Ambə tə dza tsunə sey, tə n dii ndow wɔɔ a wi, nsə teybow i wi zə. Ngəd tə tii tə n ngii duʼlə nghee ghə koʼ kɔʼ Mûkəbii.

²¹Yeso n dza kpiʼi ndow tə̀ ghə nə̀, “Buulə zə i loʼ ghi ghaa. Nghee Bày â tûm bənə mə, à loʼ soʼo ighələ n tûm shiənə ndow ghaa.”

²²Ambə Yeso dza tsunə sey, tə n zày ndow n kow ghə, dza tə̀ ghə nə̀, “Ney na Zay kə Zow kə.

²³Abə wù ghaa neyzəənə bəb i wù zə, Zə̀ kə n neyzəə soʼo bəb i wù tii, nə̀ ghaa ka bəb i wù i neyzəə, Zə̀ kə i neyzəə soʼo way bəb i wù tii zə.”

²⁴À n loʼ sey nə̀ Tɔmɔs wey tə â loʼ soʼo ngəd ə Yeso, (ghə â tɔŋŋə wi nə̀ à loʼ Ngɔŋmbaa), tə n kee way n nəŋə zey Yeso mə bənə tii.

²⁵Nghee tə ndow bənə, ngəd tə loʼ tey sey dzanu tə̀ wi nə̀, “Ghey n Mûkəbii koʼ.” Tə n dza tə̀ ghə nə̀, “Mə i bəghəm fuu kə nə̀ mə n tɔʼ koʼ nyi tsu, mɔm koʼ tsu zələ a təmbaa ghey n wɔɔ a wi, mɔm ndow soʼo zələ key n teybow i wi.”

²⁶Ambə tsuʼu n tsəghə tsu ifam, ngəd tə Yeso tə n loʼ kpiʼi n ndaw, Tɔmɔs n loʼ ghi ghə. À n loʼ nə̀ baʼ u fii doʼonu, ghə n taa fəmi kɔʼ Yeso nə̀ tə tey n səə ghə, tə n dza tə̀ ghə nə̀, “Buulə zə i loʼ ghi ghaa.”

²⁷Tə n daŋŋə dza tə̀ Tɔmɔs nə̀, “Koʼo wɔɔ ghuŋ ghə, gaʼ bə waa kəwɔɔ wə fa. Naalə shi bə wɔɔ kə kə̀, wə mɔm bə teybow zuŋ. Ka i səmə, keeli tsu bəghəm i fə̀ŋ zə.”

²⁸Tɔmɔs n beeli ndow wi nə̀, “Wə loʼ Mûkəbii wuŋ nsə Zə̀ kuŋ kə.”

²⁹Yeso n dza tə̀ wi nə̀, “Wə n nya bəghəm nghee wə koʼ bənə mə ə? Buulə i loʼ tə̀ ghə̂ ghey ghə bəghəm fuunə nə̀ ghə ka buʼ koʼ.”

³⁰Yeso mâ dii ndəmə tətsəə tə̀ ngəd tə wi tə nə̀ ghə ka tɔ̀ɔ naŋa fa n maʼlə kən.

³¹A ghən ghə kee tɔ̀ɔ naŋanə fa, loʼ ni ghəŋə tsu nə̀ ghaa i loʼ ni bəghəm fuu nə̀ Yeso loʼ wù wey Zə̀ kə â dza naŋa nə̀ i tûm bənu, Waa Kəzə̀, nsə nə̀, abə ghaa bəghəm tə̀ wi, ghaa loʼ ni keeli imuu nə̀ i way ni may.