Read Weh Kəfwaʼ 14 Bible Online

Kəfwaʼ 14 - Weh bible

Kəfwaʼ 14

¹Ambə Pɔl ghi Banabas bə soʼonə nə Ikonum, ghə n ndow n ndaw kədzəŋi ə ghə̂ a Təjuu, ghɔɔmə n jìi zey ndəmə ghə̂ a Təjuu nsə ghə̂ ghey ghə way ghə̂ a Təjuu ghə â loʼ ni keeli bəghəm i fə̀ŋ.

²Ghə̂ a Təjuu ghən ghə â khə way bəghəm i fə̀ŋ zə n fədlə kuu tənyɔʼ, bəəbə maʼa kɔʼ fə̀ŋ tə ghə̂ ghey ghə way ghə̂ a Təjuu ghə kuum Pɔl ghi Banabas nsə dzûmə tə Klisto tə loʼ tey.

³Pɔl nsə Banabas n ndəŋ doʼo kəŋə ndow fu tii, naʼlə tûm i dzuŋu zə bòʼ Mûkəbii nə̀ ghə khə way tsəŋ i loʼ zə. Mûkəbii n dii bə nə̀ tûm ghə zən ghə naʼlənə bòʼ ndzuŋ ə Kəzə̀ loʼ isəŋə nghee tə â funə ghə n daʼa kə ni ghəŋŋə faalə mə nsə ghəə a zum ghə idzuu ghə.

⁴Ghə̂ ghə n dzawwə doʼo bə fu tii inaʼ, ghə̂ a loʼ ghə n bəghəm dzəŋi ndow ghi ngəd tə Təjuu, a loʼ ghey ghə bəghəm dzəŋi ndow ngəd tə Yeso tey.

⁵Sey, ghə̂ a loʼ ghə n ghə̂ ghey ghə way ghə̂ a Təjuu ghə nsə ghə̂ Təjuu ghə n ndow koʼ ndow ghə̂ a nii ghey fu inaʼ, ghə n bəghəm dzəŋi kɔʼ ni chɔd Pɔl nsə Banabas, ghə təmmə wey ghə nə atay.

⁶Ambə ngəd tə Yeso tən keeli tsunə ghəə a tii ghə, ghə n tyi nuu ndow n mboʼo Likonia n naʼa tə Listra nsə Debe nsə naʼa tey fu n dəŋə kə tii kə.

⁷Ghə n ndow n sə kə ni naʼlə tûm i dzuŋu zə fu tii.

⁸Wù loʼ n loʼ fu tii n naʼ i Listra nə̀ tə loʼ kəkəŋŋə. Ghə â ji wi sey nə̀ tə loʼ kəkəŋŋə, tə n loʼ nə̀ tə ka kam bwey koʼ tə ghə a jinə wi.

⁹Wù tii n tɔʼɔ zəllə nghee Pɔl ghɔɔmənə. Pɔl n koʼ ndow nə̀ tə khənu bəghəm i fə̀ŋ zə nə̀ Yeso loʼ ni baŋŋə wi, tə n laalə ndow wi tsətsəghə,

¹⁰dza ndow tə wi n dzə i taw zə nə̀, “Nuu kɔʼ idəŋ!” Wù tii n daŋŋə ghaʼ nuu kɔʼ, zey ndow ni bwey.

¹¹Ambə nɔɔ kə aghə̂ key koʼ tsunə ghəə zən Pɔl ghəŋŋənə, ghə n kaʼ ndow ni buʼlə nbɔŋ n ghɔɔmə zə inaʼ i Likonia dza nə̀, “Zə̀ wə n tsuu bə n səə saa n wû u wù sɔŋtsuʼ!”

¹²Ghə n fu tsu zəd i Banabas nə a loʼ Zeyus, fu ndow zəd i Pɔl nə̀ a loʼ Hemes təŋkey, â loʼ wi tə a baa ghɔɔmənə.

¹³Ndaw zə̀ kən ghə â tɔŋŋənə nə̀ a loʼ Zeyus â doʼo shi ndow n bow zə naʼ. Sey, fɔɔngili zə̀ kə Zeyus kən nsə nɔɔ kə aghə̂ kə n ney bə num tə təmbɔŋɔlɔʼ tə num tə nii tə nsə tey u sə̀ŋ wə n fuʼ u mbàa wey u nyiə bənə inaʼ. Ghə n ləghə ni fəələ umaʼlə tə Pɔl nsə Banabas.

¹⁴Ambə Pɔl nsə Banabas wən ghə â loʼnə ngəd tə Yeso tə, zow tsunə ghəə ghən, ghə n baalə maʼa tsu ndzə tə ghə, tyi nyi ndow n fəŋŋə kə aghə̂, buʼlə shiə kɔʼɔ kəbɔŋ nə̀,

¹⁵“Kə̂ ghaa nə ghəŋŋənə ghəə ghən, ghey loʼ soʼo ghə̂ a sɔŋtsuʼ tə a loʼ ghaa! Ghey fa bə ni bə naʼa tûm i dzuŋu zə tə̀ ghaa, nə̀ ghaa loʼ ni kwey nuu bə fə̀ŋ tə ghaa n ghəə ghən a gaamə way ghaa, ghaa i ngɔɔmə ndow Zə̀ kən kə loʼnə utaw. À loʼ Zə̀ kən kə loʼnə utaw kə â bɔmnə mbi idzəm, tɔŋɔ bəkighow, ghəlikətsə, tədzuu, nsə fə wey tii udzəm.

