Read Weh Kəfwaʼ 4 Bible Online

Kəfwaʼ 4 - Weh bible

Kəfwaʼ 4

¹Nghee Pita ghi Jɔn nam ghɔɔmənə ghi ghə̂ ghey, ghə fɔɔngili a loʼ ghə ghi wù wey tə â loʼnə tow kə təsawgoʼ kə n ndaw Kəzə̀ i nii zə nsə ghə̂ a Sadusi ghə, n bə n səə ghə.

²Ghə̂ ghən â bə koʼ bə Pita ghi Jɔn n təŋkey nəghə mə â ngii fəə ghə nghee ghə diinə ghə̂ ghə n ghəə ghə bòʼ Yeso. Ghə â naʼlə nə̀ Yeso zhəm dzəŋŋə nə ivə, dii tsu nə̀ wù loʼnu ni zhəm dzəŋŋə nə ivə.

³Ghə n kwu kɔʼ Pita ghi Jɔn, fii naŋa ndow ghə n ndaw tsaʼ ni saʼ ghə tsətsə wey n təŋkey â loʼ n nəŋə i fənə tə.

⁴À kee loʼ nə̀ ndəmə ghə̂ ghey ghə â zownə ghɔɔmə i ghə zə, n bəghəm fuu. Taŋ a ghə̂ ghey ghə â bəghəmnə tə Yeso n dzəŋi nyiə kɔʼɔ ndow təkam tətaa.

⁵Tsətsə wey, tsoʼ tə inaʼ, ngəd tə Təjuu nsə ghə̂ a dii a kəlaŋ ghə n təmdzəŋi bə n Yerosalem.

⁶Fɔɔngili u nii nii wə tɔŋɔ Anas n loʼ fu, Kayfas, Jɔn, Alekzanda nsə tyəm a fɔɔngili u nii nii wə n loʼ soʼo fu.

⁷Ghə n ney naŋa bə Pita ghi Jɔn n sə̂ kə ghə, bəb ndow tə ghə nə̀, “Ghəə ghey ghaa â ghəŋŋənə, ghaa â ghəŋŋə n daʼa kə ndee nkee n zəd i ndee?”

⁸Zay kə Zow kə n nyi bə n kow Pita, tə n beeli ndow ghə nə̀, “Tsoʼ tə inaʼ tə nsə ngəd tə inaʼ tə!

⁹Abə i loʼ nə̀ ghaa bəbə ghey n ghəə ghə na fa a dza ghey ghəŋə ghə i dzuŋu zə ni baŋŋə kəkəŋŋə, tɔʼlə soʼo ni keeli jìi zey ghey baŋŋənə wi tii,

¹⁰n dza n dza bə tə ghaa adzəm nsə ghə̂ ghə Izree ghə adzəm nə a loʼ n zəd i Yeso Klisto, wù Nazaled, wù wən teynə fa n sə kə ghaa nə tə n taw doʼo bə. Ghaa â baa Yeso wən n zat kə fəkaʼ, Zə̀ kə n kee zhəm dzəŋŋə bə wi nə ivə.

¹¹Yeso wən loʼ wù wey màʼlə K-a-zə̀ kə dzanə nə̀, ‘Tay zey ghaa ghə̂ a bɔm a təndaw a tuu maʼanə, Zə a bə fəd doʼo kɔʼnə tay i bow i ndaw zə.’

¹²À loʼ kə n bam i Yeso wù keelinə bəghəshi zə, wù loʼ kəm way fa n mbi Zə̀ kə fuu naŋanə tə loʼ ni bəghəshi saa n ghəə a saa a bəbə ghə.”

¹³Nghee ghə koʼnə jìi zey Pita ghi Jɔn ghɔɔmənə tii nə ghə tsəŋə way, koʼ tɔb kɔʼ soʼo nə a maŋ loʼ laŋa tə aghə̂ nə ghə ka basə nyi dzə n ndaw kəmàʼlə, dzuu zə n ngii zum ghə. Ghə sey daŋŋə koʼ keeli ndownu nə̀ ghə â loʼ dzəŋi tsə ghi Yeso.

¹⁴Ghə n kee laʼ kìi ghə i dza zə n təŋkey ghə â ndzəmə koʼo ndownu wù wey ghə â baŋŋənə, tə teynə n səə Pita ghi Jɔn.

¹⁵Sey ghə n dza tə Pita ghi Jɔn nə̀ ghə shi təmi tsu a bii. Ambə ghə shi ndownə, ghə̂ a ndaw tsə ghey n daŋŋə kaʼ ni ghɔɔmə n wû i ghə.

¹⁶Ghə n bəbə n wû i ghə nə̀, “A i jiə tsu ngee ghi ghə̂ ghən ə? Aghə̂ adzəm n Yerosalem n keeli nə̀ ghə n ghəŋə kɔb kə ighəə kə, saa way ni tuu maʼa.

¹⁷Ni kee ghəŋə nə̀ kə ghəə a tii a nə zamnə, saa khə ni teeli kii naŋa ndow ghə nə kə ghə nə kəm ghɔɔmə ghə i loʼ zə n zəd i wù wən ghə tɔŋŋə nə̀ a loʼ Yeso.”

¹⁸Ghə sey daŋŋə tɔŋɔ nyi dzəŋŋə bənu Pita ghi Jɔn, tsəʼlə tsu kəlaŋ tə ghə nə̀ kə ghə nə kəm ghɔɔmə ghəə zə nkee ni dii aghə̂ n zəd i Yeso.

¹⁹Pita ghi Jɔn, n fəd beeli ndow ghə nə̀, “Wû i ghaa, moʼlə tsu na nə̀ a kpii ghə i ghaa zə tə Zə̀ kə ə? Ni zow tə ghaa mɔ, ni zow tə Zə̀ kə ə?

