Read Weh Kəfwaʼ 22 Bible Online

Kəfwaʼ 22 - Weh bible

Kəfwaʼ 22

¹Pɔl n dza tə nɔɔ kə aghə̂ key nə̀, “Waazə ghuŋ ghə, ghə bày wuŋ ghə, ghaa zəllə n na tə n tiilə dza bə tə ghaa nə̀ n ka ghəŋə dzə ghə i bəbə i loʼ zə.”

²Ambə ghə zow ndow nə̀ tə ghɔɔmə bə tə ghə n ghɔɔmə n Hibru, ghə n baa nuu fuŋ doʼo may tsu mɔŋ. Pɔl n ndow n sə kə dza tə ghə nə̀,

³“N loʼ wù Juu, ghə ji mə n naʼ i Tasus n mboʼ ə Silishya. Mə n kee nyim fa n Yerosalem, zoʼlə kɔʼ bə kəmàʼlə n tənə Gamaliel. Ghə n ney shi kɔʼ bə mə tə̀ laŋ kə ghə bày bày a saa kə diinə. Mə n ngii nyûmə soʼo n wû wə n ghəə a Kəzə̀ tə̀ aloʼ ghaa ghən adzəm ghaa loʼnə na fa.

⁴Mə â chɔdlɔ tsə ghə̂ ghey ghə â dzûmə jii zən i loʼnə i Mûkəbii zə, buʼ ghəŋə daŋŋə nə ghə kpu. Mə n ghəŋŋə nə̀ ghə i kwɔɔ fii naŋŋə gheynum ghə nsə gheyzən ghə n ndaw tsaʼ.

⁵Fɔɔngili u nii nii wə nsə ngəd tə ndaw tsə tə loʼnu ni tɔʼ tiilə dza ghəə ghən. À buʼ loʼ ghə, ghə â fuunə mə n màʼlə wə nə̀ n ndow fuu tə ngəd tə Təjuu tey n Damaskus. Sey, mə n ndow fu ni ndow kwu ghə̂ ghən, n ney dzəŋŋə bə ghə n ndaw tsaʼ n Yerosalem ni chɔd ghə.”

⁶Pɔl n ndow n sə kə dza nə̀, “Nghee n ndownə, nə n sə kuʼlə ndow n Damaskus n fə̀ŋ ə tsə tə, daa kə loʼ kə n gbələ baŋ shi tsu bə sa n bikighow n dəŋə key mə â loʼnə tii.

⁷Mə ntəghə bwu shi tsu ndow aghəd. Mə zow ndow dzə̂ i loʼ zə i dza bənə tə mə nə̀, ‘Sɔl, Sɔl, à loʼ kee wə chɔdlɔnə mə ə?’

⁸Mə n bəb kɔʼ nə̀, ‘Wə loʼ ndee a Mûkəbii?’ Tə n dza tə mə nə̀, ‘N loʼ Yeso, wù Nazaled wey wə chɔdlɔ kaabənə.’

⁹Ghə̂ ghey mə â loʼ dzəŋi ghi ghə adzəm n koʼ daa kə tii kə, ghə n ka kee zow dzə̀ zey i ghɔɔmə bənə tə mə.

¹⁰Mə n bəb tə wi nə̀, ‘Mə i jiə tsu ngee a Mûkəbii?’ Mûkəbii n dza tə mə nə̀, ‘Nuu kɔʼ, wə nyi ndow n Damaskus. À loʼ fu ghə i dza bənə tə̀ wɔ ghəə ghey adzəm Zə̀ kə dza naŋa nə̀ wə ghəŋə.’

¹¹Mə n kəm way ni koʼ təluʼu bòʼ daa key kə â baŋ nyi bənə n sə̂ ghuŋ, sey, ghə̂ ghey mə â loʼ dzəŋi ghi ghə n tali nyi ndow mə n Damaskus.

¹²Wù loʼ n loʼ fu n Damaskus ghə â tɔŋŋə nə̀ loʼ Ananyas. Tə n ndzəmə fuu nkɔʼlə tə Zə̀ kə, naŋŋə dzɔbə laŋ kə Mushi. Ghə̂ a Təjuu ghey fu adzəm n ngii fuu wi n ngɔɔmə zə.

¹³Tə n bə təmi bə n sə kuŋ, dza tə mə nə̀, ‘waazə wuŋ Sɔl, n dza nə wə kəm kaʼ ni koʼ tə luʼu.’ N nəŋə i tii zə, mə n kəm kaʼ ndow ni koʼ təluʼu, laalə ndow wi.

¹⁴Tə n daŋŋə dza bə tə mə nə̀, ‘Zə̀ kə ghə bày bày a saa kə n wɔ sày nə̀ wə i khə ghəə ghey tə ləghənə, wə koʼ Wù kəfwaʼ a wi wən tə loʼnə Tsətsəghə, wə i zow soʼo ghɔɔmə zey i shiə bənə n dzuu i wi.

¹⁵À loʼ wɔ wə i doʼlənə təmi tiilə ə wi, wə i dza tə ghə̂ ghə adzəm ghəə ghey wə koʼnə nsə a ghey wə zownə.

