Read Weh Roma 7 Bible Online

Roma 7 - Weh bible

Roma 7

¹Waazə ghuŋ ghə, ghaa məghənu ghəə ghey laŋ kə dzanə? Ghaa məghənu nə̀ laŋ kə khə kə kədaʼa n kow wù n nəŋə zey tə nam loʼnə utaw ə?

²Ney kɔʼ na doʼ i weyzən wən tə loʼ nə̀ tə n ney num, laŋ kə dii nə̀, tə khə ni bɔɔmə loʼ kə n tənə num wi tə̀ num wi loʼnə utaw. Nə̀ num kpuunu, laŋ kə dii nə̀ weyzən ə tii nya loʼ n ngəŋ.

³Abə weyzən wən ney ndòwnə num u nuu wə nə̀ num wi nam loʼ utaw, tə n sey taa zaʼ num tə laŋ kə diinə. Abə tə kee ney ndownə wù u nuu wə nə̀ num wi ma kpu, laŋ kə way dzə ni kwu wi n ghə i loʼ zə.

⁴Waazə ghə, a loʼ soʼo ghə i mɔʼɔ zə ghi ghaa. Abə a bənə n ghəə a kəlaŋ, ghaa loʼ tə̀ a loʼ ghə̂ a kpuu ghə tə̀ laŋ kə n təŋkey, ghaa mâ kpu dzəŋi ghi Klisto. Ghaa nya loʼ nə kəfə kəmɔʼ ghi wù wən Zə̀ kə â zhəm nuu dzəŋŋə bənə nə ivə, sey nə̀, saa loʼ ni ghəŋə ghəə ghey a fuunə kɔʼləmə tə̀ Zə̀ kə.

⁵I loʼ sey n təŋkey, nəŋə zey saa â nam muunə n jìi zey vən fə uwû i saa i ləghənə, saa â ngii khə zày ni ghəŋŋə ghəə a bəbə ghə, laŋ kə n baa chimmə may ndow saa ni ghəŋŋə ghəə a bəbə a tii ghə. Ghəə ghey saa ghəŋŋənə adzəm, a ney bə ivə.

⁶A kee bə nya, Zə̀ kə n saa bəghəshi n laŋ wən wə â kow naŋanə saa. Saa nya loʼ tə̀ a loʼ ghə̂ a kpu ghə tə̀ laŋ kə. Saa nya kəm fwaʼa way tə̀ Zə̀ kə nə̀ saa dzûmə ndow ghəə ghey ghə tɔ̀ɔ naŋanə n màʼlə k-a-laŋ, saa nya fəd muu tə̀ Zay kə Zow kə diinə.

⁷Saa loʼ ni baa dza tsu nə̀ ngee nya a? À loʼ nə̀ laŋ kə loʼ fə kə bəbə kə ə? Ngaŋ, à ndɔm way dzə sey. À kee ndzəm loʼ nə̀ abə a mə bow tə laŋ kə, mə way ni keeli fə key bəb i loʼ ghii kə. Abə laŋ kə mə ka dza nə̀, “Kə wə nə shiə n sə ghə n fə kə wù.” Tə n mə khə dzə way nə̀ i dzɔbə way ni shiə n sə ghə n fə kə wù.

⁸À kee loʼ nə̀ bəb i tsəghə n baa kəlaŋ ni chimmə mə nə̀ mə i ghəŋŋə ndəmə ndəmə tə ghəə tə bəbə tə. Dii tsu nə̀ abə laŋ kə mə̂ way, bəb i mə khə way daʼa kə loʼ kə.

⁹Wû wuŋ, mə â buʼ muu tsə soʼo sey, nə̀ n khə way fə key ghə tɔŋŋənə nə̀ a loʼ kəlaŋ. Ambə n keeli kɔʼnə laŋ K-a-zə̀ kə, bəb zə daŋa keeli tsu kədaʼa n kow mə.

¹⁰Laŋ kən kə mə khənə ni ney bə muu zey Zə̀ kə fuunə, fəd loʼ tə̀ i ney bə ivə.

¹¹Bəb i sey taa daŋnu n baa kəlaŋ, nəb fuu tsu mə, wey maʼa tsu soʼo mə.

