Read Weh Kəfwaʼ 3 Bible Online

Kəfwaʼ 3 - Weh bible

Kəfwaʼ 3

¹N tsuʼ fə loʼ fə, Pita nsə Jɔn n ndow n ndaw Kəzə̀ i nii zə nə tənəŋə tətəghə n tsə tə n nəŋə zey ghə gɔŋŋə tsənə tii.

²Wù kəkəŋŋə u loʼ wə n loʼ fu n fuʼ u mbàa wən ghə â tɔŋŋə nə̀ aloʼ fuʼ u mbàa u dzuŋu wə. Ghə â ji wi nə tə loʼ kəkəŋŋə, ghə̂ ghə n bòʼlə bəghə tsə wi tsuʼu ndzəm, bə naŋŋə bə wi n fuʼ u mbàa wey nə̀ tə i nɔɔ khəə wə n wɔ ghə̂ ghey ghə tsəghə nyiənə n ndaw Kəzə̀ i nii zə.

³Ambə tə koʼ ndownə Pita ghi Jɔn ghə tsəghə nyiə ndownə n ndaw Kəzə̀ i nii zey, tə n nɔɔ ndow ukhəə n wɔ ghə.

⁴Pita ghi Jɔn n laalə nyi ndow wi n waa asə̂. Pita n daŋŋə dza ndow tə wi nə̀ “Laalə bə ghey!”

⁵Wù tii n laalə ndow ghə, moʼlə kə nə ghə i fuunu wi n fə kə

⁶Pita n fəd dza ndow tə wi nə̀, “N ngəmsə khə way khəə wə ni fuu tə wɔ, n kee fuunu wɔ n fə key n khənə ghii kə. N zəd i Yeso Klisto wù Nazaled, nuu təmi kɔʼ, wə bwey ndow.”

⁷Nghee Pita dza tsunə sey, tə n kwu tsu kpii kə wi kə zəə kə, tɔɔmə kɔʼ wi nə tə təmi kɔʼ idəŋ. N nəŋə i tii zə kələ, fuu i wi nsə kəŋŋə tə wi tə n daŋŋə taw doʼo i bə.

⁸Tə n taa kɔʼ n fuu i wi, kaʼ ndow ni bwey. Tə n nyi ndow n ndaw Kəzə̀ i nii zey ghi ghə, bwey taalə kɔʼɔ idəŋ, fuu ukali tə Zə̀ kə.

⁹Ambə ghə̂ ghey fu adzəm koʼnə wi nghee tə bweynə, zow soʼo nghee tə fuunə kali wə tə Zə̀ kə,

¹⁰ghə n koʼ keeli ndow wi nə a loʼ wù wey tə â nɔɔ tsənə n fuʼ u mbàa u ndaw Kəzə̀ i nii zey ghə tɔŋɔnə nə a loʼ fuʼ u mbàa u dzuŋu wə. Dzuu zə n zum ghə, ghə n məʼlə kìi ghəə zey i shinə n kow wi.

¹¹Nghee tə wù wey zən doʼo ndow n kow Pita ghi Jɔn, dzuu zə n zum ghə. Ghə̂ ghə n nyəŋ zuŋŋə bə fu n luʼu key ghə â tɔŋŋə nə̀ a loʼ zeeli kə Solomun.

¹²Ambə Pita koʼ tsunə sey, tə n dza ndow tə ghə̂ ghey nə̀, “Ghə̂ a Izree ghə, à lo kee dzuu i zumnə ghaa n ghəə zən ə? A loʼ kee ghaa laalənə ghey n ndzoʼo jii zən ə? À loʼ kee ghaa laalənə ghey tə a i dzanə à loʼ n daʼa kə ghey, ghey ghəŋənə nə̀ wù wən bwey nkee ghaa moʼlə nə̀ ghey loʼ ghə̂ a dzuŋu ghə n sə K-a-zə̀ ni ghəŋə nə̀ wù wən bwey ə?

¹³Zə̀ kə Abraham, Zə̀ kə Ayzik nsə Zə̀ kə Yakɔb kə, tɔŋɔ Zə̀ kən ghə bày a saa ghə â kɔʼlənə, n kɔʼlə naŋa wù kəfwaʼ a wi Yeso. À loʼ Yeso wən ghaa â fuu tsəʼlə ndownə nə̀ ghə wey wi. Ghaa mâ wi tuu maʼa n sə kə Pilato loʼ sey nə̀ Pilato mâ tsə̀m ni zəghə maʼa wi.

