Read Weh Kəfwaʼ 19 Bible Online

Kəfwaʼ 19 - Weh bible

Kəfwaʼ 19

¹Nghee Apolos loʼnə n Kɔrint, Pɔl n tsəghə tɔɔlə ndow n fə̀ŋ inaʼ, ndow nyi ndow n naʼ i Efesus. Tə n ndow kpiilə ndow ghi dzûmə tə Klisto tə loʼ tə fu.

²Tə n bəb tə ghə nə̀, “Zay kə Zow kə â nyinu n kow ghaa n nəŋə zey ghaa â bəghəmnə tə Klisto ə?” Ghə n beeli ndow wi nə̀, “Ngaŋ, ghey ka kam buʼ zow koʼ tsə nə̀ fə kə loʼ kə loʼnu tə a loʼ Zay kə Zow kə.”

³Pɔl n bəb tə ghə nə̀, “Â kee loʼ ndzoʼo mmuu n Kəzə̀ n ghaa mə ghaa â neynə ə?” Ghə n beeli ndow wi nə̀, “Â loʼ mmuu n Kəzə̀ kuum ghəə ghey Jɔn â diinə.”

⁴Pɔl n dza tə ghə nə̀, “Mmuu n Kəzə̀ mən Jɔn â fuunə, â loʼ n mey tə fuunə tə̀ ghə̂ ghey ghə tyi kweyyə nuu bənə fə̀ŋ tə ghə tə n ghəə a bəbə ghə. Tə n dza ndow tə ghə̂ ghə Izree ghə nə̀ bəghəm fu tə wù wey tə â khə ni bə n baa wi, tɔŋɔ Yeso.”

⁵Nghee ghə daŋŋə zow tsunə ghɔɔmə zən, ghə n bəghəm fu, ney kɔʼ mmuu n Kəzə̀ n zəd i Mûkəbii Yeso.

⁶Ambə Pɔl gaʼ tsu wɔɔ a wi ghə n tow u ghə, Zay kə Zow kə n daŋŋə nyi tsu n kow ghə. Ghə sey daŋŋə zeynu ni ghɔɔmə n ghɔɔmə tə naʼa tə nuu tə, dza ndow soʼo ghəə ghey a nuu bənə n wɔ Zə̀ kə.

⁷Ghə â dzəŋi loʼ tə a loʼ aghə̂ ighəm nsə ghə̂ ghə abəghə fu tii.

⁸Pɔl n ney kəŋə ndow təndzɔŋɔ tətəghə nə tə ndow ghɔɔmə kə aghəə ghi ghə̂ ghey n ndaw kədzəŋi ghə̂ Təjuu nə tə tsəŋə way. Tə n ghɔɔmə ballə ghi ghə ni kɔŋŋə nuu bə ghə bòʼ ghəə a fɔɔ u Kəzə̀.

⁹Ghə̂ a ghə a loʼ ghə n kee taw n tow kə, tuu ni bəghəm tûm i dzuŋu zə, khəə soʼo ghəə a bəbə ghə kuum Jìi zey Mûkəbii ləghənə n sə kə aghə̂. Pɔl n zəghə tsu ghə, ney nuu ndow ghi dzûmə tey tə â bəghəmnə tûm i dzuŋu zə ghi wi. Ghə n dzəŋi ndow ghɔɔmə zeeli tsə tsuʼu n dzəm n dzuu i ndaw i nii zey Tayranus â dii tsənə ghə̂ tii.

¹⁰Pɔl n ghəŋə kəŋə ndow ghəə ghən nə tənum tə bəghə, n jii ghə̂ ghən adzəm ghə muunə n Eshya, ghə̂ a Təjuu nsə ghə̂ ghən ghə way ghə̂ a Təjuu ghə, n zow tsu ghɔɔmə i Mûkəbii.

¹¹Zə̀ kə n fu tsu Pɔl n daʼa kə, tə n ghəŋŋə ndəmə ghəə a faalə ghə nə ghə̂ a ka kam koʼ koʼ tsə.

¹²Ghə̂ ghə n ney kɔʼ badla n təndzə mən Pɔl â zəd wû u wi wə tii, nsə maʼlə u kəfwaʼ u wi, ndow zəd ə ndow n kow ghə̂ a dzaŋa ghə, ghə n taw doʼo i bə, zay u bəbə wə n nuu shi soʼo n kow ghə.

¹³Ghə̂ a Təjuu a loʼ ghə, ghə â bwey dzum shiə kaabə bə zay u bəbə wə n kow ghə̂ ghə, ghə n mbɔŋ dza ghə dza i ney zəd i Mûkəbii Yeso ni dzum shi zay u bəbə wə n kow ghə̂ ghə, dza nə̀, “N dza nə̀ ghaa shi nuu n zəd i Mûkəbii Yeso wən Pɔl naʼlə kaabənə.”

