Read Weh Kəfwaʼ 20 Bible Online

Kəfwaʼ 20 - Weh bible

Kəfwaʼ 20

¹Ambə ndəm kən tsu kay tsunə, Pɔl n tɔŋɔ zuŋŋə bə dzûmə tə Klisto, kuu fə̀ŋ tə ghə, dza tə ghə nə̀ ghə doʼo kədzuŋ, daŋŋə zəghə tsu ghə ndow n Masedonya.

²Pɔl n bwey tsəghə bə naʼa tey tədzəm n mboʼo tii, kuu fə̀ŋ tə dzûmə tə Klisto tey fu n ghɔɔmə i wi, ndow daŋŋə n Gris.

³Tə n doʼo kəŋə ndow təndzɔŋɔ tətəghə fu tii. Nghee tə ndzuŋŋənə wû wə ni ndow n Sirya, tə n zow tsu inyəŋŋə nə̀ ghə̂ a Təjuu a loʼ a bii ni wey wi. Tə kweyyə kɔʼ fə̀ŋ ə wi ni dzəŋŋə nə tə tsəghə jii n Masedonya.

⁴Ghə̂ ghey Pɔl â bwey dzəŋi ndow ghi ghə â loʼ Sopata waa Pirus tə â nuu bənə n Beria. A loʼ ghə n loʼ Aristakus ghi Sekɔndus ghə â nuu bənə n Tesalonika, Gayɔs tə â nuu bənə n Debe. A loʼ ghə n loʼ Taychikus ghi Trofimus ghə â nuu bənə n mboʼo Eshya. Timoti n loʼ soʼo tii.

⁵Ghə̂ ghən n nuu ndow isə, ndow ləmə ndow ghey n naʼ i Trowas.

⁶Ambə a zə̂ kɔʼnə zə̂ kə baa kən mbvuŋ way tii, ghey n zəghə tsu Filipi, bwey ntsuʼu ntaa nə kəfən, ndow kwɔɔlə ndow ghə n Trowas, doʼo kəŋə ndow iwən fu.

⁷N tsuʼ inaʼ wə nkala, ghey n tsu doʼo tsu n kuubə tə ni zə̂ baa K-a-zə̀. Nghee tə Pɔl â khənə moʼlə zə ni zəghə tsətsə wey, tə n kaʼ tsu ni ghɔɔmə, tə n ghɔɔmə aghəə tə ghə̂ ghə sa, ndow taa ndow n fə̀ŋ ə tsuʼu tə.

⁸Daa wə n baŋŋə kaabə tsə fu n dzuu i ndaw zey idəŋ ghey â dzəŋi doʼnə tii.

⁹Waa fəghaŋ u num u loʼ wə ghə â tɔŋŋənə wi nə aloʼ Yutikus n doʼ fu n zay kə ndaw. Ambə Pɔl sə khəə nduŋŋə ndow kə ghəə ghə, waa wey n kaʼ ndow ni dzoʼ bweeli. Tə n dzoʼ bweeli kə sa, baa bweeli nuu indow. Nghee tə̀ mbweeli tə tsəghəshi tsunə wi, tə n nuu bwù shi tsu bə aghəd n zay kə ndaw. Luʼu key tə â bwu shi tsu bənə tii â loʼ təndaw tətəghə tə doʼo kuulə kɔʼ ndownə. Ghə n bə boʼo kɔʼ wi nə tə n kpu.

¹⁰Pɔl n nuu shi tsu ndow, nyiŋi maŋŋə keeli ndow wi, dza tsu nə̀, “Ka na fə̀ŋ tə baŋŋə dzə, tə ka kam kpu dzə!”

¹¹Tə n daŋŋə nuu dzəŋŋə kɔʼ ndow ibam n ndaw zey idəŋ, ndow zə̂ kɔʼ baa K-a-zə̀ ghi dzûmə tə Klisto tey fu, ghɔɔmə aghəə ghi ghə sa, tsuʼ wə n zow nyi bə. Tə n daŋŋə zəghə tsu ghə, nuu ndow.

