Read Weh Kəfwaʼ 10 Bible Online

Kəfwaʼ 10 - Weh bible

Kəfwaʼ 10

¹Wù loʼ â loʼnu n naʼ i Kayserya zəd i wi zə â loʼnə nə̀ a loʼ Kɔnilus. Tə n loʼ kətow tə̀ saʼ kə sawgoʼ tə Roma tən tə loʼnə fəbɔm, ghə â tɔŋŋə nə̀ aloʼ “Saʼ kə təsawgoʼ kə Itali.”

²Tə â ngii gaʼ fə̀ŋ n ghəə a Kəzə̀. Wi ghi ghə̂ a wi ghə n ndaw adzəm n ngɔɔmə tsə Kəzə̀. Tə n buu n wɔɔ kə ni gaamə ghə̂ a Təjuu a laa ghə, gɔŋŋə soʼo tə Zə̀ kə nəŋə tədzəm.

³N tsuʼ fə loʼ fə, nə a kɔʼɔ ndow tənəŋə tətəghə n tsə tə, jim wə n bə wi nə tə mə koʼ ndow tsəndəghə ə Kəzə̀ i nyi bənə, dza tə wi nə̀, “Kɔnilus!”

⁴Tə n sɔʼ laalə ndow tsəndəghə ə Kəzə̀ zey nə itsəŋ, bəb ndow tə wi nə̀, “À loʼ kee a mûkəbii?” Tsəndəghə zey n beeli ndow wi nə̀, “Gɔŋŋə zə nsə fə wən wə fuunə tə ghə̂ a laa ghə, Zə̀ kə n ney ləghə, tə nya tey ni beeli bə wɔ.

⁵Nya, tûm ndow ghə̂ ghə n Jopa, ghə ney bə Shimun wən ghə tɔŋŋə nə̀ a loʼ Pita.

⁶Tə nyi n ndaw Shimun wən tə fwaʼanə n gow tə tənyam. Ndaw wi loʼ n nguŋ ə dzuu i nii zə.”

⁷Tə tsəndəghə ə Kəzə̀ zey nuulə ndownə sa, Kɔnilus n daŋŋə tɔŋɔ tsu ghə̂ a kəfwaʼ a wi abəghə nsə sawgoʼ u loʼ wə tə â ngii gaʼnə fə̀ŋ n ghəə Kəzə̀, loʼ wù umɔʼ n sawgoʼ tey tə keyyənə wi.

⁸Tə n tiilə dza ndow ghəə ghən i shinə ghi wi adzəm, tûm ndow ghə n naʼ i Jopa.

⁹Ambə tsətsə wey tə a loʼ n fə̀ŋ ə tsə tə, nə ghə̂ ghey Kɔnilus mə tûmnə sə kuʼlə ndow n Jopa, Pita n nuu kɔʼ ndow n gɔŋ kə ndaw ni ndow gɔŋŋə.

¹⁰Dzəŋ n kaʼ wi ni zab, tə n ləghə ni zə kəfə. Nghee ghə nam khəələnə fəzəə wə, jim wə n bə wi.

¹¹N jim u tii wə tə n koʼ ndow bikighow kə chi shi ndownə, fə kə loʼ kə tə a loʼ igham n shiə tsuu bə aghəlitsə, nə̀ ghə zəghə tsuu bə n ngaŋŋə tə tii tə təkaykə.

¹²N fə kə tii kə, nyam tən tədzəm tə bweynə, tə tən tə ghaŋŋənə, nsə nən mən n zəʼlə idəŋ n loʼ tii.

¹³Tə n zow dzə i loʼ i dza bənə tə wi nə̀, “Nuu kɔʼ a Pita, wə wey i loʼ zə wə fə.”

¹⁴Pita n beeli ndow wi nə̀, “Ngaŋ a Mûkəbii, n ka kam zə̂ koʼ tsə fə kə loʼ kə nə̀ kə dzəənu nkee kə key laŋ kə ghə̂ Təjuu kə tuunə nə̀ kə ghə nə̂ zə̂ənə.”

¹⁵Dzə̀ ə tii n ghɔɔmə kpiʼi bə tə wi nə̀, “Fə key Zə̀ kə sòw naŋa tsunə, ka tɔŋɔ dzə nə̀ à loʼ fə kə dzəə kə.”

¹⁶Dzə̂ ə tii n dza kuulə kə ghə i mɔ̀ʼɔ zə tə wi tənəŋə tətəghə, gham i tii zə n daŋŋə nuu dzəŋŋə kɔʼ ndow idəŋ n bikighow.

¹⁷Nghee tow kə nam kpuunə Pita, tə n məʼlə kii ghəə zey jim wən diinə. N nəŋə i tii zə, ghə̂ ghey Kɔnilus mə tûm bənə, n kəŋ koʼ tsu ndaw Shimun, ghə n tey fu n fuʼ u mbàa.

