Read Weh 1 Kɔrint 15 Bible Online

1 Kɔrint 15 - Weh bible

1 Kɔrint 15

¹Waazə ghə, n dza i zəŋŋə bə ghaa n tûm i dzuŋu zən mə â naʼlə tə̀ ghaa, ghaa n ney naŋa tsu, ghaa u təmi taw tsunə tii n bəghəm i fə̀ŋ i ghaa.

²À loʼ tûm i dzuŋu zən zə i ghəŋŋənə nə̀ Zə̀ kə bəghəshi ghaa abə ghaa tɔʼ kwu keeli tsu dzənə ghɔɔmə i Kəzə̀ zən mə â naʼanə tə̀ ghaa. Nə̀ à way sey, i sey dii nə̀ ghəə zey ghaa â bəghəmnə tii, ghaa â maŋ bəghəm nə kənunu.

³Ghə i səŋi zey i loʼnə n tûm i dzuŋu zey mə â fuu nduŋŋə bənə tə̀ ghaa loʼ nə̀, Klisto â kpu n tow u saa ni ney nuu ghəə a saa a bəbə ghə tə̀ i tɔ̀ɔ doʼonə n màʼlə K-a-zə̀.

⁴I tɔ̀ɔ doʼo soʼo n màʼlə K-a-zə̀ nə̀, tə â kpu tsunu, ghə n tsəllə tsu wi, ambə tsuʼu n tsəghə tsunə ntəghə, Zə̀ kə n zhəm dzəŋŋə bə wi nə ivə.

⁵I tɔ̀ɔ doʼo soʼonu nə̀ nghee tə zhəm dzəŋŋə bənə nə ivə, tə n dii bə wû u wi tə̀ Pita[2], kəm dii bə wû u wi tə̀ ngəd tə wi tən ighəm n ghii tə təbəghə.

⁶Ambə tsuʼu n loʼ n tsəghə tsunə, tə n kəm dii soʼo wû u wi tə̀ dzûmə tə wi tə nə̀ ghə dzəŋi doʼonu nə̀ ghə n tsəghəshi bɔm mə ntaa. Ndəmə dzûmə tə Klisto tən tə â diinə wû wə tə̀ ghə nam loʼnu utaw nya, a loʼ ghə a loʼ nə̀ ghə n kpu.

⁷Tə n dii bə uwû tə̀ Jems, dii ndow soʼo uwû tə̀ ngəd tə wi tə tədzəm.

⁸Tə n dii guŋŋə bə soʼo uwû tə̀ mə. N fey loʼ tə a loʼ waa ghə ji guŋŋə tsunə nə̀ nəŋə zey ghə â khənə ni ji wi tii ka kam kpii.

⁹N dza sey n təŋkey, n loʼ tə a loʼ winətəghə n fəŋŋə kə ngəd tə Klisto tədzəm. N nam ngii nəʼlənu ni doʼo ngəd n fəŋŋə kə ngəd tə Klisto n təŋkey mə â chɔdlɔ tsə ghə̂ ghey ghə bəghəmnə tə̀ Zə̀ kə.

¹⁰N loʼ wù wey n loʼnə ghii wə nya bòʼ ndzuŋ ə Kəzə̀. Ndzuŋ zən Zə̀ kə â diinə tə̀ mə, â ka maŋ nay dzə kənunu. Zə n ghəŋə nə̀ n fəd fwaʼ tsəghəshi tsətəndəghə tə Klisto tə loʼ tey tədzəm. N khənu nə̀ â way dzə n daʼa kuŋ, â loʼ daʼa K-a-zə̀ kə â ghəŋənə mə nə̀ n fwaʼ tsəghəshi ghə adzəm.

¹¹Sey nə̀ a loʼ kə mə nkee ghə̂ a loʼ ghey a naʼa bənə tûm i dzuŋu zə tə̀ ghaa, ghə imɔʼ i loʼ nə̀, ghey dzəŋi naʼlə kə ghə i mɔʼɔ zə, bəghəm i fə̀ŋ i ghaa i fa bəghə doʼo kə n ghə i tii zə.

