Read Weh Kəfwaʼ 18 Bible Online

Kəfwaʼ 18 - Weh bible

Kəfwaʼ 18

¹Ambə Pɔl ghɔɔmə may tsunə tə ghə̂ a ndaw tsə ghey, tə n zəghə tsu Atens, nuu ndow n Kɔrint.

²Tə n ndow kpiilə ndow ghi wù Juu u loʼ fu ghə â tɔŋŋə nə̀ aloʼ Akwila ghə â jinə wi n naʼ i Pontus. Tə n loʼ ghi wey wi Prisila. Ghə â kuʼlə nuu bə n naʼ i Itali kuumnə Klodius wən tə â loʼnə də̀ŋ kə Roma kə â tsəʼlə kəlaŋ nə̀ ghə̂ a Təjuu adzəm a zəghə naʼ i Roma. Pɔl n nuu ndow ni ndow koʼ ghə.

³Tə n ndow muu dzəŋi ndow ghi ghə, fwaʼa dzəŋi soʼo ghi ghə n təŋkey ghə â taŋi fə wən ghə tsədənə fəə mə tii tə aloʼ wi.

⁴N tsuʼu mə inaʼ n Təjuu n dzəm, Pɔl n ghɔɔmə tsə n ndaw kədzəŋi ə ghə̂ a Təjuu ghə, dəmə ni kɔŋŋə bə ghə̂ a Təjuu nsə ghə̂ ghən ghə way ghə̂ a Təjuu ghə nə̀ ghə bəghəm tə Klisto.

⁵Ambə Silas ghi Timoti nuu bə n Masedonya, Pɔl n baa təmi tən tsu kə ni naʼa ghəə a Kəzə̀, tiilə dza ndow ghə̂ a Təjuu nə Yeso loʼ wù wey Zə̀ kə â dza naŋa nə̀ i tûm bənu.

⁶Ambə ghə̂ a Təjuu khə̂mə ghɔɔmə i Pɔl zə, zey ndow ni kpaalə wi, tə buʼ maʼa tsu kəbvə n ndzə̂ tə wi ni dii tsu nə̀ tə n nyoʼo dzəm tə ghə. Tə n dza tə ghə nə̀, “Və i ghaa i laalə kə ghaa, wɔɔ kuŋ kə way tii. Ni nuu tsu nya ndow isə, mə i tûm i dzuŋu i nya naʼlə kə tə ghə̂ ghən ghə way ghə̂ a Təjuu ghə.”

⁷Tə n zəghə tsu fu, nuu ndow nə wù loʼ tə â ngɔɔmə tsənə Zə̀ kə, zəd i wi zə â loʼ nə a loʼ Titius Justus. Ndaw wi â kuʼlə loʼ kə n səə ndaw kədzəŋi ə ghə̂ a Təjuu.

⁸Krispus wən tə â loʼ tow kə n ndaw kədzəŋi ə ghə̂ a Təjuu, n bəghəm tə Mûkəbii ghi ghə̂ a ndaw a wi ghə adzəm. Ndəmə ghə̂ a Kɔrint ghey ghə â zow ghɔɔmə i Pɔl zə, ghə n bəghəm fu soʼo, ney kɔʼ mmuu n Kəzə̀.

⁹N tsuʼ fə loʼ fə n tsuʼu tə, Mûkəbii n bə dii may bə tə̀ Pɔl nə ujim, dza tə wi nə̀, “Ka fə kə loʼ kə tsəŋ dzə, ndow kə n sə kə ni ghɔɔmə ghəə ghə, kə wə nə tsəŋə doʼlənə mɔŋ.

¹⁰N loʼ ghi wɔ, wù loʼ i way ni mɔm wɔ boʼnə ndəmə ghə̂ ghey ghə loʼnə fa n naʼ zən loʼ ghə̂ ghuŋ.”

¹¹Sey, Pɔl n doʼo tsu fu kənum nsə ndzɔŋɔ tə tətuubə, dii kə ghə fu n ghɔɔmə i Kəzə̀ zə.

¹²A n kee bə nghee ghə naŋa kɔʼnə Galio tə aloʼ gɔvənɔ n mboʼo Akaya, ghə̂ a Təjuu ghey fu n Kɔrint n zuŋŋə kɔʼ, kwu kɔʼ Pɔl, ghəŋŋə nə̀ ghə ney ndow wi n ndaw tsə nə̀ ghə saʼ wi.

¹³Ghə n dza ndow tə Galio nə̀, “Wù wən kɔŋŋə nuu ndow aghə̂ nə̀ ghə i ngɔɔmə Zə̀ kə n jìi zey laŋ u ghey u ka bəghəm.”

¹⁴Tə Pɔl ni kee kɔʼ kɔli, Galio n dza tə ghə̂ a Təjuu ghey nə̀, “Wee ghə̂ a Təjuu ghə, abə a mə loʼ nə̀ tə bwulə maʼa kəlaŋ, nkee nə̀ tə ghəŋə bəbə bəb kə ighəə kə loʼ kə, tə n mə loʼ ni zow n wɔ ghaa.

