Read Weh 1 Kɔrint 14 Bible Online

1 Kɔrint 14 - Weh bible

1 Kɔrint 14

¹Waazə ghə, ghaa khə ni dii ləghə zə tə̀ ghə̂ ghə. Kuu tsu na səŋ zə ni keeli naamə wən Zay kə Zow kə fuunə. N ləghə nə̀ ghaa ndəŋ kuu tsu isəŋ ni ghəŋə nə̀ Zay kə Zow kə fuu ghaa n naamə kə ni naʼlə tûm Kəzə̀.

²N sey dza n təŋkey, wù wey tə ndzəmə ghɔɔmənə lii tə təghɔɔmə, ghɔɔmə dzə way tə̀ ghə̂ ghə, tə ghɔɔmə tə Zə̀ kə. Ghə̂ a zowkeeli dzə way ghəə ghey tə dzanə n təŋkey, tə ghɔɔmə ghəə ghey a nyi doʼonə nghee tə̀ Zay kə Zow kə diinə tə̀ wi.

³Wù wey tə naʼlənə tûm Kəzə̀ kee ghɔɔmə tə̀ ghə̂ ghə, tə ghɔɔmə ni bəghə kɔʼ bə muu i Kəzə̀ i ghə, ni kuu fə̀ŋ tə ghə nsə ni tsəmmə fə̀ŋ tə ghə.

⁴Wù wey tə ghɔɔmənə lii tə təghɔɔmə tə, bəghə kɔʼɔ bə bəghəm i fə̀ŋ i wi, wù wey tə naʼlənə tûm Kəzə̀ kee bəghə kɔʼɔ bə bəghəm i fə̀ŋ i dzûmə tə Klisto.

⁵I mə loʼ ni doʼo ghə i dzuŋu zə abə ghaa adzəm, ghaa mə loʼnə ni ghɔɔmə lii tə təghɔɔmə tə, a kee dzɔb tsəghəshi abə ghaa mə loʼ ni naʼa tûm Kəzə̀. I loʼ nə̀, wù wey tə naʼlənə tûm Kəzə̀ n dzəŋi kə dzûmə tə Klisto tsəghəshi wù wey tə ghɔɔmənə n lii tə təghɔɔmə, a may kə nə̀ wù loʼ loʼnu fuu tə loʼnə ni tɔʼ tiilə dza lii tə təghɔɔmə tən n dzəŋi kə dzûmə tə Klisto ni ghəŋə nə̀ bəghəm i fə̀ŋ i ghə zə i taw.

⁶Waazə ghə, zə i gaamə ghaa n kee abə n bənə n səə ghaa, ghɔɔmə kə n lii tə təghɔɔmə, tə̀ Zay kə Zow kə fuu bənə, ka chi dii ghəə a Kəzə̀, ka tiilə dza tɔb u Kəzə̀, ka naʼa tûm Kəzə̀ i loʼ zə, ka fuu ghaa n tsə̀ i loʼ zə ə?

⁷À loʼ soʼo ighələ n fə̂ u buʼu wən u khə way muu zə tə a loʼ ndɔŋ zən ghə tɔŋɔnə nsə bəghəm kən ghə buʼunə. Abə ghə tsɔɔbə buʼunə, zəghə u tii u way ni kwu, wù i way ni zowkeeli soʼo ndzaŋ zey ghə buʼunə.

⁸Nkee abə wù wey tə buʼunə nguʼ ə tsam ka buʼ dzɔb, ghə̂ ghə i zowkeeli ngee nə̀ nəŋə i tsam zə kpii ə?

⁹A wey bɔɔmə loʼ nghee ghəə ghən a loʼnə tii, abə wù ka ghɔɔmə shi bə n ghɔɔmə zey ghə̂ a loʼ ni zowkeeli, ghə̂ ghə i keeli way ghəə zey wə mə dza i dza. Wə i maŋ loʼ tə u maŋa buʼlə nbɔŋ nə kənunu.

