Read Weh Kəfwaʼ 21 Bible Online

Kəfwaʼ 21 - Weh bible

Kəfwaʼ 21

¹Ambə ghey tɔŋɔ zow guŋŋə tsunə tow u dzûmə tə Klisto tey n Efesus, ghey n ney kɔʼ kəfən, teyyə ndow iwû n Kɔs. Tsətsə wey, ghey n zəghə tsu fu nuu ndow n Rɔds, tsəghə ndow daŋŋə n Patara.

²À loʼ fu ghey â keelinə fə̀n kə, kə daŋanə n Foenishia. Ghey n nyi kɔʼ tii, nuu ndow n daŋ zə.

³Ambə ghey bə taa tsunə n luʼu key a koʼ ndow naʼ i Sayprus, ghey n baʼ naŋa ndow naʼ i tii zə n kpii kə kwɔɔ kə, nuu ndow n Sirya, taa shi ndow n Tayra n təŋkey â loʼ fu fən key a khə ni siʼi shiəllə fə wey kə â boʼo keelinə.

⁴Ghey n koʼ tsu dzûmə tə Klisto tə loʼ tə fu, doʼo kəŋə ndow ntsuʼu nsəghəmbəghə fu ghi ghə. Zay kə Zow kə n chimmə kɔʼ ghə, ghə n dza tə Pɔl nə kə wə nə ndow daŋŋənə n Yerosalem.

⁵Ambə nəŋə i ghey i nuulə i kpii tsunə, ghey n zey ndow nə̀ u nuulə wə. Ghə adzəm, ghey a ghə nsə waa a ghə ghə n nuu shi bə inaʼ ni bə tənə naŋa ghey n nguŋ ə dzuu. Ghey n tsu nyaʼa tsu fu ghi ghə, gɔŋŋə tsu.

⁶A n tɔŋɔ zow tsu iwû, daŋŋə ney kɔʼ kəfən, ghə n kee nuu ndow ibam nə ghə.

⁷Ambə ghey zəghə tsunə Tayra, ghey n kɔʼ bəŋ tsu n Tolemes, tɔŋɔ zow tsu dzûmə tə Klisto tey fu, gaʼ bweeli tsu ghi ghə fətsuʼ fəmɔʼ.

⁸Tsətsə wey, ghey n zəghə tsu fu, ndow bə n Kayserya, nyi ndow n ndaw fɔɔngili Filip, tə â loʼnə wù umɔʼ n ghə̂ ghey asəghəmbəghə ghə â say kɔʼ n Yerosalem ni gaamə bə ghey ni dzaw ufəzəə.

⁹Wù wən n khə waa a wi a zən ghə akaykə nə ghə khə way num ghə. Fwaʼ kə ghə kə â loʼ ni dza ghəə ghey Zə̀ kə dza bənə.

¹⁰Ambə ghey doʼo kəŋə ndow tsuʼu n loʼ mə fu, wù tûm Kəzə̀ u loʼ wə ghə â tɔŋŋə nə̀ a loʼ Agabus n nuu tsu bə n Judeya.

¹¹Tə n bə koʼ tsu ghey, ney kɔʼ kwɔɔ fə Pɔl, kow tsu fuu i wi nsə kpii i wi zə tii, dza tsu nə̀, “Zay kə Zow kə dza nə̀, ‘À wən loʼ jìi zey ngəd tə Təjuu tey n Yerosalem i kwɔɔ kow tsunə wù wey tə khənə kwɔɔ fən, ghə ney fu tsəghə ndow wi tə ghə̂ ghey ghə way ghə̂ a Təjuu ghə.’”

¹²Ambə ghey zow tsunə ghəə ghən, ghey ghi ghə̂ a loʼ ghey fu n buʼ Pɔl n wɔɔ kə nə̀ tə ka ndow dzə n Yerosalem.

¹³Pɔl n dza tə ghə nə̀, “Ghaa sey jiə ngee? Ghaa baŋŋə fə̀ŋ zuŋ nə idey ə? Mə n tsəm bəghəm nə ghə kwu kow naŋa mə, ghə buʼ wey daŋŋə mə n Yerosalem bòʼ Mûkəbii Yeso.”

¹⁴Ambə ghey dəm kii tsu ni tuu nə̀ tə ka ndow fu, ghey n zəghə maʼa tsu wi dza nə̀, “I doʼo ndow kə tə Mûkəbii ləghənə.”

¹⁵Ambə ghey doʼo kəŋə ndownə tsuʼu mə fuu, ghey n kuumə kɔʼ fə u ghey nuu ndow ni ndow n Yerosalem.

