Read Weh Roma 8 Bible Online

Roma 8 - Weh bible

Roma 8

¹Nghee tə̀ Zə̀ kə bəghəshinə saa n bam i Yeso, ghə̂ ghən ghə loʼnə nə kəfə kəmɔʼ ghi Yeso Klisto, ghə kəm way ghə̂ a bəbə ghə n sə K-a-zə̀.

²I sey loʼ ntənkey, nghee tə saa loʼ soʼonə nə kəfə̂ kəmɔʼ ghi Yeso Klisto, Zay kə Zow kən kə fuunə muu zə, kə nya fwaʼa n kow mə, ghəŋŋə nə̀ mə i naŋŋə laŋ u wi. Kə n bəghəshi soʼonə mə wɔ daʼa kə ghəə a bəbə kən kə ney bənə və zə.

³Zə̀ kə mâ ghəŋə ghəə ghey laŋ kə Mushi kə â way ni ghəŋə n kow ghey təŋkey gow uwû ləghə way ni ghəŋŋə ghəə ghey laŋ kə dzanə. Tə n ney kɔʼ waa wi tûm bə fa n mbi n wû u wù sɔŋtsuʼ tə a loʼ umaʼlə ni ghəŋə nə̀ kə bəb i nə kəm keelinə daʼa kə n kow saa.

⁴Zə̀ kə â ghəŋə sey ni ghəŋə nə̀ saa ghən saa muunə nghee tə̀ Zay kə Zow kə diinə, nə̀ à way dzə nghee tə̀ gow uwû ləghənə, saa i loʼ tsətsəghə tə̀ laŋ kə diinə.

⁵I loʼ nə̀, ghə̂ ghən ghə muunə muu zən gow uwû ləghənə, bɔɔmə moʼlə tənə kə ghəə ghey a kpiilənə tə̀ gow uwû. A kee bə ghə̂ ghey ghə muunə, muu zey Zay kə Zow kə ləghənə, bɔɔmə moʼlə tənə kə ghəə ghey a kpiilənə tə Zay kə Zow kə.

⁶Wù wey tə naŋa tsunə fə̀ŋ ə wi ghəə ghən gow uwû wi ləghənə, tə i kpuunu. A kee bə wù wey tə naŋa tsunə fə̀ŋ ə wi n ghəə ghey Zay kə Zow kə ləghənə, tə n keeli imuu, tə n loʼ soʼo nə ibuulə.

⁷I loʼ sey n təŋkey, ghə̂ ghey fə̀ŋ tə ghə tə loʼ tən kə n ghəə ghey gow uwû ləghənə, ghə loʼ tən tsə kə ghə̂ a təngəmə a Kəzə̀. Ghə naŋŋə way laŋ u Kəzə̀ wə. Ndzəm ndzəm, ghə naŋŋə way laŋ u tii wə abə ghə mə buʼu ləghə kə ni naŋa.

⁸Ghə̂ ghey ghə ghəŋŋənə ghəə ghey gow uwû ləghənə, ghə way ni ghəŋə dzə ghəə ghey Zə̀ kə ləghənə.

⁹N moʼlə nə̀ ghaa muu dzə way n jìi zey gow uwû ləghənə nə̀ ghaa muu tii, ghaa fəd muu n jìi zey Zay kə Zow kə ləghənə abə à ndzəm loʼnə nə̀ Zay K-a-zə̀ kə loʼnu n kow ghaa. Wù wey tə khə way Zay kə Zow kən kə nuu bənə n wɔ Klisto, tə sey way dzə nə kəfə kəmɔʼ ghi Klisto.

¹⁰Abə à kee loʼ nə̀ Klisto loʼnu n kow wɔ, nghee à tsəm buʼ loʼ kə nə̀ gow uwû zə n kpu doʼo bòʼ bəb zə, Zay kə Zow kə fuunu wɔ n muu zə n təŋkey Zə̀ kə n ney nə̀ wə loʼ tsətsəghə.

¹¹Abə i loʼ nə̀ Zay K-a-zə̀ kən kə â zhəm dzəŋŋə bənə Yeso nə ivə loʼnu n kow wɔ, wi wən tə â zhəm dzəŋŋə bənə Klisto nə ivə, i ghəŋŋənu nə̀ wû i ghaa zən i kpunə, i kəm keeli imuu. I loʼ sey bòʼ Zay kə Zow key kə loʼnə n kow ghaa.

¹²Sey, waazə ghə, saa khə ni teeli muu n jìi zey Zay kə Zay kə Zow kə ləghənə, à way dzə n jìi zey gow uwû saa ləghənə nə̀ saa muu tii.

¹³N dza sey n təŋkey, abə ghaa muunə nghee tə̀ gow uwû ləghənə, ghaa i kpuunu. Nə̀ ghaa kee muu nghee tə̀ Zay kə Zow kə ləghənə, ghaa i wey maʼa ghəə a bəbə ghey a loʼnə n kow ghaa, ghaa i keeli imuu.

