Read Weh Jɔn 7 Bible Online

Jɔn 7 - Weh bible

Jɔn 7

¹Ambə Yeso zə̀ghə̀ tsunə Kapenum, tə n bwey kaabə kə n mboʼo Galili, tə n ləghə way ni ndow n mboʼo Judeya, n təŋkey, ngəd tə Təjuu tey fu â kəŋə jìi ni wey wi.

²À n loʼ nə̀ zə̂ kə ghə̂ Təjuu kə loʼ kə ghə tɔŋŋə nə̀ a loʼ zə̂ kə Nfəə kə nya kuʼlə may bənu.[4]

³Sey, waazə a Yeso ghə n dza tə̀ wi nə̀, “Nuu tsu fa, wə kɔʼ ndòw n Judeya, tə̀ dzûmə tey fu mbɔŋ koʼ ghəə ghey wə fwaʼanə.

⁴I loʼ nə̀, wù wey tə ləghənə nə̀ zɔŋ u wi wə i fuŋu, tə nyìə ghəŋŋə dzə way ghəə a wi ghə. Nghee tə wə ghəŋŋənə ghəə ghən, i dii shiə bə wû wə wə̀, tə ghə̂ a mbi a keeli fə key wə loʼ ghii kə.”

⁵Ghə â dza ghəə ghən, bòʼ nə̀, wû i waazə a wi, ghə ka tə wi bəghəm dzə.

⁶Yeso n dza ndòw tə̀ ghə nə̀, “Nəŋə zey n khə ni ndow tii ka kam kpii dzə, abə ghaa, ghaa loʼ ni ndow n nəŋə zey ghaa ləghənə.

⁷Ghə̂ a mbi a khə way zùŋ kə ni baa ghaa, ghə kee baa mə, n təŋkey, n tiilə dza nə̀ ghəə a ghə a ghəŋŋə a loʼ ghəə a bəbə ghə.

⁸Ndòw na nə̀ kəzə̂, mə î ndòw dzə way, n təŋkey, nəŋə zuŋ i ndòw i ka kam kpii.”

⁹Tə n dza tsu sey, doʼo səə ndòw n Galili.

¹⁰Ambə waazə a Yeso a nuu kɔʼ ndòwnə nə kəzə̂, tə n nuu kɔʼ ndòw soʼo. Tə â ka kee bə dzə n mgbaŋ, tə â fəd tsìilə bənu.

¹¹Nghee ghə loʼnə nə kəzə̂, ngəd tə Təjuu tə n kəŋə wi fu, bəbə tə̀ ghə̂ ghə nə̀, “Ghaa koʼnu Yeso wey fa a?”

¹²Ndəmə aghə̂ ghə n tsɔŋɔ ghɔɔmə n wû i ghə bòʼ wi. Ghə̂ a loʼ ghə n dza nə̀, “Tə loʼ wù dzuŋu wə.” À loʼ ghə n kee dza nə̀, “Ngaŋ! Tə sìi ndzəŋŋə aghə̂.”

¹³Ghə n ghɔɔmə sey, kee ghɔɔmə shiə kɔʼɔ way n mgbaŋ, n təŋkey, ghə â tsəŋə ngəd tə Təjuu.

¹⁴Ambə ghə zə̂ kəŋə ndòwnə tsuʼu n kəzə̂ mə kùm ndow n fə̀ŋ, Yeso n nuu kɔʼ ndòw n Ndaw Kəzə̀, kaʼ ndòw ni dii aghəə.

¹⁵Dzuu zə n zum ngəd tə Təjuu n ghɔɔmə i wi, ghə n bəbə nə̀, “Wù wən lɔʼlə keeli ngee ghəə ghən adzəm nə̀ tə ka ndow n ndaw kəmàʼlə ə?”

¹⁶Yeso n beeli ndòw ghə nə̀, “Ghəə ghən n diinə, way dzə ghəə ghuŋ a ngəŋ ghə, a loʼ ghəə a Zə̀ key kə tûmnə mə.

¹⁷Wù wey tə ləghənə ni ghəŋŋə ghəə ghey Zə̀ kə ləghənə, tə i keelinu nə̀ ghəə ghən n diinə fa, a nuu bə n wɔ Zə̀ kə mɔ n ghɔɔmə n ngəŋ zuŋ ə.

¹⁸Wù wey tə ghɔɔmənə n ngəŋ ə wi sey ləghə nə̀ ghə̂ ghə i fuu bə wi n kɔʼlə mə. Wù wey tə kee ləghənə ni fuu kɔʼlə mə tə wù wey tə tûmnə wi, ghɔɔmə kə isəŋə, wù tii badla soʼo way ghəə ghə.

