Read Weh Kəfwaʼ 7 Bible Online

Kəfwaʼ 7 - Weh bible

Kəfwaʼ 7

¹Fɔɔngili u nii nii wə n bəb ndow tə Sətifən nə̀, “Ghəə ghən ghə kwɔɔnə wɔ tii, a loʼnu isəŋə ə?”

²Sətifən n beeli ndow ghə nə̀, “Waazə ghuŋ ghə, ghə bày wuŋ ghə, ghaa zow! Tə̀ bày bày saa Abraham ni ndow mû n naʼ i Haran, â loʼ nə Zə̀ kən kə khənə kɔʼlə mə n dii bə wû wə tə wi n naʼ i Mesopotemya.

³Zə̀ kə n dza tə wi nə̀, ‘Zəghə tsu naʼ zə zə̀ nsə ghə̂ ghə ghə, wə ndow n naʼ zey mə i dii bənə tə wɔ.’

⁴Sey, Abraham n zəghə tsu naʼ i ghə̂ a tə Chaldia, ndow bəghə doʼo ndow n naʼ i Haran ni ndow kuum n nəŋə zey bày wi kpu tsunə tii. Zə̀ kə sey daŋŋə ney dzəŋŋə bənu wi n naʼ zən ghaa muunə tii nya.

⁵Zə̀ kə ka fuu dzə wi n luʼu kə tə a loʼ kə wi kə ngəŋ kə, kasə badla fə luʼu tə a loʼ tàm kəghow imɔʼ fu tii. Zə̀ kə n fəd təb naŋa ndow luʼu kən tə wi, nə a i bə keeli wi nsə waa a waa a wi ghə. Tə â təb naŋa təb kən nə̀ Abraham kam khə way waa.

⁶Zə̀ kə n dza soʼo tə wi nə̀, ‘Waa a waa ghə ghə i muulə n naʼ i kətûm, ghə nə ney naŋa ghə tə a loʼ ukɔd, ghə nə chɔd ghə nə tənum nbɔm nkaykə.’

⁷Zə̀ kə sey dzanu tə wi nə̀, ‘Mə i kee chɔdlɔnu naʼ zən ghə ney naŋa ghə̂ ghuŋ ghən tə a loʼ ukɔd, n ney nuu shi bə ghə tə ghə bə ghə i ngɔɔmə mə n luʼu kə kən.’

⁸Zə̀ kə n daŋŋə zə̂ kɔʼ nkaa ghi Abraham n ghəə a tyi kə səghə kə. Sey, Abraham n ji bə Ayzik, səghə tsu tyi kə wi nə tə loʼ ntsuʼu ifam tə ghə ji tsu wi. Ayzik n nyim ji bə Yakɔb, səghə tsu tyi kə wi. Yakɔb n nyim ji bə ghə bày a saa a səŋi ghən ighəm nsə ghə̂ ghə abəghə, səghə tsu soʼo tyi u ghə.

⁹Waa a num ghən Yakɔb â ji bənə n khə kəghoʼ n kow waazə ə ghə, tɔŋɔ Yosef. Ghə ney fii ndow wi n naʼ zə Ijip tə aloʼ kəkɔd. Zə̀ kə n nam loʼ kə ghi wi,

¹⁰bəghəshi tsu wi n chɔd mən n dzəm tə â keelinə. Zə̀ kə n fuu ndow Yosef n tɔb u nii wə, nsə mwam u dzuŋu wə, ghəŋŋə soʼo nə̀ Ferɔ də̀ŋ kə Ijip ləghə wi. Sey, Ferɔ n ney tsuʼ naŋa kɔʼ wi nə̀ tə i saʼa naʼ zə Ijip zə nsə tɔʼ ɔ wi idzəm.

¹¹Dzəŋ i faalə i loʼ zə n nyi bə n naʼ zə Ijip nsə n naʼ i Kanan, ghə̂ ghə n ngii fəghə tii, fə kə zəə kə n taa daŋŋə way n wɔ ghə bày bày a saa ghə.

