Read Weh Roma 10 Bible Online

Roma 10 - Weh bible

Roma 10

¹Waazə ghuŋ a dzuŋu ghə, dey zuŋ nsə gɔŋŋə zuŋ n tow kə ghə̂ ghə Izree i loʼ nə̀ Zə̀ kə mə bəghəshi ghə.

²N gɔŋŋə sey n təŋkey n loʼ ni təmi tiilə bòʼ ghə nə̀ ghə ndzəmə ləghənu ni ghəŋŋə ghəə ghey Zə̀ kə ləghənə, à kee loʼ nə̀ ghə khə way jìi zey i kpiinə tə ghə ni ghəŋə ghəə a tii ghə.

³Nghee ghə â khə way jìi zey i ghəŋŋənə nə̀ ghə doʼo tsətsəghə sə K-a-zə̀, ghə n maŋ kəŋ tsu kə jii ghə ni dzûmə. Sey, ghə n ka dzûmə jìi zey Zə̀ kə â ghəŋənə nə̀ ghə̂ ghə i dzûmə ni doʼo tsətsəghə n sə kə wi.

⁴I loʼ nə̀, Klisto mâ bə ghəŋə tsəghə nə̀ ghə̂ a doʼo tsətsəghə n sə K-a-zə̀ nə̀ à way dzə a dza ghə naŋŋə kəlaŋ. À wey loʼ ghə i tii zə, wù wey tə bəghəmnə tə wi, i doʼlə tsətsəghə n sə K-a-zə̀.

⁵Mushi mâ tɔ̀ɔ naŋa jìi zey wù doʼlənə tsətsəghə tii n sə K-a-zə̀ a dza tə naŋŋə kəlaŋ. Tə â tɔ̀ɔ nə̀, “Wù wey tə naŋŋənə laŋ kə nə̀ tə ka nɔʼ n ghə i loʼ zə, laŋ kə i ghəŋŋə wi nə̀ tə muu.”

⁶Tə n kee tɔ̀ɔ naŋa nghee wù loʼ ni doʼo tsətsəghə n sə K-a-zə̀ a dza tə khə bəghəm i fə̀ŋ nə̀, “Kə wə nə bəbənə n fə̀ŋ zə nə̀, ‘À i kɔʼɔ ndee idəŋ ni ndow ney tsuu bə Klisto ə?’ ”

⁷Kə wə nə̂ bəbə soʼonə n fə̀ŋ zə nə̀, “À i tsuu ndow ndee n naʼ zə ivə ni zhəm nuu shi kɔʼ bə Klisto nə ivə ə?”

⁸Isəŋə zey i kee loʼnə n màʼlə K-a-zə̀ loʼ nə̀, “Tûm i dzuŋu i kuʼlə loʼ kə n səə ghaa. Tûm tii loʼ n dzuu a ghaa, loʼ soʼo n fə̀ŋ tə ghaa. Tûm tii bɔɔmə loʼ soʼo tûm zey ghey naʼlənə nə̀ ghə̂ bəghəm tə̀ Klisto.”

⁹I loʼ nə̀, abə wə loʼ ni dza shi bə n dzuu zə zə̀ nə̀, “Yeso loʼ Mûkəbii.” Bəghəm kɔʼ soʼo n fə̀ŋ zə nə̀ Zə̀ kə zhəm dzəŋŋə bə wi nə ivə, Zə̀ kə i bəghəshi wɔ.

¹⁰N dza sey n təŋkey, à loʼ bəghəm i fə̀ŋ zən wə khənə, i ghəŋŋənə nə̀ Zə̀ kə ney wɔ nə̀ wə loʼ tsətsəghə, à loʼ soʼo n dzuu zə wə dza shiə bənə nə̀ wə n bəghəm tə Klisto i ghəŋŋənə nə̀ Zə̀ kə bəghəshi wɔ.

¹¹I bɔɔmə loʼ tə̀ i tɔ̀ɔ doʼonə n màʼlə K-a-zə̀ nə̀, “Wù wey tə bəghəmnə tə wi, fə kə loʼ kə way kə ghəŋŋənə nə̀ tə dey uwû.”