¹⁹Mushi mâ fuu ghaa n laŋ kə, a kee loʼ nə̀, wù ghaa umɔʼ way dzə tə naŋŋənə laŋ kə tii kə. Ghaa mə kəŋə kaabə tsə ni wey bòʼ kee?”

²⁰Nɔɔ kə aghə̂ key kə n dza nə̀, “Wə khə zay kə bwu kə n kow wɔ. À kəŋə ndee jii ni wey wɔ ə?”

²¹Yeso n beeli ndòw ghə nə̀, “Mə â maŋ ghəŋə tsu kə ghə i faalə zə imɔʼ, dzuu zə n zum nay ndòw ghaa n ghə i tii zə.

²²Mushi â fuu ghaa n laŋ kə ni səghə tyi kə waa kə. Â way dzə Mushi tə â baa kaʼnə ghəə a tii ghə, â kaʼ bə ghə bày bày a ghaa. Ghaa nya ney naŋa kɔʼ nə̀ ghaa nya khə ni səghə tyi kə waa kə n tsuʼ inaʼ.

²³Abə ghaa səghə tyi kə waa kə n tsuʼ inaʼ bòʼ nə̀ ghaa ləghə way ni bwuulə maʼa laŋ kə Mushi, a kee loʼ kee ghaa fəələnə nəghə wə ghi mə a dza n baŋŋə wû u wù udzəm n tsuʼ inaʼ a?

²⁴Kə̂ ghaa nə̂ saʼanə wù nə̀ ghaa laalə ndow tûm usə̂, i saʼa ndòw na wù n jìi zey i loʼnə tsətsəghə.”

²⁵Ghə̂ a Yerosalem a loʼ ghə n bəbə nə̀, “À wən way wù wey ngəd tə Təjuu tə kəŋənə jìi ni wey wi ə?

²⁶Koʼo ndòw na, tə wey tə ghɔɔmənə n mgbaŋ, ghə u dza way wi n ghə i loʼ zə. I loʼ ni doʼo nə̀ ngəd tə saa tə khənu nə̀ wù wən ndzəm loʼ wù wey Zə̀ kə â dza naŋa nə̀ i tûm bənu ə?

²⁷Wù wən way dzə wù wey Zə̀ kə â dza naŋa nə̀ i tûm bənu, n təŋkey, saa khənu luʼu key tə shinə tii. Abə wù wey Zə̀ kə â dza naŋa nə̀ i tûm bənu i bə nə̀, wù loʼ i keeli dzə way luʼu key tə shinə tii.”

²⁸Nghee tə̀ Yeso diinə ghəə ghə n Ndaw Kəzə̀ i nii zə, tə n naʼa shi kɔʼ n dzə̂ i taw zə nə̀, “Ghaa khənu mə, ghaa u khə soʼonə luʼu key n shinə tii, a kee loʼ nə̀ n ka bə dzə n daʼa kuŋ. Wù wey tə tûm bənə mə loʼ wù wey tə ghɔɔmənə isəŋə, ghaa kee khə way wi

²⁹N kee khə wi, n təŋkey, n nuu bə n səə wi, a loʼ wi tə tûmnə mə.”

³⁰Ambə ghə zow tsunə ghəə ghən tə dzanə, ghə n zey ni kəŋ jìi ni kwu wi, wù umɔʼ n kee way ni gaʼ kəwɔɔ n kow wi, n təŋkey, nəŋə zə â ka kam bə dzə tə ghə ni kwu wi.

³¹À kee loʼ nə̀ ndəmə aghə̂ n nɔɔ k-a-ghə̂ key mâ bəghəm tə̀ wi. Ghə n dza, “Abə wù wey Zə̀ kə â dza naŋa nə̀ i tûm bənu î bənə, ghaa moʼonə tə î diinu tsəə tə, tə tsəghəshinə tə tən wù wən dii naŋanə ə?”

³²Ghə̂ a tə Falasi ghə n zow tsu nghee tə̀ ghə̂ a tsɔŋɔ ghɔɔmə kaabənə ghəə ghən bòʼ Yeso, sey ghə n təmdzəŋi kɔʼ ghi ghə fɔɔngili a nii ghə, tûm tsu ghə̂ a keyyə ghə nə̀ ghə ndòw kwu Yeso.

³³Yeso n dza, “N khə kə tɔŋɔ fə inəŋə ni doʼo kəŋə ndow ghi ghaa, mə i daŋŋə nuu ndòw n səə wù wey tə tûmnə mə.

³⁴Ghaa i kəŋə mə ghaa i way ni koʼ mə, n təŋkey, luʼu key n loʼnə tii, ghaa ndɔm way ni bə fu.”

³⁵Ngəd tə Təjuu tə n zey ndòw ni ghɔɔmə n wû i ghə nə̀, “Tə dza i boʼo ndòw ghee, saa î way ni kəŋ koʼ wi ə? Tə moʼlə ni ndow n naʼ i Grik, n luʼu key ghə̂ a saa a muu kaabənə tii ni dii ndòw ghə̂ a Grik ghə ə?