¹²Ambə Yakɔb zow tsu nə̀ səb a loʼ n naʼ zə Ijip, tə n ziʼi tûm waa a wi tɔŋɔ ghə bày bày a saa fu tii.

¹³Ambə ghə kəm tsu kpiʼi ndow fu, Yosef n dii fu ndow wû u wi tə waazə a wi ghə. Sey, Ferɔ n keeli daŋŋə soʼo waazə a Yosef.

¹⁴Ambə Yosef dii ndownə wû u wi wə, tə n daŋŋə tûm tɔŋɔ bə bày wi Yakɔb nsə tyəm a ndaw a wi ghə adzəm. Ghə n dzəŋi lo aghə̂ nghəm nsəghəmbəghə nsə ghə̂ ghə ataa.

¹⁵Yakɔb n nuu tsu ndow nə Ijip. À loʼ fu tə â kpunə nsə ghə bày bày a ghey ghə.

¹⁶Ghə â bə tsəllə tsə ghə ibam n Shechem n dzuu zə isay zey Abraham a zuu kɔʼ n wɔ waa a Hamɔ ghə fu tii n naʼ i Shechem n taŋ a ukhəə.

¹⁷Nghee tə̀ nəŋə i kuʼlə bənə tə Zə̀ kə ni luulə ghəə ghən tə â təb naŋanə tə Abraham, taŋ a ghə̂ a ghey ghən ghə â muunə n naʼ i Ijip n loʼ nə̀ zə ngii nyim.

¹⁸Wù loʼ n bə doʼo kɔʼ kədə̀ŋ n naʼ zə Ijip nə tə khə way Yosef.

¹⁹Də̀ŋ kə tii kə n nəbə tsə ghə bày bày a ghey, chɔdlɔ ghə, tənnə ghə nə̀ ghə i sayyə maʼa waa a ghə a buu ghə tə ghə i kuulə.

²⁰À wən loʼ nəŋə zən ghə â ji bənə Mushi tii, tən gumi dzubə, Zə̀ kə n ləghə wi. Ghə n laalə kɔʼ bə wi n ndaw bày nə təndzɔŋɔ tətəghə.

²¹Ambə ghə maʼa ndownə wi, waa Ferɔ u zən wə n ney keeli ndow wi, ney kɔʼ bə wi tə a loʼ waa wi u num wə.

²²Ghə n dii kɔʼ bə Mushi n tɔb u ghə̂ ə Ijip wə, sey, tə n loʼ wù u səŋi n ghəə a wi a ghəŋŋə ghə, ghɔɔmə i wi zə n khə kəzən.

²³Ambə Mushi kuum tsunə num tə nghəm nkaykə, tə n moʼlə ni ndow bweyyə koʼ waazə a wi tɔŋɔ ghə̂ ghə Izree.

²⁴Tə n koʼ ndow nghee wù Ijip nyabənə wù inaʼ a wi tii nə nfən, sey tə n ndow taʼ ndow ghi wù inaʼ a wi, bwɔd wey tsu wù Ijip wey ni dey fuu ngəmə tə wù inaʼ a wi.

²⁵Mushi n moʼlə kə nə̀ waazə a wi ghə i zowkeelinu nə̀ Zə̀ kə i tsəghə n kow wi ni bəghəshi ghə, ghə n ka kee zowkeeli.

²⁶Tsətsə wey, Mushi n koʼ ndow ghə̂ ghə Izree abəghə ghə zùulənə n wû i ghə, tə n dəmə ni bayyə naŋa tsu ghə, dza tə ghə nə̀, ‘A boo, ghaa loʼ awaazə, a loʼ kee ghaa zùulənə n wû i ghaa?’

²⁷Wù wey tə â soʼnə waazə nə kəngəd n fəd tən maʼa ndow Mushi, bəb tə wi nə̀, ‘À wɔ naŋa ndee nə kətow nə̀ wə i saʼa ghey ə?

