Read Weh Roma 5 Bible Online

Roma 5 - Weh bible

Roma 5

¹Nghee tə̀ Zə̀ kə neynə saa nə̀ saa loʼ tsətsəghə n sə kə wi n təŋkey saa bəghəm tə wi, saa kəm khə way chɔdwə ghi wi n bam i Mûkəbii saa Yeso Klisto.

²À loʼ bəghəm i fə̀ŋ zən saa khənə n kow Yeso Klisto, i ghəŋənə nə̀ saa keeli ndzuŋ ə Kəzə̀ zən saa muunə tii nya. Saa khə ni duʼlə n təŋkey saa ləmmə tənə nəŋə zey saa i loʼnə ghi Zə̀ kə, tə i ghəŋə nə̀ saa keeli soʼo kɔʼlə mən tə khənə.

³Saa khə ni duʼlə soʼo abə saa keelinə chɔdmə, n təŋkey, saa khənu nə̀ abə saa keelinə chɔdmə, mə n gaamə saa nə̀ saa i loʼ ni kow fə̀ŋ.

⁴Abə saa kownə fə̀ŋ nə ighəə, saa keeli mwam wey Zə̀ kə ləghənə. Ambə saa keeli kɔʼnə mwam u tii wə, wə n ghəŋə nə̀ saa i ləmmə tənə nəŋə zey saa i doʼlə dzəŋinə ghi Zə̀ kə.

⁵Ləmə zən saa ləmmənə, way dzə ni doʼo kənunu n təŋkey, Zə̀ kə n kuu naŋa ləghə i wi zə n fə̀ŋ tə saa naʼidzəm n wû u Zay kə Zow key tə fuunə tə saa.

⁶Zə̀ kə â bɔɔmə tûm bə Klisto n nəŋə zey saa â ngəmsə khə way jii i loʼ zə ni bəghəshi wû i saa, nə̀ tə bə kpu n tow u ghə̂ a bəbə ghə.

⁷I ngii tawnu tə wù ni bəghəm ni kpu n tow kə wù wey tə khənə zày ni ghəŋə ghəə zey i kpiinə. Wù loʼ kənu ni mgbay bəghəm ni kpu n tow kə wù dzuŋu.

⁸Zə̀ kə n kee dii bə nə̀ tə ngii ləghə saa nghee tə̀ tə â tûm bənə Klisto nə̀ tə bə kpu n tow u saa nə̀ saa nam loʼ tsə ghə̂ a bəbə ghə.

⁹Abə kaŋ tə Klisto tə loʼ ni ghəŋə nə̀ saa doʼo tsətsəghə n sə K-a-zə̀, i sey dii nə̀ tə i teeli bəghəshiə soʼonu saa nə̀ kə Zə̀ kə nə chɔdlɔnə saa.

¹⁰N sey dza n təŋkey, abə və i waa wi zə â loʼ ni ghəŋə nə̀ saa ghə̂ a təngəmə a Kəzə̀ a doʼo bə nə kəfə kəmɔʼ ghi Zə̀ kə. Nya wən saa loʼnə nə kəfə kəmɔʼ ghi Zə̀ kə, i sey dii nə̀ Klisto i bəghəshiənu saa n təŋkey tə loʼ utaw.

¹¹A kad way kə sey, Zə̀ kə ghəŋə nə̀ saa i duʼlə n bam i Mûkəbii saa Yeso Klisto, tə ghəŋənə nə̀ saa i loʼ nə kəfə kəmɔʼ ghi Zə̀ kə.

¹²Bəb zə â bə fa n mbi nə̀ a ney bə wù umɔʼ. Bəb i tii zə n ney bə ivə. Sey, və zə n daŋ ndow aghə̂ adzəm n mbi n təŋkey, aghə̂ adzəm fa n mbi n ghəŋə bəb zə.

¹³Isəŋə loʼ nə̀, bəb zə â loʼnu fa n mbi tə Zə̀ kə ni fuu bə kəlaŋ. A kee loʼ nə̀, Zə̀ kə â kam ney dzə way nə̀ ghə̂ ghə n ghəŋə bəəbə n ghəə a bəbə ghey ghə â ghəŋənə nə̀ laŋ kə ka kam doʼo.