³⁶Tə dza tsu fa nə̀, ‘Ghaa i kəŋə mə ghaa i way ni koʼ mə’, nsə nə̀, ‘Luʼu key n loʼnə tii, ghaa ndɔm way ni bə fu.’ I sey dii nə̀ ngee?”

³⁷Tsuʼ fey zə̂ kə nfəə kə â maynə tii â loʼ tsuʼ fə nii fə. Yeso n nuu təmi kɔʼ idəŋ, naʼa shi kɔʼ n dzə i taw zə nə̀, “Wù wey fə̀ŋ ə mmuu zuʼlənə wi, tə bə n səə mə.

³⁸Wù wey tə bəghəmnə tə̀ mə, tə bə mə̂, n təŋkey màʼlə K-a-zə̀ kə dza nə̀, ‘Mmuu mey n fuunə muu zə itsali zə, i bənə shiə bə n fə̀ŋ ə wi tə a loʼ fədzuu.’”

³⁹Yeso â ghəə ghən a dza bòʼ Zay kə Zow key ghə̂ ghey ghə bəghəmnə tə̀ wi î keelinə. Â loʼ n nəŋə i tii zə nə̀ Zə̀ kə ka kam tûm dzə Zay kə Zow kə tə̀ ghə̂ ghey ghə bəghəmnə tə̀ wi, n təŋkey, Zə̀ kə â ka kam kɔʼlə dzə̂ Yeso n ghaʼ i wi.

⁴⁰Ambə ghə̂ a loʼ a zow tsunə ghəə ghən Yeso dzanə, ghə n dza, “Wù wən ndzəm loʼnu Wù tûm Kəzə̀.”

⁴¹Ghə̂ a loʼ ghə n dza, “Tə loʼ wù wən Zə̀ kə â dza naŋa nə̀ i tûm bənu.” A loʼ ghə n kee dza, “Wù wey Zə̀ kə â dza naŋa nə̀ i tûm bənu, way dzə ni shi n Galili.

⁴²Màʼlə K-a-zə̀ kə dza nə̀ wù wey Zə̀ kə â dza naŋa nə̀ i tûm bənu î loʼ waa a waa a Fɔɔ Devid. Ghə i jiə wi n naʼ i Betelehem, n naʼ zey Devid â shinə tii.”

⁴³Sey, nɔɔ kə aghə̂ key n dzawwə doʼo tsu n moʼlə tə ghə bòʼ Yeso.

⁴⁴Ghə̂ a loʼ ghə n ləghə ni kwu wi, wù umɔʼ n ka kee gaʼ kəwɔɔ n kow wi.

⁴⁵Nghee tə ghə̂ a keyyə ghey ghə â tûmnə nə̀ ghə ndòw kwu Yeso dzəŋŋə ndownə, ghə fɔɔngili a nii ghə nsə ghə̂ a tə Falasi ghə n bəb tə̀ ghə nə̀, “Ghaa ka ney bə wi nə̀ a loʼ kee?”

⁴⁶Ghə̂ a keyyə ghey n dza nə̀, “Wù loʼ ka kam ghɔɔmə koʼ tsə ghəə ghə tə̀ a loʼ wù wey.”

⁴⁷Ghə̂ a tə Falasi ghə n bəb ndòw tə̀ ghə nə̀, “Tə n ghaa nəb fu soʼo ə?

⁴⁸Ghaa n koʼ koʼ tsə ngəd u loʼ wə nkee wù Falasi u loʼ wə tə bəghəmnə tə̀ wi ə?

⁴⁹À kee loʼ nə̀ nɔɔ kə aghə̂ key buʼ khə way laŋ kə Mushi kə, Zə̀ kə n ghə ləŋ naŋa.”

⁵⁰Nikodemus, wù Falasi wey tə â ndòw koʼnə Yeso n tsuʼu tə, n bəb ndòw tə̀ ghə̂ a tə Falasi a loʼ ghey nə̀,

⁵¹“Laŋ kə saa kə diinu nə̀ a tsəʼlə saʼ n kow wù nə̀ ghə chɔd wi nə̀ a ka kəŋ shi kɔʼ dzə ghəə zey tə ghəŋə bəəbənə ə?”

⁵²Ghə n beeli ndòw wi nə̀, “Wə shi soʼo n Galili ə? Tɔʼɔ kəŋ shi kɔʼ n màʼlə K-a-zə̀, wə i koʼ tsu nə̀ Wù tûm Kəzə̀ u loʼ u nə shi koʼ way n Galili.”[5]

⁵³Sey, ghə adzəm, n sali nuu ndòw n ndaw tə ghə.