¹⁶Dzûmə tə Yeso tə loʼ tə tə â nuu bənə n Kayserya n ndow dzəŋi ghi ghey. Ghə n ney ndow ghey n luʼu key ghey â khə ni doʼo tii n ndaw Nasən. Nasən â loʼ wù Sayprus wən tə â kə̂ bəghəmnə ni doʼo dzûmə ə Yeso.

¹⁷Ambə ghey nyi ndownə n Yerosalem, dzûmə tə Klisto tey fu n kpii ney kɔʼ ghey nə iduʼlə.

¹⁸Tsətsə wey, ghey n dzəŋi ndow ghi Pɔl ni ndow koʼ Jems. Ngəd tə dzûmə tə Klisto tey fu tədzəm n loʼ soʼo fu.

¹⁹Pɔl n tɔŋɔ zow tsu ghə, tiilə dza kɔʼ ndow ghəə ghey Zə̀ kə ghəŋŋənə n kow ghə̂ ghey ghə way ghə̂ a Təjuu ghə n bam i fwaʼ kə wi.

²⁰Nghee ghə zow tsu ghəə a tii ghə, ghə n fuu ukali tə Zə̀ kə. Ghə n daŋŋə dza tə Pɔl nə̀, “N waazə, wə loʼ ni koʼ nghee ndəmə kam tə ghə̂ tə Təjuu tə doʼo bənə dzûmə tə Klisto tə, nsə nghee ghə nyûmə wû zə ni naŋŋə laŋ kə Mushi kə.

²¹Ghə mâ dza tə ghə nə̀ wə dii kaabə ghə̂ a Təjuu ghən adzəm ghə muunə n naʼa tə ghə̂ ghən ghə way ghə̂ a Təjuu ghə nə̀ ghə zəghə maʼa laŋ kə Mushi. Ghə mâ zow soʼo nə̀ wə tuu nə̀ kə ghə nə səghənə tyi u waa a ghə ghə, ghə ka tsəm naŋa soʼo ghəə ghə inaʼ a ghə̂ a Təjuu ghə.

²²A nya jiə tsu n ngee? Ghə i teeli keelinu nə wə n bə.

²³À wən loʼ ghəə ghey, ghey ləghə nə̀ wə ghəŋə. Ghə̂ a loʼ fa akaykə nə ghə mâ zə̂ kaa mə ghi Zə̀ kə.

²⁴Ndow dzəŋi ghi ghə̂ ghən, ghaa dzəŋi ndow sòw maʼa tsu iwû tə laŋ kə Mushi kə diinə, wə tsə fu ndow soʼo khəə u ghə tə ghə kɔm maʼa tsu tow u ghə tə laŋ kə diinə. Sey, aghə̂ adzəm i keeli nə̀ ghəə ghey ghə̂ ghə â dzanə bòʼ wɔ way dzə isəŋə. Ghə i fəd keeli nə̀, wû wə, wə muu soʼo tə laŋ kə Mushi kə diinə.

²⁵A kee bə tə ghə̂ ghən ghə bəghəmnə tə Klisto nə a way ghə̂ a Təjuu, a n tɔ̀ɔ ndow màʼlə kə tə ghə, tsu tsəd tsu tii nə̀, kə ghə nə zə̂ə fə wey ghə sâa ndownə tə a loʼ umaʼlə tə muʼu mə, kə ghə nə zəənə kaŋ tə, kə ghə nə fəənə nyam nə ghə ka səghə, kə ghə nə ghəŋŋə soʼo ghəə a laŋŋə ghə.”

²⁶Tsətsə wey, Pɔl n daŋŋə ney kɔʼ ghə̂ ghey, ghə n dzəŋi ndow sow maʼa tsu iwû tə laŋ kə diinə. Tə n daŋŋə ndow n ndaw Kəzə̀ n Yerosalem, ni ndow ghəŋə tsu nə ghə keeli tsu tsuʼu mey ghə khə ni doʼo kəŋə ndow nghee ghə sow maʼa tsu wû zə ni ndow kuum n tsuʼ fey ghə i fəələ maʼlə wə tii n tow kə kay wù.

²⁷Ambə tsuʼu mə ikhəmə mən nsəghəmbəghə may kəŋŋə bənə, ghə̂ a Təjuu a loʼ ghə ghə â nuu bənə n Eshya, n koʼ tsu Pɔl n dzəŋi kə ndaw Kəzə̀ n Yerosalem. Ghə n təəbə ghə̂ ghey fu adzəm, ghə n nuu baʼlə kwu kɔʼ Pɔl.