¹⁰Lii tə təghɔɔmə tə loʼ fa n mbi n ndəm, ghɔɔmə i loʼ i way tii nə̀ ghə̂ a zowkeeli way.

¹¹Sey, abə n zowkeeli way ghəə ghey wù ghɔɔmənə, i dii nə̀ n loʼ wù kətûm tə̀ wù wey tə ghɔɔmənə, tə u loʼ soʼo wù kətûm tə̀ mə.

¹²Nghee ghaa ngii ləghənə ni keeli naamə wən Zay kə Zow kə fuunə, ngii kuu tsu na səŋ zə ni keeli naamə wən ubəghə kɔʼɔ bənə dzəŋi kə dzûmə tə Klisto tə.

¹³A wey loʼ ghə i tii zə ghə̂ ghey ghə loʼnə ni ghɔɔmə lii tə təghɔɔmə, ghə khənə ni ngii gɔŋŋə nə̀ Zə̀ kə fuu ghə n daʼa kə ni tiilə dza bə ghəə ghey ghə ghɔɔmənə.

¹⁴Abə n gɔŋŋənə n ghɔɔmə zə inaʼ i nuu zə, à gɔŋŋə n fə̀ŋ zuŋ, tɔb wuŋ u kee zowkeeli dzə way ghəə zey n dzanə.

¹⁵Ghəə zey i kpiinə tə̀ mə ni ghəŋə à loʼ nə n khə ni gɔŋŋə n fə̀ŋ, gɔŋŋə soʼo n jìi zey n loʼnə ni zowkeeli. Nə n zhim aghəə, n khə ni zhim n fə̀ŋ zuŋ, zhim soʼo n jìi zey n loʼ ni zowkeeli.

¹⁶Ney kɔʼ na nə̀ abə wə gɔŋŋənə n ghɔɔmə zey Zay kə Zow kə fuunə, nə̀ wù loʼ loʼ fu nə̀ tə zowkeeli way ghəə zey wə dzanə, tə i loʼ ngee ni bəghəm dzəŋi ghi wɔ nə̀, “Zə i loʼ sey” n kali wey u fuunə tə Zə̀ kə, loʼ sey nə̀ tə zowkeeli way ghəə zey wə dzanə ə?

¹⁷N sey bəbə n təŋkey, wə loʼ ni loʼ nə̀ wə ndzəmə fuu nkɔʼlə tə̀ Zə̀ kə, à kee loʼ nə̀ gɔŋŋə zə i ka bəghə dzə bəghəm i fə̀ŋ i wù loʼ wey.

¹⁸N fuu zɔŋŋə K-a-zə̀ nə̀ Zay kə Zow kə n fuu mə n daʼa kə ni ghɔɔmə lii tə təghɔɔmə tsəghəshi ghaa adzəm.

¹⁹A kee loʼ nə̀, abə n khə ni ghɔɔmə n dzəŋi kə dzûmə tə Klisto, à kpii nə̀ n ghɔɔmə shi bə kə aghəə ataa ni tsə̀ aghə̂ nə̀ ghə zowkeeli tsəghəshi ni ghɔɔmə aghəə təkam ighəm n ghɔɔmə i loʼ zə nə̀ ghə̂ a zowkeeli way.

²⁰Waazə ghə, kə ghaa nə moʼlə nə̀ ghəə ghə tə̀ a loʼ aghinətəghə. Abə i bənə ni ghəŋə ghəə a bəbə ghə, ghaa khə ni loʼ tə a loʼ aghinətəghə. A kee bə n jìi zey ghaa zowkeelinə ghəə ghə tii, ghaa khə ni loʼ tə a loʼ agheynyim.

²¹I tɔ̀ɔ doʼo n màʼlə K-a-zə̀ nə̀, “Mûkəbii dza nə̀, mə i ghɔɔmə tə̀ ghə̂ ghuŋ ghə n lii tə təghɔɔmə, À i loʼ ghə̂ ghey ghə way ghə̂ a Təjuu, ghə i naʼlənə tûm zən tə̀ ghə. Ghə̂ ghuŋ ghə i nam tuu ni zəllə ghəə zey n dzanə.”

