Read Weh Kəfwaʼ 26 Bible Online

Kəfwaʼ 26 - Weh bible

Kəfwaʼ 26

¹Fɔɔ Agripa n dza ndow tə Pɔl nə̀, “Wə khənu buʼ kə nya ni ghɔɔmə.” Pɔl n daŋŋə keeli shi kɔʼ wɔɔ kə wi idəŋ, kaʼ ndow soʼo ni ghɔɔmə dza nə̀,

²“Fɔɔ Agripa, n moʼlə nə̀ n khə tow kə dzuŋu kə nə̀ a loʼ n sə̂ kə n khə ni tiilə dza nə̀ n ka ghəŋə bəəbə dzə ghə i loʼ zə n ghəə ghən ghə̂ a Təjuu a kwɔɔnə mə tii,

³boʼnə wə tɔʼ khənu ghəə ghə inaʼ a ghə̂ a Təjuu ghə nsə ghəə ghey a ghəŋŋənə nə̀ ghə̂ a ka bəghəm dzəŋi. N buʼu kəwɔɔ tə wɔ nə̀ wə kow tsu fə̀ŋ, wə zəllə tsu ghɔɔmə zuŋ.

⁴Ghə̂ a Təjuu adzəm a khənu nghee n muu shi kɔʼ bə tii ni ney nuu bə n nyaŋi fə waa. Ghə a khə soʼo nghee mə â muunə tii n naʼ zuŋ tɔŋɔ Tasus nsə n Yerosalem.

⁵Ghə khənu nə nzeyyə, abə ghə mə loʼ ni tiilə dza bə, nə̀ mə â muu tsə tə a loʼ wù zəghə u ghə̂ a tə Falasi. Zəghə wən u taw tsəghənə zəghə mə ndzəm n ghəə a Kəzə̀ a ghey.

⁶Ghə mə fa nya saʼa boʼnə n bəghəmnu, ləmmə tənə təb key Zə̀ kə â təb naŋanə tə ghə bày bày a ghey ghə.

⁷À wən loʼ təb kən naʼa tə ghey tən ighəm n ghii tə təbəghə tə ləmmə tənə ni keeli, nghee ghə ngɔɔmənə Zə̀ kə n tsə tə nsə n tsuʼu tə n fə̀ŋ tə ghə tə tədzəm. À loʼ bòʼ bəghəm zən a Mbee, ghə̂ a Təjuu a kwɔɔnə mə tii.

⁸A loʼ kee i tawnə tə ghaa ghən ghaa loʼnə fa, ni bəghəm nə Zə̀ kə loʼnu ni zhəm nuu dzəŋŋə bə wù nə ivə?

⁹Wû wuŋ, mə â moʼlə soʼo nə n tsəm khə ni kəŋ tsu təjìi tədzəm ni tuu maʼa nə̀ ghə̂ a ka bəghəm zəd i Yeso wù Nazaled.

¹⁰A wey bɔɔmə loʼ ghəə ghey mə â ghəŋŋənə n Yerosalem. Mə â ney kədaʼa n wɔ ghə fɔɔngili a nii ghə, kwu fii naŋa ndəmə ghə̂ a Kəzə̀ n ndaw tsaʼ. Ambə ghə tsəʼlə tsu saʼ nə̀ ghə wey ghə, mə n tsəm bəghəm soʼo nə ghə wey ghə.

¹¹Mə n chɔd ghə n ndəmə tənəŋə n ndaw tə udzəŋi tə ghə ni ghəŋə nə̀ ghə tuu maʼa Yeso. Mə n ngii baa ghə n jìi zey mə n bəghəm kaabə ndow ghə n naʼa tə tətùm ni chɔd ghə.”

¹²Pɔl n ndow n sə kə dza nə̀, “Â wən loʼ moʼlə zey mə â khənə n fə̀ŋ nghee n ndownə n Damaskus n daʼa key ghə fɔɔngili a nii ghə â fuunə tə mə.

