Read Weh 1 Kɔrint 12 Bible Online

1 Kɔrint 12 - Weh bible

1 Kɔrint 12

¹Waazə ghuŋ ghə, n dza n ghɔɔmə bə tə̀ ghaa nyisa n ghəə ghey ghaa â bəb bənə tə̀ mə kuum naamə wən Zay kə Zow kə fuunə tə̀ ghə̂ ghə. N ləghə nə̀ ghaa tɔʼ keeli tsu isəŋə n ghə i zən.

²Ghaa mgbaŋ khənu nə̀ n nəŋə zey ghaa â loʼnə nə̀ ghaa kam bəghəm way tə̀ Zə̀ kə, ghə mâ ghaa sìi ndzəŋŋə n ndəmə tə təjìi, nə̀ ghaa i ngɔɔmə muʼu mə nə̀ n ghɔɔmə way.

³N ləghə nə̀ ghaa keeli tsu nə̀, wù loʼ way dzə abə tə ghɔɔmənə n daʼa key Zə̀ kə fuunə tə̀ wi, tə loʼnə ni dza tsu nə̀, “Yeso i koʼo kəbaŋ kaʼ.” Wù loʼ way soʼo tə loʼnə ni dza nə̀, “Yeso loʼ Mûkəbii.” Nə̀ a way Zay kə Zow kə, kə ghəŋə nə̀ tə dza sey.

⁴Zay kə Zow kən kə loʼ kə kəmɔ̀ʼ, i kee loʼ nə̀, naamə wən tə fuunə, u loʼ ndəm.

⁵Zə a loʼ soʼo nə̀ Mûkəbii loʼ kə umɔ̀ʼ, a kee loʼ nə jii tey ghə̂ a fwaʼanə tii tə̀ wi, tə loʼ n ndəm.

⁶Zə̀ kə loʼ kə kəmɔ̀ʼ kə fwaʼanə n kow ghə̂ ghə adzəm, a kee loʼ nə̀ kə fwaʼa n ndəmə ndəmə tə təjìi.

⁷Zuŋ key Zay kə Zow kə fuunə ghə̂ ghə n naamə kən loʼ nə̀, ghə i gaamə tiilə wû i ghə zə.

⁸Zay kə Zow kə ghəŋŋə wù wən tə n ghɔɔmə ghəə ghey a khənə tɔb wə, Zay kə Zow kə mɔʼɔ kə n ghəŋə wù loʼ wey n kee khə utɔb ni khəə aghəə n jìi zey ghə̂ ghə i zowkeelinə.

⁹Zay kə Zow kə fuu wù umɔʼ n bəghəm i fə̀ŋ i nii zə, Zay kə mɔʼɔ kə n fuu tə u loʼ wey n naamə kə ni baŋŋə ghə̂ a dzaŋa ghə,

¹⁰Zay kə Zow kə fuu wù loʼ n daʼa kə ni ghəŋə ghəə zum ghə idzuu ghəə, tə n fuu wù loʼ n tɔb wə ni tiilə dza tûm Kəzə̀, tə u loʼ wə, tə n fuu kədaʼa ni koʼ keeli zay u bəbə wə nsə zay u dzuŋu wə, tə n fuu wù loʼ n daʼa kə ni ghɔɔmə lii tə təghɔɔmə, tə n kee fuu wù loʼ n daʼa kə ni tiilə dza lii tə təghɔɔmə tən Zay kə Zow kə fuunə tə̀ ghə̂ ghə nə̀ ghə ghɔɔmə.

¹¹Ghəə ghən adzəm a fuu bə Zay kə Zow kə mɔʼɔ kə, à tsə̀mə tsuu soʼo wi ndzoʼo naamə key tə i fuunə tə̀ kay wù.

¹²Klisto loʼ tə a loʼ uwû umɔʼ u khənə ndəmə uzuŋ. Wû u tii u nam loʼ kə uwû umɔʼ abə u tsəm khə kənə ndəmə uzuŋ.

¹³N jìi i mɔʼɔ zə, saa adzəm, abə wə loʼ kə wù Juu nkee wù wən tə way wù Juu, wə loʼ kəkɔd nkee wù ngəŋ, a loʼ kə Zay kə Zow kə mɔʼɔ kə, kə fuunə ghaa n mmuu n Kəzə̀ mə ni ghəŋə nə̀ saa doʼo nə kəfə kəmɔʼ. Ghəə zey i loʼnə, loʼ nə̀ saa dzəŋi khə kə Zay kə Zow kə kəmɔʼ.

¹⁴Isəŋə loʼ nə̀, wû u wù u khə way zuŋ kə kəmɔʼ, u fəd khə uzuŋ n ndəm.

¹⁵Abə fuu kə nuu dza kɔʼnə nə̀, “N way dzə zuŋ kə uwû, n təŋkey, n way dzə kəwɔɔ.” I ka dii dzə nə̀ à loʼ isəŋə nə̀ fuu kə way zuŋ kə uwû.

