Read Weh Roma 1 Bible Online

Roma 1 - Weh bible

Roma 1

¹À màʼlə kən tɔ̀ɔ bə mə Pɔl wù kəfwaʼ ə Yeso Klisto. Zə̀ kə mâ mə sày tə a loʼ ngəd ə Yeso, naŋa mə nə̀ mə i naʼlə tûm wi i dzuŋu zə.

²Tûm i dzuŋu zən n naʼlənə loʼ i zən Zə̀ kə â təb naŋanə, ghəŋə soʼo nə̀ tûm tə wi tɔ̀ɔ naŋa n màʼlə kə wi.

³Tûm tii loʼ bòʼ waa wi Yeso Klisto, ghə â ji bənə wi fa n mbi tə a loʼ waa waa fɔɔ Devid.

⁴Zə̀ kə n zhəm dzəŋŋə bə wi nə ivə n daʼa kə Zay kə Zow kə ni dii bə nə̀ Yeso Klisto Mûkəbii saa loʼ waa wi. Tə loʼ kətow tə fə wə udzəm, khə way bəb i loʼ zə.

⁵À loʼ bòʼ wi, Zə̀ kə diinə mə n ndzuŋ ə wi, sày naŋa kɔʼ mə nə̀ n doʼo ngəd ə wi, sey nə̀, mə i loʼ ni ghəŋə nə̀ aghə̂ adzəm n naʼa tə mbi tədzəm, a bəghəm tə wi, ghə i zow soʼo tə wi.

⁶Ghaa ghə̂ a naʼ i Rom, ghaa loʼ soʼonu n taŋa ghə̂ ghey Zə̀ kə tɔŋɔnə nə̀ ghə doʼo dzûmə tə Yeso Klisto.

⁷N màʼlə kən tɔ̀ɔ bə tə ghaa ghə̂ a Roma ghən Zə̀ kə ngii ləghənə, sày kɔʼ soʼo ghaa nə̀ ghaa doʼo ghə̂ a wi. N gɔŋŋə nə̀ Zə̀ kə tə loʼnə Bày saa ghi Mûkəbii Yeso Klisto dii ghaa n ndzuŋ ə wi tə ghəŋə soʼo nə̀ ghaa i loʼ nə ibuulə.

⁸Ni zey tsu, n fuu kəzɔŋŋə tə Zə̀ kuŋ kə n bam i Yeso Klisto bòʼ ghaa adzəm, n təŋkey ghə kali ghaa mbi idzəm n ndzoʼo bəghəm i fə̀ŋ zey ghaa khənə.

⁹Zə̀ kən n fwaʼanə tə wi n fə̀ŋ zuŋ idzəm ni naʼlə tûm i dzuŋu zə bòʼ Waa wi Yeso, loʼnu ni təmi tiilə nə̀ n moʼlə tsənu ghaa nəŋə tədzəm.

¹⁰Nəŋə tədzəm abə n gɔŋŋənə, n gɔŋŋə tsə nə̀, abə Zə̀ kə bəghəmnə mə i loʼ ni bə taa n səə ghaa.

¹¹Zuŋ key n mbuŋənə ni bə n səə ghaa loʼnə mə i loʼ ni kuu fəŋ tə ghaa n naamə kən Zay kə Zow kə fuunə tə mə ni ghəŋə nə̀ bəghəm i fə̀ŋ i ghaa zə i taw.

¹²N ləghə ni bə n səə ghaa sey nə̀, mə i loʼ ni təm tawwə ghaa n bəghəm i fə̀ŋ i ghaa, ghaa i mbɔŋ təm tawwə bə soʼo mə n bəghəm i fə̀ŋ zuŋ.

¹³Waazə ghə, n ləghə nə̀ ghaa keeli tsu nə̀, mə n bayyə naŋa wû wə ndəmə tənəŋə ni bə taa n səə ghaa, à kee loʼ nə̀, nəŋə tədzəm abə n bayyə tsunə wû wə ni bə, ghə i loʼ zə maŋ bə təʼlə maʼa kɔʼ mə. Ghə i tii i loʼ nə, n ləghə ni bə fwaʼ soʼo n fəŋŋə kə ghaa ni ghəŋə nə̀ ghə̂ a loʼ ghə a doʼo bə dzûmə tə̀ klisto, ighələ tə n ghəŋənə n naʼa tə loʼ tən ghə way ghə̂ a Təjuu.