²⁸Wə ləghə ni wey soʼo mə tə wə â wey maʼanə wù Ijip wey azɔy ə?’

²⁹Ambə Mushi zow tsunə ghəə ghən, tə n tyi ndow n naʼ i Midya, muu ndow fu tə a loʼ wù kətûm, ji bə waa a num ghə abəghə fu.

³⁰Ambə num tə tsəghə tsunə nghəm nkaykə, tsəndəghə Kəzə̀ n bən shi kɔʼ n sə kə Mushi nə uvələ u bəʼlənə n kɔɔ kəghìi n mbvən ə ntsaŋ n səə kaʼ u Sinay.

³¹Ambə Mushi koʼ tsunə sey, dzuu zə n zum wi. Tə n dza i səŋŋə kəŋə ndow ni tɔʼ fwɔd tsu ghəə zey i neynə bənə kə, tə n fəd zow ndow dzəə Mûkəbii i ghɔɔmə bənə tə wi dza nə̀,

³²‘N loʼ Zə̀ kə ghə bày bày wə, tɔŋɔ, Zə̀ kə Abraham, Zə̀ kə Ayzik nsə Zə̀ kə Yakɔb kə.’ Mushi n tsəŋŋə kɔʼ bə n wɔ tsəŋ zə, fə̀ŋ n way wi ni buʼ laalə ndow fu.

³³Mûkəbii n dza ndow tə̀ wi nə̀, ‘Tsɔʼ nuu tsu gow tə tə̀ boʼnə luʼu key wə teynə tii, a loʼ ghəlitsə kə bam kə.

³⁴Mə n ndzəm koʼ jìi zey ghə chɔdlɔnə ghə̂ ghuŋ ghə tii n naʼ zə Ijip. Mə n zow dey i ghə zə, shi tsu bə ni bə bəghəshi ghə. Bə fa, n tûm dzəŋŋə ndow wɔ nya n naʼ zə Ijip.’

³⁵À loʼ Mushi wən ghə â tuu maʼanə wi, bəb tə wi nə̀, ‘À wɔ naŋa ndee nə̀ kətow nə̀ wə i saʼa ghey ə?’ À loʼ Mushi u mɔʼɔ wən Zə̀ kə â tûm bənə nə̀ tə bə doʼo tow kə ghə nsə bəghəshi ə ghə n bam i tsəndəghə Kəzə̀ zən zə â dii bənə wû wə tə̀ wi n mbvən ə ntsaŋ.

³⁶Tə n ney nuu shi bə ghə nə Ijip, nə tə dii tsu dzə ghəə a faalə ghə nsə ghəə a zum ghə idzuu ghə fu tii, n dzuu i baŋa zə, nsə n mbvən ə ntsaŋ. Ghəə ghən â ney tənum nghəm nkaykə.

³⁷À wən loʼ Mushi wən tə â dza tə ghə̂ ghə Izree ghə nə̀, ‘Zə̀ kə i tûm bə ghaa n wù tûm Kəzə̀ ighələ tə̀ tə â tûm bənə mə. Wù tûm Kəzə̀ ə tii i shiə kɔʼɔ kə n fəŋŋə kə ghaa.’

³⁸À loʼ wi tə â loʼnə ghi ghə̂ ghə Izree ghə n nəŋə zey ghə â zuŋŋə doʼonə n mbvən ə ntsaŋ. Tə â loʼ fu, ghə bày bày a saa ghə n loʼ fu, tsəndəghə zey zə â ghɔɔmənə tə wi n kaʼ u Sinay n loʼ soʼo fu. Â loʼ fu n Kaʼ u Sinay tə â ney kɔʼnə ghɔɔmə i Kəzə̀ zən i ghəŋŋə nə̀ ghə̂ a keeli muu zə itsali ni fuu bə tə saa.