¹⁴I loʼ sey n təŋkey ghə̂ ghey ghə bweynə nghee tə Zay kə Zow kə ləghənə, ghə loʼ waa a Kəzə̀.

¹⁵Sey, Zay kə Zow key Zə̀ kə â fuunə tə ghaa ghəŋŋə dzə way nə̀ ghaa doʼo ukɔd, kə ghəŋŋə soʼo way nə̀ ghaa i tsəŋə. Zay kə Zow key Zə̀ kə â fuunə tə ghaa fədlə ghəŋŋə nə̀ ghaa i loʼ waa a Kəzə̀ ghə. À loʼ wi tə ghəŋŋənə nə̀ saa i tɔŋŋə ndow Zə̀ kə tɔŋŋə kuulə nə̀, “Bày! A Bày wuŋ!”

¹⁶Zay kə Zow kə diinu tə̀ fə̀ŋ tə saa tə nə̀ saa loʼ waa a Kəzə̀.

¹⁷Nghee saa loʼnə waa a Kəzə̀ ghə, saa i zə̂ə soʼonu fə wey Zə̀ kə â təb naŋanə tə ghə̂ a wi ghə. Saa ghi Klisto i dzəŋi zə̂ə soʼonu fə key Zə̀ kə â naŋanə tə wi. I loʼ sey n təŋkey, abə saa ndzəmə fəʼlə dzəŋinə ghi Klisto, saa i keeli soʼonu kɔʼlə mey tə khənə.

¹⁸N khənu nə̀ kɔʼlə mən Zə̀ kə i fuunə tə saa, n laabə tsəghəshinu fəghə zən saa fəʼlənə nya.

¹⁹N dza sey n təŋkey, fə wey udzəm Zə̀ kə bɔmnə fa n mbi ləmmə tənə tsuʼ fey Zə̀ kə i dii bənə ghə̂ ghey ghə ndzəm loʼnə waa a wi ghə.

²⁰I loʼ sey n təŋkey, Zə̀ kə n ghəŋə nə̀ fə wən fa n mbi udzəm, u doʼo bə fə u kənunu. À ka tsəm dzə fə u tii wə ni doʼo sey, à fəd tsəm Kəzə̀. Moʼlə i Kəzə̀ zə â loʼ ni

²¹bəghəshi fə u mbi n ndzoʼo kɔd kən u loʼnə tii, nsə nə̀ kə waa a Kəzə̀ a nə kəmə doʼlənə n tənə daʼa kə ghəə a bəbə ghə, ghə keeli soʼo kɔʼlə n loʼnə tə̀ waa a Kəzə̀ ghə.

²²Saa khənu nə̀ ni bə taa bə nya, fə wən udzəm Zə̀ kə â bɔmnə fa n mbi dzɔɔlə tə a loʼ weyzən wən tə soʼonə waa.

²³À kad way kə fə wən Zə̀ kə â bɔmnə fa n mbi u dzɔɔlənə n fɔɔbə i tii zə, wû i saa ghən saa loʼ nə̀ saa n bùʼ mɔm zow kɔʼ dzə kɔʼlə mən Zay kə Zow kə Zow kə fuunə, dzɔɔlə soʼonu n fə̀ŋ tə saa nghee saa ləmmə tənə nə tsuʼ fey Zə̀ kə i neynə saa nə̀ saa loʼ waa a wi, tə kweyyə nuu kɔʼ wû i saa.

²⁴Nghee Zə̀ kə â bəghəshinə saa, tə n ghəŋə nə̀ saa i ləmmə ni keeli kɔʼlə n wi. Abə saa kee khə dzənə fə kə, saa way ni kəm ngii khə zay ni ləmmə fə kə tii kə. I loʼ sey n təŋkey, wù wey tə khənə fə kə, tə kəm ngii khə dzə way zay ni ləmmə fə kə tii kə.

²⁵Abə saa ləmmənə fə kə nə̀ saa kam khə way, saa n kow tsu kə fə̀ŋ ni ləmə fə kə tii kə.

²⁶N jii i mɔʼɔ zə, Zay kə Zow kə gaamənu saa nghee saa loʼ kə nə̀ saa khə way ghəə zey saa loʼ ni dza ndow tə̀ Zə̀ kə. Abə saa khə kə way jìi zey saa loʼ ni gɔŋŋə tii, Zay kə Zow kə n wû u wi wə n dzɔɔlə gɔŋŋə n tow u saa n jìi zey wù way ni tiilə dza.

²⁷Zə̀ kən kə khənə ghəə ghey adzəm a loʼnə n fə̀ŋ tə saa, khənu moʼlə i Zay kə Zow kə n təŋkey, Zay kə Zow kə gɔŋŋə n tow u dzûmə tə Klisto n jìi zey Zə̀ kə ləghənə.