¹⁶Wə nya kəm ləmmə zeeli kee? Nuu kɔʼ ghə fuu wɔ n mmuu n Kəzə̀ mə, wə gɔŋŋə tə Zə̀ kə, tə i sow maʼa ghəə ghə a bəbə ghə.’”

¹⁷Pɔl n nam dza ndow tə ghə nə̀, “Ambə n dzəŋŋə ndownə n Yerosalem, nghee tə n gɔŋŋənə n ndaw Kəzə̀, sə ghə n nuu vəi kɔʼ mə.

¹⁸Nghee tə sə a vəi kɔʼnə mə sey, mə n koʼ ndow Mûkəbii tə dza bənə tə mə nə̀, ‘Mbad ghəŋə ndow wə zəghə tsu Yerosalem, n təŋkey, ghə̂ ghən fa i bəghəm way ghəə zey wə dzanə bòʼ mə.’

¹⁹Mə n beeli ndow wi nə̀, ‘Mûkəbii, wû i ghə, ghə khənu nə̀ mə â kwɔɔ kaabə bə ghə̂ ghey ghə bəghəm fu tə wɔ n ndaw tə udzəŋi tən tədzəm, bwɔdlɔ ghə, fìi naŋŋə soʼo ghə n ndaw tsaʼ.

²⁰Nghee ghə â wey Sitifən wey tə â tiilə dza ghəə ghə ghə̀, mə â tey soʼonu fu, mə n bəghəm fu ndow nə̀ ghə wey wi. À loʼ mə, mə â keyyənə ndzə̂ tə ghə̂ ghey ghə â weynə wi.’

²¹Mûkəbii n dza tə mə nə̀, ‘Nuu ndow n təŋkey mə i tûm nuulə nay ndow wɔ n naʼa tə ghə̂ ghey ghə way ghə̂ a Təjuu ghə.’”

²²Ghə̂ a tii ghə n ndzɔʼ zəllə kə ghɔɔmə i Pɔl sa, kɔʼ kuum tsu n luʼu kən tə bə dza tsunə nə̀ Mûkəbii tûm wi nə̀ tə ndow naʼa tûm tə ghə̂ ghey ghə way ghə̂ a Təjuu ghə. Ghə n nuu taw shi kɔʼ fu n dzə tə nə̀, “Ney nuu nyam fəkaʼ wən! Wey maʼa n na wi n ghəlitsə kən! Ndzoʼo wù wən khə way ni loʼ utaw!”

²³Ghə buʼlə mbɔŋ, wədlə ndow ndzə̂ tə ghə idəŋ, kpey wəʼlə shiə kɔʼɔ kəbvə idəŋ.

²⁴Wù nii təsawgoʼ ə Roma n tsəʼlə tsu kəlaŋ tə̀ sawgoʼ tə wi tə nə̀ ghə ney nyi ndow Pɔl nə kəbali, ghə bwɔd dzɔb tsu, tə dza bə isəŋə kuum bɔŋ mey ghə̂ a buʼlə kaabə n tow kə wi.

²⁵Ambə ghə kwu kow tsu wi nə ubaʼ, Pɔl n nuu bəb kɔʼ tə wù nii təsawgoʼ wey tə â tey fu nə̀, “Laŋ kə bəghəmnu nə ghaa bwɔd wù Rom nə ghaa ka wi saʼ tsu dzə isə ni koʼ nə̀ tə ghəŋə bəəbənu ghə i loʼ zə ə?”

²⁶Ambə wù nii təsawgoʼ wey zow tsu ghəə ghey, tə n ndow koʼ ndow tow kə təsawgoʼ wey, dza tə wi nə̀, “Wə nya dza i ghəŋə ghəə i ghaa zə ə? Wù wən loʼ wù Rom!”

²⁷Tow kə təsawgoʼ wey n ndow koʼ ndow Pɔl, bəb tə wi nə̀, “Dza bə tə mə, wə loʼ wù Rom ə?” Pɔl n beeli kɔʼ nə̀, “Ow.”

²⁸Tow kə təsawgoʼ wey n dza nə̀, “Mə â doʼo wù Rom nə n zuu n ndəmə ukhəə.” Pɔl n beeli kɔʼ nə̀, “abə mə, ghə baa ji mə n naʼ i Rom.”

²⁹Ghə̂ ghey ghə â dza i ndow bəb Pɔl n ghəə ghə n daŋŋə tyi zəghə tsu wi. Fə̀ŋ n tyi shi tow kə təsawgoʼ wey nghee tə keeli shi kɔʼ nə̀ Pɔl loʼ wù Rom, tə u ney kuum tsunə wi nə tətsaʼ.

³⁰Tow kə təsawgoʼ u tii wə n ləghə ni tɔʼ keeli shi kɔʼ zuŋ key ghə̂ a Təjuu a kwunə Pɔl tii. Tsətsə wey, tə n tsɔʼlə nuu tsu tsaʼ tey ghə â kuum naŋanə Pɔl tii, tsəʼlə tsu kəlaŋ nə̀ ghə fɔɔngili a nii ghə nsə ghə̂ a ndaw tsə ghə adzəm, zuŋŋə bə. Ambə ghə zuŋŋə bənə, tə n ney teyyə naŋa shi bə Pɔl n sə kə ghə.