¹⁴I loʼ nə̀, n teeli khə ni naʼa tûm i dzuŋu zə tə ghə̂ ghə adzəm, ghə̂ ghə nkala nsə ghə̂ ghə inaʼ ghə, ghə̂ ghey ghə nyinə màʼlə kə nsə ghə̂ ghey ghə khə way màʼlə kə.

¹⁵À wən loʼ ghəə i tii zə n ngii khənə zay ni naʼa tûm i dzuŋu zə tə ghaa ghən ghaa loʼnə n naʼ i Rom.

¹⁶N dədlə way n tow kə ni naʼa tûm i dzuŋu zə, n təŋkey, tûm i dzuŋu zən loʼ daʼa K-a-zə̀ kən kə bəghəshiənə ghə̂ ghey adzəm ghə bəghəmnə tə Klisto. Tûm tii zey tsu dzə n kow ghə̂ a Təjuu ghə tə̀ ghii zə ni ndow tə̀ ghə̂ ghən ghə way ghə̂ a Təjuu ghə.

¹⁷N dza sey n təŋkey à loʼ tûm i dzuŋu zə i dii bənə jii zey i ghəŋŋənə nə̀ wù doʼo tsətsəghə n sə K-a-zə̀. À may tsu kə n bam i bəghəm i fə̀ŋ saa doʼlənə tsətsəghə n sə K-a-zə̀, ji i nuu i kəm way dzə. À wey loʼ ghə i tii zə i tɔ̀ɔ doʼonə n màʼlə K-a-zə̀ nə̀, “Wù wey tə khənə bəghəm i fə̀ŋ zə n kow Zə̀ kə, Zə̀ kə koʼo wi nə̀ tə loʼ tsətsəghə, à loʼ wù tii, tə i keelinə muu zə itsali zə.”

¹⁸I loʼ nə̀, Zə̀ kə n dii tsu bə nəghə u wi u fəə wə n kow ghə̂ ghey adzəm ghə tuunə ni bəghəm tə wi nsə ghə̂ ghey ghə ghəŋŋənə ghəə a bəbə ghə fa mbi n təŋkey ghə tsəllə naŋa isəŋə n ghəə a bəbə ghey ghə ghəŋŋənə.

¹⁹Zuŋ key Zə̀ kə chi diinə nəghə u wi u fəə wə loʼ nə, tə n ghəŋə nə̀ ghə̂ ghə a keeli wi n təŋkey, tə n wû u wi dii tə ghə̂ ghə adzəm.

²⁰I loʼ sey n təŋkey, ni ney nuu bə tə mbi a kaʼnə, Zə̀ kə n ghəŋŋə nə̀ ghə̂ a keeli nə̀ tə loʼ Kəzə̀ n ghəə ghey tə̀ ghəŋŋənə. Ghə̂ ghə n koʼ soʼo daʼa kə wi kən kə doʼo tənnə. Tə n dii soʼo wû u wi wə n fə wey tə bɔmnə. Sey, ji i loʼ i way dzə tə̀ ghə ni dza nə̀ ghə khə way nə̀ Zə̀ kə loʼnu.

²¹Nghee ghə tsəm khə kənə nə̀ Zə̀ kə loʼnu, ghə ka wi ngɔɔmə dzə tə aloʼ Kəzə̀, nkee ni fuu zɔŋŋə kə wi n ghəə ghey tə ghəŋŋənə. Ghə fədlə keeli ndow moʼlə tə laʼlə tə, ghəŋŋə fə̀ŋ tə ghə tə a dzə doʼo tsunə tə̀ aloʼ kələm.

²²Ghə fəd doʼo kɔʼ ghə̂ a laʼlə, kee khə kə nə̀ ghə tɔbənu.

²³Ghə ney kɔʼlə mən ghə mə khənə ni fuu tə Zə̀ kən kə muunə nəŋə tədzəm, fədə fuu ndow tə mmuʼu mən ghə bɔmnə n wɔɔ, n fiilənə wù sɔŋtsuʼ, nnən, tənyam, nsə nyam tən tə siinə aghəd nə̀ fə u tii wə udzəm u kpuunu.

