Read Weh Roma 3 Bible Online

Roma 3 - Weh bible

Roma 3

¹Wu loʼ loʼ ni bəb nə̀, “À loʼ ghə i dzuŋu i ghaa zə wù keelinə abə tə loʼnə wù Juu tsəghəshi wù wey tə way wù Juu ə? Nkee à loʼ naamə kə ghaa kə wù keelinə abə ghə səghə tsunə tyi kə wi kə ə?”

²Ndəmə ndəmə tə aghəə tə tsəm loʼnu wù keelinə abə tə loʼnə wù Juu. Ghə i səŋi zə n ghəə a tii ghə loʼ nə̀, Zə̀ kə â fuu naŋa ghɔɔmə i wi tə ghə̂ a Təjuu ghə.

³Ney kɔʼ na nə̀ ghə̂ a Təjuu a loʼ ghə a tɔʼɔ naŋŋə way ghɔɔmə i ghə zə, i sey diinu nə̀ Zə̀ kə i ghəŋə way ghəə zey tə â bəghəm naŋa nə̀ tə i ghəŋŋənu ə?

⁴Ngaŋ! Abə aghə̂ adzəm fa n mbi tsəm loʼ kə ghə̂ a badla ghə aghəə ghə, Zə̀ kə kee dza tsə kə isəŋə nəŋə tədzəm. I loʼ tə i tɔ̀ɔ doʼo n màʼlə K-a-zə̀ nə̀, “Zə̀ kə, aghə̂ adzəm a khə ni keeli nə̀ wə naŋŋənu ghɔɔmə zə zə̀, Nə̀ ghə kwu kə wɔ n ghə i ghaa zə, wə i saʼa zəənu.”

⁵Ghə̂ a loʼ a loʼnu ni kee dza nə̀, “Ghəə a bəbə ghən ghey ghəŋŋənə, a dzɔbənu n təŋkey, a ghəŋŋə nə̀ ghə̂ ghə i loʼ ni tɔʼ koʼ bə nə̀ Zə̀ kə loʼ tsətsəghə. Abə i loʼnə sey, saa loʼnu ni dza nə̀ Zə̀ kə ka ghəŋə dzɔb abə tə chɔdnə saa bòʼ ghə i tii zə ə?”

⁶Ngaŋ! Abə à mə way nə̀ Zə̀ kə ndzəm loʼ tsətsəghə, tə̀ tə mə saʼa ngee mbi ə?

⁷Wù loʼ loʼnu ni nam dza soʼo nə̀, “Abə i loʼnə nə̀ ghəə a bəbə ghən n ghəŋənə, a ghəŋŋə nə̀ ghə̂ ghə i ndəŋə fuu kali wə tə Zə̀ kə tə naŋŋənə ghɔɔmə i wi zə nəŋə tədzəm. A sə loʼ kee Zə̀ kə nam saʼa kə mə tə a loʼ wù bəbə?”

⁸Sey, i kpiinu tə̀ Zə̀ kə ni chɔd ghə̂ ghən ghə kpaalənə ghey, dza nə̀ ghey dza tə̀ ghəghə nə̀, “Bə na saa i ghəŋŋə ndow kə ghəə a bəbə ghə tə aloʼ jii zey saa kɔʼlənə Zə̀ kə a tii.”

⁹Saa loʼ ni dza tsu nə ngee nya a? Saa moʼlə nə̀ saa ghə̂ a Təjuu, saa loʼnu tsətsəghə n sə K-a-zə̀ tsəghəshi ghə̂ ghey ghə way ghə̂ a Təjuu ə? Ngaŋ! Mə n khə dii nə̀ saa ghə̂ a Təjuu nsə ghə̂ ghey ghə way ghə̂ a Təjuu ghə, saa dzəŋi khə təmoʼlə ni ghəŋŋə ghəə a bəbə ghə nəŋə tədzəm.

¹⁰I tɔ̀ɔ doʼo n màʼlə K-a-zə̀ nə̀, “Wù umɔʼ way dzə tə loʼnə tsətsəghə n sə K-a-zə̀, Umɔʼ ngəmsə way dzə.

¹¹Wù umɔʼ way dzə tə zowkeelinə ghəə zey Zə̀ kə ləghənə nə tə ghəŋə, Nkee tə ndzəmə ləghənə ni keeli Kəzə̀.

¹²Aghə̂ adzəm n tuu maʼa Zə̀ kə. Ghə adzəm n doʼo bə fə u kənunu n sə K-a-zə̀. Wù umɔʼ tsəm way n fəŋŋə kə ghə tə ghəŋŋənə ghə i dzuŋu zə, Umɔʼ ngəmsə way dzə.

¹³Ghɔɔmə zey i shiə bə n dzuu a ghə, loʼ ni wey wù. Nyim kə ghə kə tɔbə ni tsìi aghə̂. Ghɔɔmə zey i shiə bə n dzuu a ghə, tsowwə tə a loʼ sɔŋ a zuu.

¹⁴Dzuu a ghə a loʼ kə ni tsɔɔmə ghə̂ ghə nsə ni ghɔɔmə ghəə a bəbə ghə.

¹⁵Ghə zaŋŋə n wû zə ni weyyə ghə̂ ghə.

¹⁶Ghə ndow kə ghee ghə n bəəbə maʼa təluʼu, ghə̂ ghə n fəʼlə.

¹⁷Ghə khə way ni ghəŋə nə̀ buulə zə i loʼ n fəŋŋə kə aghə̂

¹⁸Ghə tsəmə tsəŋə way Zə̀ kə n ghə i loʼ zə.”

