Read Weh Kəfwaʼ 9 Bible Online

Kəfwaʼ 9 - Weh bible

Kəfwaʼ 9

¹Nghee ghə â chɔdlɔnə dzûmə tə Klisto tə, Sɔl n bii kaabə ni wey ghə. Sey tə n ndow koʼ ndow fɔɔngili u nii nii wə,

²dza ndow tə̀ wi nə̀ tə fuu bə wi n màʼlə wey wə i tiilənə wi n ndaw tə udzəŋi tey n Damaskus, sey nə̀ tə kpaʼi koʼ wù loʼ tə dzûmənə jii i Mûkəbii, nə̀ a loʼ kə weynum nkee weyzən, tə n kwu tsu wi, ney bə wi n ndaw tsaʼ n Yerosalem.

³Ambə Sɔl kuʼlə ndownə n Damaskus, tsə i loʼ zə n gbələ mwàa shi tsu bə n bikighow, baŋ tsəghə ndow n luʼu key tə â loʼnə tii.

⁴Tə n bwu shi tsu bə n khinyam key aghəd, zow tsu dzə i loʼ zə i ghɔɔmənə tə wi nə̀, “Sɔl, Sɔl, à loʼ kee wə chɔdlɔnə mə ə?”

⁵Sɔl n bəb ndow tə wi nə̀, “Wə loʼ ndee a mûkəbii.” Dzə̀ i tii zə n beeli kɔʼ nə̀, “À loʼ mə Yeso wən wə chɔdlɔnə.”

⁶“Nuu kɔʼ kənu, wə nyi ndow n fə̀ŋ inaʼ. Abə wə nyi ndownə fu, wù loʼ i dza bənu tə wɔ ghəə zey wə khə ni ghəŋŋə.”

⁷Ghə̂ ghey ghə â bwey dzəŋinə ghi Sɔl n maŋ laʼ təmi doʼo kɔʼ taʼ, n ntəŋkey ghə â zow dzə̀ i ghɔɔmənə, kee koʼo way wù wey tə ghɔɔmənə.

⁸Sɔl n ghaŋŋə nuu kɔʼ aghəlitsə, ambə tə chi kɔʼ sə̂ a wi ghə, tə n kəm way ni koʼ təluʼu. Sey, ghə̂ ghey tə â loʼnə ghi ghə n tali nyi ndow wi n Damaskus.

⁹Tə n doʼo tsu ntsuʼu ntəghə nə tə koʼo way luʼu tə, zəə way, məə soʼo way fə kə.

¹⁰Dzûmə ə Klisto u loʼ wə n loʼ n Damaskus ghə tɔŋŋənə wi nə̀ à loʼ Ananyas. Mûkəbii n tɔŋɔ tsu wi nə ujim dza tə wi nə̀, “Ananyas!” Tə n bəghəm i kɔʼ dza nə̀, “Mûkəbii, mə wən ə.”

¹¹Mûkəbii n dza tə wi nə̀, “Bayyə kɔʼ wû wə, wə ndow n ndaw Judas tə muunə n bad kə inaʼ kən ghə tɔŋŋə nə̀ a loʼ Jìi Tsətsəghə, wə bəb tsu wù loʼ tə nuu bə n Tasus ghə tɔŋŋə nə̀ a loʼ Sɔl, tə gɔŋŋənu nyisa.

¹²Tə n koʼo wù loʼ nə ujim ghə tɔŋŋə nə̀ a loʼ Ananyas, tə nyi bənə, bə gaʼ tsu awɔɔ n kow wi, sey nə̀ tə loʼ ni kəm kaʼ ni koʼ təluʼu.”

¹³Ananyas n beeli kɔʼ nə̀, “Mûkəbii, ndəmə aghə̂ ghə n dza ghəə ghə tə mə kuum wù wən nsə ndəmə tə aghəə tə bəbə tey tə ghəŋŋənə n kow ghə̂ a Kəzə̀ ghə n Yerosalem.

¹⁴Tə loʼ nə̀ tə n ney daʼa kə n wɔ ghə fɔɔngili a nii ghə ni bə kwu ghə̂ ghey adzəm ghə bəghəmnə tə wɔ.”

¹⁵Mûkəbii n fəd beeli ndow wi nə̀, “Ndow kənu! N təŋkey mə n wi sày nə tə fwaʼ tə mə, tə ghəŋŋə nə̀ ghə̂ ghey ghə way ghə̂ a Təjuu ghə, də̀ŋ u ghə, nsə ghə̂ ghə Izree ghə nə̀ ghə keeli wù wey n loʼnə ghii wə.