¹²Saa fa naʼlə kaabə tsə nə̀ Zə̀ kə mâ zhəm dzəŋŋə Klisto nə ivə, a kee loʼ kee ghə̂ a loʼ ghə n fəŋŋə kə ghaa dza kaabənə nə̀ ghə̂ a way ni zhəm dzəŋŋə nə ivə ə?

¹³Abə a loʼnə nə̀ ghə̂ a zhəm dzəŋŋə way nə ivə, i sey dii nə̀ Zə̀ kə â ka zhəm dzəŋŋə dzə Klisto nə ivə.

¹⁴Abə a loʼnə nə̀ Zə̀ kə â ka zhəm dzəŋŋə Klisto nə ivə, i sey dii nə̀ tûm zən ghey naʼlənə tə̀ ghaa loʼ kənunu, zə a dii soʼo nə̀ bəghəm i fə̀ŋ i ghaa n kow Klisto maŋ loʼ kənunu.

¹⁵I sey dii nə̀ ghəə a Kəzə̀ ghən ghey naʼlənə loʼ ghəə a taw ghə n təŋkey ghey naʼlə nə̀ Zə̀ kə a zhəm dzəŋŋə bə Klisto nə ivə. Abə i ndzəm loʼnə isəŋə nə̀ ghə̂ a zhəm dzəŋŋə way nə ivə, i sey dii nə̀ Zə̀ kə â kaa zhəm dzəŋŋə soʼo Klisto nə ivə.

¹⁶N sey dza n təŋkey, abə i loʼnə nə̀ ghə̂ a zhəm dzəŋŋə way nə ivə, i sey dii nə̀ Zə̀ kə â ka zhəm dzəŋŋə soʼo Klisto nə ivə.

¹⁷Sey, abə a loʼ isəŋə nə̀ Zə̀ kə â ka zhəm dzəŋŋə bə Klisto nə ivə, i sey dii nə̀ bəghəm i fə̀ŋ i ghaa n kow wi maŋ loʼ kənunu, dii tsuu nə̀ ghəə a ghaa a bəbə a nam loʼ n tow u ghaa.

¹⁸Abə ghəə a tii a ndzəm loʼnə sey, i sey dii nə̀ ghə̂ ghən ghə a kpunə nə̀ ghə bəghəm tə̀ Klisto â sey kpu nə kənunu.

¹⁹Abə i loʼnə nə̀ bəghəm i fə̀ŋ i saa zən saa khənə n kow Klisto may kə n muu i mbi zən, i sey dii nə̀ ghə khə ni mow tə̀ saa tsəghəshi tə̀ ghə̂ ghə adzəm fa mbi.

²⁰Isəŋə kee loʼ nə̀, Zə̀ kə mâ zhəm dzəŋŋə bə Klisto nə ivə, dii tsu nə̀ ghə̂ a kpu ghə i zhəm dzəŋŋə bə soʼonu nə ivə.

²¹N ghəə ghən dza n təŋkey, və zə a nyi bə fa n mbi n bam i wù umɔʼ, à loʼ soʼo ighələ zhəm dzəŋŋə zə ivə i bəghə soʼonə n baa wù umɔʼ.

²²Nghee tə̀ i loʼ nə̀ ghə̂ ghey adzəm ghə loʼnə nə kəfə kəmɔʼ ghi Adam i kpuunu, i sey dii soʼo nə̀ ghə̂ ghey ghə loʼnə nə kəfə kəmɔʼ ghi Klisto i zhəm dzəŋŋə bənu nə ivə.

²³A kee loʼ nə̀ kay wù i zhəm dzəŋŋə bə kə nə ivə nə ulii. Klisto â loʼ wù sə̂ isə wə ni zhəm dzəŋŋə bə nə ivə. Abə Klisto i bəghə dzəŋŋənə fa n mbi, ghə̂ ghən adzəm ghə loʼ nə̀ a loʼ ghə̂ a wi, ghə nə zhəm dzəŋŋə bə soʼo nə ivə.

