Read Weh Kəfwaʼ 25 Bible Online

Kəfwaʼ 25 - Weh bible

Kəfwaʼ 25

¹Ambə Festus kɔʼ kɔʼnə ndaŋ ə Govenɔ, tə n bə n Kayserya. Ambə tsuʼu n tsəghə tsunə ntəghə, tə n nuu kɔʼ ndow n Yerosalem.

²Ghə fɔɔngili a nii ghə nsə ngəd tə Təjuu tə loʼ tə n ney teyyə bə saʼ zey ghə â khənə ghi Pɔl tə Festus.

³Ghə n buʼ kəwɔɔ nə̀ Festus gaamə ghə ni tûm kɔʼ bə Pɔl n Yerosalem. A n loʼ nə ghə n bii naŋa ni kwu wey wi n jii.

⁴Festus n beeli ndow ghə nə̀, “Pɔl loʼ n Kayserya ghə fii naŋanə n ndaw tsaʼ, n buʼu ləghə soʼo ni kuʼlə ndow fu n wû wuŋ wə.

⁵Nya, ghaa ghəŋə tsu nə ngəd tə loʼ tə n fəŋŋə kə ghaa tsu dzəŋi ndow ghi mə, nə tə ghəŋə bəəbənu ghə i loʼ zə, ghə i kwu kɔʼ ndow wi.”

⁶Ambə tə ndzɔʼ doʼo kəŋə ndownə ghi ghə tə a loʼ n tsuʼu ifam nkee ighəm, tə n nuu tsu ndow n Kayserya. Tsətsə wey, tə n kɔʼ doʼo kɔʼ n ndaŋ zey tə saʼa ghə̂ ghə tii, dza tsu nə ghə ney bə Pɔl.

⁷Ambə Pɔl bənə, ngəd tə Təjuu tey tə â nuu tsu bə n Yerosalem n nuu zuŋŋə tsəghə bə n səə wi, boʼo bə faalə tə aghəə n ndəm, kuu ndow n tow kə wi, nə imɔʼ way tii ghə loʼ ni tɔʼ dii nə̀ a loʼ isəŋə.

⁸Pɔl n tuu ghəə ghey adzəm ghə kwunə wi tii, dza nə̀, “N ka laŋ kə ghə̂ a Təjuu kə loʼ kə zaʼ dzə, n ka ghəŋə bəəbə ghə i loʼ zə n ndaw Kəzə̀ n Yerosalem, n ka dza bəəbə soʼo ghə i loʼ zə tə dəŋ kə Rom kə.”

⁹Festus n kee ləghə ni keeli tûm usə u dzuŋu wə n sə kə ghə̂ a Təjuu, sey, tə n bəb ndow tə Pɔl nə̀, “Wə ləghənu nə n kɔʼ saʼ wɔ n Yerosalem n ghəə ghən ghə kwɔɔnə wɔ tii ə?”

¹⁰Pɔl n fəd beeli ndow wi nə̀, “N fa tey n tay i saʼ i də̀ŋ kə Rom, à loʼ fa ghə khə ni saʼ saʼ zuŋ. Wû wə, wə khənu nə̀ n ka ghəŋə bəəbə dzə ghə i loʼ zə tə ghə̂ a Təjuu ghə.

¹¹Abə i loʼ nə̀ mə n zaʼ laŋ kə, ghəŋə bəəbə ghə i loʼ zə tə ghə loʼ ni wey mə tii, n tuu dzə way ni kpu. Abə a kee loʼ nə̀ ghəə ghən ghə̂ a Təjuu ghən kwɔɔnə mə tii way dzə isəŋə, wù khə dzə way daʼa kə ni ney fuu tsəghə ndow mə tə ghə̂ ghən. N ləghə nə̀ də̀ŋ kə Rom kə saʼ saʼ zuŋ”

¹²Festus n saalə kɔʼ ghi ghə̂ a ndaw tsə a wi ghə, dza ndow tə wi nə̀, “Wə nɔɔ bə nə a tûm ndow saʼ zə tə Kaysa. Wə nya khə kə ni ndow n səə Kaysa.”

¹³Ambə tsuʼu n loʼ n tsəghə tsu, Agripa tə loʼnə də̀ŋ kə ghi Benis[7] n bə n Kayserya ghi ni bə dii uwû tə Festus tə loʼnə gɔvənɔ u fəghə wə.

¹⁴Ambə ghə ndəŋ doʼo kəŋə ndownə tsuʼu mə fu, Festus n ney teyyə bə saʼ a Pɔl tə də̀ŋ key, dza tə wi nə̀, “Wù loʼ, loʼ fa n ndaw tsaʼ, Feliks â nuu naŋa taʼanə saʼ a wi tə mə.