¹²Ghə n ney ndow waa fəghaŋ wey n ndaw utaw, fə̀ŋ tə n ndzɔʼ kəm nyi dzəŋŋə bə ghə nghee ghə koʼ nə̀ tə khə way chɔd u loʼ wə.

¹³Ghey n daŋŋə ndow nyi kɔʼ nə kəfən, baŋ daŋ shi ndow n naʼ i Asos ni ney daŋ tsə Pɔl fu n təŋkey, tə â nuu ndow nə aghow, kee dza naŋa tsu nə ghey ney daŋ tsə wi fu nə kəfən.

¹⁴Ambə tə bə kwɔɔlə bənə ghey nə Asos, ghey n ney kɔʼ wi nə kəfən, dzəŋi nuu ndow n Mitilen.

¹⁵Tsətsə wey, ghey n zəghə tsu fu, ndow shi ndow n bad kə loʼ kə nə kə laalə daŋa ndow naʼ i Kyos. Tsətsə u loʼ wey, ghey n zəghə tsu fu ndow shi ndow n naʼ i Samos. Ghey n kəm zəghə tsu Samos tsətsə wey, daŋŋə bə shi bə n naʼ i Miletus.

¹⁶Pɔl â tsə̀m kɔʼ ni ney jii zən n təŋkey tə â ləghə way ni tsəghə n Efesus sey nə̀ kə i nə bəəbə nəŋə zə n mboʼo Eshya. Tə â luumənu, sey, tə n ləghə nə̀ abə i bəb kə n ngee tə loʼ ni nyi n Yerosalem n tsuʼ fə Pentikɔs.

¹⁷Ambə Pɔl loʼnə n Miletus, tə n tûm tɔŋɔ tsu ngəd tə dzûmə tə Klisto tey n Efesus nə ghə bə koʼ wi.

¹⁸Ambə ghə bə koʼ bə wi, tə n dza tə ghə nə̀, “Ghaa adzəm khənu nghee tə n muu kɔʼ bənə fa ghi ghaa ni ney nuu bə n tsuʼ fə sə isə fey mə â teyyə bənə ghow kə fa n mboʼo Eshya.

¹⁹Ghaa a mgbaŋ khə nghee tə n fwaʼ kɔʼ bənə tii tə̀ Mûkəbii ə saa nə n kɔʼlə way wû wə, mə n fwaʼ soʼo n sə̂ mə nə asə̂ n nəŋə zey mə â keelinə chɔd wə bòʼ ghə̂ a Təjuu a loʼ ghə, ghə â bii kaabə tsənə mə.

²⁰Ghaa khənu nə̀ mə â ka səm koʼ tsə ni tsə̀ ghaa n ghəə zey i khə ni gaamə ghaa nghee mə â dii tsə ghaa n sə kə aghə̂ nsə n ndaw tə ghaa.

²¹N mâ kə̂ dza tə Juu tə nsə ghə̂ ghən ghə way ghə̂ a Təjuu ghə adzəm nə ghə ney ighə̂mə, ghə kweyyə nuu bə fə̀ŋ tə ghə n ghəə a bəbə ghə, ghə bəghəm fu ndow tə Zə̀ kə nsə Mûkəbii ə saa, Yeso Klisto.

²²N nya khə kə ni ndow n Yerosalem tə Zay kə Zow kə diinə, n khə way fə key kə i shiənə fu n kow mə.

²³N khə kə nə̀ Zay kə Zow kə mâ tə mə dza naŋa zey n naʼa tən tədzəm mə â ndownə tii nə̀ mə i koʼo uchɔd, ghə i kwu fii naŋa soʼo mə n ndaw tsaʼ.