²⁴Klisto i təm zə̂ kɔʼ səghə wən u saʼanə mbi, də̀ŋ u mbi, nsə daʼa u mbi wə udzəm, tə i ney fɔɔ u tii wə tə fuu ndow tə̀ Zə̀ kə tə loʼnə Bày. Sey, mbi i daŋŋə may.

²⁵I khə ni doʼo sey n təŋkey Klisto khə ni saʼ mbi zən ni ndow kuum n nəŋə zey tə i ney naŋŋə bənə ghə̂ a təngəmə a wi ghə adzəm n tənə fuu i wi.

²⁶Wù təngəmə wən tə i ləŋi maʼa guŋŋə kɔʼɔnə, à i loʼ ivə.

²⁷I tɔ̀ɔ doʼo n màʼlə K-a-zə̀ nə̀, “Zə̀ kə ney naŋa bə ufə̂ udzəm n tənə fuu i wi.” Nghee tə̀ kə dza tsunə nə̀ tə ney naŋa “ufə̂ udzəm” n tənə fuu i wi, i sey dii nə̀ Zə̀ kə ka taŋ dzəŋi dzə wû u wi wə tii n təŋkey, à loʼ wi tə naŋa fə̂ u tii wə n tənə Klisto.

²⁸Abə Zə̀ kə i ney naŋa bənə fə̂ wə udzəm n tənə Klisto, Klisto wən tə loʼnə Waa n wû u wi wə i doʼo bə n tənə Kəzə̀, tə i ney naŋa bə ufə udzəm n tənə wi, sey nə̀, Zə̀ kə i loʼ tow kə nə aghəə adzəm.

²⁹Abə à ndzəm loʼ isəŋə nə̀ ghə̂ a kpu ghə i zhəm dzəŋŋə bə way nə ivə, a kee loʼ kee ghə̂ a loʼ a neynə mmuu n Kəzə̀ mə n tow u ghə̂ kpu ghə ə? Ghə zə̂ə kee tii abə à loʼ nə̀ ghə̂ a tii ghə i zhəm dzəŋŋə bə way ə?

³⁰Abə à loʼnə nə̀ ghə̂ a kpu a zhəm dzəŋŋə bə way, ghey sey maŋa weyyə wû i ghey ni naʼlə tûm i dzuŋu zə nə kənunu.

³¹Waazə ghə, n dza bə tə̀ ghaa nə̀ n koʼo ivə tsuʼu n dzəm. À kee loʼ nə̀, kɔʼlə mey n khənə à loʼ nə̀ ghaa loʼ nə kəfə kəmɔʼ ghi Yeso Klisto tə loʼnə Mûkəbii saa.

³²Abə mə â zuulə baalənə ghi nyam tə mbvən tən tɔŋŋə ghə̂ ghən n naʼ i Efesus, nə̀ à maŋ loʼ kə n moʼlə tə wù sɔŋtsuʼ, n mə zə̂ kee a tii abə à loʼ nə̀ ghə̂ a kpu a mə zhəm dzəŋŋə way nə ivə ə? Abə i ndzəm loʼnə nə̀ ghə̂ a kpu a zhəm dzəŋŋə way nə ivə, saa sey khə ni maŋ muu tə̀ ghə̂ a loʼ a dzanə nə̀, “Bə na, saa zə̂, saa mə nlə, n təŋkey, tsətsə, saa i kpuunu.”

³³Sey, kə ghaa i nyəŋ laʼ n baa ghə̂ ghən ghə dzanə ndzoʼo ghəə ghən, n təŋkey, “Fə a bəbə a bəəbə maʼa wù wey tə khənə mwam u dzuŋu wə.”

³⁴Fən nyi dzəŋŋə bə n na n tɔb n ghaa, ghaa buu naŋa ghəə a bəbə ghən ghaa ghəŋŋənə. Tə̀ mə, a ngii loʼ tow kə dədlə kə nə̀ ghə̂ a loʼ a loʼ n fəŋŋə kə ghaa nə ghə khə way Zə̀ kə.

³⁵Wù loʼ kee loʼ ni bəb tsu nə̀, “Ghə̂ a kpu a loʼ ngee ni zhəm dzəŋŋə bə nə ivə ə? À loʼ ndzoʼo vən fə uwû fə ghaa fə ghə i keelinə ə?”