²²Ni ghɔɔmə n lii tə təghɔɔmə loʼ tsəə tə̀ ghə̂ ghən ghə ka kam bəghəm tə̀ Klisto à way dzə tə̀ ghə̂ ghən ghə bəghəmnə tə̀ Klisto. Ni naʼa tûm Kəzə̀ fəd loʼ tsəə tə̀ ghə̂ ghən ghə bəghəmnə tə̀ Zə̀ kə, a kee way dzə tə̀ ghə̂ ghən ghə ka kam bəghəm tə̀ Zə̀ kə.

²³Ney kɔʼ na nə̀ dzûmə tə Klisto tə təmdzəŋi bənu tədzəm ni fuu nkɔʼlə tə̀ Zə̀ kə, ghə a kaʼ nyi ndownə ni gɔŋŋə n lii tə təghɔɔmə, abə wù kənunu nkee ghə̂ ghən ghə ka bəghəm tə̀ Zə̀ kə kpaʼi ndow bənə fu, ghə i moʼ way nə̀ tow u ghaa u kpiilə way ə?

²⁴Ney kɔʼ na nya nə̀, wù kənunu nkee ghə̂ ghey ghə ka kam bəghəm tə̀ Klisto kee nyi bə n dzəŋi kə ghaa nə̀ ghaa adzəm ghaa naʼlə tûm Kəzə̀, ghəə ghey ghaa dzanə, zə i mɔmnu fə̀ŋ tə ghə tə, ghə i koʼ nə̀ ngoʼo Kəzə̀ ləmmə ghə.

²⁵I loʼ sey n təŋkey, ghəə a kələm ghey n fə̀ŋ tə ghə n doʼo bə n mgbaŋ. Sey ghə i təm ndow tənguʼ aghəd, ghə fuu nkɔʼlə tə̀ Zə̀ kə, ghə i dza shiə bə n mgbaŋ nə̀, “Zə̀ kə ndzəm loʼnu n fəŋŋə kə ghaa!”

²⁶Waazə ghə, na n dza bə ghəə ghey a kpiinə tə̀ ghaa ni ghəŋə abə ghaa təmdzəŋi bənə ni ngɔɔmə Kəzə̀. Abə ghaa təmdzəŋi bənə ni ngɔɔmə Kəzə̀, wù loʼ loʼ ni khə ni zhim ghəə ghə, wù loʼ i loʼ ni tsə̀ə ghə̂ ghə, wù loʼ i loʼ ni chi dii bə aghəə tə̀ Zə̀ kə fuu bənə tə̀ wi, wù loʼ i loʼ ni ghɔɔmə n ghɔɔmə zə inaʼ i nuu zə, wù loʼ i kee loʼ ni tiilə dza bə ghəə ghən wù wən dzanə n ghɔɔmə tə naʼa tə nuu tə. Ghə̂ ghən adzəm khə ni ghəŋŋə ghəə ghən adzəm n jìi zey zə i bəghə kɔʼɔ bənə dzəŋi kə dzûmə tə Klisto kə.

²⁷I ka kpii dzə nə̀ aghə̂ abəghə nkee atəghə, ghə i ghɔɔmə n ghɔɔmə tə naʼa tə nuu tə nə inəŋə imɔʼ. Wù umɔʼ khə ni ghɔɔmə may tsu dzə, wù loʼ wey n daŋŋə ney kɔʼ. Abə ghə ghɔɔmənə, wù loʼ khə ni loʼ tə tiilə dzanə ghəə ghey ghə ghɔɔmənə.

²⁸Abə wù loʼ way fu tə loʼnə ni tiilə dza ghəə ghən tə̀ dzəŋi kə dzûmə tə Klisto tə, wù wey tə ghɔɔmənə n ghɔɔmə tə naʼa tə nuu tə khə ni zow doʼo mɔŋ, tə i ghɔɔmə tsuu kə n fə̀ŋ ə wi tə̀ Zə̀ kə.