¹³Â loʼ n fəŋ ə tsə̀ tə sa a Mbee, nghee a ndownə n jii, mə n koʼ daa kə nuu baŋ shi tsu bənə n bikighow, nə kə baŋ tsəghəshi tsə̀, baŋ ngəə tsəghə bə dəŋə key mə â loʼnə tii ghi ghə̂ ghey mə â dzəŋi ndownə ghi ghə.

¹⁴Ghey adzəm n dzəŋi bwu tsu ndow aghəd, mə n zow ndow dzə̂ i loʼ zə i ghɔɔmə bənə tə mə n ghɔɔmə i Hibru nə̀, ‘Sɔl, Sɔl, a loʼ kee wə chɔdlɔnə mə ə? Wə tsəmə maŋa fəmmə soʼo wû wə kənunu dza nə̀ wə chɔdlɔ mə.’

¹⁵Mə n bəb tsu nə̀, ‘Wə loʼ ndee a Mûkəbii?’ Mûkəbii ə tii n daŋŋə dza bə nə̀, ‘N loʼ Yeso wey wə chɔdlɔ kaabənə.

¹⁶Nuu təmi kɔʼ kə n fuu zə. Zuŋ key n dii bənə wû wuŋ wə tə wɔ loʼ ni sày wɔ nə wə doʼo wù kəfwaʼ wuŋ nsə təmi tiilə wuŋ. À loʼ wɔ, wə i tiilə dza nduŋŋə ndownə ghəə ghey wə koʼnə na fa nsə a ghey mə i dii bənə tə wɔ n tsuʼu mən n doʼo kəŋə ndownə isə.

¹⁷Mə i bəghəshiənu wɔ n wɔ ghə̂ ghə Izree nsə n wɔ ghə̂ ghən ghə way ghə̂ a Təjuu ghə. N tûm ndow wɔ tə ghə̂ ghən ghə way ghə̂ a Təjuu ghə.

¹⁸À loʼ wɔ wə khə ni chi sə̂ a ghə, wə ney nuu shi bə ghə nə kələm, wə naŋa shi bə ghə n sə̂ a zow ghə. À loʼ soʼo wɔ wə khə ni ney nuu bə ghə n wɔ daʼa kə Satan kə, wə ney bə ghə tə Zə̀ kə. Sey nə̀, n bəghəm i fə̀ŋ zən ghə khənə n kow mə, Zə̀ kə i neyzəə bəb i ghə, ghə ney kɔʼ bənə kə ghə n fəŋŋə kə ghə̂ ghey Zə̀ kə sày naŋanə.’”

¹⁹Pɔl n ndow n sə kə dza nə̀, “Fɔɔ Agripa, mə â bɔɔmə ghəŋə ndow kə ghəə ghey wù wey tə â tsu bə idəŋ â dza bənə tə̀ mə nə ujim.

²⁰Mə â zey tsu dzə n Damaskus, tsəghə ndow n Yerosalem, ndow ngəə bə mboʼo Judeya idzəm, ndow soʼo n naʼa tə ghə̂ ghey ghə way ghə̂ a Təjuu ghə. Mə â naʼlə nə̀ ghə khə ni teeli kwey nuu bə fə̀ŋ tə ghə n ghəə a bəbə ghə, ghə bəghəm soʼo tə Zə̀ kə. Ghə i ghəŋŋə ndow ghəə ghey a diinə nə̀ ghə n kwey fə̀ŋ tə ghə tə.

²¹À wən loʼ zuŋ key ghə̂ a Təjuu ghən â kwu tsunə mə n ndaw Kəzə̀ n Yerosalem, ləghə ni wey mə.