¹⁸Ghə n bəb nyi ndow n dzə̀ i taw zə nə̀, “Shimun wən ghə tɔŋŋə nə̀ a loʼ Pita, muunu fa n ndaw ə?”

¹⁹Nghee Pita nam kəŋə tow kə ni zowkeeli ghəə zey jim wey diinə, Zay kə Zow kə n dza ndow tə wi nə̀, “Ghə̂ a tey bii atəghə, ghə kəŋŋə bənə wɔ.

²⁰Sey, nuu kɔʼ, wə tsu ndow itən, bɔɔmə dzûmə ndow ghə, kə wə nə səmənə, n təŋkey, a loʼ mə n tûm bənə ghə.”

²¹Sey, Pita n nuu tsu ndow itən, dza ndow tə ghə̂ a tii ghə nə̀, “N loʼ wù wey ghaa kəŋənə, ghaa fa bə kee?”

²²Ghə n beeli ndow wi nə̀, “Wù wey tə loʼnə tow kə sàʼ kə təsawgoʼ tən tə loʼnə fəbɔm wən ghə tɔŋŋə nə̀ a loʼ Kɔnilus tûm bə ghey n səə wɔ. Tə loʼ wù dzuŋu, ngɔɔmə Kəzə̀, tə u khə soʼo kɔʼlə mə n wɔ ghə̂ a naʼ i Təjuu adzəm. Tsəndəghə Kəzə̀ â dza tə wi nə̀ tə tɔŋɔ bə wɔ n ndaw wi, sey, tə̀ tə loʼ ni zow ghəə zey wə khənə ni dza.”

²³Pita n ney nyi ndow ghə n ndaw, dza nə̀ ghə gaʼ bweeli tsu fu. Tsətsə wey, Pita nsə dzûmə tə Klisto tə loʼ tə n Jopa n nuu dzəŋi ndow ghi ghə.

²⁴Ghə n nyiə ndow n Kayserya n tsuʼ fə loʼ fey. À n loʼ nə̀ Kɔnilus n tɔŋɔ zuŋŋə bə tyim a wi ghə nsə fə a wi ghə, ghə ləmmənə ghə Pita.

²⁵Nghee Pita nyiə ndownə n ndaw, Kɔnilus n kpii ney bə wi, təm ndow tənguʼ n tənnə wi, fuu ndow wi n ngɔɔmə zə.

²⁶Pita n kee ney nuu kɔʼ wi, dza nə̀, “Nuu kɔʼ idəŋ, n loʼ soʼo wù sɔŋtsuʼ tə a loʼ wɔ.”

²⁷Nghee Pita ghɔɔmənə ghi wi, ghə n tsəghə nyi ndow ndaw, Pita n koʼnə ghə̂ ghə n tsuŋ fu tii.

²⁸Tə n dza tə ghə nə̀, “Ghaa tɔʼ khənu nə̀ laŋ kə ghey kə ka bəghəm dzə nə̀ wù Juu təmdzəŋi ghi wù wən tə way wù Juu, nkee ni bwey koʼ wi. Zə̀ kə n kee dii bə tə mə nə̀ kə n nə neynə wù loʼ tə a loʼ wù wey tə dzəənə nkee tə a loʼ wù wey wù Juu way ni təmdzəŋi ghi wi.

²⁹À wey loʼ zuŋ key nghee wə tûm tɔŋɔ bənə mə, mə n bənə nə̀ n ka səm dzə. N loʼ ni kpaʼi keeli ghəə zey wə tɔŋɔnə mə fa tii ə?”

³⁰Kɔnilus n beeli ndow wi nə̀, “A feeli u loʼ wey, n nəŋə izən soʼo n tsə tə, nə tənəŋə tətəghə, nə n gɔŋŋə n ndaw zuŋ, wù loʼ n gbələ bən shi kɔʼ n sə̂ kuŋ nə̀ tə dzəŋə keeli ndzə̂ tə nyiələ tə nə uwû.

³¹Wù wey n dza tə mə nə̀, ‘Kɔnilus, Zə̀ kə n zow gɔŋŋə zə zə̀, tə u koʼ soʼo jìi zey wɔɔ kə kə̀ buunə tii ni fuu gaamə zə tə ghə̂ a laa ghə.

³²Tûm ndow ghə̂ ghə n Jopa, ghə ney bə Shimun wən ghə tɔŋŋə nə̀ a loʼ Pita. Tə muu n ndaw Shimun wən tə fwaʼanə fə wə n gow tə tənyam, ndaw wi loʼ n nguŋ ə nali kə dzuu zə.’

³³Mə n daŋŋə tûm tɔŋɔ bənə wɔ. Wə ghəŋŋə dzɔbnu ni bə. Nya ghey n təmdzəŋi bə n sə̂ K-a-zə̀ ni zəllə ghəə ghey Mûkəbii tûm nə wɔ nə̀ wə bə naʼa tə ghey.”

