Read Weh Roma 13 Bible Online

Roma 13 - Weh bible

Roma 13

¹Aghə̂ adzəm khə ni zow tə ghə̂ ghey ghə loʼnə tow wə inaʼ n təŋkey, ghə way fu n daʼa kə ghə. À loʼ Kəzə̀ tə tsuʼ naŋa ghə nə ghə i saʼa ghə̂ ghə.

²Sey, wù wey tə tuunə ni zow laŋ u ghə̂ ghey ghə loʼnə tow u ghə wə, tə sey tuu maʼa Zə̀ key kə tsuʼ naŋanə ghə. Wù wey tə ghəŋŋənə sey, Zə̀ kə i chɔdlɔnu wù tii.

³I loʼ sey n təŋkey, ghə̂ ghey ghə ghəŋŋənə ghəə ghey a kpiilənə, khə way ni tsəŋə ghə̂ ghən ghə loʼnə tow u ghə wə, à fədlə tsəŋə ghə̂ ghən ghə ghəŋŋənə ghəə ghey a kpiilə way. Abə wə ləghə way ni tsəŋə ghə̂ ghey ghə loʼnə tow wə, wə sey khə ni ghəŋŋə ndow ghəə ghey a kpiilənə, ghə i tɔʼ kali wɔ.

⁴N dza sey n təŋkey ghə̂ ghey ghə loʼnə tow wə, loʼ ghə̂ a kəfwaʼ Zə̀ kə naŋa kɔʼ ni ghəŋə nə̀ ghaa i muu muu i dzuŋu zə. Abə wə kee ghəŋŋənə ghəə ghey a kpiilə way, ghaa khənu ni tsəŋə ghə n təŋkey ghə khənu daʼa kə ni chɔdlɔ ghə̂ ghə. Ghə loʼ ghə̂ a kəfwaʼ a Kəzə̀, Zə̀ kə naŋanə nə̀ ghə i chɔdlɔ ghə̂ ghey ghə ghəŋŋənə ghəə ghey a kpiilə way.

⁵Zuŋ key ghaa khə ni zow tə ghə̂ ghən ghə saʼanə ghaa kad way kə a dza ghaa tsəŋə nə̀ kə Zə̀ kə nə chɔdlɔnə ghaa, à kee loʼ soʼo nə̀ ghaa khənu n fə̀ŋ tə ghaa nə̀ ghaa khə ni ghəŋə sey.

⁶À wey loʼ soʼo ghə i tii zə ghaa khə ni tsow màʼlə kə n təŋkey ghə̂ ghey ghə loʼnə tow wə inaʼ, loʼ ghə̂ a kəfwaʼ a Kəzə̀, nəŋə i ghə idzəm i loʼ kə ni laalə tə̀ ghə̂ ghə.

⁷Sey, tsə nuu ndow ghə̂ ghey wə khə ghə n ndaŋ kə, nə à loʼ kə màʼlə kə tsow kə, tsow nuu ndow, nə̀ à loʼ kəmàʼlə wə khə ni tsow n bikiwən kən wə ghəŋŋənə, wə n tsow nuu i ndow. Wə khə ni buʼu wɔɔ ghə, fuu ndow ingɔɔmə tə ghə̂ ghey ghə loʼnə tow wə.

⁸Kə ghaa nə keeli wù loʼ n ndaŋ kə. Ghə i loʼ kə imɔʼ ghaa khənə ni ghəŋə, ghə i tii i loʼ nə̀ ghaa khə ni ləghə tiilə wû i ghaa zə. I loʼ sey n təŋkey wù wey tə ləghənə ghə̂ ghə, sey luulə dzə kəlaŋ.

⁹Laŋ u Kəzə̀ u dza nə̀, “Kə wə nə taa zaʼanə wey wə nkee num wə, kə wə nə weynə wù, kə wə nə tsɔŋɔnə, kə wə nə shiənə n sə zə n fə kə wù.” Abə wə təmdzəŋi kɔʼnə laŋ wən udzəm nsə laŋ u loʼ wən u loʼnə, laŋ u tii wə udzəm u dzəŋi fuu kə kəlaŋ kəmɔʼ kə dzanə nə̀, “Wə khə ni ləghə wù wey tə kuʼlə loʼnə n səə wɔ tə̀ wə ləghənə wû wə wə̀.”

¹⁰Abə wə ləghə dzənə wù wey tə kuʼlə loʼnə n səə wɔ, u way dzə ni kəm ghəŋə wù tii n bəb zə. I sey dii nə̀, wù wey tə diinə ləghə zə, sey naŋa may dzə ulaŋ udzəm.

¹¹Ghaa khə ni dii ndow ləghə zə n təŋkey, ghaa khənu nə̀ nəŋə zə n shɔd tə ghaa ni zhəm nuu bə nə təmbweeli. N dza sey n təŋkey, nəŋə zey Zə̀ kə i bəghəshiənə saa tii, zə n kuʼlə nya tsəghəshi n nəŋə zey saa bùʼ bəghəmnə tii tə̀ Yeso Klisto.

¹²À nya loʼ kə tə a loʼ ləm ləm kə utsuʼ, fəkəmə kə sa, tsuʼ wə i zow may nyi bə. Sey, saa buu naŋa ndow ni ghəŋŋə ghəə a bəbə ghey ghə̂ a ghəŋŋənə nə kələm, saa i ghəŋŋə ndow kə ghəə ghey ghə̂ a ghəŋŋənə n tsə tə. Saa bayyə kɔʼ iwû tə a loʼ wù wey tə loʼ nə̀ tə n dzəŋə keeli fə u tsam wə.

¹³Sa khə ni ghəŋŋə ndow ghəə ghey a kpiilənə tə a loʼ ghə̂ ghey ghə muunə n mgbaŋ. Saa khə way ni mə̂ə khəə kaabə tsə lə mə. Saa khə way ni ghəŋŋə ghəə a laŋŋə ghə, nkee ghəə a dzəə ghə. Saa khə way ni zuulə ballə n wû i saa nkee ni ghoʼo wû i saa zə.

¹⁴Ghaa khə ni fəd ney Mûkəbii Yeso Klisto tə a loʼ ndzə̂ tə tsam tə ghaa. Kə ghaa nə zəghə maʼa soʼonə wû i ghaa zə nə̀ zə i ghəŋŋə ghəə ghey gow uwû ghaa ləghənə.