Read Weh Roma 2 Bible Online

Roma 2 - Weh bible

Roma 2

¹Wɔ wey wə tɔʼɔ sɔʼɔnə wɔ kə tə̀ ghə̂ aloʼ ghə nə ghə ghəŋə ghəə a bəbəghə, keelitsu nə̀ jii i loʼ i tsəm way dzə wə loʼ ni dza nə̀ wɔɔ ghə a zownu, abə wə tsəm loʼ kə ndee, n təŋkey, abə wə saʼanə ghə̂ ghə a dza ghə ghəŋŋə ghəə a bəbə ghə, nə̀ wə ghəŋŋə soʼo ghəə a tii, wə sey saʼa soʼo wû wə.

²Saa khənu nə̀ jìi zey Zə̀ kə saʼanə ghə̂ ghey ghə ghəŋŋənə ndzoʼo ghəə a bəbə ghən kpiinu.

³Wɔ wən wə saʼanə ghə̂ a loʼ ghə, loʼ sey nə̀ wə ghəŋŋə soʼo ndzoʼo ghəə a tii ghə, wə kee moʼlə nə̀ wə i nɔbə shiə ngee, abə Zə̀ kə i saʼanə ghə̂ ghə ə?

⁴Nghee Zə̀ kə ngii khənə fə̀ŋ i dzuŋu zə n kow ghaa, kwɔɔlə i sî n kow ghaa, kòw fəŋ ghi ghaa, ghaa moʼlə nə̀ à maŋ loʼ nə kənunu ə? Ghaa khə way nə̀ fə̀ŋ i dzuŋu zən Zə̀ kə diinə tə ghaa, a loʼ ni fuu ghaa n buʼ kə nə̀ ghaa kwey nuu bə n ghəə a ghaa a bəbə ghə ə?

⁵Nghee ghaa kee taŋŋanə n fə̀ŋ ni kwey nuu bə n ghəə a ghaa a bəbə ghə, ghaa sey zuŋŋə kɔʼɔ ndow ngoʼ zən Zə̀ kə i fuunə tə ghaa, n təŋkey tsuʼ fə beghənu Zə̀ kə i chiə diinə nəghə u wi u fəə wə, tə saʼ aghə̂ adzəm tsətsəghə tə̀ i kpiilənə.

⁶I loʼ sey n təŋkey, Zə̀ kə i bɔɔmə tsəə kə kay wù n fwaʼ key tə fwaʼnə.

⁷Zə̀ kə i fuu muu zə itsali tə̀ ghə̂ ghən ghə buu doʼlə way ni ghəŋŋə ndzuŋ, ləmmə kə tə̀ wi nə̀ tə kɔʼlə naŋŋa kɔʼ ghə.

⁸A kee bə ghə̂ ghey ghə â muunə nə̀ ghə laalə tsuu kə wû i ghə zə, tuu maʼa isəŋə, fədlə dzûmə ndow ghəə a bəbə ghə, Zə̀ kə i chɔdlə ghə, ghə i koʼ nəghə u fəə u wi.

⁹Zə̀ kə i fuu ngoʼ, tə chɔd soʼo ghə̂ ghey adzəm ghə ghəŋŋənə ghəə a bəbə ghə. Tə i zey tsu dzə ghi ghə̂ a Təjuu ghə, tə sə ndow n kow ghə̂ ghən ghə way ghə̂ a Təjuu ghə.

¹⁰Abə ghə̂ ghən adzəm ghə ghəŋŋənə ghəə a dzuŋu ghə, Zə̀ kə i kɔʼlə ghə n fwaʼ kə ghə, tə naamə ghə, tə ghəŋə soʼo nə̀ fə̀ŋ tə ghə tə i loʼ nə ibuulə. Tə i zey tsu n kow ghə̂ a Təjuu ghə isə, tə sə ndow n kow ghə̂ ghən ghə way ghə̂ a Təjuu ghə.

¹¹I loʼ sey, tənkey, Zə̀ kə saʼa way ghə̂ ghə nə̀ tə laalə ndow tûm usə u wù.

¹²Ghə̂ ghən ghə ghəŋŋə ghəə a bəbə ghə lo sey nə̀ ghə khə way laŋ kə Mushi kə, Zə̀ kə i chɔdlɔ ghə n bəb zey ghə gheŋŋənə, nghee ghə tsəm bùʼ khə kə way Laŋ kə Mushi kən. A kee bə ghə̂ ghən ghə ghəŋŋənə ghəə a bəbə ghə nə̀ ghə khənu laŋ kə Mushi kə, Zə̀ kə i saʼa ghə nə̀ tə dzûmə kəlaŋ.

¹³I loʼ sey n təŋkey, a way dzə wù wey tə khənə ghəə ghey laŋ kə dzanə, tə doʼlənə tsətsəghə n sə K-a-zə̀, à loʼ wù wey tə ghəŋŋə ghəə ghə tə laŋ kə diinə, tə doʼlənə tsətsəghə n sə K-a-zə̀.

¹⁴Isəŋə loʼ nə̀, ghə̂ ghən ghə way ghə̂ a Təjuu ghə, ghə khə way laŋ kə Mushi kə. Abə ghə kee ghəŋə ndownə ghəə ghey a shi kpiilənə ghi laŋ kə, i sey diinə ghə khənu laŋ kə n fə̀ŋ tə ghə abə ghə tsəm khə kə way ghəə zey laŋ kə diinə.

