Read Weh Roma 11 Bible Online

Roma 11 - Weh bible

Roma 11

¹N bəbə nə̀, à loʼ nə̀ Zə̀ kə n tuu maʼa ghə̂ a wi ghə ə? Ngaŋ à way dzə sey. Wû wuŋ, n loʼ wù Izree, waa waa Abraham n sali ndaw i Benjamin.

²I loʼ nə̀ Zə̀ kə ka tuu maʼa dzə ghə̂ ghən tə â sày naŋa kɔʼnə nə̀ a loʼ ghə̂ a wi nə nzeyyə. Ghaa məghənu ghəə zey i tɔ̀ɔ doʼonə n màʼlə K-a-zə̀ kuum Elayja ə? Ghə məghənu nghee Elayja â buʼnə wɔɔ kə tii tə̀ Zə̀ kə n tow u ghə̂ ghə Izree? Tə â buʼ kəwɔɔ nə̀,

³“Mûkəbii, ghə n weyyə maʼa may ghə̂ a tətûm ghə ghə̀, ghə a sàʼ maʼa soʼonə tsə ghey ghə fəələnə maʼlə wə tii tə̀ wɔ. À nya doʼo səə kə mə n nəŋə mə, ghə a buʼu kəŋə soʼo jii ni wey maʼa mə.”

⁴Ghaa məghənu nghee Zə̀ kə â beeli ndownə Elayja tii ə? Tə â dza tə wi nə̀, “Mə n sày naŋa shi kɔʼ ghə̂ ghə fa inaʼ təkam təsəghəmbəghə nə̀ à loʼ ghə̂ ghuŋ, nə̀ wù ghə umɔʼ ka kam təm koʼ tsə nguʼ tə aghəd ni ngɔɔmə zə̀ kə tsɔŋɔ kən ghə tɔŋŋə nə̀ à loʼ Bal.”

⁵À loʼ soʼo ghə i mɔʼɔ zə n num tə tən nya, nghee Zə̀ kə ngii khənə ndzuŋ n kow ghə̂ a wi ghə, tə n sày naŋa sə fə ghə̂ ghə Izree a loʼ ghə nə̀ a loʼ ghə̂ a wi.

⁶Zə̀ kə sày ghə n ndzuŋ ə wi, à way dzə nə̀ à loʼ ghə i loʼ zə ghə ghəŋə tsunə, n təŋkey abə à mə loʼ bòʼ ghə i loʼ zə ghə ghəŋə tsunə, tə ndzuŋ ə Kəzə̀ ə tii mə way dzə ndzuŋ i loʼ zə.

⁷Saa loʼ ni kəm dza tsu nə̀ ngee nya a? Ghə̂ ghə Izree ghə â ka keeli dzə fə key ghə â kəŋənə, â lo kə sə fə aghə̂ fən Zə̀ kə â sày naŋanə. Zə̀ kə n kee ghəŋə nə̀ ghə̂ a loʼ ghey tawwə naŋa kɔʼ fə̀ŋ tə ghə nə̀ ghə i zow way ghəə zey tə dzanə tə ghə.

⁸I bɔɔmə loʼ tə i tɔ̀ɔ doʼonə n màʼlə K-a-zə̀ nə̀, “Zə̀ kə â dzəŋsə naŋa kɔʼ moʼlə tə ghə. Ni bə kuum bə na, Zə̀ kə n ghəŋə nə̀ kə sə̂ a ghə a nə kəm koʼonə luʼu tə, Ghəŋə soʼo nə̀ kə tuŋŋə u ghə u nə kəm zownə luʼu tə.”

⁹Fɔɔ Devid n dza soʼo ghə i mɔʼɔ zə nə̀, “Zə̀ kə mə kwu ghə, ghə n luʼu tey ghə khənə zə̂ kə tii, Zə̀ kə mə ghəŋə nə̀ ghə taŋŋə bwu, kə chɔd soʼo ghə.

