Read Weh Jɔn 3 Bible Online

Jɔn 3 - Weh bible

Jɔn 3

¹Wù Falasi u loʼ wə â loʼnu ghə â tɔŋŋənə nə̀ a loʼ Nikodemus. Tə n loʼ soʼo ngəd n zəghə u ghə̂ a Təjuu.

²N tsuʼ fə loʼ fə, tə n ndòw bə n səə Yeso n tsuʼu tə, dza nə̀, “Wù dii wə, n khənu nə̀ a wɔ tûm bə Kəzə̀ nə̀ wə bə dii ghey n ghəə ghə, n təŋkey, wù loʼ way dzə tə loʼnə ni fwaʼ ndzoʼo ghəə a faalə ghən wə fwaʼanə, a gɔʼɔ kə nə̀ Zə̀ kə loʼ ghi wi.”

³Yeso n beeli ndòw wi nə̀, “N kuum dza bə isəŋə tə̀ wɔ nə̀, wù way ni koʼ fɔɔ u Kəzə̀ nə̀ ghə ka wi ji kuulə.”

⁴Nikodemus n bəb ndòw tə̀ wi nə̀, “Ghə loʼ ngee ni ji kuulə wù nə̀ tə n nyim ə? Tə loʼnu ni nyi dzəŋŋə ndow n nəghə u này wi tə̀ ghə ji kpiʼi bə wi ə?”

⁵Yeso n beeli ndòw wi nə̀, “N kuum dza bə isəŋə tə̀ wɔ nə̀, wù way dzə ni nyi n Fɔɔ u Kəzə̀ nə̀ ghə ka wi ji nə mmuu nsə n Zay kə Zow kə.

⁶Wù sɔŋtsuʼ jiə wù sɔŋtsuʼ, Zay K-a-zə̀ kə a kee ghəŋŋənə saa nə̀ saa keeli kəzay.

⁷Kə̂ dzuu i nə̂ zumnə wɔ nghee n dza bənə tə̀ wɔ nə̀ ghə teeli khə ni ji kuulə ghaa.

⁸Abə kɔŋŋə kə tsəghə ndownə n bad key kə ləghənə, wù zownu nghee kə fuŋu tsəghənə, a kee loʼ nə̀, wù way dzə ni dza luʼu key kə nuu bənə tii nkee luʼu key kə ndòwnə. A wey loʼ soʼo nghee i loʼnə ghi wù wey Zay kə Zow kə loʼnə n kow wi.”

⁹Nikodemus n bəb ndòw tə wi nə̀, “Ghəə ghən loʼ ni shi ngee?”

¹⁰Yeso n beeli dza ndòw tə̀ wi nə̀, “Wə ndzəm loʼ wù dii u səŋi wə n naʼ zə Izree, a loʼ kee wə sə khə way ghəə ghən ə?

¹¹N kuum dza bə isəŋə tə wɔ nə̀, ghey ghɔɔmə ghəə ghey ghey khənə, tiilə dza bə ghəə ghey ghey koʼnə, ghaa u nam bəghəm way tûm ə ghey.

¹²Abə n dza bənə ghəə ghey a shiənə aghəlitsə tə̀ wɔ, wə u way ni bəghəm, wə î sə bəghəm ngee abə n dza bənə wɔ n ghəə ghə idəŋ ghə ə?

¹³Wù loʼ ka kam kɔʼ koʼ tsə idəŋ, a may kə wù wən tə shi tsu bənə idəŋ, tɔŋŋə Waa Weynum.

¹⁴Nghee tə̀ Mushi â ney khəə naŋa kɔʼnə zuu[1] n mbaŋ n mbvən ə ntsaŋ, a loʼ ighələ ghə î ney naŋa kɔʼɔnə Waa Weynum

¹⁵sey nə̀, wù wey tə bəghəmnə tə̀ wi, tə i keeli muu zə itsali.

¹⁶Kuumnə, Zə̀ kə â ngii ləghənu mbi ni ney fuu bə sɔʼi fə Waa wi, nə̀ wù wey tə bəghəmnə tə wi, tə i ka kpu, tə i fəd keeli muu zə itsali.

¹⁷Zə̀ kə â ka tûm bə dzə Waa wi fa mbi nə̀ tə bə saʼ mbi, tə â fəd tûm bə wi nə̀ tə bə bəghəshi ghə̂ a mbi.

¹⁸Wù wey tə bəghəmnə tə̀ wi, Zə̀ kə kəm saʼa way wi, wù wey tə ka kee bəghəm tə̀ wi, Zə̀ kə n saʼ a wi gboo khəə tən, tə u naŋa wi n ngoʼ, n təŋkey, tə ka bəghəm dzə n zəd i sɔʼi fə Waa wi.

¹⁹Tow kə ighəə key Zə̀ kə saʼa ghə̂ ghə a tii loʼ nə̀, daa kə bàŋ nyi bə n mbi, ghə̂ ghə u kee ləghənə ləm kə tsəghəshi kədaa, n təŋkey ghəə a ghə a ghəŋŋə a loʼ ghəə a bəbə ghə.