¹⁵Ambə n ndownə n Yerosalem, ghə fɔɔngili a nii ghə ghi ngəd tə ghə̂ a Təjuu ghə n ney dza bə ghəə ghey ghə kwɔɔnə wi tii. Ghə n dza bə soʼo tə mə nə̀ n tsəʼlə tsu saʼ n kow Pɔl nə̀ tə n bwu saʼ.

¹⁶Mə n dza ndow tə ghə nə̀, laŋ kə Rom kə ka bəghəm dzə nə̀ wə dza nə̀ wù n bwu saʼ nə ighəə nə̀ tə ka ghɔɔmə ballə dzə ghi wù wey tə kwunə wi n ghə i tii zə. Ghə way soʼo ni dza nə̀ wù n bwu saʼ nə̀ wù tii ka tiilə dza bə dzə nə̀ ghəə zey ghə kwɔɔnə wi tii loʼ ghəə a badla ghə.

¹⁷Ambə ghə dzəŋi bənə fa, mə n ka bəəbə inəŋə ni saʼ saʼ a tii. Tsətsə wey, mə n daŋŋə tɔŋɔ naŋa bə ndaw tsə, dza nə̀ ghə ndow ney nyi bə wi.

¹⁸Ambə ghə̂ ghey ghə kwunə wi nuu təmi kɔʼnə, ghə n ka dza dzə ghə i bəbə i loʼ zə n tow kə wi tə mə â moʼlənə.

¹⁹Ghə n fədlə baŋŋə təfəghəm kuum ghəə a Kəzə̀ a ghə nsə kuum Yeso u loʼ wə nə tə mâ kpu ghi Pɔl tə â təmi taw kɔʼnə dza nə̀ wù tii loʼ utaw.

²⁰Mə n khə way jìi zey n loʼ ni tɔʼlə shi kɔʼ ghəə ghən tii, sey, mə n bəb ndow tə wi nə̀ tə kpaʼi ləghənu nə̀ a ndow saʼ wi n Yerosalem n ghəə ghən ə?

²¹Pɔl n kee buʼ tsu kəwɔɔ nə ghə naŋa tsu kə wi, ghə tûm ndow saʼ a wi tə Kaysa tə̀ tə saʼ. Sey, mə n tsəʼlə tsu kəlaŋ nə̀ ghə naŋa tsu kə wi ni ndow kuum n nəŋə zey mə i tûm ndownə wi n səə Kaysa.”

²²Agripa n daŋŋə dza tə Festus nə̀, “N ləghənu ni zow ghɔɔmə i wù wən n wû wuŋ wə.” Festus n dza nə̀, “Wə i zownu ghɔɔmə i wi zə tsətsə.”

²³Tsətsə wey, Agripa ghi Benis n ndow bə, ghə̂ ghə n ngii fu wi n kɔʼlə mə nə uzɔŋ. Tə n tsəghə nyi ndow n zeeli kə tɔʼ ghi sawgoʼ tə nii tə nsə ngəd tə inaʼ tey tə â bə dzəŋinə ghi wi. Festus n daŋŋə dza tsu nə̀ ghə ney bə Pɔl, ghə n ney bə wi.

²⁴Festus n dza tsu nə̀, “Fɔɔ Agripa nsə ghaa ghən adzəm ghaa doʼ fa ghi ghey, ghaa koʼonu wù wən ə? À wən loʼ wù wən ghə̂ a Təjuu adzəm n Yerosalem nsə fa n Kayserya a kwɔnə wi, taw n dzə̂ tə dza nə̀ tə khə way ni muu.

²⁵Mə n laalə tsunə saʼ a tii, koʼ nə̀ tə ka ghəŋə dzə ghə i bəbə i loʼ zə tə ghə loʼ ni wey wi tii. Nghee tə ndzɔʼ dza bə dzə n wû u wi wə nə a tûm ndow saʼ a wi tə də̀ŋ kə Rom kə, mə n dza nə̀ n tûm ndownu wi fu.

²⁶A kee loʼ kə nə n khə way ghəə zey tə baa ghəŋə bəəbənə tə n loʼ ni tɔ̀ɔ dza ndow tə də̀ŋ kə Rom. À wən loʼ i ghi n ney bənə wi n sə̂ kə ghaa adzəm, n baa ney bə wi n sə̂ kə a fɔɔ Agripa, sey nə̀, abə saa i tɔʼ laalə nyi tsunə saʼ a wi, mə i loʼ ni keeli ighəə ni tɔ̀ɔ.

²⁷I ghəŋŋə way tɔb wə tə mə ni ney tûm ndow wù n ndaw tsaʼ nə a ka tiilə tsu ghəə ghey ghə kwuu wi tii.”