³⁹Ghə bày bày a saa ghə n kee tuu ni zow tə Mushi. Ghə baʼ naŋa kɔʼ wi, khə təmoʼlə n fə̀ŋ tə ghə nə ghə mə baa dzəŋŋə ndow ibam n naʼ zə Ijip.

⁴⁰Ghə n dza ndow tə Erɔn nə̀, ‘Fwaʼa kɔʼ saa n zə̀ u loʼ wə, wə i diinə saa n jii. Abə Mushi wən tə ney shi bənə ghey n naʼ zə Ijip, a khə way ghəə zey i shinə ghi wi.’

⁴¹À wən loʼ nəŋə zey ghə â fwaʼ kɔʼ muʼu fə tə a loʼ waa mbɔŋ. Ghə n fəələ umaʼlə, zə̂ Kəzə̀ ni ngɔɔmə kəfə nə ghə fwaʼ kɔʼ n wɔɔ a ghə.

⁴²Zə̀ kə n nyoʼo ndow dzəm tə ghə, zəghə maʼa ndow ghə nə ghə i ngɔɔmə ndow səghəbələ mən n loʼnə idəŋ, ndzɔŋ nsə nyi zə. I tɔ̀ɔ doʼo n màʼlə kə tûm tə Kəzə̀ nə̀, ‘A ghə̂ ghə Izree ghə! Â way dzə tə mə ghaa â wey nyam tə̀ tə aloʼ umaʼlə nghee tə ghaa â loʼnə n mbvən ə ntsaŋ nə tənum nghəm nkaykə.

⁴³Ghaa boʼlə bwey ghi fəə fə muʼu fə loʼ fə ghə tɔŋŋə nə̀ aloʼ Molek dza nə̀ aloʼ zə̀ kə ghaa, Boʼlə bwey soʼo n səghəbələ fə zə̀ kə ghaa, tɔŋŋə Refan, Nə a loʼ mmuʼu ghaa â fwaʼ kɔʼnə n wɔ̂ ni fuu ngɔɔmə zə tə ghii mə. Sey, mə i dzum nuu ghaa n naʼ zən, ghaa daŋ dzuu, ghaa ndow tsəghə daŋŋə naʼi Babilɔn.’

⁴⁴Ghə bày bày a saa ghə â khə tsənu fəə key kə diinə nə̀ Zə̀ kə loʼnu ghi ghə nghee ghə â loʼnə n mbvən ə ntsaŋ. Ghə â khəm kɔʼ fəə fə tii fə n jìi zey Zə̀ kə a tiilə ndow tə Mushi. Ghə n bɔɔmə khəm tsu kə fəə fə tii fə n fòʼ zey Zə̀ kə â diinə tə Mushi.

⁴⁵Ambə num tə tsəghə tsunə, ghə bày bày a saa ghi Joshwa n ney bə fəə kə tii kə n wɔ ghə bày a ghə ghə, bə n ghii fə nghee ghə â ndownə ni ndow ney keeli naʼ zey zə â loʼ nə̀ Zə̀ kə n dzum nuu shi ghə̂ a tii ghə fu. Fəə kə tii kə n loʼ tsə kə fu ni bə taa bə n nəŋə zey Devid â loʼnə də̀ŋ kə.

⁴⁶Zə̀ kə n dii ləghə i wi tə̀ fɔɔ Devid, sey, tə n nɔɔ ndow tə Zə̀ kə nə̀ tə fuu wi n buʼ kə tə̀ tə loʼ ni bəghə naŋa tsu ndaw fey Zə̀ kə Yakɔb kə khə ni muu tii.

⁴⁷Â fəd loʼ Solomun tə â bəghə fuunə Ndaw Kəzə̀ i tii zə.”