¹⁴Ghə̂ a loʼ ghey ghə â dzum shiə soʼonə zay u bəbə wən â loʼ waa a num a fɔɔngili u nii nii u ghə̂ Təjuu ghə asəghəmbəghə. Ghə â tɔŋŋə fɔɔngili u nii nii wən nə̀ a loʼ Skeva.

¹⁵N tsuʼ fə loʼ fə, ghə n bə soʼo ni ghəŋŋə ghəə ghən, zay kə bəbə kə n fəd dza tə ghə nə̀, “N khənu Yeso, mə n khə soʼo Pɔl, ghaa kee loʼ ghə ndee?”

¹⁶Wù wey zay kə bəbə key â loʼnə n kow wi n nuu kwu tsu ghə, taw tsəghə tsu ghə, ghə n tyillə shi fu n ndaw n wû i zum zə, nə ghə loʼ kə fəŋ a fəŋ.

¹⁷Ghə̂ a Təjuu nsə ghə̂ ghən ghə way ghə̂ a Təjuu ghə adzəm, ghə â muunə n Efesus n zow tsəghə ndow ghə i tii zə. Tsəŋ zə n ngii nyi ghə n fəŋ, ghə n daŋŋə kaʼ ni ngii fuu kɔʼlə mə zəd i Mûkəbii Yeso.

¹⁸Ndəmə aghə̂ n ghə̂ ghey ghə â bəghəm fu n bə zaa vuŋ u ghə, dza fu bə ghəə a ghə a bəbə ghey ghə â loʼ nə ghə n ghəŋə.

¹⁹Ghə̂ a loʼ ghə n ghə̂ ghey ghə â ghəŋŋənə ghəə a fənnə ghə, n kuumə bə màʼlə wey ghə ghəŋŋənə ghəə a fənnə ghə tii, bə kpəghə maʼa kɔʼ n sə kə aghə̂. Ghə n taŋ kɔʼ kaʼ kə umaʼlə kə tii kə, kə n fuu kɔʼ khəə u səŋi wə tə a loʼ bɔm tə təndangaŋ n ndəm.

²⁰Seykə, ghɔɔmə i Mûkəbii zə zaamə ndow, taŋa ghə̂ ghey ghə â bəghəmnə nyîmmə kɔʼɔ ndow soʼo.

²¹Nghee ghəə a waa a Skeva ghən tsəghə tsunə, Pɔl n tsəm tsu n fə̀ŋ ə wi nə i tsəghə tɔɔlə ndow n Masedonya nsə nə Akaya, tə ndow daŋŋə n Yerosalem. Tə n dza n fə̀ŋ ə wi nə̀, “Abə mə i ndow taa tsu fu, N teeli khə soʼo ni ndow taa n Rom.”

²²Tə n daŋŋə ney kɔʼ ghə̂ ghey ghə â gaamə bənə wi abəghə, Timoti ghi Erastus, tûm ndow n Masedonya, wû u wi n kee dzə doʼo kəŋə ndow n mboʼo Eshya.

²³À wən loʼ nəŋə zey chɔd u nii wə â nuu shi kɔʼnə n Efesus kuum jìi zey i loʼnə i Mûkəbii zə.

²⁴Wù loʼ tə â tsəə tsənə nam kə tsâa zə ishɔ̀lɔ̀, ghə â tɔŋɔ wi nə â loʼ Demitrus, n tsəə tsə fəə n zə̀ kə zən kən ghə â tɔŋŋə nə̀ a loʼ Atemis. Tə â ghəŋŋə ghə̂ a kəfwaʼ ghə n kûm n nam key tə â tsəə nə.

²⁵Wù wən n tɔŋɔ naŋa tsu ghə̂ a kəfwaʼ ghən adzəm nsə ghə̂ a loʼ ghən ghə â tsəə soʼo nə nam kə, dza tə ghə nə̀, “Waazə ghə, ghaa khənu nə a wən loʼ fwaʼ kən saa zəənə tii.

²⁶Ghaa koʼonu, ghaa a zow soʼonə nə̀ a kad way kə fa n Efesus, a loʼ soʼo mboʼo Eshya idzəm, Pɔl wən loʼ nə tə n nəəbə nuu ndəm ə aghə̂, nə̀ zə̀ wən saa faalə tsunə n wɔɔ, way dzə zə̀ u loʼ wə.

²⁷Tsəŋ i fa kad way kə nə fwaʼ kə saa kən loʼ ni bəb, tsəŋ i loʼ soʼo nə̀ fəə mə Atemis, zə̀ kə saa kə səŋi kə î bənə bə doʼlə bənə kə zum kə, nsə nə ghə loʼ ni ney nuu kɔʼlə mən Atemis khə ghi mə, nə̀ aghə̂ adzəm ngɔɔmə wi n mboʼo Eshya nsə n mbi idzəm.”

