Read Weh Jɔn 21 Bible Online

Jɔn 21 - Weh bible

Jɔn 21

¹Ghab kə n ka shi nghee tə̀ Yeso dii ndow wû u wi wə tə̀ ngəd tə wi tə, tə n dìi kpiʼi bə wû u wi tə ghə n Nyi i Tiberia. À wən loʼ nghee zə â shinə tii,

²ngəd tə Yeso tə loʼ tə â dzəŋi loʼnu, tɔŋŋə Shimun Pita, Tɔmɔs tɔŋŋə Ngɔŋmbaa, Natanyə tɔŋŋə wû Kana n Galili, waa a Zebedi a num ghə nsə ngəd tə Yeso tə loʼ tə təbəghə.

³Shimun Pita n dza tə̀ ghə nə̀, “N nya ndow ni ndow kwu tətsəghə.” Ghə n dza tə̀ wi nə̀, “Ghey bəghə soʼonu.” Ghə n dzəŋi shi ndow, nyi kɔʼ nə kəfən, ndòw bìilə bweeli ndow tətsəghə, ghə n ka kee kwu kəfə n tsuʼu tə tii tə.

⁴Ambə tsuʼ u zow nyiə bənə, Yeso n tey n nguŋ inyi, ngəd tə wi tə n ka kee koʼ keeli nə̀ a loʼ Yeso.

⁵Yeso n bəb tə̀ ghə nə̀, “Fə̂ ghuŋ ghə, ghaa khənu tsəghə tə loʼ tə fey ə?” Ghə n beeli ndow wi nə̀, “Ngaŋ!”

⁶Tə n dza tə ghə nə̀, “Nghee tə ghaa loʼnə fey nə kəfən, maʼa ndow na wûu tə n bad kə kpii u təmə wə, ghaa i kwu tətsəghə.” Sey, ghə n maʼa nyi tsu ndòw soʼo wûu u tii wə, tsəghə tə luu kɔʼ n wû u tii wə, ghə dəmə kìi ni sìi shi kɔʼ bə.

⁷Ngəd zey Yeso â ngii ləghə tsənə n dza tə̀ Pita nə̀, “À loʼ Mûkəbii!” Ambə Shimun Pita zow tsu sey, tə n ney dzəŋə kɔʼ ndzə tə wi tey tə â tsɔʼ naŋanə nə kəfən nghee tə fwaʼanə, taa nyi tsu nə inyi, təghə shi kəŋə ndow n nguŋ.

⁸Ngəd tə loʼ tey n kee shi kəŋə bə nə kəfən, sìi bə wûu tə ghə n tsəghə tə tii n ndəm n təŋkey ghə â ka ngii doʼo nyi kəŋə ndow dzə n fə̀ŋ ə inyi. Ni bə taa n nguŋ inyi, ghab kə â ngii way dzə, â loʼ kə tə a loʼ tətam fəbɔm.

⁹Ambə ghə shi taa bə n nguŋ inyi, ghə n koʼ ndow vələ u təkay u ghoʼonə n tsəghə zə i gaʼ doʼonə tii nsə baa kə.

¹⁰Yeso n dza tə̀ ghə nə̀, “Ney bə na tsəghə tə loʼ tə n tsəghə tey ghaa kwu kɔʼnə nya.”

¹¹Shimun Pita n nyi kɔʼ ibam nə kəfən, sìi shi tsu bə wûu u tii wə n nguŋ inyi, tsəghə tə tii tə n loʼ fəbɔm nsə ghəm mə ntaa n ghii tə tətəghə. Nghee tə â buʼ loʼ kə n ndəm sey, wûu u tii wə â ka tiillə dzə.

¹²Yeso n dza tə̀ ghə nə̀, “Bə na tə̀ saa bəd baʼ ntəghə.” Ngəd imɔʼ n ka tsəm bəb tə̀ wi nə̀, “Wə loʼ ndee?” N təŋkey, ghə â khənu nə̀ a loʼ Mûkəbii.

¹³Yeso n bə ney kɔʼ baa kə tii kə nsə tsəghə i tii zə, fu ndow tə̀ ngəd tə wi tə.

¹⁴I zən nya â ghəŋə ndow tənəŋə tətəghə nghee Yeso bə dii kə wû wə tə̀ ngəd tə wi tə nghee tə̀ Zə̀ kə â zhəm dzəŋŋə bənə wi nə ivə.