¹⁰Zə̀ kə mə fəb naŋa sə̂ a ghə n jìi zey ghə way ni kəm koʼ təluʼu, Dzəm tə ghə tə mə ngəmə doʼo tən ndow n wɔ chɔdmə.”

¹¹Sey, n bəbə nə̀, à loʼ nə̀ ghə̂ ghə Izree ghə â bwu sa bwu tən kənu ə? Ngaŋ! À ndɔm way dzə sey. I fəd loʼ nə̀ ghə̂ ghə Izree ghə â ghəŋə bəəbə tsunu, sey, Zə̀ kə n ghəŋə nə̀ ghə̂ ghən ghə way ghə̂ a Təjuu a keeli ibəghəshi ni ghəŋə nə̀ ghə̂ ghə Izree ghə i ghoʼo.

¹²Ghəə a bəbə ghən ghə̂ a Təjuu ghə â ghəŋənə ni tuu maʼa Klisto, â ngii ney bə ibuulə tə̀ mbi. Ghəə bəbə a tii ghə n ghəŋə soʼo nə̀ Zə̀ kə ngii fuu buulə i wi tə̀ ghə̂ ghən ghə way ghə̂ a Təjuu ghə. Buulə i tii zə i boʼo doʼlə ngee abə ghə̂ a Təjuu adzəm a loʼ ni təmdzəŋi bə ni bəghəm tə̀ Klisto ə?

¹³N dza n baa ghɔɔmə bə nya tə ghaa ghən ghaa way ghə̂ a Təjuu ghə. Nghee tə̀ Zə̀ kə sàynə mə nə̀ n doʼo ngəd ə Klisto tə ghaa, n fuu zɔŋŋə kə wi n fwaʼ kən tə fuunə tə mə.

¹⁴N moʼlə nə̀ fwaʼ kə tii kə loʼ ni ghəŋə nə̀ waazə ghuŋ, ghə̂ a Təjuu ghə i ghoʼo fə key ghə̂ ghən ghə way ghə̂ a Təjuu a khənə, sey, mə i loʼ ni gaamə ghə nə̀ ghə keeli ibəghəshi.

¹⁵I loʼ sey n təŋkey, abə i loʼ nə̀, nghee Zə̀ kə â tuu maʼanə ghə̂ a Təjuu ghə bòʼ bəb i ghə, zə â ghəŋə nə̀ ghə̂ a mbi a doʼo bə nə kəfə kəmɔʼ ghi Zə̀ kə, zə i boʼo doʼlə ngee abə Zə̀ kə kəm ney nyi bənə Juu tə ibam ə? Zə i bɔɔmə doʼlə kə tə̀ wù kpuunə zhəm dzəŋŋə bənə nə ivə, doʼo bə utaw.

¹⁶Abə wù bòʼ shi bənə boʼo fə baa fə sə isə fə, fuu ndow tə Zə̀ kə, tə n sey fuu may baa kə tii kə tə Zə̀ kə. Wù wey tə zəghə tsunə kaʼ fə, dza tsu nə̀ à khə Kəzə̀, i sey dii nə̀ à khə Kəzə̀ ghaŋ tə tii tə nsə kpìi tə tii tə.

¹⁷Ney kɔʼ n na kpìi kə kaʼ fə loʼ fə ghə tɔŋɔ nə̀ à loʼ oliv, ghə khəm nuu shi bənə n kaʼ fə oliv fə inaʼ fə, ghə a ndow ney bə kpìi kə n kaʼ fə oliv fə mbvən fə, bə zuŋ naŋa dzəŋi nyi bə n kaʼ fə oliv fə inaʼ fən, kə a nyîmmənə, məə bə utam nə̀ à loʼ ghaŋ tə kaʼ fən. Ghaa ghə̂ ghən ghə way ghə̂ a Təjuu ghə, ghaa loʼ tə a loʼ kpìi tə kaʼ fə oliv fə mbvən fə. Zə̀ kə n ghəŋə nə̀ ghaa keeli buulə zey tə â buulənə ghə̂ a Təjuu ghə a tii ighələ tə a loʼ kpìi kə kaʼ fə oliv fə mbvən fən ghə â zuŋ dzəŋi bənə ghi kaʼ fə oliv fə inaʼ fə.