¹⁵Ghəə ghey ghə ghəŋŋənə dii bənu nə̀ ghəə ghey laŋ kə diinə, loʼnu n fə̀ŋ tə ghə. Fə̀ŋ tə ghə tə dii soʼonu nə̀ ghə khənu laŋ K-a-zə̀ kə n təŋkey, fə̀ŋ tə ghə tə diinu n nəŋə zey ghə ghəŋə dzɔb tsunə, tə n dii soʼo n nəŋə zey ghə ghəŋə bəəbə tsunə.

¹⁶Tûm i dzuŋu zən n naʼlənə, bɔɔmə dii bə nghee zə i doʼlənə tii abə Zə̀ kə i saʼanə ghəə ghən a nyi doʼonə n fə̀ŋ tə aghə̂ tə n bam i Yeso Klisto.

¹⁷Abə ghaa, ghaa dza nə̀ ghaa loʼ ghə̂ Təjuu, ghaa dza nə̀ ghaa ghəŋŋə ghəə ghey laŋ kə dii, ghaŋŋə soʼo iwû nə̀ ghaa loʼ ghə̂ a Kəzə̀.

¹⁸Ghaa khənu ghəə zey Zə̀ kə ləghənə nə̀ ghaa ghəŋə, ghaa u khə soʼo ghəə zey i kpiilənə ni ghəŋə n təŋkey ghə n dii ghaa n laŋ kə Mushi kə.

¹⁹Ghaa khə nə̀ ghaa loʼ ghə̂ ghey ghə talinə ghə̂ a fəbə ghə, loʼ kədaa tə ghə̂ ghən ghə loʼnə nə kələm.

²⁰Ghaa dii ghə̂ ghey ghə khə way ghəə a Kəzə̀ ghə, dii soʼo ghə̂ ghey ghə ka kam beyyə n ghəə a Kəzə̀. Ghaa moʼlə nə̀ nghee ghə khə dzənə laŋ kə Mushi kə, ghaa khə may aghəə adzəm, ghaa way ni ghəŋə soʼo ghə i loʼ zə nə̀ à way isəŋə.

²¹Ghaa ghən ghaa diinə ghəə ghə tə ghə̂ ghə, à kee loʼ kee ghaa dii way wû i ghaa zə ə? Ghaa dza nə̀, “Kə wù nə tsɔŋɔ.” Wû i ghaa, ghaa tsɔŋɔ way ə?

²²Ghaa dza nə̀, “Kə wù nə taa zaʼanə wey wi nkee num wi.” Wû i ghaa, ghaa taa zaʼanu ghey a ghaa ghə nkee num a ghaa ghə ə? Ghaa tuu nə̀ kə ghə̂ a nə ngɔɔmənə muʼu mə, wû i ghaa, ghaa tsiilə neynu fə kə n ndaw tə mmuʼu ə?

²³Ghaa ghaŋŋə iwû nə̀ ghaa khə laŋ K-a-zə̀, ghaa a naŋŋə way laŋ kə tii kə. À sey way tow kə dədlə kə ghaa ney bənə tə Zə̀ kə ə?

²⁴I tɔ̀ɔ doʼo n màʼlə K-a-zə̀ nə̀, “Ghə̂ ghey ghə way ghə̂ a Təjuu a tsayyə zəd i Kəzə̀ bòʼ ghəə a bəbə ghey ghaa ghə̂ a Təjuu a ghəŋŋənə.”

²⁵Ni ndzəm səghə kətyi, loʼ abə wə bweynə nghee tə̀ laŋ kə Mushi kə diinə. Abə wù tii kee bwey way nghee tə laŋ kə diinə, tyi kə səghə key maŋ loʼ kənunu.

²⁶Abə wù wey tə way wù Juu bweynə nghee tə Laŋ K-a-zə̀ kə diinə nə̀ ghə ka bùʼ səghə tyi kə wi kə, Zə̀ kə i ney wi ighələ ghi wù juu wən ghə səghə dzənə tyi kə wi kə.

²⁷I sey diinə, wù wən tə way wù juu, tə naŋŋənə laŋ u Kəzə̀ wə loʼnu ni saʼ ghaa n təŋkey, ghaa naŋŋə way laŋ u Kəzə̀ wə, loʼ sey nə̀, à mgbaŋ khə ghaa ghəə ghey a tɔ̀ɔ doʼonə nə kəlaŋ, ghaa a loʼ soʼo nə̀ ghə n tyi u ghaa u səghə.

²⁸I loʼ nə̀, wù tɔʼ way kə wù Juu abə tə loʼ nə̀ ghə n tyi kə wi kə səghə tə laŋ kə diinə n təŋkey, ni ndzəm səghə kətyi maŋ way kə ni səghə maʼa kɔʼ gow uwû.

²⁹Wù wey tə ndzəm loʼnə wù Juu loʼ tə wey tə loʼ nə̀ ghə n səghə tyi kə wi kə n fə̀ŋ ə wi. À loʼ Zay kə Zow kə, kə fwaʼnə ghəə a tii ghə, a way dzə ghəə zey i tɔ̀ɔ doʼonə nə kəlaŋ. À loʼ Kəzə̀ kə kalinə ndzoʼo wù wən à way dzə wù sɔŋtsuʼ.