Read Weh 1 Kɔrint 13 Bible Online

1 Kɔrint 13 - Weh bible

1 Kɔrint 13

¹Abə n loʼ ni ghɔɔmə, ghɔɔmə tə naʼa tən fa mbi tədzəm nkee ghɔɔmə tən tsətəndəghə tə Kəzə̀ tə ghɔɔmənə, kee dii way ləghə zə tə̀ ghə̂ ghə, n sey maŋ loʼ tə à loʼ fəngəghəm fə fuŋunə kənunu nkee tə̀ a loʼ mbəŋŋə i fuŋunə kənunu.

²Abə n tsəm khə kənə naamə kən kə ghəŋŋənə nə̀ mə i loʼ ni naʼlə tûm Kəzə̀, n zowkeeli ghəə ghən adzəm a nyi doʼonə bòʼ Kəzə̀, n keeli may aghəə adzəm fa n mbi, n keeli soʼo bəghəm i fə̀ŋ zən i loʼ ni zəb nuu kɔʼ ukaʼ, nə̀ n kee dii way ləghə zə tə̀ ghə̂ ghə, n sey maŋ loʼ kənunu.

³Abə n mə loʼnə ni fuu may fə wey n khənə tə̀ ghə̂ a laa ghə, bùʼ fuu daŋŋə soʼo wû wuŋ nə̀ ghə kpəghə maʼa n tow u ghə sey nə̀ mə i loʼ ni kɔʼlə uwû tii, loʼ sey nə̀ n kee dii way ləghə zə tə̀ ghə̂ ghə, mə i keeli way naamə kə loʼ kə.

⁴Ləghə i ghəŋŋə wù nə̀ tə i kow fə̀ŋ, tə i khə soʼo fə̀ŋ i dzuŋu zə. Ləghə i ghəŋŋə dzə way wù nə̀ tə i khə ghoʼ kə. Ləghə i ghəŋŋə dzə way wù nə̀ ghaŋŋə wû wə nkee kɔʼlə kaabə tsə uwû.

⁵Ləghə i ghəŋŋə way nə̀ wù i tsayyə ghə̂ a loʼ ghə. I ghəŋŋə way nə̀ wù i dey tənə kə sə̂ fə wi fə. I ghəŋŋə way nə̀ wù i zaŋŋə fəələ n nəghə wə. I ghəŋŋə way nə̀ wù i kwɔɔ naŋŋə wù n fə̀ŋ ə wi.

⁶Ləghə i ghəŋŋə way nə̀ wù i duʼlə abə ghə̂ a ghəŋŋənə ghəə a bəbə ghə, i fədlə ghəŋŋə nə̀ wù i duʼlə abə wù ghəŋŋənə ghəə ghey a kpiilənə

⁷Ləghə i ghəŋŋə wù nə̀ tə i ghə̂mə n kow waazə nəŋə tədzəm. I ghəŋŋə wù nə̀ tə i gaʼa fə̀ŋ n kow waazə nə aghəə adzəm. I ghəŋŋə wù nə̀ tə i gaʼa fə̀ŋ n kow Zə̀ kə. I ghəŋŋə nə̀ wù i kow fə̀ŋ nəŋə tədzəm.

⁸Tûm Kəzə̀ zən ghə̂ naʼlənə nə maynu, lii tə təghɔɔmə tən ghə̂ a ghɔɔmənə nə bə maynu, tɔb wən fa mbi nə may tsəghə soʼonu, à kee loʼ nə̀ ləghə i nə may koʼ way.

⁹N sey dza n təŋkey, a zowkeeli aghəə kəm ukəm, saa naʼlə soʼo tûm Kəzə̀ kəm ukəm.

¹⁰I kee loʼ nə̀, abə nəŋə zə i kpi bənə, saa i keeli aghəə adzəm. Ghəə ghən a khənə kəm ukəm, wə i kəm khə way fwaʼ kə loʼ kə.

¹¹Nghee mə a loʼnə winətəghə, mə n ghɔɔmə tə̀ a loʼ winətəghə, moʼlə tuŋ tə n loʼ moʼlə tə winətəghə, mə n ghəŋŋə soʼo aghəə tə̀ a loʼ winətəghə. Ambə n nyəm kɔʼnə n wù, mə n zəghə maʼa ndow ghəə ghə a ghinətəghə.

¹²N sey dza n təŋkey, ghəə ghən saa koʼonə nya, saa maŋa koʼo kəzəŋŋə tə wù nə fwɔdlɔnə wû u wi wə nə kəlungali. Abə nəŋə i tii zə i baa kpi tsunə, saa i baa koʼ ndow ghəə a tii ghə n mgbaŋ. Abə Yeso i bə dzəŋŋənə, saa i fwɔdlɔ tûmmə ndow tûm usə wə ghi wi. Ghəə ghən n khənə nya, a maŋ loʼ kəm ukəm, abə Yeso i bə dzəŋŋənə, mə i keeli may ghəə a tii ghə. Isəŋə loʼ nə̀ Zə̀ kə khə aghəə adzəm kuum mə.

¹³N ghəə ghən saa adzəm, ghəə a təmi shi bə atəghə, a doʼlə tənə nə̀, bəghəm i fə̀ŋ, moʼlə tə dzuŋu tə nsə ləghə zə. A kee loʼ nə̀, ləghə i bə isə̂ n ghəə ghən adzəm.