¹⁸Kə ghaa nə koʼo kiinə ghə̂ ghən Zə̀ kə â khəm nuu shi bənə tə a loʼ təkpìi ni zuŋ nyi dzəŋi bə ghaa n kaʼ fə tii fə tɔŋɔ ghə̂ a Təjuu n təŋkey, à way dzə ghaa kpìi tən ghə zuŋ nyi bənə, ghaa ghəŋŋənə nə̀ ghaŋ tə i taw, à fəd loʼ təghaŋ tə ghəŋŋənə nə̀ ghaa i taw.

¹⁹Ghaa i loʼnu ni nam dza nə̀, “Ghə â khəmmə nuu shi bə kpìi tə loʼ tən ni fuu kəbùʼ nə̀ ghə zuŋ dzəŋi nyi ndow saa n kaʼ fə tii fə.”

²⁰À loʼ kənu isəŋə nə̀ ghə â khə̂mə nuu shi bə kpìi tə loʼ tey n təŋkey ghə â ka bəghəm dzə tə̀ Zə̀ kə, ghaa a kee tey n təŋkey, ghaa bəghəm tə Zə̀ kə. À kee loʼ nə̀ ghaa khə dzə way ni ghaŋŋə wû zə n ghə i loʼ zə, ghaa fəd khə ni ney ighə̂mə.

²¹N dza sey n təŋkey, abə Zə̀ kə â loʼ ni chɔd ghə̂ ghə Izree ghən ghə â baa loʼnə ghə̂ a wi ghə, i sey dii nə̀ tə chɔdlɔ soʼonu ghaa abə ghaa ghəŋə bəəbə tsunə.

²²Ghaa n koʼ nghee tə Zə̀ kə khənə fə̀ŋ i dzuŋu zə a tii, nsə ghee tə nyeynə tii. Tə chɔdlɔ ghə̂ ghey ghə ghəŋə bəəbənə, kee dii ghaa n ndzuŋ ə wi abə ghaa ghəŋŋə dzənə ghəə ghey tə ləghənə nə̀ ghaa i ghəŋŋə, nə̀ à way sey, tə i khəm maʼa shi bə soʼo ghaa tə̀ a loʼ kpìi kə fəkaʼ.

²³I loʼ soʼo nə̀ abə ghə̂ a Təjuu a kəm tuu way ni bəghəm tə̀ Zə̀ kə, Zə̀ kə loʼ soʼonu ni kəm ney zuŋ nyi dzəŋi bə ghə ibam n təŋkey, tə khənu daʼa kə ni ghəŋə sey.

²⁴Ghaa ghə̂ ghən ghə way ghə̂ a Təjuu ghə, ghaa loʼ tə a loʼ kpìi kə kaʼ fə oliv fə mbvən fə. Abə Zə̀ kə â loʼ ni ney zuŋ dzəŋi nyi bə ghaa ghi kaʼ fə oliv fə inaʼ fə, loʼ sey nə̀ i tawnu ni shi sey. I sey dii nə̀, zə i taw way tə̀ Zə̀ kə ni kəm ney zuŋ dzəŋi nyi dzəŋŋə bə Juu tən tə â bùʼ loʼ tsənə ghə̂ a wi ghə.

²⁵Waazə ghə, isəŋə i loʼ i loʼnu i nyi doʼonə, n ləghə nə̀ ghaa keeli tsu, zə i ghəŋŋənə ghaa, ghaa i kɔʼlə way wû zə nə̀ ghaa tɔbənu. I loʼ nə̀ ghə̂ ghə Izree ghə i taw doʼo tən dzə way n tow kə. Nəŋə i bəghənu, ghə̂ ghən adzəm Zə̀ kə sàynə nə̀ à way ghə̂ a Təjuu i bəghəmnə tə̀ Klisto, ghə̂ Təjuu ghə i təmdzəŋi bə soʼo ghə.