²⁸Ambə nɔɔ kə aghə̂ key zow tsu ghəə ghən, ghə n fəələ ndow n fə̀ŋ tii, kaʼ tsu bɔŋ n buʼlə mə dza tsu nə̀, “Atemis wən a kɔʼlə fa n Efesus, taw tsəghə uzə̀ udzəm!”

²⁹Naʼ i tii zə idzəm n daŋŋə təmi kɔʼ nə ifuu. Ghə n kwu kɔʼ Gayɔs ghi Aristakus, ghə̂ a Masidonia ghən ghə a bweynə ghi Pɔl, daŋŋə nyəŋ ndow ghi ghə n ndaw kədzəŋi i nii zey fu inaʼ.

³⁰Pɔl n ləghə ni ndow n luʼu key nɔɔ kə aghə̂ key loʼnə tii, dzûmə tə Klisto tey fu n ka kee bəghəm nə tə ndow fu.

³¹Ghə̂ a nii aloʼ ghə fu n mboʼo tii, ghə â loʼnə fə a Pɔl ghə, ghə n tûm bə soʼo tûm tə Pɔl, buʼ wi n wɔɔ kə nə̀ kə̂ tə nə̂ foʼlə ni nyi fu n ndaw kədzəŋi i nii zey.

³²Ghə̂ ghey ghə â loʼnə fu nə kədzəŋi adzəm n teynə ifuu. Ghə n taw fu n dzə̂ tə, kay wù n dza ndow i zən, waazə n dza ndow i nuu zə, n təŋkey ndəm ə ghə̂ ghey ghə â loʼnə fu, â buʼ khə way zuŋ key ghə təmdzəŋi bənə.

³³Ghə̂ a Təjuu a loʼ ghə n tənnə Alekzanda nə tə shi ghɔɔmə bə aghəə, n təŋkey ghə â koʼ wi nə tə khənu ghə i dza zə. Alekzanda n fòʼlə ndow awɔɔ nə ghə doʼo tsu mɔŋ, tə i tiilə ghəə zey i tsəghənə tə ghə.

³⁴A n kee bə nghee ghə̂ a tii a keeli tsunə nə̀ tə loʼ wù Juu, ghə n ney kɔʼɔ ndow nəŋə tə izow təbəghə nə ghə dzəŋi buʼlə kə nbɔŋ nə̀, “Atemis zə̀ kə ghə̂ a Efesus taw tsəghə uzə̀ udzəm!”

³⁵Wù wey tə â tɔɔnə màʼlə kə fu inaʼ n dəm kə sa buu naŋa tsu bɔŋ n ghə mey, dza tə ghə nə̀, “Ghə̂ a Efesus ghə! À məghə ndee nə a loʼ ghaa ghə̂ a Efesus, ghaa laalənə fəə fə Atemis fə, zə̀ kən kə taw tsəghənə zə̀ wə udzəm ə? À məghə ndee nə a loʼ soʼo ghaa, ghaa laalənə tay i kənyi zey zə â tsɔʼi tsu bə idəŋ ə?

³⁶Wù loʼ way dzə ni tuu maʼa ghəə ghən. Dzɔb loʼ kə nə̀ ghaa doʼo tsu kə mɔŋ, ghaa ka chɔd u soʼ.

³⁷Ghaa ghə̂ ghən fa maŋ ney bə kənunu, ghə ka fə kə loʼ kə tsɔŋ dzə n fəə n zə̀ kə saa, ghə ka zə̀ kə saa kə zən kən tsayyə soʼo.

³⁸Abə a loʼ nə Demitrus ghi ghə̂ a kəfwaʼ a wi a khə uchɔd ghi wù loʼ, ghə̂ a saʼ a təsaʼ a loʼnu, tsuʼu n saʼa n təsaʼ n loʼ soʼonu, ghə loʼ ni ney ndow saʼ a ghə fu.

³⁹Nə̀ a kee loʼ ghə i nuu zə, saa i bayyə kə n ndaw kədzəŋi n tay i saʼ.

⁴⁰Nghee tə i loʼnə nya, ghə loʼ ni bən kwu saa na nə̀ saa soʼo uchɔd bòʼ ghəə ghən a shinə na. Abə ghə kwu kɔʼnə saa, saa i bwunu saʼ n tənkey zuŋ kə ighəə kə way n ghəə ghən saa dəmənə fa tii.”

⁴¹Ambə tə dza tsunə sey, tə n sali maʼa tsu dzəŋi kə tii kə.