²²Ni bə kùm na, n muu nə a loʼ Kəzə̀ kə gaamənə mə. Mə n loʼ ni təmi na fa tiilə dza bə aghəə tə ghə̂ ghə adzəm, tiilə dza kə ghə i mɔʼɔ zə tə ghə̂ ghən ghə loʼ ghə̂ a səŋi ghə nsə tə ghə̂ ghən ghə way ghə̂ a səŋi ghə. Ghəə ghey n dza nə̀ ghə i bə ney kəbənə bɔɔmə loʼ ghəə ghey tûm tə Kəzə̀ ghi Mushi â nə dza naŋanə nə̀ a nə bə ney kəbənə.

²³Ghə â dza naŋa nə̀, ‘Wù wey Zə̀ kə â dza naŋa nə̀ i tûm bənu khə ni teeli bə fəghə, tə kpu tsu dzə, a loʼ soʼo wi ni doʼo wù sə̂ isə̂ ni zhəm dzəŋŋə nə ivə, sey tə i naʼlə bə tûm bòʼ ibəghəshi i loʼnə tə a loʼ kədaa tə ghə̂ a Təjuu nsə ghə̂ ghən ghə way ghə̂ a Təjuu ghə.’”

²⁴Nghee Pɔl nam dəmə ni tiilə dza nə̀ i ka ghə i bəbə i loʼ i ghəŋə dzə, Festus n nuu dza shi kɔʼ n dzə i taw zə nə̀, “Pɔl, wə zəghənu! Màʼlə kə key wə ngii zoʼlə tsu sa, kə n saʼa maʼa tow kə kə̀.”

²⁵Pɔl n kee beeli ndow wi nə̀, “N zəghə dzə way a mûkəbii Festus. Ghəə ghən n ghɔɔmə shiə bənə tə wɔ loʼ isəŋə, n bɔɔmə ghɔɔmə bə tə a loʼ wù wey tə zəghə way.

²⁶Fɔɔ Agripa khənu ghəə ghən adzəm. N ndzəmə khəə dzəŋinu ghəə ghə ghi wi nə̀ n tsəŋə way n təŋkey, n khənu nə̀ ghəə ghən n khəənə fa adzəm, i loʼ i way tii nə̀ a loʼ i fəghə zə tə wi, boʼnə ghəə ghən â ka ney dzə bənə kə nə kələm.

²⁷Fɔɔ Agripa, wə bəghəmnu ghəə ghey tûm tə Kəzə̀ tə â dza naŋanə ə? N khənu nə wə bəghəmnu.”

²⁸Fɔɔ Agripa n daŋŋə bəb ndow tə Pɔl nə̀, “Wə moʼlə nə̀ n kəmə fə inəŋə fən, wə loʼnu ni ghəŋə mə nə̀ n doʼo dzûmə Klisto ə?”

²⁹Pɔl n dza nə̀, “Abə a loʼ kə n kəmə fə inəŋə, nkee n ndaŋ kə inəŋə, gɔŋŋə zuŋ tə Zə̀ kə loʼ nə̀ wɔ ghi ghə̂ ghən adzəm ghə zəllə ghɔɔmə zuŋ zə na mə doʼo tsu dzûmə tə Klisto tə a loʼ mə. N kee gɔŋŋə dzə way nə̀ ghaa doʼo ghə̂ ndaw tsaʼ tə a loʼ mə.”

³⁰Fɔɔ wey, gɔvənɔ, Benis nsə ghə̂ ghey adzəm ghə â doʼnə n dzəŋi nuu kɔʼ ghi wi.

³¹Ambə ghə nuu shiə ndow, ghə n ghɔɔmə n wû i ghə nə̀, “Wù wən ka ghəŋə bəəbə dzə ghə i loʼ zə tə̀ ghə loʼ ni wey wi tii nkee tə̀ ghə loʼ ni kuu wi tii n ndaw tsaʼ.”

³²Fɔɔ Agripa n daŋŋə dza tsu tə Festus nə̀, “a mə loʼ ni zəghə wù wən abə tə mə ka dza bə nə̀ a ney tûm ndow saʼ a wi tə də̀ŋ kə Rom kə.”