³⁶À wən loʼ ghə i laʼlə zə ni bəb! Saa mgbaŋ khənu nə̀ abə wə zəghə tsunə ndzoʼ, i kpu tsuu dzənu tə̀ ghii zə ni fòw.

³⁷Abə wə zəghə tsunə ndzoʼ, tə̀ a loʼ sə i səb nkee ndzoʼ i loʼ zə wə zəghənə, wə zəghə dzə way fə kə nə̀ kə n nyim doʼo, wə fədlə zəghə ndow sam i tii zə nə̀ i nyim.

³⁸Zə̀ kə n kee fuu ndow ndzoʼ ə tii n wû wey tə ləghənə, nə̀ a loʼ kə sam i ghaa zə wə mə zəghənə, Zə̀ kə n fuu ndow sam i tii zə n wû wey u kpiinə tə̀ ghii zə.

³⁹Vən fə uwû fə dzəŋi way dzə ighələ. Wù sɔŋtsuʼ khə wû u wi n nəŋ, nyam tə a khə n nəŋ, nnən mə u khə soʼonə n nəŋ, tsəghə tə u khə soʼo nə wû i ghə zə n nəŋ.

⁴⁰Fə̂ wən u loʼ idəŋ, khə vən fə uwû fə ghə, fə̂ wən u loʼnə fa mbi wə a khə soʼo nə vən fə uwû fə ghə fə. Vən fə uwû fə idəŋ fə gumi n nəŋ, vən fə uwû fən fa a ghəlitsə a khə soʼo gumi i wi zə n nəŋ.

⁴¹Tsə̀ khə nyiələ i wi, ndzɔŋ a khə soʼonə nyiələ i wi zə n nəŋ, səghəbələ mə a khə soʼonə nyiələ i ghə zə n nəŋ. Abə u laalə nyi tsu soʼonə səghəbələ mə, ghə dzəŋi nyiələ way ighəə, ghə loʼ kaabə soʼo n nəŋ n nəŋ.

⁴²À wən bɔɔmə loʼ tə zə i loʼnə tii abə Zə̀ kə i zhəm dzəŋŋə bənə ghə̂ ghə nə ivə. Abə ghə tsəllə tsunə vən i wù zə, tə fwaynu, abə Zə̀ kə i kee zhəm nuu dzəŋŋə bənə ghə̂ ghə nə ivə, ghə nə kəm fway way.

⁴³Abə ghə tsəllə ndownə wù, vən i wi i kəm gumi way ni koʼ, tə n khə soʼo way daʼa kə loʼ kə. Abə Zə̀ kə i kee zhəm nuu dzəŋŋə bənə ghə̂ ghə nə ivə, ghə i gumi ni koʼ, taw dzɔbə soʼo.

⁴⁴Abə ghə tsəllə ndownə wù sɔŋtsuʼ, à loʼ vən i wi ghə tsəllə ndownə, abə Zə̀ kə i kee zhəm nuu dzəŋŋə bənə ghə̂ ghə nə ivə, ghə i keeli wû i fəghə zə nə̀ a fuu Zay kə Zow kə. Nghee i loʼ nə̀ vən fə uwû fə wù sɔŋtsuʼ fə loʼnu, i sey dii nə̀ wû wən Zay kə Zow kə fuunə khə ni teeli loʼ soʼo.

⁴⁵À wən loʼ i ghii i tɔ̀ɔ doʼonə n màʼlə K-a-zə̀ nə̀, “Wù sə̂ isə wən Zə̀ kə â bɔmnə â loʼ Adam.” Adam wə ibam wən tɔŋŋə Klisto kee loʼ zày kən kə fuunə muu zə.

⁴⁶I sey dii nə̀ wû wən zay kə fuunə â ka bə dzə isə, â fəd bə wû u wù sɔŋtsuʼ isə, wû wey Zay kə Zow kə fuunə, wə a sə bəghənə ibam.