¹⁶Sə̂ i sə, Zə̀ kə â zəghə maʼa tsu naʼa tədzəm fa mbi, nə̀ kay wù i ghəŋŋə ndow ghəə ghey a kpiilənə tə̀ wi.

¹⁷A kee loʼ nə̀ Zə̀ kə ka maŋ naŋa dzə ghə sey nə̀ tə ka ghəŋŋə nə̀ ghə keeli nə̀ tə loʼnu. Tə â ghəŋŋə nə̀ ghə keeli nə̀ tə loʼ utaw n ghəə a dzuŋu ghən tə â ghəŋŋənə ni tûm tsuu bə ghow zə i idəŋ, ghəŋŋə soʼo nə̀ fə wə i nyîmmə dzɔbə n nəŋə zey i kpiilənə. À loʼ wi tə â fuunə ghaa n fəzəə wə, ghəŋŋə soʼo nə̀ ghaa i saŋŋə n fə̀ŋ tə ghaa naʼ idzəm.”

¹⁸Ghɔɔmə zən n nam way ni buu naŋa nɔɔ kə aghə̂ kən nə̀ ghə ka ndow n sə̂ kə ni fəələ umaʼlə tə Pɔl nsə Banabas.

¹⁹Ghə̂ a Təjuu a loʼ ghə, ghə a nuu bənə n naʼa tə Antyɔk nsə nə Ikonum n ndow bə fu n Listra. Ghə nəəbə tsu nɔɔ kə aghə̂ key nə ghə dzəŋi bə i ghə. Sey ghə n təmmə Pɔl nə atay, sii nuu shi ndow ghi wi n naʼ i tii zə ndow maʼa naŋa ndow wi, khə kə nə̀ tə n kpuu.

²⁰Ambə dzûmə tə Klisto tə ndow bənə n luʼu key Pɔl â nyəŋnə tii, tə n kəm ghaʼ nuu kɔʼ idəŋ, nuu nyi dzəŋə ndow ghi ghə n naʼ i tii zə. Ambə tsətsə wey, wi ghi Banabas n nuu ndow n naʼ i Debe.

²¹Ambə ghə ndownə n naʼ i Debe, Pɔl nsə Banabas n naʼa tûm i dzuŋu zə tə ghə̂ ghey fu. Ndəmə aghə̂ n bəghəm tə Yeso fu n naʼ i tii zə. Ghə n kəm nuu tsu fu, ndow dzəŋŋə n naʼ i Listra, tsəghə ndow daŋŋə n naʼ i Ikonum, kəm dzəŋə bə n naʼ i Antyɔk zey n Pisidya.

²²Ghə n təm tawwə dzûmə tə Klisto tey fu, kuu fə̀ŋ tə ghə nə̀ ghə təmi taw tsu n bəghəm i fə̀ŋ i ghə, dza tə ghə nə̀, “Saa khə ni teeli zow ngoʼ tə̀ saa ni nyi n fɔɔ u Kəzə̀.”

²³Ghə n sày naŋa tsəghə ndow təngəd n dzəŋi dzûmə tə Klisto tən tədzəm ghə â bweyyə koʼnə. Ghə n gɔŋŋə tə ghə, bam idzuu, fu naŋa ndow ghə n wɔɔ kə Mûkəbii wən ghə â bəghəmnə tə̀ wi.

²⁴Ambə ghə bwey tsəghə may bənə n mboʼo Pisidya, ghə n nuu kùm shi ndow n mboʼo Pamfilya.

²⁵Ghə n naʼa tsu soʼo tûm i dzuŋu zə fu n naʼ i Pega, nuu tsu ndow n naʼ i Atalya.

²⁶Ghə n nuu tsu fu nə Atalya kəfən, ndow dzəŋŋə n naʼ i Antyɔk. À loʼ n luʼu kən ghə â gɔŋŋənə tii nə̀ Zə̀ kə fuu ghə n ndzuŋ ni fwaʼ fwaʼ kən ghə kuʼlə mayyə kɔʼnə.

²⁷Ambə ghə dzəŋŋə bənə n naʼ i Antyɔk, ghə n zuŋŋə naŋa bə dzûmə tə Klisto tədzəm, tiilə dza ndow jìi zey Zə̀ kə fwaʼnə tii ghi ghə, nsə nghee tə chinə jii nə ghə̂ ghey ghə way ghə̂ a Təjuu ghə̀ bəghəm soʼo tə̀ Yeso.

²⁸Sey, Pɔl ghi Banabas n ndəŋ doʼo kəŋə ndow fu ghi dzûmə tə Klisto.