¹⁵A fa fəd loʼ nə̀ ghaa maŋa baŋŋə təfəghəm nə aghəə, azəd, nsə laŋ u ghaa wə. Ghaa khə ni teeli bayyə ghəə ghən n wû i ghaa. N tuunu ni saʼ ndzoʼo ghəə ghən.”

¹⁶Nghee tə dza tsu sey, tə n dzum nuu shi ndow ghə fu n ndaw tsə.

¹⁷Ghə adzəm n fəd nu kwu kɔʼ Sɔstenes, tə â loʼnə tow kə n ndaw kədzəŋi fu, bwɔd wi fu n sə kə tsə. Ghə i tii zə n ka tsəm mɔm Galio.

¹⁸Nghee ghəə ghən tsəghə tsunə, Pɔl n dzə doʼo kəŋə ndow tsuʼu n loʼ mə fu. Tə n zəghə tsu dzûmə tə Klisto tey fu, ney kɔʼ Prisila nsə Akwila, nyi kɔʼ nə kəfən, nuu daŋ ndow n mboʼo Sirya. Tə̀ wi ni ndow n Sirya, à n loʼ nə tə n kɔm tow kə n Senkria ni diitsu nə̀ tə n naŋa ghəə zey tə â kâa naŋanə tə̀ Zə̀ kə.

¹⁹Nghee ghə nyi bənə n naʼ i Efesus, Pɔl n naŋa taʼa tsu Prisila nsə Akwila fu, kee ndow n ndaw kədzəŋi ghə̂ a Təjuu n nəŋə wi, ghɔɔmə fu ghi ghə̂ a Təjuu ghə.

²⁰Ghə n dza nə̀ tə dzə doʼo kəŋə kpiʼi ndow ghi ghə, tə n mə i tuu.

²¹A n kee bə tə dza i nuu, tə n dza tə ghə nə̀, “Mə i kəm bəghə dzəŋŋənu ni bə koʼ ghaa abə Zə̀ kə bəghəmnə.” Tə n daŋŋə bə ney kɔʼ kəfən, zəghə tsu naʼ i Efesus.

²²Ambə tə bə nyi bənə n naʼ i Kayserya, tə n kɔʼ ndow n Yerosalem, tɔŋɔ zow ndow dzûmə tə Klisto tey fu, tsəghə tsu daŋŋə ndow n Antyɔk.

²³Ambə Pɔl tsuŋŋə doʼo tsunə fu n Antyɔk, tə n zey ni ngəə kaabə naʼa tənaʼa, tsəghə tɔɔlə ndow n mboʼo ə Galeshya nsə n Frigya, təmə tawwə ndow fə̀ŋ tə dzûmə tə Klisto tey fu tədzəm.

²⁴Nghee tə̀ Pɔl bwey kaabənə n mboʼo tə Frigya tə nsə Galeshya, wù Juu u loʼ wə n ndow bə n naʼ i Efesus, zəd i wi zə â loʼ nə̀ a loʼ Apolos, tə â shinə n naʼ i Alekzandra. Tə n loʼ dzɔbə dzə̀, tɔʼ khə soʼo màʼlə K-a-zə̀.

²⁵À n loʼ nə tə n tɔʼ zoʼlə ghəə ghə bòʼ jii zey i loʼnə i Mûkəbii zə. Tə n khə zày ni dii aghə̂ n ghəə ghə bòʼ Yeso loʼ sey nə̀ tə â tɔʼ khə kə aghəə bòʼ mmuu n Kəzə̀ mey Jɔn â fuunə.

²⁶Tə n zey ndow ni naʼa ghəə a Kəzə̀ n ndaw kədzəŋi ə ghə̂ a Təjuu nə tə tsəŋə way. Ambə Prisila ghi Akwila zəllə tsu ghɔɔmə i Apolos zə, ghə n baa ney ndow wi nə ghə, tɔʼ ndow tiilə dzɔb tsu ghəə a jii zey i loʼnə i Kəzə̀ zə tə̀ wi.

²⁷Ambə Apolos ləghənə ni daŋ nə Akaya, dzûmə tə Klisto tey n Efesus n kuu fə̀ŋ ə wi nə tə ndow. Ghə n tɔ̀ɔ ndow kəmàʼlə tə dzûmə tə Klisto tey fu, nə̀ ghə ney naŋa wi. Ambə tə nyi ndownə fu, tə n ngii gaamə ghə̂ ghey ghə â bəghəmnə tə Klisto boʼ ndzuŋ ə Kəzə̀.

²⁸Tə n təmə zəə tsə ghə̂ a Təjuu n sə kə aghə̂ nə ighɔɔmə nghee tə â ney shiə kɔʼɔnə ghəə ghə n màʼlə K-a-zə̀ dii ndow tə ghə nə Yeso loʼ wù wey Zə̀ kə â dza naŋa nə̀ i tûm bənu.