¹⁹Saa n keeli nya nə̀ abə laŋ kə dza kə nə̀ ngee, kə dza ndow tə̀ ghə̂ ghey ghə loʼnə n tənə kəlaŋ. I loʼ sey ni fìi naŋa dzuu a ghə̂ adzəm fa n mbi nə̀ kə ghə nə taa daŋanə nsə ni ghəŋə tsu nə̀ ghə keeli tsu nə̀ ghə n bwu səə n sə K-a-zə̀. Sey Zə̀ kə khənu zuŋ kə ni saʼ ghə.

²⁰I loʼ nə̀, wù umɔʼ way dzə tə doʼlənə tsətsəghə n sə K-a-zə̀ a dza tə naŋŋə kəlaŋ, n təŋkey laŋ kə fədlə ghəŋŋə nə̀ wù keeli nə̀ tə n bəb i ghəŋə.

²¹Zə̀ kə n kee dii bə jìi zey i ghəŋŋənə nə̀ ghə̂ a doʼo tsətsəghə n sə kə wi. Jìi zən dii bə nə̀ wù doʼlə way tsətsəghə n sə K-a-zə̀ a dza tə naŋŋə kəlaŋ, nghee i buʼ loʼ kə nə̀ laŋ kə Mushi nsə tûm tə Kəzə̀ tə mâ tiilə dza ghəə ghə bòʼ jii tii.

²²Zə̀ kə ney naŋŋə ghə̂ ghey adzəm ghə bəghəmnə tə̀ Yeso Klisto nə̀ ghə loʼ tsətsəghə. Tə ghəŋŋə sey tə ghə̂ ghey adzəm ghə bəghəmnə tə Klisto, tə ney way n taŋ nə̀ wə loʼ wù Juu nkee wə way wù Juu.

²³I loʼ nə̀, aghə̂ adzəm n ghəŋŋə bəəbə n sə K-a-zə̀, sey, ghə ka kəm kɔʼ kpii dzə ni ghəŋə ghəə zey Zə̀ kə loʼ ni kali ghə tii.

²⁴À kee loʼ nə̀ bòʼ ndzuŋ zən Zə̀ kə khənə n kow ghə̂ ghə adzəm, tə n ghəŋə nə̀ ghə i loʼ tsətsəghə n sə kə wi n bam i Yeso Klisto wən tə kùmshi bə nə saa n ghəə a saa a bəbə ghə.

²⁵Zə̀ kə â fuu bə Klisto tə aloʼ umaʼlə ni kàa maʼa ghəə a saa a bəbə ghə, seynə abə saa gaʼnə fə̀ŋ kow Yeso Klisto wən â kpuunə n zad kə fəkaʼ, Zə̀ kə i neyzəə saa n ghəə saa a bəbə ghə boʼ və i Yeso n tow u ghey. Zə̀ kə â ghəŋə sey ni dii bə nə̀ tə loʼ tsətsəghə n ghəə a wi. N num tə ibam tə, Zə̀ kə â koʼonu ghəə a bəbə ghən ghə̂ ghə â ghəŋŋənə, tə n kee kow kə fə̀ŋ. Sey, tə n ka chɔd aghə̂ n ghəə a bəbə ghey ghə â ghəŋŋənə n nəŋə i tii zə.

²⁶Zə̀ kə ma kə̂ bayyə naŋa nəŋə zey tə i tum bənə Yeso ti, sey tən kow kə fə̀ŋ. Zə̀ kə â ghəŋə sey ni dii bə ghə̂ ghə adzəm nə̀ tə loʼ tsətsəghə. Nghee tə loʼ tsətsəghə, a loʼ wi tə ghəŋŋə soʼo nə̀ ghə̂ ghey ghə bəghəmnə tə Yeso i loʼ tsətsəghə.

²⁷I sey diinə saa way dzə ni ghaŋŋə iwû nə̀ saa n ghəŋə ghə i loʼ zə tə̀ Zə̀ kə ni ney saa nə̀ saa loʼ tsətsəghə. Saa way ni ghaŋŋə iwû n təŋkey, Zə̀ kə ka bəghəshi dzə saa a dza saa naŋŋə kəlaŋ, a fəd loʼ bòʼ bəghəm i fə̀ŋ zən saa khənə n kow Yeso.

²⁸Saa n tɔʼ koʼ nə̀, à may kə n bəghəm i fə̀ŋ zən wù khənə n kow Yeso, i ghəŋŋənə nə̀ tə doʼo tsətsəghə n sə K-a-zə̀, à way dzə nə̀ tə tɔʼɔ bwey tə laŋ kə diinə.

²⁹Ghaa moʼo nə̀ Zə̀ kə kad loʼ kə Zə̀ kə ghə̂ a Təjuu, kee way Zə̀ kə ghə̂ ghey ghə way ghə̂ a Təjuu ghə ə? Ngaŋ! Zə̀ kə kad way kə tə̀ ghə̂ a Təjuu ghə, kə loʼ soʼo Zə̀ kə ghə̂ ghey ghə way ghə̂ a Təjuu ghə.

³⁰Zə̀ kə loʼ kə kəmɔʼ, à loʼ wi tə ghəŋŋənə nə̀ ghə̂ ghən ghə loʼnə ghə̂ a Təjuu ghə, ghə doʼo tsətsəghə n sə kə wi n bam i bəghəm i fə̀ŋ zey ghə khənə n kow Yeso, ghəŋŋə soʼo nə̀ ghə̂ ghən ghə way ghə̂ a Təjuu a doʼo tsətsəghə n sə kə wi n bam i bəghəm i fə̀ŋ i mɔʼɔ zə.

³¹Nghee tə saa khə dzənə bəghəm i fə̀ŋ zə, i sey dii nə̀ laŋ kə kəm way n taŋ ə? Ngaŋ! Saa fədlə ghəŋŋə nə̀ laŋ kə khə daʼa kə wi kə tə̀ Zə̀ kə â naŋanə.