¹²I sey dii nə̀ laŋ kə bəbə dzə way, ghəə ghey laŋ kə dzanə a nuu bə n wɔ Kəzə̀, kə loʼ tsətsəghə, dzɔbə tə̀ ghə̂ ghə adzəm.

¹³I sey diinə ghəə ghey a dzɔbənə, kəm ney bə ivə n kow mə ə? Ngaŋ! Â loʼ i bəb i ney bənə və zə n kow mə nə̀ i tsəghə n baa kəlaŋ. Laŋ kə loʼ fə kə dzuŋu kə ni ghəŋə nə̀ n keeli fə key bəb i baa loʼ ghii kə. Sey, à loʼ kəlaŋ kə dii fuunə nə̀ bəb i loʼ fə kə faalə kə.

¹⁴Saa khənu nə̀ laŋ kə nuu bə n wɔ Zə̀ kə, mə n kee maŋ loʼ wù tə ghəŋənə ghəə ghey gow uwû ləghənə. N maŋ loʼ nə ghə n fìi fuu mə tə̀ a loʼ kəkɔd tə bəb zə.

¹⁵N baa tɔʼɔ zowkeeli way ghəə ghey n ghəŋŋənə n təŋkey, n ghəŋŋə way ghəə ghey n ləghənə ni ghəŋə. N fədlə ghəŋŋə ndow ghəə ghey n ləghə way ni ghəŋə.

¹⁶Abə n ghəŋŋənə ghəə zey n khənə nə̀ i kpiilə way, i sey dii nə̀ n bəghəmnu nə̀ laŋ kə loʼ fə kə dzuŋu kə.

¹⁷À fa loʼ nə̀ à way dzə mə n wû wuŋ n ghəŋŋənə ghəə a tii ghə. À fəd loʼ ghəə a bəbə ghey a loʼnə n kow mə a tənnə nə mə nə̀ mə i ghəŋə ghəə a tii ghə.

¹⁸N khənu nə̀ ndzuŋ i loʼ i way dzə n kow mə n təŋkey n maŋa ghəŋə aghəə tə̀ vən fə uwû fuŋ ləghənə. N mgbaŋ khənu moʼlə zə ni ghəŋŋə ghəə zey i kpiilənə, mə n kee dəmə kiʼi ni ghəŋə ghə i tii zə.

¹⁹N ghəŋŋə way ghə i dzuŋu zey n moʼlənə ni ghəŋə. N fədlə ghəŋŋə ndow kə ghəə a bəbə ghey n mə ləghə way ni ghəŋə.

²⁰Abə n ghəŋŋənə ghəə zey n ləghə way ni ghəŋŋə, i sey dii nə̀ a way dzə mə n ghəŋŋənə, a loʼ ghəə a bəbə ghey a loʼnə n kow mə a ghəŋŋənə nə̀ mə i ghəŋŋə ghəə a tii ghə.

²¹À ndzɔʼ loʼ tə a loʼ laŋ kə loʼ kə mə, abə n moʼlə tsu kə ni ghəŋə ghəə zey i kpiilənə, à n bəghə kə ghəə a bəbə ghə.

²²I sey diinə, N ləghənu laŋ kən Zə̀ kə fuu bənə n fə̀ŋ zuŋ idzəm.

²³A kee loʼ nə̀ n bə keeli shi kɔʼ nə̀ laŋ kə nuu kə loʼ n kow mə kə zuulə ballənə ghi laŋ kən n gaʼnə fə̀ŋ zuŋ tii. Laŋ kə tii kə ghəŋŋə nə̀ n doʼo kəkɔd tə bəb zən i fwaʼanə n kow mə.

²⁴N baa loʼ ndzoʼo wù u ghaa wə! À loʼ ndee tə loʼ ni bəghəshi mə n vən fə uwû fən fə tɔŋŋə bənə və zə n kow mə ə?

²⁵N kee fuu kəzɔŋŋə K-a-zə̀ tə bəghəshinə mə n bam i Yeso Klisto tə loʼnə Mûkəbii saa. Ghaa koʼonu jìi zey n loʼnə nya tii ə? N fə̀ŋ zuŋ, n ndzəmə ləghənu ni naŋŋə laŋ u Kəzə̀, à kee loʼ nə̀ nghee n ghəŋŋənə ghəə ghey vən fə uwû fuŋ fə ləghənə, mə n doʼ kɔd kə tə bəb zə.