¹⁵Nghee ghə bəd zə̂ may kɔʼnə, Yeso n bəb tə̀ Shimun Pita nə̀, “Shimun, waa Jɔn, wə ləghənu mə tsəghəshi jìi zey ghə̂ loʼ ghən ləghənə mə ə?” Shimun n beeli ndow wi nə̀, “Ow a Mûkəbii, wə khənu nə̀ n ləghənu wɔ.” Yeso n dza tə̀ wi nə̀, “I chiə waa a tənjì ghuŋ ghə.”

¹⁶Yeso n bəb kpiʼi ndow tə̀ wi nə̀, “Shimun, waa Jɔn, wə ləghənu mə ə?” Shimun n beeli ndow wi nə̀, “Ow a Mûkəbii, wə khənu nə̀ n ləghənu wɔ.” Yeso n dza tə̀ wi nə̀, “I laalə tə̀ njì tuŋ tə.”

¹⁷Yeso n kəm bəb kpiʼi ndow tə̀ wi ni ghəŋə ndow tənəŋə tətəghə nə̀, “Shimun, waa Jɔn, wə ləghənu mə ə?” Ghə i tii zə n ngii fəmmə Pita n fə̀ŋ nghee tə bəbə kuulə kə ghə zə imɔʼ. Tə n beeli ndow wi nə̀, “Mûkəbii, wə khə aghəə adzəm, wə a khə soʼo nə n ləghənu wɔ.” Yeso n dza ndow tə wi nə̀, “I laalə njì tuŋ tə.

¹⁸N kùm dza bə tə wɔ nə̀, nghee wə â nam loʼ winətəghə, wə n dzəŋŋə tsə ndzə tə n nəŋə wɔ, ndow n luʼu tey wə ləghənə ni ndow, a kee loʼ kə nə̀ abə wə i dən tsu, u nə naalə shiə ndow ikpi, wù nuu nə dzəŋə fu tsu ndzə tə, tə boʼo kɔʼ wɔ, tə ney ndow wɔ n luʼu key wə mə buʼu ləghə way ni ndow.”

¹⁹Yeso ghəə ghən â khəə ni dii tsu ndzoʼo və zey Pita i kpuu ghii zə, i zey i nə fuu kɔʼlə mə tə̀ Zə̀ kə. Yeso n daŋŋə dza tə̀ wi nə̀, “Dzûmə bə mə.”

²⁰Nghee tə̀ ghə nuulə ndownə, Pita n dza i baŋ laalə tsu, koʼ ndow ngəd zey Yeso â ngii ləghənə, i bəghənə n baa ghə. Tə wey tə â kuʼlə doʼnə n teybow i Yeso n nəŋə zey ghə â zə̂ənə, tə wey tə â khə̀mmə bəb kɔʼ tə̀ Yeso nə̀, “Mûkəbii, a dza i fìi fu ndee wɔ ə?”

²¹Nghee Pita koʼ ndownə wi, tə n bəb tə Yeso nə̀, “Mûkəbii, ghə i kee jiə ngee ghi wù wən ə?”

²²Yeso n beeli ndow wi nə̀, “Abə n ləghə nə̀ tə muu ni ndow kuum n nəŋə zey mə i dzəŋŋə bənə tii, a wɔ tii fəmmə kee? Dzûmə bə mə!”

²³Zɔŋ wə n fuŋ nay ndow n fəŋŋə kə ghə̂ ghey ghə â bəghəmnə tə̀ Yeso nə̀, ngəd zən i kpu way, loʼ sey nə̀ Yeso â ka dza dzə tə Pita nə̀ ngəd ə tii nə kpu way. Tə â fəd dza nə̀, “Abə n ləghə nə̀ tə muu ni ndow kuum n nəŋə zey mə i dzəŋŋə bənə tii, a wɔ tii fəmmə kee?”

²⁴À wən loʼ ngəd zey zə â koʼnə ghəə ghən, tɔ̀ɔ i naŋa, ghey a khə soʼo nə̀ ghəə ghən tə tiillə dza bənə, loʼ isəŋə.

²⁵Ndəmə ndəmə tə aghəə tə loʼ tə loʼnu Yeso â ghəŋə nə̀ ghə â ka tɔ̀ɔ naŋa. Abə ghə â tɔ̀ɔ may tsuunə ghəə ghey Yeso â ghəŋənə, tə buʼ kə mə way ni naŋa maʼlə u tii wə fa n mbi.