²⁰Abə ghey, ghey way ni buu doʼo nə̀ ghey ghɔɔmə way ghəə ghən ghey loʼ nə̀ ghey n koʼ mə i zow.”

²¹Ambə ghə bəmi kpi tsunə ghə, ghə n zəghə tsu ghə nə ghə nuu. Ghə â koʼ tsu nə̀ jii way tə ghə ni chɔd ghə, n təŋkey, aghə̂ adzəm â fuu nkɔʼlə tə Zə̀ kə n ghəə ghən a shinə.

²²Wù wən ghə â ghəŋənə kɔb kə ighəə kən n kow wi, â loʼ nə tə n tsəghəshi num tə nghəm nkaykə.

²³Ambə Pita nsə Jɔn zəghə maʼa tsunə ghə̂ a ndaw tsə ghey, ghə n dzəŋŋə ndow koʼ ndow ghə̂ a ghə, tiilə dza ndow ghəə ghey ghə fɔɔngili a nii ghə nsə ngəd tə inaʼ tə dzanə.

²⁴Ambə ghə zow tsunə ghəə ghən, ghə n təmdzəŋi bə ni gɔŋŋə, gɔŋŋə shi kɔʼ n dzə i taw zə tə Zə̀ kə nə̀, “Zə̀ kə, wə loʼ zaamə mbi, à loʼ wɔ wə bɔmnə bikighow kə nsə ghəlitsə kə, à bəm wɔ nali kə dzuu kə, nsə fə wən udzəm u loʼnə fa n mbi.

²⁵À loʼ wɔ, wə â ghəŋə nə̀ Zay kə Zow kə ghɔɔmə n bam i bày bày ghey fɔ̀ɔ Devid, wù kəfwaʼ wə, nə tə dza nə̀, ‘À shi kee naʼa tey tə bəghəm way tə̀ Zə̀ kə, fəələnə n nəghə wə ə? À kuum kee ghə̂ a gheyyə bii kaabə tsənə ghə̂ ghə ə?

²⁶Də̀ŋ u mbi u bayyə wû i tsam, Tow wə inaʼ wə a təmdzəŋi bənə, Ni zùu bàalə Kəzə̀ nsə wù wey tə tsuʼ naŋanə.’

²⁷À wən bɔɔmə loʼ ghəə zey zə â shinə fa inaʼ, Helɔd nsə Pontus Pilato n ndzəm təmdzəŋi bə ghi ghə̂ ghən ghə way ghə̂ a Təjuu ghə nsə ghə̂ ghə Izree ghə ni kad tsəm n tow kə wù kəfwaʼ wə u zow wən wə â tsuʼ naŋanə, tɔŋɔ Yeso.

²⁸Ghə â təmdzəŋi bə ni maŋ ghəŋə ghəə ghey wə â khə bayyə naŋa dzənə n daʼa kə nsə n ləghə zə nə̀ a khə ni bə shi.

²⁹Mûkəbii, koʼo nghee ghə biinə ghey tii, ghəŋə tsu nə̀ ghə̂ a kəfwaʼ ghə a keeli tsu fə̀ŋ ni dəb ə naʼlə ghɔɔmə zə zə̀ nə ghə khə way tsəŋ zə.

³⁰Dii bə daʼa kə kə̀ sey nə̀ ghey i loʼ ni baŋŋə ghə̂ ghə, ghey i ghəŋə ghəə a faalə ghə n zəd i Yeso, wù kəfwaʼ wə u zow wə.”

³¹Ambə ghə gɔŋŋə may tsunə, luʼu tə n noʼlə tsu n luʼu key ghə â təmdzəŋi doʼonə tii. Zay kə Zow kə n nyi bə n kow ghə, ghə n zey ni naʼlə tûm Kəzə̀ nə ghə tsəŋə way.

³²Dzûmə tə Yeso tədzəm tə â loʼ nə kəfə kəmɔʼ n moʼlə tə ghə tədzəm nsə n fə̀ŋ tə ghə tədzəm. Wù ghə umɔʼ n ney way fə kə wi kə tə a loʼ fə kə wi kə ngəŋ kə, ghə â fəd dzəŋi khə fə u ghə udzəm.

³³Nghee ngəd tə Yeso tə keeli tsunə daʼa kən, ghə n tiilə dza tə ghə̂ ghə nghee tə Mûkəbii Yeso â zhəm dzəŋŋə bənə tii nə ivə. Ndzuŋ ə Kəzə̀ n loʼ ghi ghə adzəm.

³⁴Wù ghə u loʼ n laʼa way fə kə n fəŋŋə kə ghə, n təŋkey, ndəm ə ghə ghey ghə â khə luʼu tə nsə ndaw tə, ghə â fìilə tsuunu, ghə n bə n khəə u tii wə.

³⁵Ghə n bə fuu naŋŋə bə khəə u tii wə tə ngəd tə Yeso tə, ghə n ney dzawwə fuu ndow tə ghə̂ ghə tə ghə koʼonə fə key ghə laʼanə.

³⁶Wù loʼ â loʼnu ghə â tɔŋŋənə wi nə a loʼ Yosef, tə â shi n bii kə Levi, nə ghə ji wi n naʼ i Sayprus. Ngəd tə Yeso tə â tsə zəd i wi nə a loʼ Banabas, dii tsu n ghɔɔmə i ghə nə̀, “Wù wey tə kuunə fə̀ŋ tə ghə̂ tə.”

³⁷Tə â fii tsu luʼu kə wi, ney bə khəə u tii wə, bə fuu bə tə ngəd tə Yeso tə.