²⁴N tsəm ə buʼu ney way muu zuŋ zə tə a loʼ fə loʼ kə, n ləghə kə ni mayyə kɔʼ fwaʼ kən Mûkəbii Yeso fuu naŋanə tə mə. Fwaʼ kə tii kə loʼ ni təmi tiilə tûm i dzuŋu zə bòʼ ndzuŋ zən Zə̀ kə khənə n kow saa.

²⁵Nya, n khənu nə wù loʼ way dzə n fəŋŋə kə ghaa ghən n loʼ nə̀ mə n naʼa ghəə a fɔɔ u Kəzə̀ tə i kəm koʼonə mə.

²⁶Sey, n kuum dza bə tə ghaa na n tsuʼ fən nə̀ abə wù ghaa u loʼ u naynə nə̀ tə ka bəghəm tə Klisto, wɔɔ kuŋ kə way tii.

²⁷N təŋkey mə â ka səm koʼ tsə ni dza tə ghaa ghəə ghən adzəm Zə̀ kə ləghə nə̀ ghaa keeli.

²⁸I keyyə na wû i ghaa zə nsə ghə̂ ghey adzəm Zay kə Zow kə fuu naŋanə n wɔ ghaa. Ghaa i laalə soʼo tə dzûmə tə Klisto tey Zə̀ kə â zuu nuu shi bənə n kaŋ tə waa wi.

²⁹N khənu nə̀ abə mə i zəghə tsunə ghaa, ghə̂ a loʼ ghə i bəghənu tə a loʼ ubəghə, ghə bə saʼa maʼa tsu ghaa.

³⁰Ghə̂ a loʼ ghə i buʼu shiə kɔʼɔ soʼonu n fəŋŋə kə ghaa ghə i badla bə ghəə ghə, ni sìi laʼ dzûmə tə Klisto ghi ghə.

³¹Ney na ghə̂mə zə, ghaa i moʼlə tsu nghee tə n fəghə kɔʼ bənə tii nə tənum tətəghə n tsə tə nsə n tsuʼu tə nə̀ n tsəə kə ghaa.

³²Nya, n fuu naŋŋə ndow ghaa n wɔɔ K-a-zə̀ nsə tə tûm zən bòʼ ndzuŋ ə Kəzə̀. À loʼ wi tə i loʼ ni bɔɔ teyyə bə ghaa, tə ghəŋŋə soʼo nə̀ ghaa zə̂ fə wey u loʼ n wɔ ghə̂ a wi ghey adzəm tə sày naŋanə.

³³N ka kam shi koʼ tsə n sə̂ zə n khəə u wù nkee n ndzə̂ tə wù.

³⁴Wû i ghaa, ghaa khənu nə̀ mə â fwaʼ tsu n wɔɔ ghuŋ ghən ni keeli fə wən mə ghi ghə̂ ghən adzəm mə â loʼ dzəŋinə ghi ghə â ləghənə.

³⁵N ghəə ghən adzəm, mə â dii bə tə ghaa nə abə wə fwaʼa tsu nə isəŋ, wə khə ni gaamə ndow ghə̂ ghey ghə taw way, moʼlə tsu ghɔɔmə zey Mûkəbii Yeso n wû u wi wə â dzanə nə̀, ‘Wù keeli ibuulə abə tə fuunə tsəghəshi abə tə neynə.’”

³⁶Ambə Pɔl khəə tsunə sey, tə n tsu nyaʼa tsu ghi ghə̂ ghey adzəm, ghə n gɔŋŋə tsu.

³⁷Ghə adzəm n deyyə, maŋŋə keeli ndow wi, dza nə̀ tə tɔʼ bwey kədzuŋ.

³⁸Fə key kə â ghəŋə nə̀ ghə ngii mow â loʼ n təŋkey, Pɔl mâ dza tə ghə nə ghə nə kəm koʼ koʼ way wi. Sey, ghə n daŋŋə ndow tənə naŋa ndow wi nə kəfən.