²⁴À wey loʼ ghə i tii zə Zə̀ kə zəghə maʼa ndownə ghə nə̀ ghə i ghəŋŋə ndow ghəə a bəbə ghey fə̀ŋ tə ghə tə ləghənə tə a loʼ nyaabə tə ghəə a laŋŋə ghən ghə ghəŋŋənə n wû i ghə.

²⁵Ghə ghəŋŋə ghəə ghən n təŋkey ghə n tuu ni bəghəm isəŋə zən i loʼnə bòʼ Kəzə̀, fədə bəghəm ghəə a badla ghə. Ghə fuu nkɔʼlə tə fə wən Zə̀ kə fwaʼ naŋanə, ngɔɔmə soʼo fə u tii wə, loʼ sey nə̀ ghə mə khə ni ghəŋŋə sey tə Zə̀ kən kə fwaʼnə fə wə udzəm fa n mbi. À loʼ kə tə wi saa khənə ni fuu kɔʼləmə nəŋə tədzəm. Zə i loʼ kə sey.

²⁶À wən loʼ ghəə zey i ghəŋənə nə̀ Zə̀ kə zəghə maʼa ndow ghə nə̀ ghə i ghəŋŋə ndow dzəə dzəə tə aghəə tey fə̀ŋ tə ghə tə ləghənə. Gheyzən a ghə a nyəŋi n wû i ghə, loʼ sey nə̀ i mə khə way ni doʼo sey.

²⁷À wey bɔɔmə loʼ nghee tə̀ gheynum a ghə a loʼ soʼonə tii. Ghə kəm naŋŋə taʼa tsuu agheyzən, fədə mgbiilə ndow kə n wû zə ni ghəŋŋə ghəə a bəbə ghey fə̀ŋ tə ghə tə ləghənə n wû i ghə. Ndzoʼo ghəə a bəbə ghən gheynum a ghəŋŋənə ni nyəŋi n wû i ghə n ghəŋə nə̀ ghə bɔŋ ndzuu n wɔ Zə̀ kə.

²⁸Nghee ghə kii maʼanə ghəə a Kəzə̀ ghə, Zə̀ kə n zəghə maʼa ghə nə̀ ghə i ghəŋŋə ndow ghəə ghə n jii zey moʼlə tə ghə tə bɔɔ doʼonə tii. À wey loʼ ghə i tii zə ghə ghəŋŋənə ghəə ghey a ka kpii tə̀ wù ni ghəŋə.

²⁹À n fə̀ŋ tə ghə luu doʼo tən kə lii tə aghəə tey tə kpiilə way n sə K-a-zə̀, tə aloʼ ghəə a bəbə, umə̂, mwam u bəbə wə. Ghəə ghey a kpiilə way tə aloʼ kəghoʼ, ni wey wù, ni tsowwə ghɔɔmə, ni nəbə ghə̂ ghə, khə fənyiʼi n kow ghə̂ ghə, khəə kaabə soʼo təfəghəm.

³⁰Ghə bəəbə kaabə zəd a ghə̂ ghə, ləghə way Zə̀ kə, khə ndow, ghaŋŋə iwû, kɔʼlə soʼo iwû. Ghə kəŋə təjii tədzəm ni ghəŋŋə ghəə a bəbə ghə. Ghə ngɔɔmə way ghə bày a ghə ghə.

³¹Ghə ghəŋŋə ghəə a laʼlə ghə, naŋŋə koʼo way ghɔɔmə i ghə zə, khə way fə̀ŋ i dzuŋu zə, khə soʼo way sî i kwɔɔlə zə n kow ghə̂ ghə.

³²Ghə mgbaŋ khənu nə̀ laŋ K-a-zə̀ kə dza nə̀ ghə̂ ghən ghə ghəŋŋə ndzoʼo ghəə ghən, kpii ni kpu. Ghə u nam ndow kə n sə̂ kə ni ghəŋŋə ghəə ghən, təmə tawwə ndow soʼo ghə̂ a loʼ ghə nə ghə i ghəŋŋə soʼo ghəə a tii ghə.