²⁰I loʼ nə̀, ghə̂ ghey ghə ghəŋŋənə ghəə a bəbə ghə, ghə ləghə way daa kə, ghə i ləghə soʼo way ni bə n tənə kədaa, sey nə̀, kə̂ kə nə̂ chiə diinə ghəə a ghə a bəbə ghə.

²¹Ghə̂ ghey ghə kee ghəŋŋənə ghəə ghey a loʼnə tsətsəghə, ghə bəghənu n tənə kədaa, ni ghəŋə nə̀ ghə̂ ghə i koʼo bə nə̀ ghəə a ghə a ghəŋŋə a loʼ ghəə ghey Zə̀ kə ləghənə.”

²²Ambə ghəə ghən a tsəghə tsunə, Yeso n nuu nyi ndòw n mboʼo Judeya ghi ngəd tə wi tə, dzə doʼo tsu fu ghi ghə, fuu aghə̂ n mmuu n Kəzə̀ mə.

²³Jɔn n kee loʼ n naʼa fə Enɔn, fə loʼnə n səə naʼ i Salim zə, fuu soʼo aghə̂ fu n mmuu n Kəzə̀ mə, boʼ nə̀ mmuu mə â ngii loʼ fu. Ndəmə aghə̂ n ndòw n səə Jɔn, tə n fuu ghə n mmuu n Kəzə̀ mə.

²⁴Ghəə ghən â shi nə̀ ghə ka kam kwu fìi naŋa dzə Jɔn n ndaw tsaʼ.

²⁵Ngəd tə Jɔn tə loʼ tə n kaʼ ni baŋŋə təfəghəm ghi wù Juu u loʼ wə bòʼ jìi zey wù khə ni kàli uwû tii ni ghəŋə nə̀ tə i zow n sə K-a-zə̀.

²⁶Sey ghə n ndòw n səə Jɔn, bəb tə̀ wi nə̀, “Wù dii wə, wə moʼlə kənu wù wey wə â loʼnə ghi wi n nguŋ ə dzuu Jodan i loʼ zey ə? Tɔŋŋə wù wey wə̀ â tiilə dzanə ghəə ghə bòʼ wi? Tə nya fuu soʼo aghə̂ n mmuu n Kəzə̀ mə, ghə̂ a nya kwɔ̀ɔ ndòw kə fu ni ndow ney mmuu n Kəzə̀ n wɔ wi.”

²⁷Jɔn n beeli ndòw ghə nə̀, “Abə Zə̀ kə idəŋ kə ka fuu wù n fə̂ kə, wù way ni keeli koʼ fə̂ kə tii kə.

²⁸Wû i ghaa, ghaa mâ zow n nəŋə zey mə â dzanə nə̀, ‘N way dzə wù wey Zə̀ kə â dza naŋa nə̀ i tûm bənu, Zə̀ kə maŋ tûm bə mə isə̂ nə̀ n bə bayyə naŋa tsu təluʼu tə̀ wi.’

²⁹Wù wey tə baa khənə weyzən n zə̂ kə ney zə iwû zə, loʼ num weyzən, fə̂ a num weyzən ə tii maŋa zəllə kə ni zow dzə̀ ə wi, ghə n duʼlə. À wey loʼ ndzoʼo ghəə zey i ghəŋŋə nə̀ mə i ngii khə duʼlə zə n fə̀ŋ zuŋ.

³⁰Sey, ndzə̂ ighɔŋ ə wi khə kə ni kɔʼɔ nay ndow kə idəŋ idəŋ, i zuŋ zə i kee tsuu.”

³¹Jɔn n dza kpiʼi ndow tə dzûmə tə wi tə nə̀, “Wù wey tə shi tsu bənə idəŋ tsəghəshi aghə̂ adzəm. Wù wey tə shinə fa a ghəlitsə loʼ wù ghəlikətsə, tə ghɔɔmə tənə kə ghəə a kəghəlitsə. Sey, Yeso loʼ wù wey tə shi tsu bənə idəŋ, tə tsəghəshi aghə̂ adzəm.

³²Tə tiilə dza bə ghəə ghey tə koʼnə nsə a ghey tə zownə, ghə̂ ghə a kee bəghəm way ghɔɔmə i wi zə.

³³Wù wey tə bəghəm naŋanə ghɔɔmə i wi zə, loʼ ni tiilə dza nə̀ ghɔɔmə i Kəzə̀ i loʼ isəŋə.

³⁴Wù wən Zə̀ kə tûm bənə, ghɔɔmə bə ghɔɔmə i Kəzə̀, n təŋkey Zə̀ kə n fuu wi n Zay kə wi kə naʼ idzəm.

³⁵Bày idəŋ ngii ləghə Waa wi, tə u fuu naŋa ndòwnə ghəə ghə adzəm n wɔɔ kə wi.

³⁶Wù wey tə bəghəmnə tə Waa tii, tə i keeli muu zə itsali, wù wey tə ka kee zow tə̀ Waa, î keeli dzə way muu zə. Zə̀ kə n fəələ tən nəghə wə ghi wù tii.”