⁴⁷Zə̀ kə â bɔm wù sə isə wən tɔŋŋə Adam nə təzub, dii tsu nə̀ tə shi fa n mbi. Wù ibam wən tɔŋŋə Klisto kee shi tsu bə idəŋ.

⁴⁸Ghə̂ a mbi a loʼ tə a loʼ Adam wən ghə â bɔmnə wi nə təzub, ghə̂ ghən ghə i kɔʼɔnə idəŋ, ghə i kee loʼ tə̀ a loʼ Klisto wən tə â tsu bənə idəŋ.

⁴⁹Nghee i loʼ nə̀ saa bɔɔmə khə ndzoʼo wû u Adam wən Zə̀ kə â bɔmnə nə təzub, i sey dii nə̀ saa i bɔɔmə keeli soʼonu ndzoʼo wû u Klisto wən tə â tsu bənə idəŋ.

⁵⁰Waazə ghə, ghəə zey n dzanə i loʼ nə̀, wû u wù sɔŋtsuʼ u way dzə ni nyi n fɔ̀ɔ u Kəzə̀. Gow uwû zən i fwaynə, way dzə ni nyi n fɔɔ u Kəzə̀ wən fə u fway way fu.

⁵¹Koʼo n na! N dza n chi dii bə ghaa nə̀ isəŋə i loʼ zə, zə â nyi doʼonə. I loʼ nə̀, à way dzə saa ghən adzəm saa loʼnə dzûmə tə Klisto tə, saa i kpuunə, Zə̀ kə nə kee maŋa nuu kwey kɔʼɔ kə wû i saa.

⁵²Tə wù ni chi asə̂, à nə loʼ nə̀ ghəə a tii ghə n ney tsəghə bənə kə. I loʼ sey n təŋkey, n nəŋə zey sɔŋ i Kəzə̀ zə i fuŋ nyi ndownə, Zə̀ kə i zhəm nuu dzəŋŋə bə dzûmə tə Klisto tən tə kpu dzənə, ghə i keeli bə wû i fəghə zə, saa ghən a nam loʼnə utaw, Zə̀ kə i kwey nuu bə soʼo wû i saa.

⁵³Isəŋə loʼ nə̀, wû u wù sɔŋtsuʼ wən u fwaynə, u khə ni teeli kwey doʼo bə wû wən u way ni fway koʼ. Wû wən u kpunə, khə soʼo ni teeli kwey doʼo bə wû wən u way ni kpu koʼ tsə.

⁵⁴Sey, abə wû wən u fwaynə nə̂ kwey doʼo bənə n wû wən u fway way, wû wən u kpunə, nə kwey doʼo bə soʼonə wû wən u kpu way, i nə dii nə̀ zə n luulə ghəə zey i tɔ̀ɔ doʼonə n màʼlə K-a-zə̀ nə̀, “Zə̀ kə n təm zə̂ və zə.”

⁵⁵A nə dza n nəŋə i tii zə nə̀, “A və zə! Daʼa kən wə khənə ni təmə zə̂ə ghə̂ ghə tii, kə ghee? A və zə! Daʼa kən wə khənə ni chɔd ə ghə̂ ghə tii, kə kəm ghee?”

⁵⁶Və i keeli kədaʼa bòʼ ghəə a bəbə ghən ghə̂ a ghəŋŋənə, ghəə a bəbə ghə u ngii loʼ n təŋkey, ghə̂ a naŋŋə way laŋ K-a-zə̀ kə.

⁵⁷A kee fuu zɔŋŋə K-a-zə̀ nə̀ tə n ghəŋə nə̀ saa təm zə̂ ivə n bam i Mûkəbii saa Yeso Klisto.

⁵⁸Sey, waazə ghuŋ a dzuŋu ghə, təmi taw tsu na n bəghəm i fə̀ŋ i ghaa, kə̂ fə̂ kə loʼ kə nə̂ soʼlənə ghaa. Fuu nyi ndòw na wû i ghaa zə n fwaʼ kə Mûkəbii, n təŋkey ghaa khənu nə̀ fwaʼ kən ghaa fwaʼanə tə̀ wi way dzə kənunu.