²⁹Abə ghaa təmdzəŋi bənə n dzəŋi kə dzûmə tə Klisto, ghə̂ ghey ghə naʼlənə tûm Kəzə̀ khə ni loʼ kə abəghə nkee atəghə ni ghɔɔmə, ghə̂ a loʼ ghey khə ni tɔʼ zəllə ghəə ghey ghə dzanə, ni koʼ nə̀ i kpiilə kənu.

³⁰Abə Zə̀ kə kee chi dii bənə ghə i loʼ zə tə̀ wù loʼ tə doʼnə nə̀ wù loʼ mə ghɔɔmənu, wù wey tə mə ghɔɔmənə, khə ni buu doʼo tsu ni ghɔɔmə.

³¹I loʼ nə̀ ghaa khə ni fuu tsuu bùʼ kə tə̀ ghə̂ ghey ghə naʼlənə tûm Kəzə̀ nə̀ ghə i nuulə naʼlə umɔʼ umɔʼ ni ghəŋə nə̀ ghə̂ a zoʼlə kɔʼ ghəə a tii ghə nsə ni kuu fə̀ŋ tə ghə.

³²I loʼ nə̀, ghə̂ ghey Zay kə Zow kə fuunə ghə n naamə kə ni naʼlə bə ghəə ghey Zə̀ kə dzanə loʼnu ni kwu keeli wû i ghə tə̀ ghə ni ghɔɔmə umɔʼ umɔʼ.

³³Keeli tsu na nə̀, Zə̀ kə way dzə Zə̀ kən kə fwɔdlɔnə ghə̂ ghə, tə fədlə ləghə nə̀ ghəə ghə i bwey kɔʼɔ ndow nə ibuulə. Tə̀ i loʼnə n dzəŋi u dzûmə tə Klisto nə təluʼu tədzəm,

³⁴gheyzən a khə ni zow doʼo kə mɔŋ, abə ghə loʼnə n dzəŋi u dzûmə tə Klisto. Ghə khə way ni ghɔɔmə n təŋkey i tɔ̀ɔ doʼo n laŋ kə ghə̂ a Təjuu nə̀, weyzən khə way ni loʼ tow kə.

³⁵Abə ghə khənə ghə i loʼ zə ni bəb zow shi kɔʼ, ghə khə ni bəb tə̀ num a ghə ghə n ndaw, n təŋkey, à loʼ tow kə dədlə kə abə weyzən ghɔɔmənə n dzəŋi kə dzûmə tə Klisto.

³⁶Keeli tsu na nə̀, ghɔɔmə i Kəzə̀ zə â ka kaʼ nuu bə dzə n kow ghaa. Ghaa keeli tsu soʼo nə̀ a kad way kə tə ghaa, ghə â bə naʼanə ghəə a Kəzə̀ ghən.

³⁷Wù wey tə moʼlənə nə̀ i loʼ wù tûm Kəzə̀ nkee ghəə ghey tə ghəŋŋənə, a fuu Zay kə Zow kə wi n daʼa kə tii kə, wù tii khə ni keeli tsu nə̀, ghəə ghən n dza bənə fa, à loʼ Mûkəbii n wû u wi wə, tə tsəʼlə bənə laŋ kə tii kə.

³⁸Wù wey tə ka ney ghəə ghən n taŋ, tə keeli tsu nə̀ ghəə ghey tə dzanə, ghə̂ ghə i ney soʼo way n taŋ.

³⁹Sey, waazə ghə, keeli tsu na zay ni naʼa tûm zey Zə̀ kə fuu bənə tə̀ ghaa, kə ghaa nə kii naŋŋə soʼonə ghə̂ ghə nə̀ kə ghə nə ghɔɔmənə n ghɔɔmə tə naʼa tə nuu tə.

⁴⁰Kee maʼa tsu na wû zə ni ghəŋŋə kɔʼɔ ndow ghəə ghə n jìi zey i kpiilənə nsə nə ulii.