¹⁴Ghəə a wi ghə â zownu n sə K-a-zə̀, tə n loʼ wù dzuŋu, ghaa n fəd tuu maʼa wi, kee dza nə̀ Pilato chi zəghə shi bə ghaa n wù wey tə weynə ghə̂ ghə.

¹⁵Ghaa â wey maʼa wù wən tə fuunə muu zə, Zə̀ kə n kee zhəm dzəŋŋə bə wi nə ivə. Ghey mâ koʼ ghəə a tii ghə adzəm, ghey a dza bənə nya tə ghaa.

¹⁶Wù wən ghaa koʼo bənə fa, ghaa adzəm, ghaa tɔʼ khənu wi, tə taw doʼo bə bòʼ bəghəm i fə̀ŋ zən ghey khənə n kow Yeso. À loʼ bəghəm i fə̀ŋ n kow Yeso i ghəŋənə nə̀ wù wən taw doʼo bə tə ghaa koʼonə.

¹⁷Waazə ghə, n khənu nə ghaa nsə ghə̂ ghən ghə laalənə ghaa, ghaa â ghəŋə ghəə ghən n kow Yeso n təŋkey ghaa â khə way ghəə zey ghaa â ghəŋŋənə.

¹⁸À loʼ nə̀, à wən loʼ jìi zey Zə̀ kə neynə ni luulə ghəə ghən tə â naʼa naŋanə n wɔ tûm tə wi tə tədzəm nə̀, wù wi wey tə â dza naŋa nə̀ i tûm bənu khə ni teeli fəghə.

¹⁹Kwey nuu bə na fə̀ŋ tə ghaa tə n ghəə a bəbə ghə, ghaa bə n səə Zə̀ kə tə̀ tə neyzəə ghəə a ghaa a bəbə ghə.

²⁰Abə ghaa ghəŋənə sey, Zə̀ kə i ghəŋə tsu nə̀ kɔŋŋə kə nyaʼi nyi bə ghaa, tə i fuu ghaa n gaamə zə, tə tûm bə soʼo wù wey tə â dza naŋa nə̀ i tûm bənu, tɔŋɔ Yeso wey tə â sày naŋa kɔʼ tə ghaa.

²¹Yeso khə ni doʼo kə idəŋ ni ndow kuum n nəŋə zey i kpiinə tə Zə̀ kə ni bayyə naŋa dzəŋŋə aghəə adzəm. Zə̀ kə mâ khə təb naŋa ghəə ghən tə saa n bam i tûm tə wi tə zow tə.

²²Mushi mâ dza nə̀, ‘Mûkəbii, Zə̀ kə ghaa, i say kɔʼɔ wù tûm ə wi n fəŋŋə kə ghaa tə̀ tə â sàynə mə. Ghaa khə ni teeli zow ghəə ghey adzəm tə dzanə tə ghaa.

²³Wù wey tə i zow way ghəə ghey wù tûm wey dzanə, Zə̀ kə i dzaw nuu shi bə wi n fəŋŋə kə ghə̂ a wi, tə ləŋi maʼa wi.’

²⁴Ndzəm ndzəm, tûm tə Kəzə̀ tədzəm, ni ney nuu bə n kow Samwel, ghə mâ naʼa zey ghəə ghən a shiənə n tsuʼu n mən.

²⁵Ghaa loʼ waa a waa a tûm tə Kəzə̀, dii tsu nə̀ kaa mən Zə̀ kə â zə̂nə ghi ghə bày a ghaa ghə, loʼ soʼo tə ghaa. Zə̀ kə â dza tə Abraham nə̀, ‘Mə i buulə tənaʼa tədzəm fa n mbi n bam i waa a waa ghə.’

²⁶Ambə Zə̀ kə sày kɔʼnə wù kəfwaʼ a wi, tə n bùʼ tûm bə dzə wi n səə ghaa nə̀ tə bə buulə ghaa, tə ghəŋə nə̀ ghaa adzəm, ghaa kweyyə nuu bə n ghəə a ghaa a bəbə ghə.”