¹⁶Mə i diinu tə wi nghee tə khə ni fəghə tii bòʼ mə.”

¹⁷Sey, Ananyas n nuu ndow, nyi ndow n ndaw zey Sɔl loʼnə tii, gaʼ ndow awɔɔ n kow wi dza nə̀, “Sɔl, n waazə, Mûkəbii tɔŋŋə Yeso wən tə â dii wû wə tə wɔ n jii nə wə bəghə fa, tə tûm bə mə n səə wɔ nə wə loʼ ni kəm koʼ təluʼu, Zay kə Zow kə i loʼ soʼo n kow wɔ naʼ idzəm.”

¹⁸N nəŋə i tii zə kə, fə u loʼ wə tə a loʼ zhwey u tətsəghə wə n tsɔʼlə nuutsu n sə̂ a Sɔl. Tə n kəm kaʼ ni koʼ təluʼu. Tə n nuu i kɔʼ, Ananyas n fuu wi n mmuu n Kəzə̀ mə.

¹⁹Ambə tə zə̂ kɔʼnə fəzəə wə, daʼa kə nyi bə n kow wi. Sɔl n doʼo tsu tsuʼu n loʼ mə ghi dzûmə tə Klisto tey n Damaskus.

²⁰Tə n daŋŋə zey ndow ni naʼa tûm nə Yeso loʼ waa Kəzə̀ n ndaw tə udzəŋi tə ghə̂ a Təjuu.

²¹Dzuu zə n zum ghə̂ ghey adzəm ghə â zownə ghɔɔmə i wi zə. Ghə n kaʼ ni bəb n wû i ghə nə̀, “N dza a wən loʼ wù wən tə â chɔdlɔnə ghə̂ ghey ghə tɔŋɔ tsu zəd i Yeso zə n Yerosalem ə? N dza zuŋ key tə â bənə fa tii â loʼ ni kwu ghə̂ a tii ghə, tə ney ndow fuu tə ghə fɔɔngili a nii ghə ə?”

²²Sɔl n fəd ndəmi nyi ndow uwû ni naʼa tûm i dzuŋu zə. Tə n dii nə təjìi tədzəm nə̀ Yeso ndzəm loʼ wù wey Zə̀ kə â dza naŋa nə̀ i tûm bənu. Tə n dii n jìi zey ghə̂ a Təjuu ghey n Damaskus n laʼ kii kɔʼ ghə i dza zə.

²³Ambə ntsuʼu n tsəghə tsunə, ghə̂ a Təjuu ghə n dzəŋi doʼo tsu, kad kɔʼ tsəm nə̀ ghə khə ni wey Sɔl.

²⁴Wù loʼ n kee bə tsɔŋ dza tsu tsəm zey ghə mə kad naŋanə tə Sɔl. Tsuʼu n dzəm, n tsə tə nsə n tsuʼu tə, ghə̂ a Təjuu ghə n keyyə bweeli tsə n fuʼ u mbàa wə inaʼ ni wey wi.

²⁵N tsuʼ fə loʼ fə, n tsuʼu tə, dzûmə tə Sɔl tə loʼ tə n nyaʼi ndow bə ney kuu nyi tsu Sɔl n khəə kə nii kə, tûm nuu shi ndow wi nə kəbuʼ n mbàa zey.

²⁶Ambə tə ndow bənə n Yerosalem, tə n ləghə ni təmdzəŋi ndow ghi dzûmə tə Klisto tey fu. Ghə n kee tsəŋə ghaʼa wi n təŋkey ghə â kam bəghəm dzə way nə̀ tə n doʼo dzûmə ə Yeso.

²⁷Banabas n kee ney ndow ghi wi n səə ngəd tə Yeso tə, tiilə dza ndow tə ghə nghee Sɔl a koʼnə Mûkəbii tii n jii nə̀ tə ndow n Damaskus, tə n ghɔɔmə ndow tə wi. Banabas n tiilə dza soʼo tə ghə nghee tə Sɔl â dəbbə naʼlənə ghəə ghə tii n zəd i Yeso n Damaskus.

²⁸Sɔl sey daŋŋə doʼo dzəŋi ndownu ghi ghə, tsəghə ndow kə n sə kə ni naʼa tûm i dzuŋu zə n zəd i Mûkəbii n naʼ i Yerosalem idzəm nə tə tsəŋə way.

²⁹Ghɔɔmə i wi zə n bəghəm dzəŋi way ghi ghə̂ a Təjuu ghey ghə a ghɔɔmənə ghɔɔmə i Grik zə. Sey, ghə n kee kəŋə jii ni wey wi.