³⁴Ambə Pita zow tsunə ghəə ghən, tə n zey tsu ni ghɔɔmə nə̀, “Mə n ndzəm koʼ nya nə̀ Zə̀ kə badla way kpey wə,

³⁵tə bəghəm naŋŋə aghə̂ adzəm, abə wù tii ngɔɔmə dzənə wi ghəŋŋə soʼo ghəə ghey a loʼnə tsətsəghə. Tə ney way n taŋ nə̀ wù tii shi n naʼ i ghaa zə.

³⁶Ghaa khənu nə̀, Zə̀ kə â tûm bə tûm wi tə ghə̂ ghə Izree ghə, naʼlə ndow tûm i dzuŋu zə bòʼ ibuulə n bam i Yeso Klisto. Tə loʼ Mûkəbii tə ghə̂ ghə adzəm.

³⁷Ghaa khənu ghəə a səŋi ghey ghə â neynə bənə kə n naʼ i Judeya idzəm, ni ney nuu tsu n Galili nghee Jɔn â naʼa may tsunə tûm nə̀ ghə̂ a kweyyə nuu bə fə̀ŋ tə ghə n ghəə a bəbə ghə, ghə ney mmuu n Kəzə̀.

³⁸Ghaa khənu nghee Zə̀ kə â tsuʼ naŋanə Yeso, wù Nazaled, fuu tsu wi n Zay kə Zow kə nsə daʼa kə. Ghaa khə soʼonu nghee tə â bwey kaabənə, ghəŋŋə ndzuŋ, baŋŋə ghə̂ ghən adzəm ghə a loʼ nə n tənnə daʼa kə avəətsəə, n təŋkey, Zə̀ kə â loʼ ghi wi.

³⁹Ghey loʼ ghə təmi tiilə n ghəə ghən adzəm tə â ghəŋənə n naʼ i ghə̂ a Təjuu nsə n Yerosalem. Ghə n wey tsu wi nə ghə baa n zat kə fəkaʼ.

⁴⁰Zə̀ kə n kee zhəm dzəŋŋə bə wi nə ntsuʼu ntəghə, tə n ghəŋə soʼo nə̀ tə dii bə uwû.

⁴¹Tə â ka dii dzə wû wə tə ghə̂ ghə adzəm, tə â dii bə kə tə ghə̂ ghən Zə̀ kə â say naŋanə, tɔŋɔ ghey ghən ghey â zə̂nə, mə̂ dzəŋi soʼo ghi wi nghee tə â zhəm dzəŋŋə bənə nə ivə.

⁴²Tə n dza nə̀ ghey i naʼlə ndow tûm i dzuŋu zə tə ghə̂ ghə, təmi tiilə ndow soʼo tə̀ ghə̂ ghə nə̀ tə loʼ wù wən Zə̀ kə naŋa nə̀ tə i saʼa ghə̂ ghən ghə loʼnə utaw nsə a ghən ghə kpu dzənə.

⁴³Tûm tə Kəzə̀ tədzəm tə mâ ghɔɔmə bòʼ wi dza nə̀ ghə̂ ghey ghə bəghəm nə tə wi, Zə̀ kə i neyzəənu ghəə a ghə a bəbə ghə n bam i zəd i wi.”

⁴⁴Nghee Pita nam ghɔɔmənə, Zay kə Zow kə n tsu bə n kow ghə̂ ghey adzəm ghə zəllənə tûm wi.

⁴⁵Dzuu zə n zum ghə̂ a Təjuu ghən ghə bəghəmnə tə Klisto, ghə â nuu dzəŋi bənə ghi Pita n naʼ i Jopa ni koʼ nə̀, Zə̀ kə n fuu soʼo Zay kə Zow kə tə ghə̂ ghən ghə way ghə̂ a Təjuu ghə.

⁴⁶N təŋkey ghə â zow ghə, ghə ghɔɔmənə lii tə təghɔɔmə tə, fuu ukali tə Zə̀ kə. Pita n daŋŋə ghɔɔmə shi kɔʼ nə̀,

⁴⁷“N khənu nə wù loʼ way dzə fa tə loʼ ni tuu nə̀ ghə̂ ghən ka ney mmuu n Kəzə̀ mə nə mmuu n təŋkey, ghə n keeli soʼo Zay kə Zow kə tə a loʼ saa.”

⁴⁸Sey, tə n dza nə̀ ghə fuu ghə n mmuu n Kəzə̀ mə n zəd i Yeso Klisto. Nghee tə ghə̂ ghey ney kɔʼnə mmuu n Kəzə̀ mə, ghə n daŋŋə dza nə̀ Pita doʼo kəŋə ndow ghi ghə n tsuʼu n loʼ mə.