²⁸Ghə̂ a tii ghə n buʼlə nbɔŋ, dza tsuu nə̀, “Ohooo Ghə̂ ghə Izree ghə, tɔm bə na ghey! À wən loʼ wù wey tə tsə̀ə bəəbə ghə̂ ghə nə təluʼu tədzəm nə̀ ghə ka i zow tə ghə̂ Izree ghə, ghə ka i naŋŋə laŋ kə Mushi kə, ghə ka i kɔʼlə soʼo ndaw Kəzə̀ ə saa i nii zən. Ghə zey i bəb tsəghəshi tsunə loʼ nə̀ tə baa ney nyi bə ghə̂ ghey ghə way ghə̂ a Təjuu fa n ndaw Kəzə̀ ə saa, ghəŋə nə̀ kə luʼu kən nə kəm zow.”

²⁹Ghə â dza sey n təŋkey nghee ghə â buʼ koʼ tsu wi fə̀ŋ inaʼ ghi Trofimus, wù Efesus, ghə moʼlə kə nə Pɔl sey ney ndow wi n ndaw Kəzə̀ n Yerosalem.

³⁰Naʼ idzəm n nuu təmi kɔʼ nə ifuu, ghə̂ ghey n nyəŋ zuŋŋə i bə, kwu kɔʼ Pɔl n ndaw Kəzə̀, sii nuu shi ndow ghi wi a bii. Ghə n daŋŋə fii kɔʼ baʼ kə dzəŋi kə dzûmə tə Klisto.

³¹Nghee ghə dəmə kaabə ni wey wi, zə ndow nyi ndow n tuŋŋə kə wù nii wey tə â loʼ tow kə n saʼ kə təsawgoʼ kə Roma kə nə̀, Yerosalem idzəm i tey nə ifuu.

³²Tə n daŋŋə mbad ney kɔʼ təsawgoʼ nsə ghə̂ a nii a loʼ ghə, nyəŋ nyi tsu ndow n fəŋŋə kə ghə. Ambə ghə nuu baŋ koʼ kɔʼ wù nii təsawgoʼ ghi sawgoʼ tə, ghə buu naŋa tsu ni bwɔd Pɔl.

³³Wù nii təsawgoʼ wey n kuʼlə kəŋə bə, kwu kɔʼ Pɔl, tsəʼlə tsu kəlaŋ nə ghə kuum tsu wi nə tətsaʼ təbəghə. Tə n daŋŋə bəb zow kɔʼ wù wey Pɔl loʼnə ghii wə n wɔ ghə̂ ghey, nsə ghə zey tə ghəŋə bəəbənə.

³⁴Ghə̂ a loʼ ghə fu n nɔɔ kə aghə̂ key n dza shiə kɔʼɔ n dzə̂ tə taw tə nə a loʼ i zən, a loʼ ghə n dza ndow i nuu zə. Ambə tə sə way ni tɔʼ keeli basə kə ighəə nghee dəm kə â sə ngii loʼ, tə n dza tsu nə ghə ney ndow ghi wi nə kəbali.

³⁵Ambə tə bə taa tsunə nə kəghub, sawgoʼ tə n baa boʼo nuu kɔʼ wi, bòʼ ndəm key nɔɔ kə aghə̂ key â ghəŋŋə bə ghii kə.

³⁶Nɔɔ kə aghə̂ key n buʼlə bə kə nbɔŋ ibam nə̀, “Wey n na wi!”

³⁷Ambə ghə dza i naŋa nyi ndow Pɔl nə kəbali, tə n bəb tsu tə wù nii təsawgoʼ wey nə̀, “N loʼnu ni dza ghə i loʼ zə tə wɔ ə?” Wù nii təsawgoʼ wey n bəb tə wi nə̀, “Wə khənu ni ghɔɔmə ghɔɔmə i Grik ə?

³⁸A way wɔ wù Ijip wey tə â soʼ kɔʼ chɔd wə, ney nuu soʼ ndow ghi ghə̂ a weyyə ghə aghə̂ ghə təkam təkaykə n mbvən ə ntsaŋ ə?”

³⁹Pɔl n beeli ndow wi nə̀, “N loʼ wù Juu. Ghə ji n Tasus n mboʼ ə Silishya. N shi n naʼ i nii zə. N buʼ fu wɔ n wɔɔ kə, zəghə mə tə n ghɔɔmə ndow tə ghə̂ ghən.”

⁴⁰Wù nii wey fu tsu wi n bùʼ kə, sey Pɔl n təmi kɔʼ nə kəghub, foʼlə ndow ghə n wɔɔ kə nə ghə doʼo tsu mɔŋ. Ambə ghə ndzɔʼ dəm soʼo, ghə n nuu zow doʼo tsu mɔŋ. Pɔl n kaʼ ndow ni ghɔɔmə tə ghə n ghɔɔmə i Hibru.