³⁰Ambə dzûmə tə Klisto tə zow tsu ghəə ghən, ghə n ney ndow Sɔl n Kayserya, tûm nuu ndow wi n Tasus.

³¹À wən loʼ nəŋə zən kɔŋŋə kə â nyi bənə tii n kow ghə̂ ghə n dzəŋi u dzûmə tə Klisto wən n Judeya, Galili nsə n Samaria. Zay kə Zow kə n kuu fə̀ŋ tə ghə nə̀ ghə i muu n jìi zey Mûkəbii ləghənə. Taŋ a ghə n nyîmmə kɔʼɔ ndow naʼ idzəm.

³²Nghee tə Pita ngəə tsəghə bənə naʼ zə, ambə n tsuʼ fə loʼ fə, tə n bwey ndow səə ghə̂ a Kəzə̀ ghey ghə loʼnə n naʼ i Lida.

³³Tə n ndow kwɔɔlə ndow wù loʼ fu tii ghə â tɔŋŋə nə̀ a loʼ Enias, nə̀ wû u wi wə n kpu doʼo nə tənùm ifam nə tə nuulə kɔʼɔ way nə ukay.

³⁴Pita n tɔŋɔ tsu wi dza, “Enias! Yeso Klisto n wɔ baŋŋə, nuu kɔʼ wə faalə tsu kay wə.” Tə n daŋŋə nuu kɔʼ idəŋ n nəŋə i tii zə kə.

³⁵Ambə ghə̂ ghən adzəm ghə muunə n Lida nsə n Sharɔn koʼ tsunə wù wən, ghə n bəghəm fuu ndow tə Mûkəbii.

³⁶Dzûmə ə Yeso u loʼ wə n naʼ i Jopa ghə â tɔŋŋə nə̀ a loʼ Tabita, n ghɔɔmə i Grik nə a loʼ Dɔkas, dii tsu nə a loʼ ngaw. Weyzən wən n ghəŋŋə tsə ghəə a dzuŋu ghə tə ghə̂ ghə nəŋə tədzəm, fuu soʼo igaamə tə ghə̂ a laa ghə.

³⁷Dzaŋ zə n bə kwu tsu wi, tə n kpu i tsu, ghə n sow tsu vən i wi, kɔʼ nyəŋŋə naŋa ndow n dzuu i ndaw zey i doʼo kuulə kɔʼ idəŋ.

³⁸Nghee tə naʼ i Jopa zə â kuʼlə loʼnə n səə naʼ i Lida, dzûmə tə Klisto tey n naʼ i Jopa n zow tsu nə Pita loʼ n naʼ i Lida, ghə n dzə̀ kɔʼ aghə̂ abəghə tûm ndow tə wi. Buʼ ndow wi n wɔɔ kə nə̀, “Kələ wɔ, nyəŋ bə nya sa, kə ghab kə nə shiənə!”

³⁹Pita n daŋŋə bayyə tsu uwû, nuu dzəŋi ndow ghi ghə. Ambə tə ndow kuum tsunə fu, ghə n ney kɔʼ ndow ghi wi n dzuu i ndaw zey i doʼo kɔʼ ndow idəŋ. Ghey a kpusə adzəm n dzəŋ tsəghə kɔʼ wi, dey, dii ndow wi n ndzə tey Dɔkas â təmnə tə ghə nə tə nam loʼ utaw.

⁴⁰Pita n kuŋŋə dza kə tə ghə nə̀ ghə nuu shi ndow a bii ghə adzəm. Tə n təm ndow tənguʼ aghəd, gɔŋŋə i tsu. Tə n khə̀mə ndow uwû n bad key vən zey zə â nyə̀ŋnə tii, dza tsu nə̀, “Tabita, nuu kɔʼ!” Tə n chi kɔʼ sə̂ a wi, nghee tə koʼ kɔʼnə Pita, tə n nuu doʼo i kɔʼ.

⁴¹Pita kwu tsu wɔɔ kə wi, tɔɔmə kɔʼ wi nə̀ tə nuu təmi kɔʼ idəŋ, daŋŋə tɔŋɔ nyi dzəŋŋə bə dzûmə tə Klisto tey fu tədzəm nsə ghey a kpusə ghey fu, fuu tsəghə ndow wi tə ghə nə tə loʼ utaw.

⁴²Zɔŋ u tii wə n fuŋ tsəghə ndow n naʼ i Jopa idzəm, ndəm aghə̂ n bəghəm tə Mûkəbii.

⁴³Pita n doʼo kəŋə ndow ndəmə ntsuʼu n Jopa ghi Shimun wən tə a fwaʼa fə wə n gow tə tənyam.