⁴⁸Sətifən n ndow n sə kə dza, “I loʼ nə̀, Zə̀ kə idəŋ kə muu dzə way n ndaw nə a bəghə wù sɔŋtsuʼ. I bɔɔmə loʼ tə wù tûm Kəzə̀ dzanə nə̀,

⁴⁹‘Mûkəbii dza nə̀, bikighow kə loʼ kuu kə ufɔɔ kuŋ, Ghəlikətsə kə u loʼnə luʼu key n gaʼanə fuu zuŋ zə tii. A loʼ ndzoʼo ndaw i ghaa zə ghaa loʼ ni bəghə tə mə ə? Nkee a baa loʼ ndzoʼo luʼu kə ghaa kə ghaa dza i naŋa tə mə tə a loʼ luʼu kuŋ kə zayyə kə ə?

⁵⁰N dza à mgbaŋ loʼ mə n bɔm naŋanə fə u tii wə udzəm ə?’”

⁵¹Sətifən n ndow n sə kə dza nə̀, “Ghə̂ a taw a kətow ghən! Ghaa bɔɔmə khə kə fə̀ŋ tə ghə̂ ghən ghə ka bəghəm tə Zə̀ kə, ləghə soʼo way ni zow isəŋə. Ghaa baa ni tuu maʼa ghəə ghey Zay kə Zow kə dzanə. Ghə bày bày a ghaa â ghəŋŋə tsə sey, ghaa bɔɔmə loʼ soʼo sey.

⁵²Wù tûm Kəzə̀ u loʼ u mâ doʼo koʼ nə̀ ghə bày a ghaa a ka wi chɔd ə? Ghə â buʼ wey maʼa daŋŋə a ghən ghə â dza naŋa zey bənə bə i wù kəfwaʼ a wi wən tə loʼnə tsətsəghə. Ghaa n fìi fu ndow wi tə ghə̂ a təngəmə a wi ghə, ghə n wey maʼa daŋŋə ndow wi.

⁵³À kəm bwuulə maʼa ghaa laŋ K-a-zə̀ kə, loʼ sey nə̀ aloʼ n wɔ ghaa tsətəndəghə tə Kəzə̀ tə â kuu tsunə laŋ kə tii.”

⁵⁴Ambə ghə̂ a ndaw tsə a zow tsu ghəə ghən Sətifən dzanə, ghə n ngii fəələ n fə̀ŋ tə, tsowwə asɔŋ n kow wi.

⁵⁵Zay kə Zow kə n fəd nyi bə n kow Sətifən naʼ idzəm, tə n laalə kɔʼ ndow idəŋ. Ambə tə laalə kɔʼ ndownə idəŋ, tə n koʼ ndow ghaʼ i Kəzə̀ idəŋ nsə Yeso tə teynə fu n kpi u Kəzə̀ u təmmə wə.

⁵⁶Sey, tə n dza tə ghə nə̀, “Koʼo na! N koʼo ndow bikighow kə chi doʼonə, mə n koʼo ndow soʼonə Waa Weynum tə teynə fu n kpi u Kəzə̀ u təmmə wə.”

⁵⁷Ambə tə ghɔɔmənə sey, ghə n bɔ̀m naŋa tsu tuŋŋə u ghə, kaʼ ndow ni buʼlə mbɔŋ, dzəŋi kwɔ̀ɔ ndow n səə wi.

⁵⁸Ghə n kwu tsu wi, sìi nuu shi ndow wi nə inaʼ, zey ndow ni təmmə wi nə atay. Ghə̂ ghey ghə â teynə fu, tɔʼɔ zow ghəə ghey Sətifən dzanə, n tsɔʼlə kɔʼ saŋ tə ghə, naŋa ndow n səə waa fəghaŋ u loʼ wə ghə tɔŋŋə nə̀ a loʼ Sɔl.

⁵⁹Nghee tə ghə təmmə nə wi sey, Sətifən n zey ndow ni gɔŋŋə dzanə, “Mûkəbii Yeso, ney zay kuŋ kə.”

⁶⁰Tə n bwu ndow nə anyi, dey shi kɔʼ n dzə i taw zə dza, “Mûkəbii, kə wə nə ney naŋŋənə bəb zən n tow u ghə.” Ambə tə dza tsunə sey, tə n kpu i tsu.