¹⁴À loʼnu isəŋə nə̀ və zə â khə tsənu daʼa kə n kow ghə̂ ghə adzəm fa n mbi ni ney nuu bə n num tə Adam, bə kuum bə n num tə Mushi. Ghə̂ ghə kpuu boʼ ghəə a ghə a bəbə ghə â way dzə nə̀ kpuu ghə bwu laŋ kə loʼ kə tə Adam â bwunə laŋ kə. I loʼ nə̀, Adam â loʼ tə a loʼ tsəə n ndzoʼo wù wey Zə̀ kə â dza naŋa nə̀ i tûm bənu.

¹⁵À kee loʼ nə̀ naamə key Zə̀ kə fuunə, way dzə tə aloʼ bəb i Adam. N dza sey n təŋkey, ndəmə aghə̂ a kpuulə bòʼ bəb i wù umɔʼ. À kee loʼ nə̀ à dow tsəghəshi ndzuŋ zən Zə̀ kə diinə nsə naamə kən tə fuunə tə̀ ghə̂ ghə n ndəm nə kənunu. Tə fuu naamə kən n bam i wù umɔʼ tɔŋɔ Yeso Klisto, tə â kpuunə n tow u ghə.

¹⁶Ghəə ghey naamə K-a-zə̀ kən ghəŋŋənə way dzə ighəllə tə aloʼ ghəə ghey bəb zey Adam â ghəŋənə i fuunə n təŋkey, nghee wù umɔʼ â ghəŋə tsunə bəb zə, Zə̀ kə n saʼ wi koʼtsu nə̀ tə n bwu saʼ. À kee loʼ nə̀ Zə̀ kə n dii ndzuŋ ə wi tə ndəmə ghə̂ ghey ghə â ghəŋənə bəb zə, ney naŋa bə ghə nə̀ ghə loʼ tsətsəghə bòʼ wù umɔʼ tɔŋɔ Klisto.

¹⁷À loʼ kənu isəŋə nə̀ və zə â keeli kədaʼa n kow ghə̂ ghə fa n mbi nə̀ à ney bə bəb zey wù umɔʼ â ghəŋə tsunə. A kee loʼ nə̀, ndzuŋ zən nsə naamə kən kə bəghənə n bam i wù umɔʼ tɔŋɔ Yeso Klisto kə tsəghəshi bəb zey, ghəŋŋənə nə̀ saa doʼo tsətsəghə n muu i saa ghi Zə̀ kə.

¹⁸Nghee tə i loʼ nə̀ à loʼ ghə i bəbə zən imɔʼ i ghəŋənə nə̀ Zə̀ kə dza nə̀ aghə̂ adzəm n bwu saʼ, a loʼ soʼo ighələ ghə i dzuŋu zən imɔʼ Klisto â ghəŋənə i ghəŋənə nə̀ aghə̂ adzəm a doʼo tsətsəghə n sə K-a-zə̀, ghə keeli soʼo muu zən i nə may way.

¹⁹Nghee i loʼ nə̀ wù umɔʼ a tuu ni zow tə Zə̀ kə, ndəmə aghə̂ n doʼo bə ghə̂ a bəbə ghə. N jii i mɔʼɔ zə, wù umɔʼ tə â zownə tə̀ Zə̀ kə, i ghəŋŋənə nə̀ ndəmə aghə̂ doʼo bə tsətsəghə n sə K-a-zə̀.

²⁰Zə̀ kə fuu bə laŋ kə wi nə̀ ghə̂ adzəm i loʼ ni koʼo ndow ghəə a bəbə ghən ghə ghəŋŋənə. A n kee bə ghə̂ a ghəŋŋə nduŋŋə ndow kə ghəə bəbə ghə, Zə̀ kə n baa kəm dii bə ndzuŋ ə wi tə̀ ghə̂ ghə naʼ idzəm nə̀ maŋ kwɔɔlə tsu isî.

²¹Nghee tə bəb zə â khənə daʼa kə n kow ghə̂ ghə, ney bə ivə, à loʼ soʼo ighələ ndzuŋ ə Kəzə̀ khənə daʼa kə ni ghəŋə nə̀ ghə̂ ghə i loʼ tsətsəghə n sə kə wi ni keeli muu zən i nə may way n bam i Mûkəbii saa Yeso Klisto.