¹⁶Nkee abə tuŋŋə kə nuu dza kɔʼ nə̀, “N way dzə zuŋ kə uwû n təŋkey n way dzə isə̂.” I ka dii dzə nə̀ à loʼ isəŋə nə̀ tuŋŋə kə way zuŋ kə uwû.

¹⁷Ney kɔʼ na nə̀ bə wû udzəm mə loʼ kə nə̀ a loʼ isə̂, wù mə zow ngee ghəə ghə? Nkee abə wû udzəm mə loʼ kənə tuŋŋə kə, wù mə ləmizow ngee luʼu tə?

¹⁸Isəŋə loʼ nə̀, a loʼ Kəzə̀ tə kuu zuŋ uwû wə udzəm n kow wù n jìi zey tə ləghənə nə̀ u doʼo tii.

¹⁹Abə vən fə uwû fə mə khə kə zuŋ kə kəmɔʼ, tə wû udzəm u mə loʼ ghee?

²⁰Isəŋə loʼ nə̀ vən fə uwû fə loʼ kə fəmɔʼ, fə u kee khənə ndəmə uzuŋ.

²¹A wey loʼ ghə i tii zə sə̂ i way dzə ni dza tə̀ wɔɔ kə nə̀, “N khə way ghə i loʼ zə ni ghəŋə ghi wɔ!” Tow kə way ni dza soʼo tə̀ ghow kə nə̀, “N khə way ghə i loʼ zə ni ghəŋə ghi wɔ!”

²²I fəd loʼ nə̀, luʼu tə uwû tən tə loʼ nə̀ tə taw way, a baa loʼ tə ghii tə khənə fwaʼ kə səŋi kə.

²³Luʼu tə uwû tən saa moʼlə nə̀ tə basə khə way fwaʼ kə, à fəd loʼ tə ghii saa tɔʼɔ neynə nəŋə zə ni tɔʼ laalə tə ghii tə. Badla tə uwû tey tə dzɔbə way ni koʼ, à fəd loʼ tə ghii saa tɔʼɔ laalə soʼonə tə ghii tə.

²⁴Saa baa naŋŋə way sə̂ zə n luʼu tə uwû tə səŋi tən tə ngii khənə fwaʼ kə, n təŋkey, Zə̀ kə fəd bayyə naŋa wû u wù n jìi zey, zuŋ u wû wən u ngii khə way fwaʼ kə, à fəd loʼ tə ghii saa ngii laalənə tii.

²⁵Zə̀ kə sey ghəŋə naŋa nə̀ kə ghə nə dzawwə doʼonə n wû i ghə, ghə i fədlə gaamə tiilə wû i ghə zə.

²⁶Dii tsu nə̀, abə bad kə uwû kəmɔʼ kə fəʼlənə, zuŋ u wû u loʼ wey udzəm wə n fəʼlə soʼo, abə bad kə uwû kəmɔʼ kə loʼ dzɔbnə, zuŋ u wû u loʼ wey udzəm wə n loʼ dzɔb soʼo.

²⁷Ghaa loʼ wû u Klisto, kay wù n fəŋŋə kə ghaa u loʼ zuŋ kə uwû kə wi kə.

²⁸Zə̀ kə sày naŋa aghə̂ n dzəŋi kə dzûmə tə Klisto nə ulii. A sə̂ kə bə ngəd tə Yeso, ghə̂ ghey ghə naʼlənə tûm Kəzə̀ ghə u dzûmə ndow nə̀, ghə̂ ghey ghə diinə ghəə a Kəzə̀ ghə, ghə u dzûmə bənə ghə. A ghə dzûmə ndow ghə̂ ghən ghə ghəŋŋənə faalə mə, a ghən Zə̀ kə fuunə ghə n daʼa kə ni baŋŋə ghə̂ ghə u dzûmə ndow, ghə̂ ghən ghə gaamə nduŋŋə ndownə ghə̂ ghə u dzûmə ndow, a ghən ghə loʼnə ni kwu keeli aghə̂ u dzûmə ndow, tə̀ ghə̂ ghey ghə ghɔɔmənə lii tə təghɔɔmə tə i sə dzûmə ndow.

²⁹A way dzə aghə̂ adzəm ghə loʼnə ngəd tə Yeso tə, nkee ghə̂ ghey ghə naʼlənə tûm Kəzə̀ nkee ghə̂ ghey ghə diinə ghɔɔmə i Kəzə̀ zə. A way dzə aghə̂ adzəm ghə loʼ ni ghəŋə nfaalə.

³⁰A dzə aghə̂ adzəm ghə khənə daʼa kə ni baŋŋə ghə̂ ghə nkee ni ghɔɔmə n lii tə təghɔɔmə. A way soʼo aghə̂ adzəm ghə khənə daʼa kə ni tiilə dza ghəə ghey Zə̀ kə dii bənə.

³¹I kee loʼ nə̀, n ləghə nə̀ ghaa kuu tsu isəŋ ni keeli naamə wən u loʼ ni gaamə ndəmə aghə̂. N dza n dii bə tə̀ ghaa jìi zey i tɔʼ kpiinə tə̀ ghaa ni muu tii.