¹²I loʼ sey n təŋkey, Zə̀ kə bəghəshiə aghə̂ adzəm. Zə̀ kə ney way n taŋ nə̀ wə loʼ wù Juu nkee wù wən tə way wù Juu. À loʼ Mûkəbii u mɔʼɔ wə tə loʼnə Mûkəbii tə ghə̂ ghə adzəm, tə buu soʼo n wɔɔ kə ni fuu tə ghə̂ ghey adzəm ghə nɔɔ ndownə tə wi.

¹³I bɔɔmə loʼ tə i tɔ̀ɔ doʼonə n màʼlə K-a-zə̀ nə̀, “Wù wey tə nɔɔ ndownə n zəd i Mûkəbii, Zə̀ kə i bəghəshiənu wi.”

¹⁴Nya, ghə̂ a sə loʼ ngee ni nɔɔ igaamə n wɔ wi nə̀ ghə ka tə wi bəghəm ə? Ghə loʼ soʼo ngee ni bəghəm tə wi nə̀ ghə ka kam zow koʼ tsə ghə i loʼ zə kuum wi ə? Ghə a loʼ soʼo ngee ni zow aghəə kuum wi nə̀ wù loʼ ka bə naʼa bə tûm tii tə̀ ghə ə?

¹⁵Wù loʼ soʼo ngee ni ndow naʼa tûm i dzuŋu zə nə̀ Zə̀ kə ka wi tûm ə? I bɔɔmə loʼ tə̀ i tɔ̀ɔ doʼonə n màʼlə K-a-zə̀ nə̀, “À ngii loʼ ghə i dzuŋu zə ni koʼ nə̀ tûm tə Kəzə̀ tə nya bəghənu ni bə naʼa tûm i dzuŋu zə!”

¹⁶À kee loʼ nə̀, à way dzə aghə̂ adzəm ghə â bəghəmnə tûm i dzuŋu zən n təŋkey, wù tûm Kəzə̀ Ayzaya mâ dza nə̀, “Mûkəbii, a loʼ ndee tə â bəghəmnə tûm ghey ə?”

¹⁷Sey, wù bəghəm kə tûm nə̀ tə n zow tûm tii. À loʼ abə ghə naʼlənə tûm i dzuŋu zə bòʼ Klisto wù zow soʼonə tûm i tii zə.

¹⁸N kee bəbə nə̀, à loʼ nə̀ ghə̂ ghə Izree ghə â ka zow tûm i dzuŋu zən ə? Ghə mâ tsəm zow n təŋkey i tɔ̀ɔ doʼo n màʼlə K-a-zə̀ nə̀, “Ghə mâ naʼa ngəə tsəghə bə tûm tii n mbi idzəm. Bat kə mbi kə loʼ kə way soʼo nə̀ ghə ka kam zow tûm i tii zə a fu.”

¹⁹N dza n kəm tsu nə̀, à loʼ nə̀ ghə̂ ghə Izree ghə â ka zowkeeli ə? Ghə mâ tsəm zowkeeli! À loʼ nə̀ â kee tuu ghə, n təŋkey, Mushi n wû u wi wə mâ bùʼ dza nə̀ Zə̀ kə dza nə̀, “Mə i ney kɔʼɔ naʼ zən ghaa moʼo nə̀ à way dzə naʼ i səŋi zə, N ghəŋə nə̀ ghaa i ghoʼo naʼ i tii zə. Mə i ney soʼo laŋa kə inaʼ kə loʼ kə, N ghəŋə nə̀ ghaa i fəələ nəghə wə tii.”

²⁰Wù tûm Kəzə̀ Ayzaya mâ dəb dza soʼo nə̀ Zə̀ kə dza nə̀, “À mə â fəd kəŋ keeli kɔʼ ghə̂ ghey ghə â kəŋə way mə. Mə n bə dii ndow wû wuŋ tə ghə̂ ghey ghə â buʼu bəbə way mə.”

²¹Tə kee dza soʼo nə̀ Zə̀ kə dza kuum ghə̂ ghə Izree ghə nə̀, “N chi naŋa wɔ ghuŋ nəŋə tədzəm Ni kpiney ghə̂ ghey ghə zow way tə mə, tuu maʼa ghəə ghey n dzanə.”