²⁸Saa khənu nə̀, Zə̀ kə ghəŋŋə nə̀ ghəə ghey adzəm a shiənə, a fwaʼ n ndzuŋ ə ghə̂ ghey ghə ləghənə wi. À wən loʼ saa ghən Zə̀ kə â tɔŋɔnə nə̀ saa ghəŋə ghəə ghey tə â bayyə naŋanə nə saa ghəŋə.

²⁹I loʼ sey n təŋkey, ghə̂ ghey Zə̀ kə â khənə nə̀ ghə i bə doʼlə ghə̂ a wi, tə â khənu nə̀ ghə i kweyyə nuulə bənu, ghə doʼo bə tə a loʼ waa wi, sey nə̀ waa wən i loʼ waa u sə isə wə n fəŋŋə kə ndəmə ghə̂ ghən ghə loʼnə dzûmə tə Klisto tə.

³⁰I loʼ soʼo nə̀, ghə̂ ghey Zə̀ kə sày naŋanə, à loʼ soʼo ghə tə tɔŋɔnə nə̀ ghə doʼo ghə̂ a wi. Ghə̂ ghey tə tɔŋɔnə nə̀ ghə doʼo ghə̂ a wi, à loʼ soʼo ghə tə ghəŋənə nə̀ ghə doʼo tsətsəghə n sə kə wi. Ghə̂ ghey tə ghəŋənə nə̀ ghə doʼo tsətsəghə n sə kə wi, à loʼ soʼo ghə tə ghəŋənə nə̀ ghə keeli nkɔʼlə.

³¹À loʼ ghə i ghaa zə saa loʼ ni kəm dza bòʼ ghəə zən ə? Abə Zə̀ kə taʼanə ghi saa, à loʼ ndee ni ballə ghi saa a?

³²Abə Zə̀ kə â loʼ ni ney fuu ndow waa wi nə̀ tə kpuu n tow u saa adzəm, ghaa moʼlə nə̀ tə i fuu way saa n fə u loʼ wən udzəm naʼ idzəm ə?

³³À loʼ ndee tə loʼ ni ney bə saʼ n kow ghə̂ ghən Zə̀ kə sày naŋanə ə? Wù umɔʼ tsəm way, à may kə Kəzə̀ kə ghəŋŋənə nə̀ ghə doʼo tsətsəghə n sə kə wi.

³⁴À loʼ ndee tə loʼ ni dza nə̀ saa n bwu saʼ a? Wù umɔʼ tsəm way n təŋkey, Yeso Klisto wən tə â kpunə, Zə̀ kə zhəm dzəŋŋə bə wi nə ivə, tə u loʼnə nya n kpii u Kəzə̀ u təmə wə, teynu tə gɔŋŋə n tow u saa.

³⁵A loʼ kee kə loʼnə ni dzawwə saa ghi Klisto tə ləghənə saa a? Abə a buʼ loʼ kənə chɔd wə nkee saa tsəmə fəʼlə kənu nkee saa zow kə ngoʼ nkee dzəŋ tsəmə zabə kənə saa, tsəm loʼ tə̀ zə i wey maʼa saa, i tsəm way ni dzawwə koʼ saa n ləghə zey klisto khənə nkow saa.

³⁶À wey loʼ ghə i tii zə i tɔ̀ɔ doʼo n màʼlə K-a-zə̀ nə̀, “À loʼ bòʼ wɔ a Zə̀ kə, ghey koʼonə və zə nəŋə tədzəm, Ghə ghəŋŋə ghi ghey tə a loʼ tənjì ghə dza i ndow wey.”

³⁷Saa tsəmə təmə zəənu ghəə ghən adzəm n təŋkey à saa gaamə Klisto wən tə ləghənə saa.

³⁸N dza sey n təŋkey n khənu nə̀ fə kə loʼ kə way dzə ni dzawwə saa n ləghə zən Zə̀ kə khənə n kow saa. Nə à loʼ kə ivə nkee imuu, nə̀ a loʼ kə tsətəndəghə tə Kəzə̀ nkee avəətsəə, nə̀ a loʼ kə ghəə ghən saa loʼnə nya tii nkee a ghey a nə bəghənə nkee daʼa u ghaa wə, u tsəm way ni dzawwə koʼ saa.

³⁹Abə a tsəm loʼ kə fə wey u loʼ idəŋ nkee u wey u loʼnə itən nkee fə wən Zə̀ kə bɔmnə fa n mbi udzəm, fə kə loʼ kə tsəm way dzə kə loʼnə ni dzawwə saa ghi ləghə zən Zə̀ kə khənə n kow saa ghən saa loʼnə nə kəfə kəmɔʼ ghi Mûkəbii saa Yeso Klisto.