²⁶À loʼ n jii i mɔʼɔ zə, Zə̀ kə i bəghəshiənə ghə̂ ghə Izree ghə adzəm. I bɔɔmə loʼ tə i tɔ̀ɔ doʼonə n màʼlə K-a-zə̀ nə̀ Zə̀ kə â dza nə̀ “Wù wey tə bəghəshiənə ghə̂ ghə i shiə kɔʼɔ n naʼ i Zayɔn, Tə i ghəŋə soʼo nə̀ waa a waa a Yakɔb a tyi maʼa ghəə a bəbə ghə.

²⁷À wən loʼ nkaa mən mə i zə̂ənə ghi ghə, Abə mə i ney nuu kɔʼnə ghəə a ghə a bəbə ghə.”

²⁸Nghee ghə̂ ghə Izree ghə â tuu maʼanə tûm i dzuŋu zə, ghə n doʼo bə ghə̂ a təngəmə ghi Zə̀ kə. À wey loʼ ghə i tii zə ghaa ghən ghaa way ghə̂ Təjuu ghə â keelinə bùʼ kə ni bəghəm tə̀ Klisto. À kee loʼ nə̀ Zə̀ kə nam ləghə kənu ghə n təŋkey, tə â sày kɔʼnu ghə bòʼ ləghə zey tə â khənə ghi ghə bày bày a ghə ghə.

²⁹I loʼ sey n təŋkey, Zə̀ kə kəm kweyyə way fə̀ŋ ə wi abə tə sày kɔʼ dzənə wù, tə kəm ney nuulə soʼo way naamə key tə fuu dzənə tə wù tii.

³⁰Nghee tə ghaa ghən ghaa way ghə̂ a Təjuu ghə â taw tsə n tow kə tə Zə̀ kə, Zə̀ kə n nya kee kwɔɔlənə sî zə n kow ghaa ntəŋkey ghə̂ a Təjuu ghə a taw n tow kə tə wi.

³¹N jii i mɔʼɔ zə, nghee tə Zə̀ kə â kwɔɔlənə sî zə n kow ghaa, Tə i kwɔɔlə soʼonu sî zə n kow ghə̂ a Təjuu ghən ghə tawnə n tow kə nya.

³²I loʼ sey n təŋkey, Zə̀ kə n ghəŋə nə̀ aghə̂ adzəm a doʼo bə tə a loʼ ghə̂ a ndaw tsaʼ tə tow kə taw kə, sey nə̀ tə loʼ ni dii sî i wi i kwɔɔlə zə tə ghə adzəm.

³³Zə̀ kə ndəmə kûmnu! Tə khə utɔb naʼ idzəm, khə soʼo aghəə adzəm! À lo ndee tə loʼnə ni tiilə dza jìi zey Zə̀ kə sàynə ni ghəŋŋə ghəə ghə tii? À loʼ ndee tə loʼnə ni zowkeeli jìi zey Zə̀ kə ghəŋŋənə ghəə a wi ghə tii?

³⁴I bɔɔmə loʼ tə i tɔ̀ɔ doʼonə n màʼlə K-a-zə̀ nə̀ “Wù loʼ way dzə tə khənə ghəə zey Zə̀ kə moʼlənə n fə̀ŋ ə wi Wù loʼ way dzə tə loʼnə ni tsə̀ Kəzə̀.

³⁵Wù loʼ way dzə tə â fùu fuu koʼ tsənə Zə̀ kə n fə kə Nə̀ tə i tsə dzəŋŋə bə.”

³⁶I loʼ sey n təŋkey, à loʼ Kəzə̀ kə fwaʼnə fə wə udzəm. À naŋŋə wi fə wə udzəm, à loʼ wi tə khənə fə wə udzəm. Saa khə ni fuu kɔʼləmə tə Zə̀ kə nəŋə tədzəm. Zə i loʼ sey.